Bagoeledi Ba Mmušo Ba A Bega

Modimo o mo Phumotše Megokgo

BATHO bao ba fetošago maphelo a bona gore a dumelelane le melao ya Jehofa le ditekanyetšo tša gagwe ba šegofatšwa ka tekanyo e kgolo. Le ge go dira diphetogo tše swanetšego go se bonolo ka mehla, thušo le kgothatšo ke tše di dulago di hwetšagala. (Psalme 84:​11) Phihlelo e latelago go tšwa Borwa-bohlabela bja Asia e bontšha seo.

Mosadi yo mongwe wa Hlatse go tšwa Fora ge a be a le maikhutšong o ile a boledišana le mong wa lebenkele yo a bitšwago Kim * ka morero wa Jehofa ka lefase. Gape o ile a tlogelela Kim kopi ya puku ya O ka Phela ka mo go sa Felego Paradeiseng mo Lefaseng. Ge a gaša mahlo matlakaleng a puku, Kim o ile a kopana le mantšu a rego, “ó tlo phomola mexôkxô ka moka mahlong a bôná.” (Kutollo 21:⁠4) Kim o gopola gore: “Temana ye e ile ya nkgoma kudu, bao ba bonego ke myemyela le go swara mehlamo letšatši ka moka lebenkeleng, ke mang yo a bego a ka tseba gore ge ke fihla gae mantšibua, ke ile ka lla go fihla ke robala?” Ge a utolla mothopo wa manyami a gagwe, o re: “Ke dutše le monna ka nywaga e 18 gomme ke be ke sa thaba ka gobane a gana go nyalana le nna. Ke be ke nyaka go fediša tsela ye ya go phela, eupša ka ge ke dutše le yena ka nako e telele gakaalo, ke be ke se na sebete.”

Nakwana ka morago ga moo, Kim o ile a amogela go ithuta Beibele le yo mongwe wa Dihlatse tša Jehofa yo a bitšwago Linh. Kim o re: “Ke be ke fagahletše go diriša seo se rutwago ke Beibele. Ka mohlala, ke ile ka kgaotša go rapela bagologolo ba-ka, gaešita le ge se se ile sa baka kganetšo go tšwa ka lapeng lešo. Go feta moo, ke ile ka dira maiteko a gore kwano ya rena e be ya semolao, eupša mogwera wa-ka o ile a gana go dira seo. Nakong ye e thata, Hlatse ya go tšwa Fora e ile ya tšwela pele e nthomela dikgatišo tša Beibele, gomme Linh e be e le yo a kgothatšago kudu go nna. Go se fele pelo le thekgo e lerato ya dikgaetšedi tše go nthušitše go kgotlelela go fihlela ke bona seo mogwera wa-ka a bego a le sona e le ka kgonthe. Ke ile ka utolla gore o be a šetše a kile a ba le bao a ba bitšago ‘basadi’ ba 5 le bana ba 25! Se se ile sa mpha sebete sa go mo tlogela.

“Go tlogela ntlo e kgolo ya manobonobo go ya go dula phapošing e nyenyane go be go se bonolo. Ka mo go oketšegilego, mogwera wa-ka wa pele o be a mpeile ka tlase ga kgateletšo ya gore ke boe ke tle ke dule le yena gape, e bile a ntšhošetša ka gore ge e ba ke gana o tla nkgolofatša ka esiti. Ka thušo ya Jehofa, ke ile ka kgona go dira seo se nepagetšego.” Kim o ile a dira tšwelopele gomme mafelelong a kolobetšwa ka April 1998. Ka mo go oketšegilego, banababo ba babedi le morwa wa gagwe yo a sa lego mahlalagading ba ile ba thoma go ithuta Beibele le Dihlatse tša Jehofa.

Kim o re: “Ke be ke nagana gore bophelo bja-ka bo tla dula bo se na kholofelo. Lega go le bjalo, lehono ke thabile, le ka mohla ga ke sa lla bošego. Jehofa o šetše a phumotše megokgo mahlong a-⁠ka.”

[Mengwalo ya ka tlase]