E Swarelela Kudu go Feta Gauta e Sekilego

GAUTA ke e nyakwago kudu ka baka la botse le go swarelela ga yona. Go kganyogega ga yona kudu ke ka gobane e dula e phadima le go taga mo e nyakilego e le ka mo go sa felego. Se ke ka gobane gauta e emeletšana le go hlaselwa ke meetse, okisetšene, sulfur le mo e ka bago dilo tše dingwe ka moka. Dilo tše dintši tša bokgabo tša gauta tšeo di hweditšwego dikepeng tšeo di ilego tša nwelela le mafelong a itšego di sa dutše di na le go taga ga tšona ka morago ga nywaga e lekgolo.

Lega go le bjalo, ke mo go kgahlišago gore Beibele e re go na le selo se se swarelelago kudu e bile e le seo se “fetaxo . . . xauta ye e ônalaxo le xe e lekotšwe ka mollô.” (1 Petro 1:7) Gauta ge e “lekotšwe,” goba e sekišitšwe ka mollo le ka megato e mengwe e ka fihlelela tshekego ya 99,9 lekgolong. Lega go le bjalo, gaešita le gauta e sekišitšwego e a onala goba ya hwelela, ge e sa šireletšega go aqua regia (meetse a esiti), e lego motswako wa dikarolo tše tharo tša hydrochloric acid le karolo e tee ya nitric acid. Ka gona, Beibele ke e nepagetšego ka lehlakoreng la tša thutamahlale ge e re ‘gauta e a onala.’

Ka mo go fapanego, tumelo ya Mokriste wa therešo e “boloka moya o phela.” (Ba-Hebere 10:​39, NW) Batho ba ka bolaya motho yo a nago le tumelo e tiilego, bjalo ka ge ba dirile ka Jesu Kriste. Eupša bao ba nago le tumelo ya kgonthe ba newa kholofetšo ye: ‘Botegang go fihla lehung, ke tle ke le nee mphapahlogo wa bophelo.’ (Kutollo 2:​10) Bao ba hwelago tumelong ba dula ba gopolwa ke Modimo, gomme o tlo ba tsoša. (Johane 5:​28, 29) Ga go na tekanyo ya gauta yeo e ka dirago seo. Mo tabeng ye, tumelo ke yeo ruri e lego ya bohlokwa-hlokwa go feta gauta. Lega go le bjalo, gore tumelo e be ya bohlokwa-hlokwa gakaalo, e swanetše gore le yona e lekolwe goba e lekwe. Ge e le gabotse, ke ‘seka se se lekilwego sa tumelo’ yeo Petro a itšego ke ya bohlokwa-hlokwa go feta gauta. Dihlatse tša Jehofa di tla thabela go go thuša go ithuta Beibele e le gore o tle o hlagolele le go swarelela tumelong e tiilego mabapi le Modimo wa therešo, Jehofa le go Morwa wa gagwe, Jesu Kriste. Go ya ka Jesu, se se bolela “bophelô byo bo sa felexo.”​—Johane 17:3.