Go Dira Bofsa bja Gago Gore bo Atlege

BADUDI ba naga e nngwe ya Yuropa ba ile ba kgopelwa go kgetha dilong tše tharo: bobotse, lehumo goba bofsa. Kgetho ya pele e bile bofsa. Ee, batho ba dihlopha ka moka tša nywaga ba lebelela nywaga ya mahlalagading le nywaga ya mathomong a bo-20 e le nako e kgethegilego bophelong. Le gona yo mongwe le yo mongwe o nyaka bafsa ba dira phetogo e atlegago go tloga bjaneng go ya go beng motho yo mogolo. Eupša bjang?

Na Beibele e ka thuša? Karabo ke ee yeo e sa belaetšego. Anke re hlahlobeng mafelo a mabedi moo Lentšu la Modimo e kago ba thušo e kgethegilego go bafsa, mohlomongwe thušo e kgolo go bafsa go feta sehlopheng le ge e le sefe sa nywaga.

Go Phedišana le ba Bangwe Gabotse

Jugend 2000 ke pego yeo e lego mabapi le nyakišišo e nabilego ka boemo bja kgopolo, mekgwa le boitshwaro bja bafsa ba fetago 5 000 ba Jeremane. Nyakišišo e utolla gore ge bafsa ba phegelela boithabišo​—bjalo ka go theetša mmino, go tšea karolo dipapading, goba gaešita le go hlwa mafelong a itšego ba sa dire selo​—mo e nyakilego go ba ka dinako ka moka ba na le batho ba bangwe. Mohlomongwe go feta sehlopha le ge e le sefe sa nywaga, bafsa ba nyaka go ba le dithaka tša bona. Go ka phethwa e le ka kgonthe ka gore se sengwe sa diphiri tša go atlega bofseng ke go phedišana le ba bangwe gabotse.

Eupša ga go bonolo ka mehla go phedišana le ba bangwe gabotse. Ka kgonthe, ditswalano tša batho ke lefelo leo go lona masogana le makgarebe a dumelago gore gantši a hwetša mathata. Mo Beibele e ka ba thušo ya kgonthe. Lentšu la Modimo le swere tlhahlo ya motheo bakeng sa bafsa go ageng ditswalano tše leka-lekanego. Ke eng seo Beibele e se bolelago?

O mongwe wa melao ya motheo e bohlokwa kudu ya ditswalano tša batho o bitšwa Molao wa Gauta: “Ka mehla swara ba bangwe ka tsela yeo le wena o tlago rata gore ba go sware ka yona.” Go swara ba bangwe ka tlhompho, seriti le ka botho go ba kgothaletša gore le bona ba go sware ka tsela e swanago. Boitshwaro bjo botho bo ka fokotša moya wa kgohlano le kgateletšego. Ge e ba o ka tsebega ka boitshwaro bja gago bja go naganela ba bangwe, go bonala ba tla go nea tlhokomelo e kgethegilego le go go amogela. Na ga o ikwe o thabile ge o amogelwa ke ba bangwe?​—Mateo 7:​12, Revised English Bible.

Beibele e go eletša gore “wa xeno O mo ratê ka mokxwa wo O ithataxo ka wôna.” O swanetše go ithata ka kgopolo ya gore o itlhokomele le gore o be le boitlhompho bjo bo leka-lekanego, e sego go feta tekanyo e bile e sego ka tekanyo e nyenyane kudu. Ke ka baka la’ng seo se thuša? Ke therešo gore ge e ba o se na boitlhompho, o ka ba yo a  swayago ba bangwe diphošo ka mo go feteletšego, e lego seo se šitišago ditswalano tše dibotse. Eupša boitlhompho bjo bo leka-lekanego ke motheo woo go wona o ka theago bogwera bjo bo tiilego.​—Mateo 22:39.

