Phenyo Kgorong ya Tsheko ya Molao-theo ya Mmušo

DIHLATSE TŠA JEHOFA kua Jeremane di hweditše phenyo e bohlokwa kua Kgorong ya Tsheko ya Molao-theo ya Mmušo kua Karlsruhe. Ka gona di ile tša gata mogato o bohlokwa mabapi le go tsebja ga tšona.

Dihlatse tša Jehofa di be di dutše di dira boboledi kua Jeremane ka nywaga e fetago 100. Di ile tša phologa tlaišo e šoro ka diatleng tša dipušo tše pedi tša bogateledi lekgolong la nywaga la bo-20​—Bosošalisi bja Setšhaba le Bokomanisi. Ga e sa le go tloga ka 1990, Dihlatse di ile tša tsoma go tsebja ka molao bjalo ka mokgatlo wa molao wa phatlalatša. Ka morago ga dikahlolo tše pedi tša kgoro tšeo di sego tša thekga le ge e ka ba e tee ya tšona, Dihlatse di ile tša ipiletša Kgorong ya Tsheko ya Molao-theo ya Mmušo, yeo e ilego ya tsebiša kahlolo ya yona ka December 19, 2000.

Phetho ya go Dumelelana le Dihlatse tša Jehofa

Baahlodi ka moka ba šupago ba kgoro ba ile ba ahlola ka go dumelelana le Dihlatse. Baahlodi ba ile ba fetoša kahlolo ya 1997 ya Kgoro-tsheko ya Bolaodi ya Mmušo gomme ba laela gore kgoro e hlahlobe gape kgopelo ya Dihlatse.

Kgoro ya Tsheko ya Molao-theo ya Mmušo e ile ya diriša tiragalo ye go bolela ka tswalano ya kgopolo magareng ga Mmušo le dihlopha tša bodumedi. Ge e le gabotse, boemo bja bodumedi “ga bo ahlolwe ka ditumelo tša bjona, eupša ka mokgwa wa bjona.”

Kgoro e ile ya lemoga gape gore ge Dihlatse di dutše di diriša “boema-gare bja Bokriste,” ga di “hlasele molao wa pušo ka batho” gomme ga di “kganyoge go hloma sebopego se sengwe sa mmušo legatong la pušo ka batho.” Lega go le bjalo, go se tšee lehlakore dikgethong tša dipolitiki ga se gwa swanela go ba kgahlanong le Dihlatse bakeng sa go nyaka ga tšona go tsebja ka molao.​—Johane 18:​36; Ba-Roma 13:1.

Kgoro e ile ya bontšha ka mo go tšwelago pele gore modumedi​—go sa šetšwe gore ke Hlatse goba motho yo a itšego wa bodumedi bjo bongwe​—ka dinako tše dingwe a ka ikhwetša a le boemong bjoo dinyakwa tša Mmušo le dinyakwa tša tumelo ya gagwe di thulanago. Ge e ba motho a latela letswalo la gagwe ka “go latela ditumelo tša bodumedi go feta molao,” Mmušo o ka lebelela se e le go lokafatšwa gomme go le ka kua ga tekanyo ya tokologo ya bodumedi.​—Ditiro 5:29.

Kahlolo ya kgoro e bile sehlogo se segolo sa ditaba. Go be go se na kuranta ya kua Jeremane yeo e bego e se na pego ka molato. Diteišene tše kgolo ka moka tša dithelebišene le tša radio di ile tša gaša dipego goba dipoledišano. Go feta le ge e le neng pele leina la Jehofa ga se la ka la phatlalala ka bophara gakaakaa kua Jeremane.

[Mothopo wa Seswantšho go letlakala 8]

AP Photo/Daniel Maurer