Sepela ‘Tseleng ya go Loka’

MOPOROFETA Jesaya o itše: “Moloki mo rereng, Le re: O na le mahlatse! ka xobane ó tlo ja dikenyô tša medirô y’axwe.” Jesaya gape o itše: “Tsela ya moloki e lokile.” (Jesaya 3:​10; 26:7, NW) Ke mo go kwagalago gore ge e ba ditirišano tša rena di tla tšweletša dienywa tše dibotse, re swanetše go dira se se lokilego mahlong a Modimo.

Lega go le bjalo, re ka sepela bjang tseleng ya go loka? Re ka letela ditšhegofatšo dife ka go dira bjalo? Gomme ba bangwe ba ka holwa bjang ke go latela ga rena ditekanyetšo tša go loka tša Modimo? Go kgaolo 10 ya puku ya Beibele ya Diema, Kgoši Salomo wa Isiraele ya bogologolo o nea dikarabo dipotšišong tše ge a dutše a bontšha phapano magareng ga moloki le yo mobe. Ka go dira bjalo, o diriša polelwana “moloki goba baloki” ka makga a 13. Dipolelwana tše di tšwelela ka makga a senyane go ditemana 15 go ya go 32. Ka gona, go ela hloko Diema 10:​15-32 go tla itlhatsela e le mo go kgothatšago. *

Kgomarela ka go Tia Tayong

Salomo o šupa go bohlokwa bja go loka. O re: “Thoto ya mohumi ke sebô sa xaxwe; thšexo ya badiidi ké bosenyêxêlô. Thuô ya moloki e a mo phediša; khumô ya e mobe e iša sebeng.”​—Diema 10:​15, 16.

Mahumo a ka dira e le tšhireletšo malebana le maemo ao go sa kgodišegego ka wona bophelong go fo swana le ge toropo ya dibo e nea tekanyetšo ya tšhireletšego go bao ba dulago go yona. Le gona bodiidi e ka ba bjo bo senyago ge e ba go se na ditiragalo tšeo di dirago gore maemo a fetoge. (Mmoledi 7:​12, PK) Lega go le bjalo, kgoši e bohlale e ka ba e be e bolela ka kotsi e akaretšago bobedi bohumi le bodiidi. Mohumi a ka ba le tshekamelo ya go holofela ka mo go feletšego mahumo a gagwe, a nagana gore dilo tša gagwe tša bohlokwa ke “morakô o moxolo.”  (Diema 18:​11) Ka lehlakoreng le lengwe, modiidi a ka nagana ka tsela e fošagetšego gore bodiidi bja gagwe bo dira gore bokamoso bja gagwe bo se ke bja ba le kholofelo. Ka go rialo, bobedi ba palelwa ke go itirela leina le lebotse le Modimo.

Ka lehlakoreng le lengwe, go sa šetšwe gore moloki o na le mo gontši goba mo gonyenyane dilong tše di bonagalago, mediro ya gagwe ya go loka e lebiša bophelong. Bjang? Ge e le gabotse, o kgotsofetše ka seo a nago le sona. Ga a dumelele boemo bja gagwe bja tša ditšhelete bo šitišana le boemo bja gagwe bjo bobotse le Modimo. Go sa šetšwe gore ke mohumi goba modiidi, tsela ya moloki e mo tlišetša lethabo mo nakong ye le kholofelo ya bophelo bjo bo sa felego nakong e tlago. (Jobo 42:​10-13) Yo mobe ga a holege gaešita le ge a hwetša mahumo. Go e na le go thabela mohola wa ona wo o šireletšago le go phela ka go dumelelana le thato ya Modimo, o diriša mahumo a gagwe go godiša bophelo bja sebe.

Kgoši ya Isiraele e tšwela pele ka gore: “Mo-lôtôla-thutô ó swere tsela ya bophelô; pala-balai ó a timêla.” (Diema 10:​17) Seithuti se sengwe sa Beibele se šišinya gore temana ye e ka kwešišwa ka ditsela tše pedi. E nngwe mohlomongwe ke ya gore motho yo a theetšago keletšo le go phegelela go loka o tseleng ya bophelo, mola yo a sa amogelego keletšo a le kgole le tsela. Temana gape e ka bolela gore “yo a kwago keletšo o bontšha tsela ya bophelo [go ba bangwe ka gobane mohlala wa gagwe o mobotse o a ba hola], eupša le ge e le mang yo a hlokomologago phošollo o fapoša ba bangwe.” (Diema 10:​17, New International Version) Mabakeng ka bobedi, go bohlokwa gakaakang gore re kgomarele tayo gomme re se ke ra nyatša tsholo!