Ge feela bogwera bo gola, go nyakega gore bo tiišwe ka maiteko go tšwa mahlakoreng ka bobedi. Go beela nako ka thoko tabeng ya bogwera go swanetše go go dira gore o ikwe o thabile, ka ge “lethabo la go nea le feta la go newa.” Sebopego se sengwe sa go nea ke go lebalela, e lego se se akaretšago go hlokomologa diphošo tše dinyenyane le go se letele phethego go ba bangwe. Beibele e re botša gore: “Teka-tekano ya lena a e tsebje ke batho bohle.” Ka kgonthe, “ka thokô ya lena, Le phedišanê xa-botse le batho ka moka.” Go thwe’ng ge e ba mogwera a go bontšha bofokodi bja gago? Na o itshwara bjang? Ela hloko keletšo ye e šomago yeo e tšwago ka Beibeleng: “Se phakê xo selekêxa ka pelong,” ka gobane “kxati ya monthati e a bôtêxa.” Na ga se therešo gore bagwera ba tutuetša dikgopolo tša gago, polelo le boitshwaro? Ka gona, Beibele e lemoša gore: “Ditlwaelano tše mpe di senya mekgwa e mebotse.” Ka lehlakoreng le lengwe, “e a sepelelanago le ba bohlale, o tlo hlalefa.”​—Ditiro 20:​35; Ba-Filipi 4:5, NW; Ba-Roma 12:​17, 18; Mmoledi 7:9; Diema 13:​20, PK; 27:6; 1 Ba-Korinthe 15:​33, NW.

Marco o bolelela masogana le makgarebe a mantši ge a re: “Melao ya motheo ya Beibele ke thušo e kgolo tabeng ya go phedišana le ba bangwe gabotse. Batho ba bangwe bao ke ba tsebago ba phelela dikgahlego tša bona ka noši le seo ba ka ikholago ka sona. Beibele e re ruta gore re nagane, e sego kudu ka rena, eupša ka ba bangwe. Go fihla bokgoleng bjo ke bonago ka gona, yeo ke tsela e kaone kudu ya go ba le ditswalano tše dibotse le batho.”

Seo bafsa ba swanago le Marco ba ithutago sona go tšwa ka Beibeleng se ba thuša e sego feela nywageng ya bofsa, eupša le nywageng ya ka moso. Gape mabapi le bokamoso, re hwetša tsela e nngwe yeo Beibele e ka bago thušo e kgethegilego go moloko wa bafsa.

Pelaelo Mabapi le Bokamoso

Bafsa ba bantši ke bao ba fišegelago go tseba ditaba. Mohlomongwe go feta sehlopha le ge e le sefe sa nywaga, ba nyaka go tseba seo se diregago le gore ke ka baka la’ng se direga. Beibele go feta puku le ge e le efe, e hlalosa mabaka a maemo a lefase le go re botša seo re ka se letelago nakong e tlago. Se ke seo moloko wa bafsa o nyakago go se tseba. Ke ka baka la’ng re ka kgodišega ka seo?

Go ba gona, gaešita le ge go dumelwa ka kakaretšo gore bafsa ba phelela feela bophelo bja gona bjale, dinyakišišo tše dingwe di utolla kgopolo e fapanego go se nene. Di bontšha gore bafsa gantši ba ela hloko seo se diregago tikologong ya bona, ke moka ba itirele diphetho tša kamoo bophelo bo bonalago bo ka ba ka gona nakong e tlago. Bohlatse bja se ke gore go masogana le makgarebe a mararo go a 4 a nagana “gantši” goba “gantši-ntši” ka bokamoso. Gaešita le ge bafsa ka kakaretšo ba e-na le kholofelo, bontši bja bafsa ba lebelela bokamoso ka go belaela.

