Diabolo​—Ke yo a Fetago go fo ba wa Tumela-khwele

“Gohle ka Testamenteng e Mpsha go na le thulano e kgolo ka lehlakoreng le lengwe magareng ga madira a Modimo le a go loka, gomme ka go le lengwe e le a mabe a eteletšwego pele ke Sathane. Ye ga se kgopolo ya mongwadi o tee goba ba babedi, eupša ke motheo o dumelelanago. . . . Ka gona bohlatse bja Testamente e Mpsha ke bjo bo kwagalago. Sathane ke selo sa kgonthe se kotsi, yo ka mehla e lego lenaba la Modimo le la batho ba Modimo.”​—“The New Bible Dictionary.”

KA GONA, ke ka baka la’ng batho ba bantši bao ba ipolelago gore ke Bakriste​—le bao ba bolelago gore ba dumela Beibele​—ba ganetša kgopolo ya gore Diabolo wa kgonthe o gona? Ge e le gabotse, ga ba amogele Beibele e le Lentšu la Modimo. (Jeremia 8:9) Ba re bangwadi ba Beibele ba be ba bonagatša difilosofi tša ditšhaba tšeo di bego di ba dikologile gomme ga se ba ka ba bega therešo e tšwago go Modimo ka mo go nepagetšego. Ka mohlala, rathutatumelo wa Mokatholika Hans Küng o ngwala gore: “Dikgopolo tša dinonwane tša Sathane yo a nago le mašole a batemona . . . di tseneletše go tloga  dinonwaneng tša Babele go tsena Bojudeng bja pele gomme go tloga moo tša tsena Testamenteng e Mpsha.”​​—On Being a Christian.

Eupša Beibele ga se feela lentšu la batho; ka kgonthe ke Lentšu le le buduletšwego la Modimo. Ka gona, ke ga bohlale go tšeela godimo seo e se bolelago ka Diabolo.​—2 Timotheo 3:​14-17; 2 Petro 1:​20, 21.

Ke Eng Seo Jesu a Bego a se Nagana?

Jesu Kriste o be a dumela gore Diabolo ke wa kgonthe. Jesu ga se a ka a lekwa ke bobe bjo bo bego bo le ka gare go yena. O be a hlasetšwe ke motho wa kgonthe yo ka morago a mmiditšego gore ke “mmuši wa lefase.” (Johane 14:​30; Mateo 4:​1-11) O be a bile a dumela gore go na le dibopiwa tše dingwe tša moya tše di bego di thekga Sathane maanong a gagwe a mabe. O fodišitše batho ba ba “naxo le môya o mobe.” (Mateo 12:​22-28) Gaešita le kgatišo ya baila-Modimo e lego A Rationalist Encyclopædia e bolela bohlokwa bja se ge e re: “Ka mehla e bile sekgopi go bo-rathutatumelo kamoo Jesu wa Diebangedi a amogetšego go dumela go dibopiwa tše kgopo tša moya.” Ge Jesu a be a bolela ka Diabolo le batemona ba gagwe, o be a sa fo bušeletša ditumela-khwele tše di bego di e-tšwa dinonwaneng tša ba-Babele. O be a tseba gore ba be ba le gona e le ka kgonthe.

Re ithuta mo gontši ka Diabolo ge re ela hloko mantšu a Jesu go barutiši ba bodumedi ba mehleng ya gagwe a rego: “Tata-weno yo le tšwaxo xo yêna ké Diabolo; ’me Le phêxêlla xo dira medirô ya yêna tata-weno eo. Ké yêna senokwane xo tloxa mathomong, xobane mo xo yêna therešô xa e yo’. Xe a bolêla maaká, ó bolêla tša xaxwe; xobane ké yêna moaketši le rra-xo-moaketši.”​—Johane 8:44.

Go ya ka se, Diabolo, e lego leina leo le bolelago “mothomeletši,” e be e le “moaketši le rra-xo-moaketši.” (Mongwalo o sekamego ke wa rena.) E bile sebopiwa sa pele sa go bolela maaka ka Modimo, gomme o dirile seo morago kua tšhemong ya Edene. Jehofa o be a boletše gore batswadi ba rena ba pele ba be ba tla “hwa lehu” ge ba be ba ka ja sehlare sa go tseba botse le bobe. A diriša molomo wa noga, Sathane o ile a re mantšu ao e be e se therešo. (Genesi 2:​17; 3:4) O bitšwa ka mo go swanetšego gore ke “noga ya kgale, e bitšwago Diabolo le Sathane.”​—Kutollo 12:9, PK.

