Emang Ka Botlalo Le Ka Kgodišego E Tiilego

Dikopano​—Go Matlafatšwa mo go Thabišago ga Borwarre bja Rena

JOSEPH F. RUTHERFORD wa nywaga e 50, a le boemong bjo bo fokolago bja tša maphelo ka morago ga nako ya mo e nyakilego go ba ngwaga a le kgolegong ka mo go sa swanelago, o be a šoma a thabile e le moamogedi wa baeng. O be a kuka disutukheise tša Bakriste-gotee le yena ka mafolofolo go di iša ka diphapošing tša bona tša hoteleng. Ba babedi bao e bego e le bagolegwa-gotee le yena​—Barutwana-gotee le yena ba Beibele​—ba aba dikabelo tša diphapoši go lešaba le legolo leo le bego le letetše marobalo. Boemo bo ile bja kgatlampana go ba go fihlela ka kua ga bošego-gare. Moya wa bona wa lethabo o fetela go bona ka moka. Go be go direga’ng?

Ngwaga e be e le wa 1919, gomme Barutwana ba Beibele (bao lehono ba tsebjago e le Dihlatse tša Jehofa) ba be ba boela sekeng go tšwa nakong ya tlaišo e šoro. Gore ba matlafatše borwarre bja bona lefsa, ba ile ba swara kopano kua Cedar Point, Ohio, U.S.A., go tloga ka September 1 go ya go 8, 1919. Letšatšing la mafelelo la kopano, lešaba leo le thabilego ka mo go tseneletšego la ba 7 000 le be le theeditše ka kelohloko ge Ngwanabo rena Rutherford a be a kgothatša yo mongwe le yo mongwe wa batla-kopanong ka mantšu a rego: ‘Le batseta ba Kgoši ya dikgoši le Morena wa marena, bao le tsebišago batho . . . mmušo wa letago wa Morena wa rena.’

Go batho ba Jehofa, dikopano di thomile morago kua nakong ya Isiraele ya bogologolo. (Ekisodo 23:​14-17; Luka 2:​41-43) Dipokano tše bjalo e be e le dinako tša lethabo, di thuša bohle bao ba lego gona gore ba bee megopolo ya bona Lentšung la Modimo. Ka mo go swanago, dikopano tša Dihlatse tša Jehofa mehleng yeno di ithekgile ka dikgahlego tša moya. Go batho ba elago dilo hloko e le ka kgonthe dipokano tše bjalo tša lethabo di nea bohlatse bjo bo sa ganetšwego bja gore Dihlatse di kopantšwe ke ditlemo tše matla tša borwarre bja Bokriste.

Maiteko a go ba go Tšona

Bakriste ba mehleng yeno ba lemoga gore dikopano tša bona ke dinako tša go itapološa moyeng le tša thuto yeo e lego Lentšung la Modimo. Ba lebelela diboka tše tše dikgolo e le thušo e nyakegago ya go ba thuša gore ba “[eme] ka botlalo le ka kgodišego e tiilego thatong ka moka ya Modimo.” (Ba-Kolose 4:​12, NW) Ka gona, Dihlatse di thekga dipokano tše ka pelo ka moka, di dira maiteko a magolo gore di be go tšona.

Go ba bangwe, go ba gona ga bona dikopanong tše bjalo go nyakega gore ba bontšhe tumelo le go fenya mapheko a swanago le dithaba. Ka mohlala, nagana ka Hlatse e tšofetšego ya Austria. Gaešita le ge a be a e-na le bolwetši bja swikiri gomme a nyaka go hlabelwa insulin letšatši le letšatši, o ile a kgonthišetša gore a be gona matšatšing ka moka a kopano ya selete nageng ya gabo. Kua India, lapa le legolo la Dihlatse leo le phelago bodiiding bjo šoro le ile la hwetša go nyakile go le thata kudu gore le be gona kopanong. Setho se sengwe sa lapa se ile sa nea thušo. O itše: “Ka ge ke be ke sa nyake go foša tiragalo, ke ile ka rekiša mangina a-ka a gauta e le gore ke lefelele leeto. Go be go swanetšwe go dirwe boikgafo bjo, ka ge go kopana gotee le diphihlelo di ile tša tiiša tumelo ya rena.”

