‘Tsomang Khutšo Gomme le e Kganyelele’

“Xe xo kxônêxa ka thokô ya lena, Le phedišanê [ka khutšo, PK] le batho ka moka.”​—BA-ROMA 12:18.

1, 2. Ke mabaka afe a mangwe ao ka ona khutšo e dirilwego ke batho e ka se bego e swarelelago?

NAGANA ka ntlo yeo e nago le motheo o fokolago, ditšhipi tša moago tše di senyegilego le marulelo a lekelelago. Na o be o ka nagana ka go hudugela ka go yona gomme o e dire legae la gago? Ga go bonagale go le bjalo. Gaešita le go e penta lefsa go be go ka se fetoše therešo ya gore ngwako ga o sa le boemong bja go tia. Go se go ye kae o tla wa.

² Khutšo le ge e le efe e tšwago lefaseng le e swana le ntlo yeo. E agilwe motheong o fokolago​—e lego dikholofetšo le maano a batho, “bao xo sexo phološô xo bôná.” (Psalme 146:3) Histori e bontšha lelokelelo le letelele la dintwa magareng ga ditšhaba, dihlopha tša merafo le meloko. Ke therešo gore go bile le dinako tše kopana tša khutšo, eupša khutšo ya mohuta ofe? Ge e ba ditšhaba tše pedi di e-lwa gomme go phatlalatšwa gore go na le khutšo ka gobane setšhaba se sengwe se fentšwe goba ka gobane ditšhaba ka bobedi di sa bone mohola wa go tšwela pele di e-lwa, yeo ke khutšo ya mohuta ofe? Lehloyo, dipelaelo le mahufa a manyenyane tšeo di thomilego ntwa di sa dutše di le gona. Khutšo yeo e lego ponagalo ya maaka feela, ya ‘go fo khupetša’ bonaba, ga se khutšo e swarelelago.​—Hesekiele 13:10.

3. Ke ka baka la’ng khutšo ya batho ba Modimo e fapana le khutšo le ge e le efe e dirilwego ke batho?

³ Lega go le bjalo, khutšo ya kgonthe e gona lefaseng le leo le sentšwego ke ntwa. Kae? Gare ga balatedi ba Jesu Kriste bao ba tšeago ka mehlala ya gagwe, e lego Bakriste ba kgonthe bao ba kwago mantšu a Jesu gomme ba katanela go ekiša tsela ya gagwe ya bophelo. (1 Ba-Korinthe 11:1; 1 Petro 2:​21) Khutšo yeo e lego gona gare ga Bakriste ba therešo ba merafo e sa swanego, maemo setšhabeng gotee le ditšhaba ke ya kgonthe ka gobane e tšwa tswalanong ya khutšo yeo ba nago le yona le Modimo, yeo e theilwego tumelong ya bona sehlabelong sa topollo sa Jesu Kriste. Khutšo ya bona ke mpho e tšwago go Modimo, e sego selo seo se dirilwego ke batho. (Ba-Roma 15:​33; Ba-Efeso 6:​23, 24) Ke mafelelo a go ikokobeletša ga bona “Kxoši ya kaxišô,” Jesu Kriste le go rapela Jehofa “Modimo wa leratô le moláô.”​—Jesaya 9:5; 2 Ba-Korinthe 13:11.

4. Mokriste o ‘phegelela’ khutšo bjang?

⁴ Khutšo ga e fo itlela feela go batho bao ba sa phethagalago. Ka baka leo, Petro o boletše gore Mokriste yo mongwe le yo mongwe o swanetše gore a “tsome khutšo gomme a e phegelele.” (1 Petro 3:​11, NW) Re ka dira seo bjang? Boporofeta bja kgale bo nea karabo. Jehofa ge a bolela ka Jesaya o itše: “Bana ba gago ka moka ba tlo rutwa ke Jehofa, gomme khutšo ya bana ba gago e tla ba e kgolo.” (Jesaya 54:​13, PK; Ba-Filipi 4:9) Ee, khutšo ya kgonthe e tlela bao ba kwago dithuto tša Jehofa. Go feta moo, khutšo gotee le “lerato, lethabo, . . . go se fele pelo, botho, go loka, tumelo, boleta le boitshwaro,” ke dienywa tša moya o mokgethwa wa Modimo. (Ba-Galatia 5:​22, 23, NW) E ka se ke ya thabelwa ke motho yo a se nago lerato, a se nago lethabo, a felago pelo, a sego botho, yo mobe, wa go se botege, yo šoro goba yo a se nago boitshwaro.

