Tšhegofatšo ya Jehofa e a re Humiša
Tšhegofatšo ya Jehofa e a re Humiša
“Khumišô ké dithšexofatšô tša Morêna; xa e tlale ka xo itapiša.”—Diema 10:22.
1, 2. Ke ka baka la’ng lethabo le sa tswalanywe le mahumo a dilo tše di bonagalago?
GO PHEGELELA dilo tše di bonagalago go buša maphelo a ba dimilione lehono. Eupša na dilo tše di bonagalago di ba dira gore ba thabe? The Australian Women’s Weekly e re: “Ga ke gopole nako yeo ka yona batho ba ilego ba šulafalelwa ke tsela ya bophelo go swana le gona bjale.” E oketša ka gore: “Ke kgakanego. Re botšwa gore Australia e boemong bjo bobotse bja tša boiphedišo, gore le ka mohla bophelo ga se bja ka bja ba bjo bokaone. . . . Go sa dutše go le bjalo, go letela tše mpe ke mo go atilego setšhabeng. Banna le basadi ka mo go swanago ba kwa gore go na le selo seo se hlaelelago maphelong a bona eupša ga ba kgone go hlalosa gore ke eng.” Mangwalo a nepile gakaakang ge a bontšha gore lethabo goba bophelo ga di tšwe dilong tšeo re nago le tšona!—Mmoledi 5:10; Luka 12:15.
2 Beibele e ruta gore lethabo le legolo kudu le tšwa tšhegofatšong ya Modimo. Tabeng ye, Diema 10:22 e re: “Khumišô ké dithšexofatšô tša Morêna; xa e tlale ka xo itapiša.” Go itapiša gantši go bakwa ke go nyaka mahumo a dilo tše di bonagalago ka megabaru. Ka mo go swanelegago, moapostola Paulo o lemošitše gore: “Xobane ba ba rataxo xo huma ba wêla melekong le mereong; ba ya le dikxanyoxô tše ntši tša bošilo tše di xobošaxo motho tša mo senya, tša mo tekesetša thsenyexong le tahlexong. Xobane mexabaru ké wôna modu wa bobe ka moka; xomme ba bangwê ba xo kêkêla xo tšôna ba aroxile tumêlô ba ikôbêla mehlakô e mentši.”—1 Timotheo 6:9, 10.
3. Ke ka baka la’ng bahlanka ba Modimo ba lebeletšana le diteko?
3 Ka lehlakoreng le lengwe, ditšhegofatšo tše di se nago bohloko di tlela bohle bao ba ‘tšwelago pele ba theetša lentšu la Jehofa.’ (Doiteronomio 28:2, NW) Lega go le bjalo, ba bangwe ba ka botšiša gore ‘Ge e ba go se na bohloko tšhegofatšong ya Jehofa, ke ka baka la’ng ba bantši ba bahlanka ba Modimo ba tlaišega?’ Beibele e utolla gore diteko tša rena di dumeletšwe ke Modimo eupša ge e le gabotse di tšwa go Sathane, tshepedišong ya gagwe e kgopo le tlhago ya rena ya go se phethagale. (Genesi 6:5; Doiteronomio 32:4, 5; Johane 15:19; Jakobo 1:14, 15) Jehofa ke mothopo wa “ ’Neô tšohle tše botse, le ’mphô tšôhle.” (Jakobo 1:17) Ka gona, le ka mohla ditšhegofatšo tša gagwe di ka se bake bohloko. Ka gona anke re eleng hloko tše dingwe tša dimpho tša Modimo tše di phethagetšego.