Kua Papua New Guinea, sehlopha sa batho ba sa kolobetšwago, ba thabelago se be se ikemišeditše go ba gona kopanong ya selete motseng-mošate. Ba ile ba batamela monna wa motsaneng wa gabo bona yo a bego a e-na le koloi ya batho bohle gomme ba mmotšiša gore o be a tla ba nyaka bokae go ba iša kopanong. Ka ge tšhelete yeo a bego a e nyaka e be e feta seo ba bego ba e-na le sona, ba ile ba dira dithulaganyo tša go šoma legaeng la monna yoo, ba mpshafatša khitšhi ya gagwe. Ka gona ba ile ba kgona go fihla kopanong ya selete gomme ba holwa ke go ba gona lenaneong ka moka.

 Bokgole ga se bothata bjo bo sa fenywego go Dihlatse tša Jehofa ge di ikemišeditše go ba gona dikopanong. E le gore a be gona kopanong kua Lille, Fora, ka 1978, moemedi wa mofsa go tšwa Poland o ile a sepela dikhilomithara tše 1 200 ka paesekele ka matšatši a tshelelago. Selemong sa 1997, Dihlatse tše pedi go tšwa Mongolia di ile tša sepela leeto la dikhilomithara tše 1 200 gore di be gona pokanong ya Bokriste kua Irkutsk, Russia.

Borwarre bja Kgonthe bo a Šoma

Botee le borwarre tšeo di bonagatšwago ke Dihlatse dikopanong tša tšona ke tšeo di bonagalago gabotse go batho ba elago dilo hloko ba se nago kgethollo. Ba bantši ba kgahlišitšwe ke gore ga go na kgethollo gare ga batla-kopanong le gore go na le borutho bja kgonthe gare ga bao ba ka bago ba gahlana la mathomo.

Nakong ya kopano ya morago bjale ya ditšhaba-tšhaba kua Australia, mohlahli wa babogi ba lefelo yo a bego a sepela le baemedi ba kopano bao ba etetšego lebakeng la beke o ile a nyaka gore a dule le bona ka nako e oketšegilego e le gore a ka thabela segwera sa bona. A kgahlišitšwe ke lerato le botee bja bona, ga se a kgolwe gore ba kgona go tlwaelana gabotse gakaalo, ka ge bontši bja bona ba be ba sa tsebane. Ge go be go fihla nako ya gore a sepele, o ile a hlaboša lentšu gore ba mo theetše. A ba bitša “banabešo le dikgaetšedi,” o ile a thoma go ba leboga eupša ga a ka a fetša, ka gobane o ile a šitišwa ke maikwelo gomme a rothiša megokgo.

Ka 1997, Sri Lanka e ile ya swara kopano ya yona ya selete ya mathomo ya maleme a mararo lepatlelong le legolo. Lenaneo ka moka le ile la newa sammaletee ka Seisemane, se-Sinhalese le se-Tamil. Lefaseng la ditwantšhano tše di oketšegago tša semorafo, pokano e bjalo ya dihlopha tša maleme a mararo ga se ya ka ya tšwela pele e sa elwe hloko. Lephodisa le lengwe le ile la botšiša ngwanabo rena gore: “Ke bomang ba laolago kopano ye​—na ke ma-Sinhalese, ma-Tamil goba ke Maisemane?” Ngwanabo rena o ile a araba ka gore: “Ga go le se tee sa dihlopha tše seo se laolago kopano. Ka moka re dira se re le gotee.” Lephodisa le ile la se kgolwe. Ge dihlopha ka moka tša maleme a mararo di kopanela thapelong ya go phetha le go “Amene” e kopanetšwego yeo e ilego ya kwagala lepatlelong ka moka, batla-kopanong ba ile ba opa magofsi ka nako e telele. E nyakile e e-ba batheetši ka moka bao ba bego ba rothiša megokgo. Ee, dikopano ka kgonthe ke go matlafatšwa mo go thabišago ga borwarre bja rena.​—Psalme 133:1. *

[Mengwalo ya ka tlase]