 ‘Le Phedišane ka Khutšo le Batho ka Moka’

5, 6. (a) Go ba le khutšo go bolela’ng ka Beibeleng? (b) Bakriste ba katanela go ba le khutšo go bomang?

⁵ Khutšo e hlalositšwe e le boemo bja go iketla goba go homola. Tlhaloso e bjalo e be e tla akaretša maemo a mantši ao go ona go se nago thulano. Go ba gona, le motho yo a hwilego o khutšong! Lega go le bjalo, e le gore motho a tle a thabele khutšo ya kgonthe o swanetše go dira se se fetago go ba le khutšo. Thutong ya gagwe ya Thabeng, Jesu o itše: “Ba lehlôxônôlô ké ba-dira-khutšô, xobane bôná-bao ba tlo bitšwa bana ba Modimo.” (Mateo 5:9) Jesu o be a bolela le batho bao ka morago ba bego ba tla ba le sebaka sa go ba bana ba Modimo le go tlo amogela bophelo bja go se hwe legodimong. (Johane 1:​12; Ba-Roma 8:​14-17) Gomme mafelelong, batho ka moka bao ba botegago bao ba se nago kholofelo ya legodimong ba tla thabela “tokologo ya letago ya bana ba Modimo.” (Ba-Roma 8:​21, NW) Ke feela bao ba nago le khutšo bao ba ka bago le kholofelo e bjalo. Lentšu la Segerika bakeng sa “go ba le khutšo” ge e le gabotse le bolela “badira-khutšo.” Ka gona go ba le khutšo go ya ka pono ya Mangwalo go bolela go kgothaletša khutšo ka mafolofolo, ka dinako tše dingwe e le go dira khutšo moo pele e bego e se gona.

⁶ Re sa dutše re nagana ka se, ela hloko keletšo ya moapostola Paulo go ba-Roma e rego: “Xe xo kxônêxa ka thokô ya lena, Le phedišanê [ka khutšo, PK] le batho ka moka.” (Ba-Roma 12:​18) Paulo o be a sa botše ba-Roma feela gore ba be le kgopolo e fodilego, gaešita le ge seo se be se tla thuša. O be a ba kgothaletša go dira khutšo. Le bomang? Le “batho ka moka”​—ditho tša lapa, Bakriste-gotee gaešita le bao ba bego ba na le ditumelo tše sa swanego le tša bona. O ile a kgothaletša ba-Roma go dira khutšo le ba bangwe ‘go fihla mo go kgonegago ka thoko ya bona.’ Aowa, ga se a ka a nyaka gore ba kwanantšhe ditumelo tša bona ka baka la khutšo. Go e na le go fo rumola ba bangwe ka mo go sa nyakegego, ba be ba swanetše go boledišana le bona ka maikemišetšo a khutšo. Bakriste ba be ba swanetše go dira bjalo go sa šetšwe gore ba be ba dirišana le bao ba lego ka phuthegong goba bao ba lego ka ntle. (Ba-Galatia 6:​10) Ka go dumelelana le se, Paulo o ngwadile gore: “Ka mehla Le ôtêlêlê xo dirana xabotse le xo dira bohle xa-botse.”​—1 Ba-Thesalonika 5:15.

7, 8. Ke bjang le gona ke ka baka la’ng Bakriste ba e-na le khutšo go bao ba nago le ditumelo tše sa swanego le tša bona?

