Dipotšišo tše Tšwago go Babadi

Ba-Kolose 1:​16 e bolela ka Morwa wa Modimo gore “ka moka di hlodilwe ke Yêna, di hloletšwe Yêna.” Ke ka kgopolo efe dilo ka moka di bego di “hloletšwe” Morwa wa Modimo, Jesu?

Jehofa o dirišitše Morwa wa gagwe yo a tswetšwego a nnoši e le mošomi yo a nago le bokgoni go hlola dilo tše dingwe ka moka, ke gore, dilo ka moka ka ntle le Jesu ka boyena. (Diema 8:​27-30; Johane 1:⁠3) Ka mo go swanetšego, Morwa o kgahlwa ke mediro yeo, gomme ke ka kgopolo ye e ‘hloletšwego’ yena.

Re tseba gore batswadi ba lebeletše go kgahlwa kudu ke seo ba se tšweletšago​—e lego barwa le barwedi ba bona, e bile gantši ba a kgahlega. Ka gona, seema sa Beibele se bolela ka ‘morwa yo [tatagwe] a mo ratago.’ (Diema 3:​12, PK; 29:​17) Ka mo go swanago, Jehofa Modimo o ile a kgahlwa ke Isiraele ge batho ba gagwe ba be ba botega. (Psalme 44:3; 119:​108; 147:​11) Gape o kgahlwa ke potego ya bao ba mmotegelago ka go se kwanantšhe go fihla le mehleng ya rena.​—Diema 12:​22; Ba-Hebere 10:38.

Ka gona, e be e le mo go swanetšego gore Modimo o be a ka dira gore modiri-gotee le yena, Jesu, a kgahlwe ke dilo tšeo a di fihleletšego. Ge e le gabotse, Diema 8:​31 (NW) e bolela gore Morwa ‘o be a thabela naga e enywago ya lefase la gagwe, gomme dilo tšeo a bego a kgahlwa ke tšona di be di le mabapi le bana ba batho.’ Ke ka kgopolo ye ge Ba-Kolose 1:​16 e re: “Ka moka di hlodilwe ke Yêna, di hloletšwe Yêna.”​—Mongwalo o sekamego ke wa rena.