Ke ka baka la’ng go e-na le go belaela? Bontši bja bafsa matšatšing a ba šetše ba e-na le mathata ka bosenyi, bošoro le go dirišwa gampe ga dihlare-tagi. Bafsa ba tshwenyega ka go hwetša mešomo e swarelelago lekokong leo le phadišanago ka tekanyo e kgolo. Ba ikhwetša ba le ka tlase ga kgateletšo ya go hwetša meputso ya godimo sekolong  goba gore e be ba atlegago kudu mošomong. Mosetsana wa nywaga e 17 o llile ka gore: “Re phela lekokong la se mphete ke go fete. Motho yo mongwe le yo mongwe o dira dilo ka tsela ya gagwe. Ka mehla o swanelwa ke go bontšha gore wena o ka kgona, gomme se se a nnyamiša.” Mofsa yo mongwe wa nywaga e 22, o itše: “Batho ba fihlelelago dilo ba atlega bophelong gomme ba ka phela ka boiketlo. Batho ba madimabe bao ka mabaka a fapa-fapanego ba sa kgonego go atlega, ba no šala ba le maemong a tlasana.” Ke ka baka la’ng bophelo e le bja go phadišana gakaakaa? Na bophelo bo tla tšwela pele bo le ka tsela ye?

Tlhaloso ya Kgonthe

Ge bafsa ba lebelela lekoko la batho ka go tshwenyega goba ka go belaela​—ba tseba goba ba sa tsebe​—ba dumelelana le Beibele. Lentšu la Modimo le bontšha gore “lekoko [la lehono] la se mphete ke go fete” ke sešupo sa mehleng yeno. Moapostola Paulo o ngwadile ka mehla ya rena lengwalong leo a le ngwaletšego lesogana le le bitšwago Timotheo gore: “Go tla tla dinako tše hlobaetšago tšeo go lego thata go lebeletšana le tšona.” Ke ka baka la’ng e le tše hlobaetšago, le gona ke ka baka la’ng e le tše thata go lebeletšana le tšona? Bjalo ka ge Paulo a ngwadile ka mo go oketšegilego, ke ka gobane batho e be e tla ba ba  “xo ithata, ba mexabaru, ba lenyatšô le baikxoxomoši, . . . ba xo se leboxe, ba xo se ile selô . . . le ba ba sa tsebexo xo ithswara.” Na ye ga se tlhaloso e nepagetšego ya ka moo batho ba itshwarago ka gona lehono?​—2 Timotheo 3:​1-3.

Beibele e bolela gore dinako tše tšeo di hlobaetšago di be di tla tšwelela “mehleng ya bofêlô,” pele ga ge diphetogo tše dikgolo di ka tlišwa lekokong ka moka la batho. Diphetogo tše di tla kgoma batho ka moka, ba banyenyane le ba bagolo ka tsela e swanago. Ke diphetogo tša mohuta ofe? Mmušo wa legodimong go se go ye kae o tla tšeela pušo ya ditaba tša batho legato, gomme batseta ba wona ba tla thabela ‘khutšo e kgolo’ kae le kae. “Baloki e ba beng ba naxa, ba dula mo xo yôna ka mehla le ka mehla.” Maikwelo a go belaela le a go tšhoga e tla ba e le selo sa kgale.​—Psalme 37:​11, 29, bapiša le PK.

Ke Beibele feela yeo e neago temogo yeo e ka botwago ka bokamoso. Ge mofsa a tseba seo se tlago go direga nywageng e mmalwa e tlago, a ka lokišeletša tšwelopele e bile a ka ikwa a šireletšegile kudu-kudu tabeng ya go laola bophelo bja gagwe. Maikwelo a a fokotša kgateletšego le pelaelo. Ka tsela ye senyakwa se se kgethegilego sa moloko wa bafsa​—e lego go kwešiša lekoko la batho le go tseba seo bokamoso bo tlago go se tliša​—se ahla-ahlwa ka Beibeleng.

Go Atlega Bofseng

Na motheo wa go atlega bofseng ke eng? Na ke thuto e oketšegilego, dilo tše di bonagalago le bagwera ba bantši? Ba bantši ba ka nagana bjalo. Nywaga ya mahlalagading le nywaga ya mathomong a bo-20 e swanetše go fa motho mathomo a mabotse bakeng sa bophelo bjo bo sa letšego ka pele. Ka mantšu a mangwe, go atlega bofseng e ka ba sešupo sa seo se tlago go direga ka morago.