⁷ Re ka ba le khutšo bjang le bao ba nago le ditumelo tše sa swanego le tša rena le bao ba ka bago ba bile ba di ganetša? Tsela e nngwe ke gore re phema go bontšha moya wa go iphagamiša. Ka mohlala, e ka se be ga khutšo go bolela ka batho ba itšego ka go diriša maina a lenyatšo. Jehofa o utolotše dikahlolo tša gagwe malebana le mekgatlo le dihlopha, eupša ga re na tshwanelo ya go bolela ka motho le ge e le ofe bjalo ka ge eka o šetše a ahlotšwe. Ka kgonthe ga re ahlole ba bangwe, gaešita le baganetši ba rena. Ka morago ga gore a botše Tito gore a eletše Bakriste ba Kereta mabapi le ditirišano tša bona le babuši ba batho, Paulo o ile a bolela gore a ba gopotše gore “ba se bê le maroxa, e se bê ba dintwa; e bê ba botho; batho bohle ba ba bônê è le ba bonôlô byo bo tletšexo.”​—Tito 3:​1, 2.

 ⁸ Go ba le khutšo le bao ba nago le tumelo e sa swanego le ya rena go hlohleletša kudu tabeng ya go bolelela therešo go bona. Ke therešo gore ga re hlagolele bogwera bjoo bo ‘senyago bokwala.’ (1 Ba-Korinthe 15:​33) Lega go le bjalo, re ka ba ba botho gomme re swanetše go swara batho ka moka ka seriti le ka botho. Petro o ngwadile gore: “Tsela ye Le tšeaxo ka yôna Lè le xare xa ba-ntlê, a e bê e botse, xore xe ba Le phara ba re Le disenyi, e tlê e re xe ba lebeleša, ba bônê medirô e botse ya lena ’me ba rêtê Modimo, è le letšatši le a ba etetšexo ka lôna.”​—1 Petro 2:12.

Go ba le Khutšo Bodireding

9, 10. Ke mohlala ofe wa go dirišana ka khutšo le bao e sego badumedi woo moapostola Paulo a o beilego?

⁹ Bakriste ba lekgolong la pele la nywaga ba be ba tsebja ka sebete sa bona. Ga se ba ka ba hwefola molaetša wa bona, gomme ge ba be ba lebeletšane le kganetšo ba be ba ikemišetša go kwa Modimo e le mmuši go e na le batho. (Ditiro 4:​29; 5:​29) Lega go le bjalo, ga se ba ka ba gakantšha go ba le sebete le go ba bogale. Ela hloko matseno a Paulo ge a be a lwela tumelo ya gagwe pele ga Kgoši Herode Agaripa II. Herode Agaripa o be a e-ba le dikopano tša botona le botshadi le  wa le leloko le yo e lego kgaetšedi ya gagwe Berenike. Lega go le bjalo, Paulo o be a sa ikemišetša go kgalema Agaripa ka taba ya mekgwa. Go e na le moo, o ile a gatelela dintlha tšeo ba bego ba dumelelana ka tšona, a reta Agaripa ka go ba ga gagwe setsebi sa meetlo ya bo-Juda le modumedi wa baporofeta.​—Ditiro 26:​2, 3, 27.

¹⁰ Na Paulo o be a gegea ka go se botege monna yo a bego a ka mo nea tokologo? Aowa. Paulo o ile a latela keletšo ya gagwe ka noši gomme a bolela therešo. Ga go na selo se tee seo a se boletšego go Herode Agaripa seo e bego e se therešo. (Ba-Efeso 4:​15) Eupša Paulo e be e le modira-khutšo gomme a tseba kamoo a ka bago “dilo tšohle go batho ba mehuta ka moka.” (1 Ba-Korinthe 9:​22, NW) Morero wa gagwe e be e le go lwela tshwanelo ya gagwe ya go bolela ka Jesu. Bjalo ka morutiši yo a nago le bokgoni, o ile a thoma ka go bolela ka selo seo yena le Agaripa ba bego ba tla dumelelana ka sona. Ka gona Paulo o ile a thuša kgoši yeo ya boitshwaro bjo bo gobogilego gore e lebelele Bokriste ka tsela e kgahlišago kudu.​—Ditiro 26:​28-31.

