Le se ke la Lapa go Dira se Sebotse
Le se ke la Lapa go Dira se Sebotse
“A re se kê ra lapa xo dira botse; xobane xe re sa lesetše, re tlo buna ka lebaka la xôna.”—BA-GALATIA 6:9.
1, 2. (a) Ke ka baka la’ng kgotlelelo e nyakega bakeng sa go hlankela Modimo? (b) Aborahama o ile a bontšha bjang kgotlelelo, gomme ke eng seo se mo thušitšego go dira bjalo?
RE LE Dihlatse tša Jehofa, re thabela go dira thato ya Modimo. Gape re lapološwa ke go rwala “yoko” ya go ba barutiwa. (Mateo 11:29) Lega go le bjalo, go hlankela Jehofa le Kriste ga se ka mehla go lego bonolo. Moapostola Paulo o dirile se gore e be se se kwagalago ge a be a kgothaletša Bakriste gotee le yena gore: “Xo rata xore Le se fêlê pelo, xore ka xo dira thatô ya Modimo Le tšeê se Le se holofedišitšwexo.” (Ba-Hebere 10:36) Go kgotlelela go a nyakega ka gobane go hlankela Modimo e ka ba mo go hlohlago.
2 Bophelo bja Aborahama ka ntle le pelaelo ke bohlatse bja ntlha yeo. Dinakong tše dintši o ile a lebeletšana le dikgetho tše thata le maemo a gateletšago. Go laelwa gore a tlogele bophelo bja boiketlo kua Uri e be e le feela mathomo-mayo. Kapejana o ile a lebeletšana le tlala, lehloyo la baagišani ba gagwe, go nyaka a lahlegelwa ke mosadi wa gagwe, lehloyo la ba bangwe ba lapa la gabo le ntwa e sehlogo. Diteko tše dikgolo kudu di be di sa tla. Eupša Aborahama ga se a ka a lapa go dira se sebotse. Se ke se se lemogegago ge o ela hloko gore o be a se na Lentšu la Modimo le le feletšego, bjalo ka ge re e-na le lona lehono. Lega go le bjalo, ka ntle le pelaelo o be a tseba ka boporofeta bja pele, moo Modimo a ilego a tsebatša gore: “Le xôna ke bea lehlôyô xare xa xaxo le mosadi, le xare xa peu ya xaxo le peu ya xaxwe.” (Genesi 3:15) Ka ge Peu yeo e be e tla tla ka yena, gona Aborama e be e tla ba mohlaselwa wa bonaba bja Sathane. Go lemoga ntlha ye ka ntle le pelaelo go thušitše Aborahama go kgotlelela diteko tša gagwe ka lethabo.
3. (a) Ke ka baka la’ng batho ba Jehofa lehono ba swanetše go letela ditlaišego? (b) Ba-Galatia 6:9 e re nea kgothatšo efe?
3 Batho ba Jehofa lehono le bona ba swanetše go letela ditlaišego. (1 Petro 1:6, 7) Go feta moo, Kutollo 12:17 e re lemoša gore Sathane o ‘tsošitše ntwa’ le mašaledi a tloditšwego. Ka baka la go tswalana kgaufsi le batlotšwa, “dinku tše dingwê” ka mo go swanago ke bahlaselwa ba bogale bja Sathane. (Johane 10:16) Ka ntle le kganetšo yeo Bakriste ba ka lebeletšanago le yona bodireding bja bona bja phatlalatša, gape ba ka lebeletšana le dikgateletšo tše di lekago maphelong a bona ka noši. Paulo o re kgothaletša gore: “A re se kê ra lapa xo dira botse; xobane xe re sa lesetše, re tlo buna ka lebaka la xôna.” (Ba-Galatia 6:9) Ee, gaešita le ge Sathane a ikemišeditše go fediša tumelo ya rena, re swanetše go lebeletšana le yena, re tiile tumelong. (1 Petro 5:8, 9) Mafelelo a tsela ya rena ya potego e ka ba afe? Jakobo 1:2, 3 e hlalosa gore: “Bana bešo, xe Le wêla melekong ya mehuta-huta, Le re: ké lethabô fêla. Le fêlê Le tseba xore xo lekwa xa tumêlô xo tšweletša kxôtlêlêlô.”