Bea Lerato Legatong la Lehloyo

Se se latelago Salomo o tšweletša seema sa dikarolo tše pedi se se nago le kgopolo e swanago, karolo ya bobedi e tiišetša ya mathomo. O re: “Melomo ya maaká e uta lehlôyô.” Ge e ba motho a hloile yo mongwe ka pelong ya gagwe gomme a go bipa ka mantšu a bose goba ka kgegeo, ke sehwirihwiri​—o na le “melomo ya maaká.” Go se kgoši ye e bohlale e oketša ka gore: “Mo-kwalakwatša-thsêlê ké yêna lešilo.” (Diema 10:​18) Go e na le go bipa lehloyo la bona, batho ba bangwe ba dira ditatofatšo tša maaka goba ba phatlalatša dipolelo tša maaka mabapi le yo ba mo hloilego. Se ke bošilo ka gobane pego ya go thomeletša ge e le gabotse ga e fetoše seo motho yoo a lego sona. Gomme motheetši yo a nago le temogo o tla lemoga go swarwa ka pelo gomme o tla tšeela fase mothomeletši. Ka gona yo a phatlalatšago pego e mpe o a ikgobatša.

Tsela ya go loka ga e retologele boforeng goba go go thomeletša. Modimo o boditše ba-Isiraele gore: “O se kê wa hlôya ngwan’eno pelong ya xaxo.” (Lefitiko 19:​17) Le gona Jesu o eleditše batheetši ba gagwe gore: “Ratang manaba a lena; ba ba Le roxaxo Le ba šexofatšê; ba ba Le hlôyaxo Le ba setšê; ba ba Le pharaxo le ba Le hlômaraxo Le ba rapêlêlê. Ké xôna xe Le tlo ba bana ba Tata-weno wa maxodimong.” (Mateo 5:​44, 45) Go kaone gakaakang go tlatša dipelo tša rena ka lerato go e na le lehloyo!

“Swara Molomo”

Ge e gatelela bohlokwa bja go laola leleme, kgoši e bohlale e re: “Boati bya phokô xa bo hloke diphapoxô; matsebe ó swara molomo.”​—Diema 10:19.

“Lešilo le atiša dipolêlô.” (Mmoledi 10:​14) Molomo wa lona o “thšoloxa tša bošilo.” (Diema 15:2) Se ga se bolele gore motho yo mongwe le yo mongwe yo a bolelago kudu ke lešilo. Eupša go bonolo gakaakang bakeng sa motho yo a bolelago kudu go ba mokero wa go phatlalatša lesebo le le gobatšago goba mabarebare! Botumo bjo bo senyegilego, maikwelo a bohloko, ditswalano tše di sentšwego gaešita le go gobala mmeleng gantši go ka tswalanywa le polelo ya bošilo. “Dipolelong tše dintši bošaedi ga bo hlokwe.” (Diema 10:​19, PK) Go feta moo, ke mo go tenago go ba le motho yo a nago le seo a ka se bolelago tabeng e nngwe le e nngwe. Anke re se ke ra ba le mantšu a mantši.

 Go feta go fo phema maaka, yo a swarago molomo wa gagwe o dira ka bohlale. O nagana pele a bolela. A tutuetšwa ke lerato la go rata ditsela tša Jehofa le kganyogo ya kgonthe ya go thuša magagabo, o ela hloko mafelelo a mantšu a gagwe go ba bangwe. Mantšu a gagwe ke a lerato le a botho. O naganišiša kamoo a ka dirago seo a se bolelago gore e be seo se ipiletšago le seo se nago le thušo. Mantšu a gagwe a bjalo ka “diapole tša gauta mogopjaneng wa silifera”​—ke a bokgoni le a nago le seriti ka dinako tšohle.​—Diema 25:​11, PK.

“E Lapološa ba Bantši”

Salomo o tšwela pele ka gore: “Leleme la moloki ké lehumô-humô; pelo ya e mobe ké lefêla.” (Diema 10:​20) Seo moloki a se bolelago se sekile​—bjalo ka silifera e sekilego ya maemo a godimo, e se nago ditšhila tše di tološitšwego. Se ka ntle le pelaelo ke sa therešo ka bahlanka ba Jehofa ge ba dutše ba aba tsebo e phološago bophelo ya Lentšu la Modimo go ba bangwe. Mohlahli wa bona yo Mogolo, Jehofa Modimo o ba rutile gomme ‘o ba file leleme la ba rutegilego gore ba tsebe go thekga yo a lapilego ka go bolela le yena.’ (Jesaya 30:​20; 50:4) Ka kgonthe, leleme la bona le bjalo ka silifera e sekilego ka ge le bolela therešo ya Beibele. Mantšu a bona ke a bohlokwa ka mo go sa felego gakaakang go ba dipelo tše di botegago go feta maikemišetšo a ba babe! Anke re fišegeleng go bolela ka Mmušo wa Modimo le mediro e makatšago ya Modimo.