Lentšu la Modimo—Mpho ya Bohlokwa Kudu
4. Ke tšhegofatšo efe le mpho e bohlokwa yeo batho ba Jehofa ba e thabelago ‘lebakeng le la bofelo’?
4 Mabapi le “lebaka la bofêlô,” boporofeta bja Daniele bo re: ‘Tsebo e tlo ata.’ Lega go le bjalo, se se ile sa kgonthišetšwa ke mantšu a rego: “xa xo e mobe e a kaxo kwešeša ditaba tšeo; xo tlo kwešeša ba ba naxo le thlaoloxanyô.” (Daniele 12:4, 10) Nagana ka seo! Lentšu la Modimo—diporofeto ka mo go kgethegilego—di bontšhwa ka bohlale bjo bjalo bja Modimo gore ba babe ba ka se ke ba di kwešiša e le ka kgonthe, gaešita le ge batho ba Jehofa ba di kwešiša. Morwa wa Modimo o rapetše ka gore: “Ke a Xo leboxa Wene Tata Mong’a lexodimo le lefase xe tšeo O di fihletše ba bohlale le ba thlaloxanyô, ’me wa di utollêla ba e lexo bana.” (Luka 10:21) Ke tšhegofatšo e kaakang go ba le mpho e bohlokwa kudu ya Lentšu la Modimo le le ngwadilwego, Beibele le go ba gare ga bao Jehofa a ba neilego temogo ya go lemoga dilo tša moya!—1 Ba-Korinthe 1:21, 27, 28; 2:14, 15.
5. Bohlale ke eng, gomme re ka bo hwetša bjang?
5 Re ka be re se na temogo ya moya ka mo go feletšego ge e be e se ka “bohlale byo bo tšwaxo xodimo.” (Jakobo 3:17) Bohlale ke bokgoni bja go diriša tsebo le kwešišo bakeng sa go rarolla mathata, go phema dikotsi, go fihlelela dipakane goba go nea keletšo e kwagalago. Re hwetša bjang bohlale bja Modimo? Diema 2:6 e re: “Bohlale motho ó bo newa ke Modimo; tsebô le temoxô di tšwa molomong wa xaxwe.” Ee, Jehofa o tla re šegofatša ka bohlale ge e ba re phegelela go bo rapelela, bjalo ka ge a neile Kgoši Salomo “pelo e bohlale ya temoxô.” (1 Dikxoši 3:11, 12; Jakobo 1:5-8) Bakeng sa go hwetša bohlale, gape re swanetše go tšwela pele re theetša Jehofa ka go ithuta ka mehla le go diriša Lentšu la gagwe.
6. Ke ka baka la’ng e le tsela ya bohlale go diriša melao le melao ya motheo ya Modimo maphelong a rena?
6 Mehlala e megolo ya bohlale bja Modimo e hwetšwa ka melaong le melaong ya motheo ya Beibele. Ye e re hola ka tsela e nngwe le e nngwe—mmeleng, monaganong, maikwelong le moyeng. Mopsalme o opetše ka mo go swanelegago gore: “Molaô wa Morêna xa o na bosodi, o lapološa môya. Bohlatse bya Morêna bo a bôtêxa, bo hlalefiša a se naxo maanô. ’Taêlô tša Morêna di lokile, di thabiša pelo. Ditayô tša Morêna di sekile, di boniša mahlô. Xo šia Morêna ké bothakxa, bo tiile neng le neng. Dikahlolô tša Morêna ké therešô, xa di na mo di hlaolaxo. Di kxanyoxêxa xo fetiša dixauta le bontši bya xauta ye e taxilexo.”—Psalme 19:7-10; 119:72.
7. Ke eng seo se tlišwago ke go hlokomologa ditekanyetšo tša Modimo tša go loka?
7 Ka lehlakoreng le lengwe, bao ba hlokomologago ditekanyetšo tša Modimo tša go loka ga ba hwetše lethabo le tokologo tšeo ba di tsomago. Kapejana, ba lemoga gore Modimo ga a kwerwe, ka gobane motho o tlo buna se a se bjalago. (Ba-Galatia 6:7) Ba dimilione bao ba hlokomologago melao ya motheo ya Beibele ba buna mafelelo a bjalo a nyamišago a bjalo ka boimana bjo bo sa nyakegego, malwetši a šiišago goba ditemalelo tše di fokodišago. Ka ntle le ge ka go itshola ba fetoša tsela ya bona bophelong, tsela ya bona mafelelong e tla ba lebiša lehung gomme mohlomongwe go fedišwa ke letsogo la Modimo.—Mateo 7:13, 14.