Tlhaselo e Lebanyago
4. Ke bjang Sathane a dirišitšego ditlhaselo tše lebanyago maitekong a go fediša potego ya batho ba Modimo?
4 Ka ntle le pelaelo bophelo bja Aborahama bo bontšha ‘meleko ya mehuta-huta’ yeo Mokriste a ka lebeletšanago le yona lehono. Ka mohlala, o ile a swanela ke go arabela tlhaselong ya bahlasedi ba tšwago Sineare. (Genesi 14:11-16) Ga se mo go makatšago gore Sathane o tšwela pele go diriša ditlhaselo tše di lebanyago ka mokgwa wa tlaišo. Ga e sa le go tloga mafelelong a Ntwa ya II ya Lefase, dinaga tše dintši di ile tša thibela semmušo mošomo wa Bokriste wa go ruta wa Dihlatse tša Jehofa. Kgatišo ya 2001 Yearbook of Jehovah’s Witnesses e bega ka bošoro bjoo Bakriste ba Angola ba ilego ba bo kgotlelela diatleng tša manaba. Ka go ithekga ka Jehofa, banababo rena dinageng tše bjalo ba ile ba gana ka matla go tlogela! Ba ile ba arabela e sego ka go retologela bošorong goba borabeleng, eupša ka go phegelela ka bohlale modirong wa boboledi.—Mateo 24:14.
5. Ke bjang bafsa ba Bakriste e ka bago bahlaselwa ba tlaišo sekolong?
5 Lega go le bjalo, tlaišo ga e akaretše feela bošoro. Aborahama mafelelong o ile a šegofatšwa ka barwa ba babedi—Išimaele le Isaka. Genesi 21:8-12 e re botša gore lebakeng le lengwe Išimaele o be a ‘kwera’ Isaka. Lengwalong la gagwe le le yago go ba-Galatia, Paulo o bontšha gore se e be e le sa kgonthe kudu go feta feela papadi ya bana, ka gobane o hlalosa Išimaele a tlaiša Isaka! (Ba-Galatia 4:29) Go kwerwa ke bao re tsenago le bona sekolo le go hlaselwa ka mantšu ke baganetši go ka bitšwa ka mo go swanetšego gore ke tlaišo. Mokriste yo mofsa yo a bitšwago Ryan o gopola tlhokofatšo yeo a ilego a tlaišwa ka yona diatleng tša bao a tsenago le bona ka klaseng: “Leeto la metsotso e 15 la pese la ge ke e-ya le ge ke boa sekolong le be le bonagala le tšea diiri ka ge ke be ke gobošwa ka mantšu. Ba ile ba mphiša ka mathajana a go swaraganya dipampiri ao ba a fišitšego ka digotetša-disekerete.” Lebaka la tshwaro ye e sehlogo e be e le lefe? “Go tlwaetšwa ga-ka ka tsela ya pušo ya Modimo go ntirile gore ke be yo a sa swanego le bafsa ba bangwe sekolong.” Lega go le bjalo, ka thekgo ya batswadi ba gagwe, Ryan o ile a kgona go kgotlelela ka potego. Bafsa, na dithogako tša dithaka tša lena di le dirile gore le ikwe le nyamile? Ka gona, le se ke la langwa! Ka go kgotlelela ka potego, le tla bona go phethagala ga mantšu a Jesu a rego: “Ba lehlôxônôlô ké bô-lena, xe ba Le roxa, ba Le tlaiša, ba Le phara ka bobe ka moka ka maaká ka ’baka la-ka.”—Mateo 5:11.