Diabolo o boletše maaka ka sehlare sa go tseba botse le bobe. O ganeditše ka gore, kiletšo ya go ja sehlareng seo e be e sa swanela; e be e le go dirišwa gampe ga matla. O rile Adama le Efa, ba be ba ka “ba byalo ka Modimo” tabeng ya go itirela phetho ya seo se lokilego le se sebe. Sathane o be a bontšha gore bjalo ka batho ba ba nago le tokologo ya boikgethelo, ba swanetše go itirela diphetho ka mo go feletšego. (Genesi 3:​1-5) Go hlaselwa mo ga go swanelega ga tsela ya Modimo  ya go buša go ile gwa rotoša dikgang tše bohlokwa. Ka gona Jehofa o dumeletše nako bakeng sa gore dikgang tše di lokišwe. Se se bolela gore Sathane o dumeletšwe gore a tšwele pele a phela ka nakwana. Nako ya gagwe e lekanyeditšwego ke yeo ga bjale e felago ka lebelo. (Kutollo 12:​12) Lega go le bjalo, o tšwela pele a aroganya batho le Modimo ka maaka le ka bohwirihwiri, a diriša batho ba swanago le ba-mangwalo le Bafarisei ba mehleng ya Jesu gore ba gaše dithuto tša gagwe.​—Mateo 23:​13, 15.

Jesu gape o boletše gore Diabolo ke “mmolai wa batho go tloga mathomong” (PK) le gore “ga se a ka a ema ka go tia therešong.” (NW) Se ga se bolele gore Jehofa o bopile Diabolo e le “mmolai wa batho.” Beibele ga e rute gore Diabolo o be a bopetšwe go ba mohuta o itšego wa ntatauwane yeo e ikarabelago mabapi le lefelo la mollo le tlhokofatšo bakeng sa motho le ge e le ofe yo a bego a ganetša Modimo, go feta moo, ga e rute gore go na le lefelo le le bjalo le ka mohla. Beibele e bontšha gore bahu ba lebitleng le le tlwaelegilego la batho, e sego lefelong la mollo goba bodulong bja Sathane.​—Ditiro 2:​25-27; Kutollo 20:​13, 14.

Mathomong Diabolo o be a le “therešong.” O kile a ba karolo ya lapa la Jehofa la legodimong e le morwa wa moya yo a phethagetšego wa Modimo. Eupša ga se a ka “a ema ka go tia therešong.” O ile a kgetha ditsela tša gagwe ka noši le melao ya gagwe ya motheo yeo e theilwego maakeng. ‘O thomile,’ e sego ge a be a bopša e le morwa yo e lego morongwa wa Modimo, eupša nakong ya ge a be a rabela ka go ithatela malebana le Jehofa gomme a botša Adama le Efa maaka. Diabolo o swana le batho bao ba ilego ba rabela malebana le Jehofa nakong ya Moše. Re bala ka bona gore: “Ba mo dirile tše mpe, ga se bana ba gagwe, ke ditšhila.” (Doiteronomio 32:5, PK) Go ka bolelwa se se swanago ka Sathane. O fetogile “mmolai wa batho” ge a be a rabela gomme a ikarabela bakeng sa lehu la Adama le Efa, ge e le gabotse, bakeng sa lapa ka moka la batho.​—Ba-Roma 5:12.

Barongwa ba sa Kwego

Barongwa ba bangwe ba ile ba thekga Sathane borabeleng bja gagwe. (Luka 11:​14, 15) Barongwa ba ba ile “ba tloxa madulong a bôná” gomme ba iphetoša mebele ya batho e le gore ba thabele ditswalano tša botona le botshadi le “barwedi ba batho” ba mehleng ya Noage. (Juda 6; Genesi 6:​1-4; 1 Petro 3:​19, 20) “Karolô ya boraro ya dinaledi tša lexodimong,” goba palo e nyenyane ya dibopiwa tša moya, e ile ya latela tsela ye.​—Kutollo 12:4.

Puku yeo e tletšego diswantšho kudu ya Kutollo e swantšha Diabolo e le “drakone e kgolo e khubedu.” (Kutollo 12:​3, PK) Ka baka la’ng? Ga se gore ke ka gobane ka tsela ya kgonthe a e-na le mmele wo o tšhošago le o befilego. Ge e le gabotse, ga re tsebe gore dibopiwa tša moya di na le mmele wa mohuta mang, eupša mohlomongwe boemong bjoo, Sathane ga a fapane le dibopiwa tše dingwe tša moya tšeo e lego barongwa. Lega go le bjalo, “drakone e kgolo e khubedu” ke tlhaloso e swanetšego ya tshekamelo ya Sathane e gagolago, e boifišago, e matla le e senyago.