8. Ke ka baka la’ng barati ba Lentšu la Modimo ba thabile?
8 Lega go le bjalo, bao ba ratago Lentšu la Modimo gomme ba le diriša ba tlelwa ke ditšhegofatšo tše di humilego ga bjale le nakong e tlago. Ba na le lebaka la go ikwa ba lokolotšwe ke molao wa Modimo, ba thabile e le ka kgonthe gomme ba letetše ka go fagahla nako ya ge ba tla lokollwa sebeng le mafelelong a sona a bolayago. (Ba-Roma 8:20, 21; Jakobo 1:25) Kholofelo ye e kgonthišeditšwe ka gobane e ithekgile ka mpho e lerato kudu ya Modimo bakeng sa batho—sehlabelo sa topollo sa Morwa wa gagwe a nnoši Jesu Kriste. (Mateo 20:28; Johane 3:16; Ba-Roma 6:23) Mpho e bjalo e kgolo e kgonthišetša go tsenelela ga lerato la Modimo bakeng sa batho gomme e kgonthišetša ditšhegofatšo tše di sa felego bakeng sa bohle bao ba tšwelago pele ba theetša Jehofa.—Ba-Roma 8:32.
Re Leboga Mpho ya Moya o Mokgethwa
9, 10. Mpho ya Jehofa ya moya o mokgethwa e re hola bjang? Nea mohlala.
9 Mpho e nngwe ya Modimo e lerato yeo re swanetšego go e leboga ke moya wa gagwe o mokgethwa. Ka letšatši la Pentekoste ya 33 C.E., moapostola Petro o ile a kgothaletša mašaba a bego a le gona kua Jerusalema gore: “Sokoloxang; ka moka Le kolobetšwê Leineng la Jesu Kriste, e bê xôna xo lebalêlwa dibe; ké mo Le tl’o xo fiwa neô ya Môya-mokxêthwa.” (Ditiro 2:38) Lehono, Jehofa o nea moya o mokgethwa go bahlanka ba gagwe ba ineetšego bao ba o rapelelago le bao ba nyakago go dira thato ya gagwe. (Luka 11:9-13) Mehleng ya bogologolo, matla a a magolo legohleng—moya o mokgethwa wa Modimo, goba matla a šomago—a matlafaditše banna le basadi ba tumelo, go akaretša le Bakriste ba pele. (Sakaria 4:6; Ditiro 4:31) A ka re direla se se swanago, gaešita le ge re ka lebeletšana le mapheko a magolo goba ditlhohlo bjalo ka batho ba Jehofa.—Joele 2:28, 29.
10 Nagana ka mohlala wa Laurel, yo a ilego a hlaselwa ke polio gomme a phela ka gare ga sethuša-go-hema ka nywaga e 37. * Go sa šetšwe maemo a gagwe ao a lekago kudu, o ile a hlankela Modimo ka phišego go fihla lehung la gagwe. Go theoša le nywaga, tšhegofatšo ya Jehofa e humilego e ile ya tlela Laurel. Ka mohlala, o ile a kgona go thuša batho ba 17 go fihlelela tsebo e nepagetšego ya therešo ya Beibele, gaešita le ge a be a tswaleletšwe ka motšheneng wa gagwe ka diiri tše 24 ka letšatši! Boemo bja gagwe bo re gopotša ka mantšu a moapostola Paulo: “Xe ke fôkôla ké mo ke naxo le matla.” (2 Ba-Korinthe 12:10) Ee, katlego le ge e le efe yeo re ka bago le yona go boleleng ditaba tše dibotse ga e tšwe bokgoning bja rena le matla, eupša e tšwa thušong ya Modimo ka moya o mokgethwa woo a o neago bao ba tšwelago pele ba theetša lentšu la gagwe.—Jesaya 40:29-31.
11. Moya wa Modimo o tšweletša dika dife go bao ba aparago “motho e mofsa”?
11 Ge e ba re e-kwa Modimo, moya wa gagwe o tšweletša ka go rena dika tša lerato, lethabo, khutšo, go se fele pelo, botho, go loka, tumelo, bonolo le boitshwaro. (Ba-Galatia 5:22, 23, NW) ‘Dienywa tše tša moya’ ke karolo ya “motho e mofsa” yoo Bakriste ba mo aparago sebakeng sa mekgwa le ge e le efe e gagolago e swanago le ya dibata yeo ba ka bego ba ile ba e bontšha nakong e fetilego. (Ba-Efeso 4:20-24; Jesaya 11:6-9) Sa bohlokwa kudu ke seenywa sa lerato, “tlêmô ya botlalô.”—Ba-Kolose 3:14.