Dipelaelo tša Letšatši le Letšatši
6. Ke dilo dife tše di ka senyago ditswalano gare ga Bakriste-gotee lehono?
6 Bontši bja diteko tšeo re lebeletšanago le tšona lehono di akaretša dipelaelo tše tlwaelegilego tša letšatši le letšatši. Aborahama ka noši o ile a swanela ke go lebeletšana le dingangišano tšeo di ilego tša tsoga magareng ga badiši ba gagwe le ba motlogolo wa gagwe Loto. (Genesi 13:5-7) Ka mokgwa o swanago lehono, go fapana ga dimelo le go hufegelana ka ditsela tše dinyenyane go ka senya ditswalano gaešita le go bea khutšo ya phuthego kotsing. “Xobane mo xo naxo le kxalefô le mereba, ké mo xo naxo le pherekanô le medirô e mebe ka moka.” (Jakobo 3:16) Ke ga bohlokwa gakaakang go rena gore re se ke ra dumelela boikgantšho bo šitiša khutšo bjalo ka ge Aborahama a dirile gomme re tsome dikgahlego tša ba bangwe!—1 Ba-Korinthe 13:5; Jakobo 3:17.
7. (a) Ke eng seo motho a swanetšego go se dira ge e ba a kgopišitšwe ke Mokriste-gotee le yena? (b) Aborahama o ile a bea bjang mohlala o mobotse tabeng ya go boloka ditswalano tše dibotse le ba bangwe?
7 Go ba le khutšo e ka ba tlhohlo ge re ikwa gore re swerwe ka mokgwa wo e sego wa toka ke modumedi-gotee. Diema 12:18 e re: “Xo na le babolabodi ba ma-hlaba-wa-lerumô.” Mantšu a se nago tlhaologanyo, gaešita le ge a bolelwa ka ntle le maikemišetšo a mabe, a ka baka manyami a magolo. Bohloko e ba bjo bo tseneletšego kudu ge e ba re ikwa gore re thomeleditšwe goba re le bahlaselwa ba lesebo le šoro. (Psalme 6:6, 7) Eupša Mokriste a ka se ke a dumelela maikwelo a bohloko go mo dira gore a lape! Ge e ba o le boemong bjo bo bjalo, gata mogato wa pele go lokiša ditaba ka go bolela ka mokgwa o botho le yo a bakilego kgopišo. (Mateo 5:23, 24; Ba-Efeso 4:26) Sekamela go lebaleleng motho yoo. (Ba-Kolose 3:13) Ka go se boloke sekgopi, re dira gore re kgone go fodiša maikwelo a rena gotee le go lokiša tswalano ya rena le ngwanabo rena. Aborahama ga se a ka a boloka sekgopi le ge e le sefe seo a ka bago a bile le sona malebana le Loto. Ka baka leo, Aborahama o ile a kitimela go phološa Loto le lapa la gagwe!—Genesi 14:12-16.
Diteko Tšeo re Ipakelago Tšona
8. (a) Bakriste ba ka ‘ikobela mehlako e mentši’ bjang? (b) Ke ka baka la’ng Aborahama a ile a kgona go ba le pono e leka-lekanego ka dilo tše di bonagalago?
8 Ke therešo gore diteko tše dingwe re ipakela tšona. Ka mohlala, Jesu o laetše balatedi ba gagwe gore: “Le se kê la ikxobêlêla mahumô lefaseng, mo xo senyaxo thswêlê le diji, mo xo phulaxo mahodu a utswa.” (Mateo 6:19) Lega go le bjalo, banababo rena ba bangwe ba “ikôbêla mehlakô e mentši” ka go bea dikganyogo tša dilo tše di bonagalago pele ga tša Mmušo. (1 Timotheo 6:9, 10) Aborahama o be a ikemišeditše go gafa boiketlo bja dilo tše di bonagalago bakeng sa gore a kgahliše Modimo. “Ké ka tumêlô xe a diilêla naxeng yeo a e holofedišitšwexo, xwa ba byalo ka e ke xa se naxa ya xaxwe, a dula merakeng; le Isaka, le Jakobo ba dira ka mokxwa woo, è le bôná ba xo tlo ja bohwa byoo ba holofedišitšwexo byôna. Xobane ó be a letetše motse wo o tl’o xo thêwa wa tia, woo mothei le moaxi wa wôna e lexo Modimo.” (Ba-Hebere 11:9, 10) Tumelo ya Aborahama ‘motseng’ wa nakong e tlago goba mmušong wa Modimo, e mo thušitše gore a se ke a ithekga ka mahumo. Na e ka se be ga bohlale gore re dire se se swanago?
