Na o a Gopola?

Na o thabetše go bala ditokollo tša morago bjale tša Morokami? Gona, bona ge e ba o ka kgona go araba dipotšišo tše di latelago:

• Ke ka baka la’ng dipotšišo tše di rotošitšwego go Jobo kgaolo 38 di swanelwa ke go elwa hloko le lehono?

Bontši bja mediro e makatšago yeo Modimo a ilego a e ela hloko e ka se kwešišwe ka mo go feletšego le ke bo-rathutamahlale ba mehleng yeno. Mediro ye e akaretša tsela yeo ka yona matla-kgogedi a bolokago lefase modikong, seo ge e le gabotse seetša e lego sona, gore ke ka baka la’ng go e-na le mehuta e fapa-fapanego ya dikgapetla tša lehlwa, kamoo marothodi a pula a hlamegago ka gona le kamoo matla a kgathago tema ka gona go magadima.​—4/15, matlakala 4-11.

• Ke mehlala efe ya Beibele yeo e ka re thušago go lebeletšana le maikwelo a fošagetšego ka katlego?

Asafa, Baruke le Naomi ba ile ba lebeletšana le dinako tša manyami goba tša maikwelo a mangwe a fošagetšego, gomme pego ya Mangwalo mabapi le go lebeletšana ga bona ka katlego le maemo a bjalo e ka re thuša.​—4/15, matlakala 22-4.

• Ke ditsela dife tše dingwe tšeo di holago bakeng sa go thuša bahlologadi ba Bakriste?

Bagwera ba ka ithapela go thuša ka botho le ka mo go lemogegago. Ditho tša lapa goba ba bangwe ba ka ba boemong bja go nea thušo ya tša ditšhelete goba ya dilo tše di bonagalago, moo go nyakegago thušo e le ka kgonthe. Bakriste-gotee le bona ba ka thuša ka go tsenya letsogo mo go bontšhago lerato la bogwera, ba nea thekgo ya moya le khomotšo.​—5/1, matlakala 5-7.

• Ke ka baka la’ng go le bohlokwa go nyala “feela Moreneng,” bjalo ka ge 1 Ba-Korinthe 7:​39 (NW) e eletša?

Manyalo a go nyalana le bao ba sa dumelego a ipontšhitše gantši e le a masetla-pelo. Go feta moo, go latela keletšo ye ya Modimo ke taba ya go botegela Jehofa Modimo ka go se kwanantšhe. Ge re itshwara ka go dumelelana le Lentšu la Modimo, dipelo tša rena ga di re ganetše. (1 Johane 3:​21, 22)​—5/15, matlakala 20-1.

• Ka ge Jehofa e le yena a ka re lebalelago dibe, ke ka baka la’ng Bakriste ba ipobola dibe tše dikgolo go banna ba bagolo ka phuthegong?

Ee, ke tebalelo ya Jehofa ya go lebalela dibe tše dikgolo yeo Mokriste a swanetšego go e tsoma. (2 Samuele 12:​13) Eupša bjalo ka ge moporofeta Nathane a ile a nea Dafida thušo, banna ba bagolo ba budulego ka phuthegong ba ka thuša badiradibe ba itsholago. Go ya go bagolo go dumelelana le tlhahlo e neilwego go Jakobo 5:​14, 15.​—6/1, letlakala 31.

• Ke bohlatse bofe bjo bo lego gona bja gore re swanetše go hlokomela dišuana le bahlologadi bao ba hlokago?

Pego ya histori e bontšha gore go nea tlhokomelo e bjalo go ile gwa swaya borapedi bja therešo bobedi go ba-Hebere ba bogologolo le go Bakriste ba pele. (Ekisodo 22:​21, 22; Ba-Galatia 2:​9, 10; Jakobo 1:​27) Moapostola Paulo o akareditše ka Mangwalong ditaelo tše di kwagalago bakeng sa Bakriste gore ba nee tlhokomelo go bahlologadi ba bahloki. (1 Timotheo 5:​3-​16)​—6/15, matlakala 9-​11.

• Senotlelo se se lebišago bophelong bjo bo thabišago le bjo bo nago le morero ke sefe?

Re swanetše go hlagolela le go kgomarela tswalano e swanetšego le Jehofa, Tatago rena wa legodimong. Go ithuta Beibele ke thušo e bohlokwa ya gore re dire sona seo.​—7/1, matlakala 4-5.

• Na motho yo mongwe le yo mongwe o na le moya o sa hwego wo o phologago lehu?

Le ge batho ba bangwe ba dumela gore moya ga o hwe, Beibele ga e thekge kgopolo e bjalo. E bontšha gore ge motho a e-hwa, o boela leroleng gomme o ba boemong bja go se be gona. Eupša Modimo o na le bokgoni bja go mmušetša bophelong, ka gona kholofelo le ge e le efe bakeng sa bokamoso e ithekgile ka Modimo nakong ya tsogo. (Mmoledi 12:7)​—7/15, matlakala 3-6.

• Daniele o be a le kae ge ba-Hebere ba bararo ba be ba lekwa molaleng wa Dura?

Beibele ga e bolele. E ka ba e le gore Daniele o be a sa tlamega go ba moo ka lebaka la maemo a gagwe, goba a ka ba a be a se gona ka baka la kabelo ya gagwe ya bolaodi. Eupša re ka kgodišega gore ga se a ka a kwanantšha potego ya gagwe go Jehofa.​—8/1, letlakala 31.