11. Ke bjang re ka bago badira-khutšo bodireding bja rena?

¹¹ Re ka ba bjang badira-khutšo bodireding bja rena? Ka go swana le Paulo, re swanetše go phema dingangišano. Go ba gona, ka dinako tše dingwe go nyakega gore re be ba “xo bolêla Lentšu [re] sa boife,” re lwele tumelo ya rena ka sebete. (Ba-Filipi 1:​14) Eupša mabakeng a mantši morero wa rena o mogolo ke go bolela ditaba tše dibotse. (Mateo 24:​14) Ge e ba motho a bona therešo mabapi le merero ya Modimo, ke gona a ka thomago go tlogela dikgopolo tša bodumedi bja maaka gomme a itlhwekiše mekgweng e sa hlwekago. Ka gona, go fihla bokgoleng bjo bo kgonegago, ke mo gobotse go gatelela dilo tšeo di tlago go ipiletša go batheetši ba rena, re thome ka dilo tšeo re dumelelanago ka tšona le bona. E tla ba mo go se nago mohola go hlasela motho yoo, ge e ba go be go ka boledišanwa le yena ka bohlale, a bego a ka theetša molaetša wa rena.​—2 Ba-Korinthe 6:3.

Badira-khutšo ka Lapeng

12. Ke bjang re ka bago badira-khutšo ka lapeng?

¹² Paulo o itše bao ba tsenago lenyalong “ba tlo rwala bothata nameng.” (1 Ba-Korinthe 7:​28) Ba tla lebeletšana le mathata a fapa-fapanego. Gare ga dilo tše dingwe, banyalani ba bangwe ba tla fela ba e-ba le dilo tšeo ba sa dumelelanego ka tšona. Dilo tše di swanetše go rarollwa bjang? Ka mokgwa wa khutšo. Modira-khutšo o tla katanela go thibela ngangišano gore e se ke ya gola. Bjang? Sa pele, ka go diša leleme. Ge se dirišetšwa go kodutla le go hlaba ka mantšu, setho se se senyenyane ka kgonthe se ka ba ‘lešaedi leo le padilego leo le tletšego bohlwele bjo bo bolayago.’ (Jakobo 3:8) Modira-khutšo o dirišetša leleme la gagwe go aga go e na le go senya.​—Diema 12:18.

13, 14. Ke bjang re ka bolokago khutšo ge re foša ka polelo goba ge maikwelo a phagama?

¹³ Ka ge ka moka ga rena re sa phethagala, ka dinako tše dingwe re bolela dilo tšeo ka morago re itsholelago tšona. Ge se se direga, akgofela go lokiša ditaba​—go dira khutšo. (Diema 19:​11; Ba-Kolose 3:​13) Phema go ikhwetša o le ka gare ga “diphetolanô” le “diphapang tša lefêla.” (1 Timotheo 6:​4, 5) Go e na le moo, lebelela ka kua ga boemo gomme o leke go kwešiša maikwelo a molekane wa gago. Ge e ba o boledišwa ka bogale, o se ke wa itefeletša. Gopola gore “phetolô e bolêta e phohliša dipêfêlô.”​—Diema 15:1.

¹⁴ Ka dinako tše dingwe, o ka swanela ke go ela hloko keletšo e lego go Diema 17:​14 yeo e rego: “Thšaba, ntwa è sešo ya befa.” Tšhabela boemo bjo bo ferekanyago. Ka morago mola bogale bo phohletše, mohlomongwe o ka kgona go rarolla bothata ka mokgwa wa khutšo. Mabakeng a mangwe, e ka ba ga bohlale go kgopela thušo go molebeledi wa Mokriste yo a godilego tsebong. Banna ba bjalo bao ba nago le phihlelo le kwelobohloko e ka ba thušo e lapološago ge e ba khutšo ya lenyalo e le kotsing.​—Jesaya 32:​1, 2.