9, 10. (a) Ke bjang kganyogo ya go nyaka go tuma e ka tsošago teko? (b) Ngwanabo rena lehono a ka itshwara bjang e le yo “monyenyane”?
9 Ela hloko sebopego se sengwe. Beibele e nea taelo ye e matla: “Xe motho a ka ithsema a re: Ke selô, mola à se selô, ó a iphora.” (Ba-Galatia 6:3) Go oketša moo, re kgothaletšwa go se dire ‘selo ka kgang le ka go nyaka go retwa eupša e be ka boipoetšo.’ (Ba-Filipi 2:3) Ba bangwe ba itlišetša diteko ka go palelwa ke go diriša keletšo ye. Ka go tutuetšwa ke kganyogo ya go nyaka botumo go e na le kganyogo ya go nyaka go dira “modirô o botse,” ba a nyama le go ngongorega ge ba sa hwetše ditokelo ka phuthegong.—1 Timotheo 3:1.
10 Aborahama o beile mohlala o mobotse ka go ‘se ikgopole go fetiša ka mo a swanetšego.’ (Ba-Roma 12:3, PK) Ge a be a gahlana le Melekitsedeke, Aborahama ga se a ka a dira eka boemo bja gagwe bja go gaugelwa ke Modimo bo mo dirile gore e be yo a phagamego. Ka mo go fapanego, o ile a dumela boemo bjo bo phagamego bja Melekitsedeke e le moperisita ka go mo nea karolo ya lesome. (Ba-Hebere 7:4-7) Ka mo go swanago Bakriste lehono ba swanetše go rata go itshwara bjalo ka ba ‘banyenyane’ gomme ba se ke ba nyaka go ba sebogelong sa batho bohle. (Luka 9:48) Ge e ba bao ba etelelago pele ka phuthegong ba bonagala ba go tima ditokelo tše itšego, itlhahlobe ka potego bakeng sa go hwetša gore ke dikaonefatšo dife tšeo o ka di dirago semelong sa gago goba mokgweng wa go dira dilo. Go e na le go nyamišwa ke ditokelo tšeo o se nago tšona, diriša ka mo go tletšego tokelo yeo o nago le yona—tokelo ya go thuša ba bangwe go tseba Jehofa. Ee, “ikokobetšeng ka tlase xa seatla se matla sa Modimo, xore a Le xodišê lebakeng la xôna.”—1 Petro 5:6.
Go ba le Tumelo Dilong Tšeo di sa Bonwego
11, 12. (a) Ke ka baka la’ng ba bangwe ka phuthegong ba ka lahlegelwa ke maikwelo a bona a go akgofa ga nako? (b) Aborahama o beile bjang mohlala o mobotse ka go thea bophelo bja gagwe tumelong ya go dumela dikholofetšo tša Modimo?
11 Teko e nngwe e ka akaretša seo se bonagalago e le go diega ga bofelo bja tshepedišo ye ya dilo. Go ya ka 2 Petro 3:12, Bakriste ba swanetše go ‘letela le go phafogela go tla ga letšatši la Jehofa.’ Lega go le bjalo, ba bantši ba letetše “letšatši” le ka nywaga e mentši, ba bangwe ka nywaga-some. E le mafelelo a se, ba bangwe ba ka nyama le go lahlegelwa ke maikwelo a go akgofa.
12 Ela hloko gape mohlala wa Aborahama. O ile a thea bophelo bja gagwe ka moka tumelong ya go dumela dikholofetšo tša Modimo, gaešita le ge go be go se na kgonagalo ya gore ka moka di tla phethagatšwa nakong ya ge a sa phela. Ee, o phetše nako e lekanego gore a ka bona morwa wa gagwe Isaka a gola. Eupša e be e tla ba nywaga-kgolo pele ga ge bana ba Aborahama ba ka bapetšwa le “dinaledi tša lexodimong” goba “lešabašaba la lebotong la lewatlê.” (Genesi 22:17) Lega go le bjalo, Aborahama ga se a ka a nyama goba go lapa. Ka gona moapostola Paulo o boletše ka Aborahama le bapatriareka ba bangwe gore: “Bôná-bao ka moka ba hwile bà dumetše, bà sešo ba amoxêla tše ba di holofedišitšwexo. Ba di bone dì le kxolê ba di thabêla, ba ipolêla ba re: Re baeng le ba ba diiletšexo lefaseng.”—Ba-Hebere 11:13.