Sathane le batemona ba gagwe ga bjale ba thibetšwe o šoro. Ba ka se sa kgona go iphetoša mmele go swana le ge go bonala ba kile ba kgona. Go se go ye kae ka morago ga go hlongwa ga Mmušo wa Modimo diatleng tša Kriste ka 1914, ba ile ba lahlelwa fase tikologong ya lefaseng.​—Kutollo 12:​7-9.

Diabolo ke Lenaba le Lego Thata go ka Fenywa

Lega go le bjalo, Diabolo e sa dutše e le lenaba le lego thata go ka fenywa. O “dikoloxa bo-ka tau e bôpaxo; ó nyaka yo a kaxo mo metša.” (1 Petro 5:8.) Ga se selo sa motheo seo se sa hlalosegego sa bobe bjo bo lego nameng ya rena e sa phethagalago. Ke therešo gore re lwa letšatši  le letšatši le ditshekamelo tša rena tša sebe. (Ba-Roma 7:​18-20) Eupša ntwa e kgolo ke go lwa le “marena a lefase a lefsifsi leno, le meoya e kgopo, e lego sebakeng sa godimo.”​—Ba-Efeso 6:​12, PK.

Tutuetšo ya Diabolo e phatlalala gakaaka’ng? Moapostola Johane o re: “Lefase ka moka le rapaletše matleng a yo mobe.” (1 Johane 5:​19, NW) Go ba gona, ga re nyake go laolwa ke Diabolo goba go dumelela poifo ya ditumela-khwele mabapi le yena e re golofatša. Ka gona, re ba bohlale ge e ba re dula re phafogetše maiteko a gagwe a go re foufaletša therešo le go senya potego ya rena go Modimo.​—Jobo 2:​3-5; 2 Ba-Korinthe 4:​3, 4.

Diabolo ga se ka mehla a dirišago maiteko a šoro e le gore a hlasele bao ba nyakago go dira thato ya Modimo. Ka dinako tše dingwe, o itira eka ke “morongwa wa seetša.” Moapostola Paulo o lemošitše Bakriste ka kotsi ye ge a be a ngwala gore: “Se ke se boifaxo, ké xore Le ka senywa mexopolô, la timêlwa ke therešô ye e išaxo xo Kriste, la etša Efa xe a forwa ke nôxa ka maanô a yôna.”​—2 Ba-Korinthe 11:​3, 14.

Ka gona re swanetše go ‘phafoga, re phakgame, re lwe le yena re tiile tumelong.’ (1 Petro 5:​8, 9; 2 Ba-Korinthe 2:​11) Phema go bapalela ka diatleng tša Sathane ka go hlaphuhla selong le ge e le sefe seo se kgokaganego le bonoge. (Doiteronomio 18:​10-12) E-ba morutwana yo mafolofolo wa Lentšu la Modimo, o gopola gore Jesu Kriste o be a šupa Lentšung la Modimo leboelela ge a be a lekwa ke Diabolo. (Mateo 4:​4, 7, 10) Rapelela moya wa Modimo. Dienywa tša wona di ka go thuša go phema mediro ya nama, yeo Sathane a e hlohleletšago ka mo go atlegago kudu. (Ba-Galatia 5:​16-24) Gape, rapela Jehofa go tšwa pelong ge o ikwa o le ka tlase ga kgateletšego ka tsela e itšego go tšwa go Diabolo le batemona ba gagwe.​—Ba-Filipi 4:​6, 7.

Ga go nyakege gore o boife Diabolo. Jehofa o holofetša tšhireletšo ya kgonthe malebana le selo le ge e le sefe seo Sathane a ka se dirago. (Psalme 91:​1-4; Diema 18:​10; Jakobo 4:​7, 8) Moapostola Paulo o re: “Tiang Moreneng le thateng ya matla a xaxwe.” Ke moka le tla ‘kgona go fenya dipogo tša Diabolo.’​—Ba-Efeso 6:​10, 11.

[Seswantšho go letlakala 5]

Jesu o be a tseba gore Diabolo ke motho wa kgonthe

[Seswantšho go letlakala 6]

“Lefase ka moka le rapaletše matleng a yo mobe”

[Mothopo]

NASA photo

[Diswantšho go letlakala 7]

Lwantšha Diabolo ka go ithuta Lentšu la Modimo le ka go rapela ka mehla