Badira-khutšo ka Phuthegong

15. Go ya ka Jakobo, ke moya ofe o mobe wo o bego o tsogile gare ga Bakriste ba bangwe, gomme ke ka baka la’ng moya woo e le wa “lefase,” wa “bophoofolo” le wa “botemona”?

¹⁵ Ka manyami, Bakriste ba bangwe ba lekgolong la pele la nywaga ba ile ba bonagatša moya wa lehufa le diphapano​—e lego se se fapanego le khutšo. Jakobo o itše: “Bohlale bya mohuta woo xa bo tšwe xodimo; ké bya lefase ké bya  [bophoofolo, NW], ké bya [botemona, NW]. Xobane mo xo naxo le kxalefô le mereba, ké mo xo naxo le pherekanô le medirô e mebe ka moka.” (Jakobo 3:​14-16) Ba bangwe ba dumela gore lentšu la Segerika leo le fetoletšwego e le “pherekanô” le šupa boithati bja go rata maemo le go lwela maemo. Ke ka lebaka le lebotse ge Jakobo a bo bitša ‘bja lefase, bja bophoofolo le bja botemona.’ Go theoša le histori, babuši ba lefase ba ile ba lwantšhana, go etša diphoofolo tša nageng ge di e-lwa. Ruri phenkgišano ke ya “lefase” le ya “bophoofolo.” Gape ke ya “botemona.” Seka se seo se sa lemogegego se ile sa bonagatšwa la mathomo ke morongwa yo a bego a nyoretšwe pušo yo a ilego a itira lenaba la Jehofa Modimo gomme a fetoga Sathane, mmuši wa batemona.

16. Ke bjang Bakriste ba bangwe ba lekgolong la pele la nywaga ba ilego ba bonagatša moya o swanago le wa Sathane?

¹⁶ Jakobo o ile a kgothaletša Bakriste gore ba gane go ba le moya wa pherekano, ka gobane o lwantšhana le khutšo. O ngwadile gore: “Dintwa le diphapang xare xa lena di tšwa kae? Mo di tšwaxo xôna šefa: A xa se dikxanyoxong tša lena di lošanaxo mo dithong tša lena?” (Jakobo 4:1) Mo ‘dikganyogo’ di ka bolela go tsoma ka megabaru dilo tše di bonagalago goba go kganyoga botumo, taolo goba tutuetšo. Ka go swana le Sathane, go bonagala ba bangwe ka diphuthegong ba be ba nyaka go ba bao ba phagamego go e na le go ba ‘ba banyenyane,’ bjalo ka ge Jesu a itše balatedi ba gagwe ba therešo ba tla ba bjalo. (Luka 9:​48) Moya o bjalo o ka amoga phuthego khutšo.

17. Ke bjang Bakriste lehono e ka bago badira-khutšo ka phuthegong?

¹⁷ Lehono, le gona re swanetše go lwantšha moya wa go sekamela dilong tše di bonagalago, go beng le lehufa goba go rateng maemo ga lefela. Ge e ba re le badira-khutšo ba kgonthe, re ka se ikwe re nyenyefatšwa ge e ba ba bangwe ka phuthegong ba re feta ka bokgoni kudu mešomong e itšego, e bile re ka se ba hlompholle go ba bangwe ka go belaela maikemišetšo a bona. Ge e ba re e-na le bokgoni bjo bo lemogegago, re ka se bo dirišetše go itira ba ba kaone ka ba bangwe, bjalo ka ge eka re bontšha gore phuthego e tla gola feela ka baka la bokgoni bja rena le tsebo. Moya o bjalo o tla baka karogano; o ka se tliše khutšo. Badira-khutšo ga ba kgantšhe ditalente tša bona, eupša ba di diriša ka boipoetšo go hlankeleng banababo bona le go godišeng Jehofa. Ba lemoga gore mafelelong, lerato​—e sego bokgoni​—ke lona le hlaolago Mokriste wa therešo.​—Johane 13:​35; 1 Ba-Korinthe 13:​1-3.