Ka ge re bone, Beibele e ka thuša mofsa go dira gore nywaga ya gagwe ya bofsa e atlege. Bafsa ba bantši ba šetše ba bone se se le bjalo maphelong a bona ka noši. Ba bala Lentšu la Modimo ka mehla gomme ba diriša seo ba ithutago sona. (Bona “Keletšo go tšwa go Mohlanka wa Mofsa wa Jehofa,” go letlakala 6.) Ka kgonthe, Beibele e tloga e le puku ya bafsa lehono ka gobane e ka ba thuša gore “e bê [ba] boló-ka-tlalô, [ba] kxonišwê xo dira medirô e botse ka moka.”​—2 Timotheo 3:​16, 17.

[Ntlhakgolo go letlakala 5]

Se sengwe sa diphiri tša go atlega bofseng ke go phedišana le ba bangwe gabotse

[Ntlhakgolo go letlakala 6]

Mohlomongwe go feta sehlopha le ge e le sefe sa nywaga, bafsa ba nyaka go tseba seo se diregago le gore ke ka baka la’ng se direga

[Lepokisi go letlakala 6, 7]

Keletšo go tšwa go Mohlanka wa Mofsa wa Jehofa

Alexander o na le nywaga e 19. O godišeditšwe ka lapeng la Dihlatse tša Jehofa, gomme o thabela go bontšha tumelo ya gagwe ka pelo ka moka. Eupša go be go se bjalo ka mehla. Alexander o a hlalosa:

“O ka se kgolwe gore ke ile ka kopanela le Dihlatse tša Jehofa ke le mofsa yo a sa kolobetšwago ka nywaga e fetago e šupago. Ka nako yeo, borapedi bja-ka e be e se bja pelo ka moka, e be e fo ba taba ya go dirwa ka mokgwa wa tlwaelo. Ke nagana gore ke be ke fo ba ke be ke se na matla a go itlhahlobišiša ka potego.”

Ka morago boemo bja kgopolo bja Alexander bo ile bja fetoga. O tšwela pele:

“Batswadi ba-ka le bagwera ka phuthegong ba ile ba tšwela pele ba nkgothaletša go bala Beibele ka mehla, bakeng sa go tseba Jehofa bjalo ka motho. Mafelelong, ke ile ka ikemišetša go leka seo. Ka gona ke ile ka fokotša go bogela ga-ka thelebišene gomme ka dira go bala Beibele karolo ya lenaneo la-ka la mesong. Mafelelong, ke ile ka thoma go kwešiša seo Beibele e lego mabapi le sona. Ke ile ka thoma go lemoga kamoo e ka nthušago ka gona bjalo ka motho. Gomme​—sa bohlokwa kudu​—ke ile ka kwešiša gore Jehofa o nyaka gore ke mo tsebe. Ka morago ga ge ke ile ka ela seo hloko, tswalano ya-ka ya motho ka noši le yena e ile ya thoma go gola, gomme bogwera ka gare ga phuthego bo ile bja kaonefala. A phetogo e kaakang yeo Beibele e e dirilego bophelong bja-ka! Ke kgothaletša gore mohlanka yo mongwe le mongwe yo e sa lego mofsa wa Jehofa a bale Beibele ka mehla.”

Go na le bafsa ba dimilione lefaseng ka bophara bao ba kopanelago le Dihlatse tša Jehofa. Na o yo mongwe wa bona? Na o tla rata go holwa ke go bala Beibele ka mehla? Ke ka baka la’ng o sa latele mohlala wa Alexander? Fokotša mediro e sego bohlokwa kudu gomme o dire go bala Beibele karolo ya lenaneo la gago la ka mehla. O tla holega e le ka kgonthe.