Moloki ke tšhegofatšo go bao ba mo dikologilego. Salomo o tšwela pele ka gore: “Melomo ya e a lokilego e horiša ba bantši; eupša mašilo a hwa ka xo hloka tlhaloganyo.”​—Diema 10:​21, PK.

Ke bjang ‘moloki a horišago ba bantši’? Lentšu la Sehebere leo le dirišitšwego mo le fetišetša kgopolo ya “go diša.” (Diema 10:​21) Le na le kgopolo ya go hlahla gotee le go fepa, bjalo ka ge modiši wa mehleng ya bogologolo a be a hlokomela dinku tša gagwe. (1 Samuele 16:​11; Psalme 23:​1-3; Sefela sa Difela 1:7) Moloki o hlahla goba o eta pele ba bangwe go ya tseleng ya go loka, polelo ya gagwe e fepa batheetši ba gagwe. Ka baka leo, ba phela maphelo a thabišago le a kgotsofatšago kudu gomme ba ka ba ba amogela bophelo bjo bo sa felego.

Lega go le bjalo, go thwe’ng ka lešilo? Ka ge e le lešilo, le bontšha go se be le maikemišetšo a mabotse goba go se tshwenyege ka mafelelo a tsela ya gagwe. Motho yo bjalo o dira selo le ge e le sefe seo a se nyakago, a sa šetše ditla-morago tša sona. Lega go le bjalo, o hwetša dikotlo tša ditiro tša gagwe. Ge moloki a thuša ba bangwe go tšwela pele ba phela, lešilo le ka se ke la kgona gaešita le go ipoloka le phela.

Furalela Boitshwaro bjo bo Hlephilego

Semelo sa motho gantši se utollwa ke dilo tše a di ratago le tšeo a sa di ratego. Ge e bolela ntlha ye, kgoši ya Isiraele e re: “Lešilo le senya lè sêxa; monna wa thlaoloxanyô sa xaxwe ké bohlale.”​—Diema 10:23.

Ba bangwe ba lebelela boitshwaro bjo bo hlephilego bjalo ka papadi, gomme ba fo bo dira feela bakeng sa “go ithabiša.” Batho ba bjalo ba hlokomologa Modimo e le yo bohle ba swanetšego go ikarabela go yena, gomme ba dula ba sa nyake go lemoga go fošagala ga tsela ya bona. (Ba-Roma 14:​12) E ba bao ba gobogilego go bolela ka ntlha ya go nagana gore Modimo ga a bone diphošo tša bona. Ge e le gabotse, ka ditiro tša bona ba re: “Xa xo Modimo!” (Psalme 14:​1-3; Jesaya 29:​15, 16) A bošilo gakaakang!

 Ka lehlakoreng le lengwe, motho wa temogo o lemoga gore boitshwaro bjo bo hlephilego ga se papadi. O a tseba gore ga bo kgahliše Modimo le gore bo ka senya tswalano ya motho le yena. Boitshwaro bjo bo bjalo ke bošilo ka gobane bo amoga batho boitlhompho, bo thuba manyalo, bo senya bobedi monagano le mmele gomme bo lebiša go lahlegelweng ke tebogo bakeng sa dilo tša moya. Re dira ka bohlale ge re phema boitshwaro bjo bo hlephilego gomme ra hlagolela go rata bohlale bjalo ka kgaetšedi yo a rategago.​—Diema 7:4.

Aga Motheong o Lokilego

Salomo ge a šupa bohlokwa bja go aga bophelo bja motho motheong o swanetšego o itše: “Yo mobe ó wêlwa ke tše a bexo a di šia; moloki ó newa se a bexo a se belaêla. Ledimo xe le fetile, le e mobe ó ile; moloki ó thekxilwe, ó dula à le xona.”​—Diema 10:​24, 25.