“Khutšo e be Magoši a Gago”

18. Bagolo ba godiša khutšo bjang gare ga bona ka noši?

¹⁸ Bagolo ba phuthego ba etelela pele tabeng ya go ba badira-khutšo. Jehofa o ile a bolela e sa le pele mabapi le batho ba gagwe gore: “Ke tlo bea khutšo e be magoši a gago, le go loka e be mmuši wa gago.” (Jesaya 60:​17, PK) Ka go dumelelana le mantšu a a boporofeta, bao ba hlankelago e le badiši ba Bakriste ba šoma ka thata bakeng sa go godiša khutšo gare ga bona ka noši le gare ga mohlape. Bagolo ba ka boloka khutšo gare ga bona ka noši ka go bonagatša “bohlale byo bo tšwaxo xodimo” bjo bo nago le khutšo le bjo bo nago le teka-tekano. (Jakobo 3:​17) Ka go ba ga bona le ditlogo tše di fapa-fapanego le diphihlelo tše sa swanego bophelong, bagolo ka phuthegong ka dinako tše dingwe ba tla ba le dipono tše di sa swanego. Na se se bolela gore ga ba na khutšo? E sego ge e ba boemo bjo bjalo bo rarollwa ka mo go swanetšego. Badira-khutšo ba bolela dikgopolo tša bona ka tsela ya boipoetšo gomme ka tlhompho ba theetša tša ba bangwe. Go e na le go phegelela tseleng ya gagwe, modira-khutšo o tla naganišiša kgopolo ya ngwanabo ka thapelo. Ge e ba go se na molao wa motheo wa Beibele wo o tshelwago, go dula go e-na le sebaka sa dikgopolo tše di fapa-fapanego. Ge ba  bangwe ba sa dumelelane le yena, modira-khutšo o tla sekamela go thekgeng phetho ya bontši. Ka go rialo o tla ipontšha e le yo a nago le teka-tekano. (1 Timotheo 3:​2, 3, bapiša le NW.) Balebeledi bao ba nago le phihlelo ba a tseba gore go boloka khutšo go bohlokwa kudu go feta go dira dilo ka tsela ya bona.

19. Ke bjang bagolo ba dirago e le badira-khutšo ka phuthegong?

¹⁹ Bagolo ba godiša khutšo le ditho tša mohlape ka go di thekga e sego ka go fo swaya maiteko a tšona diphošo ka mo go feteletšego. Ke therešo gore ka dinako tše dingwe ba bangwe ba ka swanelwa ke go phošollwa. (Ba-Galatia 6:1) Eupša mošomo o mogolo wa molebeledi wa Mokriste ga se go fo nea tayo. Gantši molebeledi o nea theto. Bagolo ba lerato ba katanela go bona tše botse go ba bangwe. Balebeledi ba thabela mošomo o thata o dirwago ke Bakriste-gotee le bona, gomme ba kgodišegile gore Bakriste-gotee le bona ba dira sohle seo ba ka se kgonago.​—2 Ba-Korinthe 2:​3, 4.

20. Phuthego e holega bjang ge bohle e le badira-khutšo?

²⁰ Ka gona, ka lapeng, ka phuthegong le ge re dirišana le bao ba nago le ditumelo tšeo di sa swanego le tša rena, re katanela go ba le khutšo le go šomela khutšo. Ge e ba re hlagolela khutšo ka mafolofolo, re tla tlaleletša lethabong la phuthego. Ka nako e swanago, re tla šireletšwa le go matlafatšwa ka ditsela tše dintši bjalo ka ge re tla bona sehlogong se se latelago.

Na o a Gopola?

• Go ba le khutšo go bolela’ng?

• Re ka ba bjang le khutšo ge re dirišana le bao e sego Dihlatse?

• Ditsela tše dingwe tša go hlagolela khutšo ka lapeng ke dife?

• Bagolo ba ka kgothaletša khutšo bjang ka phuthegong?

[Dipotšišo tša Thuto]

[Seswantšho go letlakala 9]

Badira-khutšo ba phema moya wa go phagama

[Diswantšho go letlakala 10]

Bakriste ke badira-khutšo bodireding, ka gae le ka phuthegong