13. (a) Ke bjang Bakriste lehono ba lego bjalo ka “baeng”? (b) Ke ka baka la’ng Jehofa a tla fediša tshepedišo ye ya dilo?
13 Ge e ba Aborahama a be a ka boloka bophelo bja gagwe bo theilwe dikholofetšong tšeo diphethagalo tša tšona di bego “dì le kxolê,” le rena lehono re ka dira bjalo kudu gakaakang ka ge go phethagala ga dilo tše go le kgaufsi kudu! Ka go swana le Aborahama, re swanetše go itebelela re le “baeng” tshepedišong ya Sathane, re gane go dudišega mokgweng wa bophelo wa boithati. Ge e le gabotse, re be re ka kgetha gore “bofêlô bya dilô tšohle” bo tle ka go akgofa, e sego feela go ba kgaufsi. (1 Petro 4:7) Mohlomongwe re tlaišwa ke mathata a šoro a tša maphelo. Goba dikgateletšo tša tša boiphedišo di ka re imela kudu. Lega go le bjalo, re swanetše go gopola gore Jehofa o tliša bofelo e sego feela go re phološa maemong a šoro, eupša bakeng sa go kgethagatša leina la gagwe. (Hesekiele 36:23; Mateo 6:9, 10) Bofelo bo tla tla, e sego ka nako e swanetšego rena, eupša ka nako e swanetšego kudu merero ya Jehofa.
14. Go se fele pelo ga Modimo go hola bjang Bakriste lehono?
14 Gopola gape gore, “Morêna xa a diexiše tše a di boletšexo a re di tlo tla, bo-ka ba bangwê xe ba re ké xo diexiša; sa xaxwe ké xo se Le fêlêle pelo, xobane xa a rate xe xo na le ba ba lahlêxaxo; ó rata xe bohle ba ka fihlêla thsokoloxô.” (2 Petro 3:9) Ela hloko gore Modimo ga a “le fêlêle pelo”—lena ditho tša phuthego ya Bokriste. (Mongwalo o sekamego ke wa rena.) Go bonagala ba bangwe ba rena re nyaka nako e oketšegilego bakeng sa go dira diphetogo e le gore re “tlo hwetšwa kè Yêna [re] se na bosodi le senyalô, [re] le ba moláô.” (2 Petro 3:14) Ka gona, na ga se ra swanela go leboga gore Modimo o re bontšhitše go se fele pelo mo go bjalo?
Kamoo re ka Hwetšago Lethabo go sa Šetšwe Mapheko
15. Jesu o ile a kgona bjang go boloka lethabo la gagwe ge a be a lebeletšane le diteko, gomme go mo ekiša go hola Bakriste bjang lehono?
15 Bophelo bja Aborahama bo ruta Bakriste dithuto tše dintši lehono. Ga se a bontšha feela tumelo eupša o bontšhitše gape le go se fele pelo, bohlale, sebete le lerato leo le se nago boithati. O ile a etiša pele borapedi bja Jehofa bophelong bja gagwe. Lega go le bjalo, go swanetše go gopolwa gore mohlala o phagamego wo re swanetšego go o ekiša o beilwe ke Jesu Kriste. Le yena ka mo go swanago o ile a lebeletšana le diteko tše ntši, eupša go tšona ka moka ga se a ka a lahlegelwa ke lethabo. Ke ka baka la’ng? Ka gobane o ile a boloka monagano wa gagwe o lebišitšwe kholofelong ya nakong e tlago. (Ba-Hebere 12:2, 3) Ka gona, Paulo o rapetše ka gore: “Xomme Modimo, Yêna Mong wa tiišô le khomotšô, lena ka moka a Le fê kxopolô e tee ya xo amana le Kriste Jesu.” (Ba-Roma 15:5) Ka boemo bjo bo swanetšego bja monagano, re ka hwetša lethabo go sa šetšwe mapheko ao Sathane a ka a beago ka pele ga rena.