Yo mobe a ka tšhoša ba bangwe kudu. Lega go le bjalo, mafelelong seo a se boifago se a mo tlela. Ka ge a hloka motheo melao-motheong ya go loka, o bjalo ka moago o sa tiiago wo o wišwago ke ledimo le matla. O ineela ka tlase ga kgateletšego. Ka lehlakoreng le lengwe, moloki o bjalo ka motho yo a dirago ka go dumelelana le mantšu a Jesu. Ke “monna yo bohlale, e a axilexo ngwakô wa xaxwe lwaleng.” Jesu o itše: “Xwa theoxa pula, xwa tla lefula, xwa tšutla ledimo, tša wêla ngwakô woo, ’me wa se we, ka xe o theilwe lwaleng.” (Mateo 7:​24, 25) Motho yo bjalo o tiile​—go nagana le ditiro tša gagwe di theilwe ka go tia melaong ya motheo ya Modimo.

Pele e tšwela pele ka phapano magareng ga yo mobe le moloki, kgoši e bohlale e nea temošo ya go lebanya eupša e bohlokwa. E re: “Bjalo ka binika menong le bjalo ka muši mahlong, sebodu se bjalo go bao ba se romago.” (Diema 10:​26, NW) Binika ga e kwagale gabotse menong. Esiti ya yona e babago e tšweletša tatso e bodila ka ganong yeo e ka dirago gore meno a motho a kwe a tsikitlega. Muši o dira mahlo gore a be bohloko bjo bo hlabago. Ka go dumelelana le se, motho le ge e le mang yo a thwalago sebodu goba a se dirišago e le moemedi o ikemišeditše go tshwenyega gomme o tla lahlegelwa ke ditšhelete.

“Tsela ya Jehofa ke Sephemo”

Kgoši ya Isiraele e tšwela pele: “Xo boifa Morêna xo phediša xalelele; nywaxa ya babe e a kxaotšwa. Kholofêlô ya baloki ké lethabô; tše ba babe ba di botilexo di a lôba.”​—Diema 10:​27, 28.

Moloki o hlahlwa ke poifo ya go boifa Modimo gomme o leka go thabiša Jehofa ka dikgopolo tša gagwe, mantšu le ditiro. Modimo o na le taba le yena gomme o phethagatša ditebelelo tša gagwe tša go loka. Lega go le bjalo, yo mobe o phela bophelo bja go se boife Modimo. Dikholofelo tša gagwe ka dinako tše dingwe di ka bonagala di phethagatšwa eupša ka nakonyana feela, ka gobane matšatši a gagwe gantši a fokotšwa ke bošoro goba bolwetši bjo bo tlišwago ke mokgwa wa gagwe wa go phela. Ka letšatši le a hwago ka lona dikholofelo tša gagwe ka moka di a fela.​—Diema 11:7.

Salomo o re: “Tsela ya Jehofa ke sephemo sa e a se nago bosodi; eupša go badirabobe ke tshenyego.” (Diema 10:​29, PK) Tsela ya Jehofa mo ga e šupe go tsela ya bophelo yeo re swanetšego go sepela go yona, eupša e šupa tseleng ya Modimo ya go dirišana le batho. Moše o itše: “Ké Yêna Lentšwê, yo tirô-phethexi, ka xe ’tsela tša’xwe tšohle di lokile.” (Doiteronomio 32:4) Ditsela tša Modimo tša go loka di bolela tšhireletšego bakeng sa baloki le tshenyego bakeng sa ba babe.

 Jehofa o itlhatsela e le sephemelo gakaakang bakeng sa batho ba gagwe! “Moloki xa a šuthe neng le neng; ba babe xa ba dule, naxa xa e be ya bôna. Molomo wa yo boló o hloxa bohlale; leleme la dithsêlê le tla lôba. Melomo ya yo boló e tseba tše di thabišaxo, ya babe ké ya dithsêlê.”​—Diema 10:​30-32.

Ka ntle le pelaelo baloki ba a atlega gomme ba šegofatšwa ka baka la go sepela tseleng ya go loka. Ka kgonthe, “khumišô ké dithšexofatšô tša Morêna; xa e tlale ka xo itapiša.” (Diema 10:​22) Ka gona, ka mehla anke re kgonthišegeng gore re dira ka go dumelelana le melao ya motheo ya Modimo. Gape a re swareng melomo ya rena gomme re diriše maleme a rena bakeng sa go aga ba bangwe ka therešo e phološago bophelo ya Lentšu la Modimo gomme re ba hlahle go ya tseleng ya go loka.

[Mengwalo ya ka tlase]

[Seswantšho go letlakala 26]

Leleme le ka ba bjalo ka “lehumô-humô”