Lerato la Bokriste—Mpho Yeo re Swanetšego go e Thabela
12. Ke bjang Thabitha le Bakriste ba bangwe ba lekgolong la pele la nywaga ba ilego ba bontšha lerato?
12 Lerato la Bokriste ke mpho e nngwe e šegofaditšwego e tšwago go Jehofa—yeo re e thabelago ka mo go swanetšego. Le bušwa ke molao wa motheo, eupša ke leo le humilego ka maikwelo a borutho moo le gogelago badumedi kgaufsi gotee go feta kamoo dikgokagano tša nama di ka dirago. (Johane 15:12, 13; 1 Petro 1:22) Ka mohlala, ela hloko Thabitha, mosadi yo mobotse wa Mokriste wa lekgolong la pele la nywaga. “Medirô e mebotse ya xaxwe e be e le e mentši; le xo hlallêla badiidi ka kxauxêlô è le xo xontši,” kudu-kudu bakeng sa bahlologadi ka phuthegong. (Ditiro 9:36) Basadi ba ba ka be ba be ba na le ba leloko, eupša Thabitha o be a nyaka go dira seo a ka se kgonago go thuša le go ba kgothatša. (1 Johane 3:18) A mohlala o mobotse gakaakang woo o beilwego ke Thabitha! Lerato la borwarre le ile la tutuetša Perisika le Akwila go “neêla dihlôxô tša bôná” bakeng sa Paulo. Lerato gape le ile la tutuetša Epafora, Luka, Onesiforo le ba bangwe go thuša moapostola ge a be a golegilwe kua Roma. (Ba-Roma 16:3, 4; 2 Timotheo 1:16; 4:11; Filemone 23, 24) Ee, Bakriste ba mohuta woo lehono ba “na le leratanô,” mpho e šegofaditšwego go tšwa go Modimo yeo e ba hlaolago e le barutiwa ba therešo ba Jesu.—Johane 13:34, 35.
13. Re ka bontšha bjang gore re leboga ka mo go tseneletšego borwarre bja rena bja Bokriste?
13 Na o leboga lerato leo le bontšhwago ka phuthegong ya Bokriste? Na o leboga borwarre bja rena bja moya bja lefaseng ka bophara? Tše le tšona ke dimpho tše di šegofaditšwego le tše di humišago tše di tšwago godimo. Re ka bontšha bjang gore re di tšeela godimo? Ka go direla Modimo tirelo e kgethwa, ka go ba le karolo dibokeng tša Bokriste le ka go bontšha lerato le dienywa tše dingwe tša moya wa Modimo.—Ba-Filipi 1:9; Ba-Hebere 10:24, 25.
“Dimpho Tšeo e Lego Banna”
14. Ke eng seo se nyakegago go Mokriste ge e ba a tla hlankela e le mogolo goba mohlanka wa bodiredi?
14 Banna ba Bakriste bao ba kganyogago go hlankela barapedi-gotee le bona e le bagolo goba bahlanka ba bodiredi ba na le pakane e botse. (1 Timotheo 3:1, 8) Bakeng sa go swanelegela ditokelo tše, ngwanabo rena o swanetše go ba monna yo a sekametšego dilong tša moya, yo a tsebago Mangwalo kudu le yo a fišegago bodireding bja tšhemo. (Ditiro 18:24; 1 Timotheo 4:15; 2 Timotheo 4:5) O swanetše go bontšha boikokobetšo, boipoetšo le go se fele pelo, ka gobane ditšhegofatšo tša Modimo ga di tlele batho bao ba ikgodišago, bao ba ikgogomošago le bao ba ratago maemo. (Diema 11:2; Ba-Hebere 6:15; 3 Johane 9, 10) Ge e ba a nyetše, o tla swanela ke go ba hlogo e lerato ya lapa yeo e kgonago go laola gabotse ba lapa la gagwe ka moka. (1 Timotheo 3:4, 5, 12) Ka baka la ge a tšeela godimo mahumo a moya, monna yo bjalo o tla amogela tšhegofatšo ya Jehofa.—Mateo 6:19-21.