16. Re ka dira’ng ge mathata a rena a bonagala e le a nolago moko?
16 Ge mathata a bonagala e le a nolago moko, ikgopotše gore bjalo ka ge Jehofa a ratile Aborahama, le wena o a go rata. O nyaka gore o atlege. (Ba-Filipi 1:6) Holofelang Jehofa ka mo go feletšego, le kgodišegile gore “a ka se kê a lesa la lekwa ka tše di kaxo Le palêla; xotee le molekô ó tlo fêla a bea sebaka sa xo tlo efoxa, xore Le kxônê xo kxôtlêlêla.” (1 Ba-Korinthe 10:13) Hlagolela mokgwa wa go bala Lentšu la Modimo letšatši le letšatši. (Psalme 1:2) Tiišetša thapelong, o kgopele Jehofa a go thuše go kgotlelela. (Ba-Filipi 4:6) O tla ‘nea moya o mokgethwa go ba ba mo kgopelago.’ (Luka 11:13) Diriša ka mo go holago ditokišetšo tše Jehofa a di dirilego go go fepa moyeng, tše bjalo ka dikgatišo tša rena tše di theilwego Beibeleng. Gape tsoma thekgo ya borwarre. (1 Petro 2:17) E-ba gona dibokeng tša Bokriste ka potego, ka gobane moo o tla amogela kgothatšo yeo o e nyakago bakeng sa go kgotlelela. (Ba-Hebere 10:24, 25) Thabela kgodišego ya gore kgotlelelo ya gago e lebiša boemong bja go amogelega mahlong a Modimo le gore potego ya gago e thabiša pelo ya gagwe!—Diema 27:11; Ba-Roma 5:3-5.
17. Ke ka baka la’ng Bakriste ba sa felelwe ke kholofelo?
17 Aborahama o ile a ratwa ke Modimo e le “mogwera” wa gagwe. (Jakobo 2:23, PK) Gaešita le ge go le bjalo, bophelo bja Aborahama e be e le tatelano ya diteko tše di gateletšago le ditlaišego. Ka gona Bakriste ba ka letela se se swanago ‘mehleng ye ya bofelo’ e mebe. Ge e le gabotse, Beibele e re lemoša gore “batho ba babe le baaroši, bobe bya bôná bo tlo fêla bò xola bò e-ya.” (2 Timotheo 3:1, 13) Go e na le go felelwa ke kholofelo, lemoga gore dikgateletšego tšeo re lebeletšanago le tšona di nea bohlatse bja gore bofelo bja tshepedišo ye e kgopo ya Sathane bo kgaufsi. Eupša Jesu o re gopotša gore “e a tl’o xo tiišetša xo fihla bofelong, ké yêna a tl’o xo phološwa.” (Mateo 24:13) Ka gona, ‘o se ke wa lapa go dira se sebotse!’ Ekiša Aborahama gomme o be gare ga bao ‘ka tumelo le kgotlelelo ba ruilego tše di holofeditšwego.’—Ba-Hebere 6:12.
Na o Lemogile?
• Ke ka baka la’ng batho ba Jehofa lehono ba swanetše go letela diteko le tlaišo?
• Ke ka ditsela dife Sathane a ka dirišago ditlhaselo tše lebanyago?
• Diphapano magareng ga batho gare ga Bakriste di ka rarollwa bjang?
• Ke bjang boikgogomošo le boikgantšho di ka bakago diteko?
• Ke ka tsela efe Aborahama a beilego mohlala o mobotse ka go letela go phethagala ga dikholofetšo tša Modimo?
[Dipotšišo tša Thuto]
[Seswantšho go letlakala 26]
Bafsa ba bantši ba Bakriste ba a tlaišwa, ba kwerwa ke dithaka tša bona
[Seswantšho go letlakala 29]
Mehleng ya Aborahama phethagalo ya dikholofetšo tša Modimo e be e “le kxolê,” lega go le bjalo, o ile a thea tumelo ya gagwe go tšona