Tshwanelo ya Gago ya go Dumela

Mohlomongwe o rata tshwanelo ya gago ya go dumela selo le ge e le sefe seo o kganyogago go se dumela. Ke ka mokgwa woo mo e ka bago batho bohle ba dirago ka wona. Ka go diriša tshwanelo ye, badudi ba lefase ba dimilione tše sekete ba tšweleditše ditumelo tše di fapa-fapanego ka tsela e makatšago. Go swana le phapano ya mebala, dibopego, mehuta, tatso, menkgo le medumo yeo re e hwetšago tlholong, ditumelo tše di fapanego gantši di oketša kgahlego, tlhalalo le lethabo bophelong. Ka kgonthe, phapano e bjalo e ka ba e natefišago bophelo.​—Psalme 104:24.

EUPŠA go nyakega temogo. Ditumelo tše dingwe ga se feela gore ke tše di fapanego eupša gape di kotsi. Ka mohlala, mathomong a lekgolo la bo-20 la nywaga, batho ba bangwe ba ile ba thoma go dumela gore ba-Juda le ba-Mason ba Lokologilego le ba Amogetšwego ba be ba logile maano a go “šwalalanya tlhabologo ya Bokriste le go hloma mmušo wa lefase ka tlase ga pušo ya bona ya mohlakanelwa.” Mothopo o mongwe wa tumelo ye e be e le pampišana ya bao ba hloilego ba-Juda yeo e bego e e-na le sehlogo se se rego Protocols of the Learned Elders of Zion. Pampišana e boletše gore maano a be a akaretša go kgothaletša go tšhelwa ga metšhelo ya godimo kudu, go godiša tšweletšo ya go dirwa ga dibetša, go kgothaletša taolo e kgolo ya kgweba-noši e le gore ‘mahumo a ba-Ntle a tle a senywe ka go panya ga leihlo.’ Ditatofatšo di akareditše gape le go diriša tshepedišo ya thuto ka bohlale e le gore go ‘fetošwe ba-Ntle gore e be dibata tše di se nago tlhaologanyo,’ gaešita le go aga diporo tša ka tlase ga mmu bakeng sa go kopanya metse e megolo e le gore bagolo ba ba-Juda ba tle ba kgone ‘go fenya baganetši le ge e le bafe ka go ba fediša o šoro.’

Go ba gona, a e be e le maaka​—ao a bego a reretšwe go hlohleletša maikwelo a bao ba hloilego ba-Juda. Mark Jones wa Musiamo wa Brithania o re: ‘Nonwane ye ya go hloka tlhaologanyo, e ile ya phatlalala ka tekanyo e kgolo go tloga Russia,’ mo e ilego ya tšwelela ka lekga la pele kuranteng ka 1903. E ile ya tšwelela gape ka go The Times ya London ka May 8, 1920. Mo e ka bago ka godimo ga ngwaga ka morago ga moo, The Times e ile ya pepentšha pampišana yeo gore ke ya bofora. Lega go le bjalo, tshenyo e be e šetše e dirilwe. Jones o re: ‘Maaka a go swana le a, go thata go a fediša.’ Ge batho ba ka a dumela, a tšweletša ditumelo tše hlaswegago kudu, tše senyago le tše kotsi​​—gantši ka mafelelo a gobatšago, bjalo ka ge histori ya lekgolong la bo-20 la nywaga e bontšhitše.​​—Diema 6:​16-​19.

Go Dumela ge go Bapišwa le Therešo

Go ba gona, ga go nyakege maaka a rerilwego pele gore go tšwelele ditumelo tše fošagetšego. Ka dinako tše dingwe, re ka ba le kwešišo e fošagetšego ka seo re se badilego. Ke batho ba bakae bao ba hwilego mahu a ka pela ka ge ba be ba dira selo seo ba bego ba dumela gore se nepagetše? Le gona, gantši re dumela selo feela ka gobane re nyaka go se dumela. Moprofesara yo mongwe o bolela gore gaešita le bo-rathutamahlale “gantši ba ye ba tšeele dikakanyetšo  le diphetho tša bona godimo kudu.” Ditumelo tša bona di ba dira gore ba palelwe ke go ahlola ditaba ka ntle le kgethollo. Ke moka ba ka ba ba fetša nako ya bophelo ka moka ba leka ka mo go sa thušego selo go thekga ditumelo tše fošagetšego.​​—Jeremia 17:9.

Dilo tše swanago di diregile ka ditumelo tša bodumedi​​—moo dikganetšo tše dikgolo di lego gona. (1 Timotheo 4:1; 2 Timotheo 4:​3, 4) Motho yo mongwe o na le tumelo e tseneletšego go Modimo. Yo mongwe o re batho ga ba na bohlatse le ge e le bofe bjo bo ka thekgago tumelo ya bona go Modimo. Yo mongwe o tiiša gore o na le moya o sa hwego wo o phologago lehu. Yo mongwe o dumela gore ge o e-hwa o kgaotša go ba gona ka mo go feletšego. Go molaleng gore ditumelo tše di thulanago tša go swana le tše ga se ka moka e ka bago tše nepagetšego. Ka gona, na ga se gabohlale gore o kgonthišetše gore seo o se dumelago ke sa therešo e le ka kgonthe, e sego feela seo o nyakago go se dumela? (Diema 1:5) O ka dira seo bjang? Sehlogo se se latelago se tla ahla-ahla taba ye.

[Seswantšho go letlakala 3]

Sehlogo sa 1921 se pepentšha “Protocols of the Learned Elders of Zion”