15, 16. Ke bomang bao ba itlhatselago e le “dimpho tšeo e lego banna”? Nea mehlala.
15 Ge bao ba hlankelago e le bagolo ka phuthegong ba katana bjalo ka baebangedi, badiši le barutiši ba re nea mabaka a kwagalago a go thabela ‘dimpho tše bjalo e lego banna.’ (Ba-Efeso 4:8, 11, NW) Bao ba holwago ke tirelo ya bona e lerato ga se ka mehla ba ka bontšhago tebogo ya bona, eupša Jehofa o bona sohle seo bagolo ba botegago ba se dirago. A ka se ke a lebala lerato leo ba le bontšhago bakeng sa leina la gagwe ka go direla batho ba gagwe.—1 Timotheo 5:17; Ba-Hebere 6:10.
16 Ela hloko taba ya mogolo yo mongwe yo a šomago ka thata yo a ilego a etela mosetsana wa Mokriste yo a bego a le kgaufsi le go buiwa bjoko. Mogwera wa lapa o ngwadile gore: “E be e le yo botho, yo a thekgago le yo a hlokomelago. O ile a kgopela tumelelo ya go rapela Jehofa le rena. Ge a dutše a rapela, tate [yo e sego yo mongwe wa Dihlatse tša Jehofa] o ile a lla, gomme yo mongwe le yo mongwe o ile a lla ka phapošing ya sepetlele. Thapelo ya mogolo yoo e be e le lerato gakaakang, gomme Jehofa o be a le lerato gakaakang bakeng sa go mo romela ka nako yeo!” Molwetši yo mongwe wa Hlatse o ile a bolela ka bagolo bao ba ilego ba mo etela gore: “Ge ba be ba e-tla kgaufsi le malao a-ka lefelong la balwetši bao ba babjago kudu, ke be ke tseba gore selo le ge e le sefe seo se ka diregago go tloga ka nako yeo go ya pele, ke be ke tla se kgotlelela. Ke ile ka thoma go tia matla gomme ka ba le khutšo.” Na motho le ge e le ofe a ka reka go kgomega mo go bjalo go lerato? Le gatee! Ke mpho e tšwago go Modimo, yeo e hwetšagalago ka phuthegong ya Bokriste.—Jesaya 32:1, 2.
Mpho ya Bodiredi bja Tšhemo
17, 18. (a) Ke mpho efe ya tirelo yeo Jehofa a dirilego gore e hwetšagale go batho ba gagwe ka moka? (b) Modimo o neile thušo efe e le gore re ka phetha bodiredi bja rena?
17 Ga go na tlhompho e kgolo kudu e ka newago motho go feta ya go hlankela Jehofa, yo Godimo-dimo. (Jesaya 43:10; 2 Ba-Korinthe 4:7; 1 Petro 2:9) Lega go le bjalo, tokelo ya go ba le karolo bodireding bja phatlalatša e bulegetše bohle—ba banyenyane le ba bagolo, banna le basadi—bao ba nago le kganyogo ya kgonthe ya go hlankela Modimo. Na o diriša mpho ye e bohlokwa? Ba bangwe ba ka gogela morago ka gobane ba ikwa ba sa swanelege, eupša gopola gore Jehofa o nea bao ba mo hlankelago moya o mokgethwa gomme o lokiša le ge e le kae moo re ka bago re hlaelelwa.—Jeremia 1:6-8; 20:11.
18 Jehofa o neile bahlanka ba gagwe ba ikokobeditšego modiro wa go bolela ka Mmušo, e sego batho bao ba sekamelago go ikgantšheng gomme ba ithekga ka bokgoni bja bona ka noši. (1 Ba-Korinthe 1:20, 26-29) Batho ba ikokobeditšego le ba ipoeditšego ba lemoga mafokodi a bona gomme ba ithekga ka thušo ya Modimo ge ba tšea karolo bodireding bja tšhemo. Gape ba thabela thušo ya moya yeo a e neago ka “molaki e a bôtêxaxo yo bohlale.”—Luka 12:42-44; Diema 22:4.
Bophelo bjo bo Thabišago bja Lapa—Mpho e Botse
19. Ke dintlha dife tšeo di lebišago katlegong go godišeng bana?
19 Lenyalo le bophelo bja lapa bjo bo thabišago ke dimpho tše di tšwago go Modimo. (Ruthe 1:9; Ba-Efeso 3:14, 15) Bana le bona ke “neô ya Morêna” e bohlokwa, ba thabiša batswadi bao ka katlego ba tsenyago dika tša Modimo ka go bona. (Psalme 127:3) Ge e ba o le motswadi, tšwela pele o theetša lentšu la Jehofa ka go tlwaetša bana ba gago go ya ka Lentšu la gagwe. Bao ba dirago bjalo ba kgodišegile ka go hwetša thekgo ya Jehofa le tšhegofatšo e humilego.—Diema 3:5, 6; 22:6; Ba-Efeso 6:1-4.
20. Ke eng seo se ka thušago batswadi bao bana ba bona ba furalelago borapedi bja therešo?
20 Go sa šetšwe maiteko a potego a batswadi bao ba boifago Modimo, mohlomongwe ba bangwe ba bana ba bona ba kgetha go furalela borapedi bja therešo ge ba gola. (Genesi 26:34, 35) Se e ka ba seo se gobatšago maikwelong go batswadi. (Diema 17:21, 25) Lega go le bjalo, go e na le go lahlegelwa ke kholofelo ka moka, e ka ba mo go thušago go bona go gopola seswantšho sa Jesu sa morwa wa lehlaswa. Gaešita le ge morwa yoo a ile a tloga gae gomme a tšea tsela e arogilego, ka morago o ile a boela ntlong ya tatagwe, yo a ilego a mo amogela ka mokgwa wa lethabo le wa lerato. (Luka 15:11-32) Le ge go ka direga eng, batswadi ba botegago ba Bakriste ba ka kgonthišega ka kwešišo ya Jehofa, go kgomega ga gagwe ka lerato le thekgo ya gagwe e sa palelwego.—Psalme 145:14.
21. Re swanetše go theetša mang gomme ka baka la’ng?
21 Ka gona, anke yo mongwe le yo mongwe wa rena a hlahlobe seo e lego sa bohlokwa maphelong a rena. Na re nyaka ka phišego dilo tše di bonagalago ka bontši, e lego seo se ka re tlišetšago bohloko gotee le go malapa a rena? Goba na re phegelela ‘dineo tše dibotse le dimpho tše di phethagetšego’ tše di tšwago go “Ra-dietša”? (Jakobo 1:17) Sathane e lego “rra-xomoaketši” o nyaka gore re šomele mahumo a dilo tše di bonagalago gomme re lahlegelwe ke bobedi lethabo le bophelo. (Johane 8:44; Luka 12:15) Lega go le bjalo, Jehofa o na le taba le rena e le ka kgonthe gomme o re kganyogela tše kaone kudu. (Jesaya 48:17, 18) Ka gona, a re tšweleng pele re theetša Tatago rena yo lerato wa legodimong gomme ka mehla re mo “thabêlê.” (Psalme 37:4) Ge e ba re tšwela pele ka tsela e bjalo, dimpho tša Jehofa tše bohlokwa kudu le ditšhegofatšo tše dintši di tla re humiša—gomme ka ntle le bohloko le ge e le bofe.
[Mengwalo ya ka tlase]
^ ser. 10 Bona Phafoga! (ya Seisemane) ya January 22, 1993, matlakala 18-21.
Na o a Gopola?
• Lethabo le legolo kudu le ka hwetšwa kae?
• Tše dingwe tša dimpho tšeo Jehofa a di neago batho ba gagwe ke dife?
• Ke ka baka la’ng bodiredi bja tšhemo e le mpho?
• Batswadi ba ka dira eng bakeng sa go hwetša tšhegofatšo ya Modimo ge ba godiša bana ba bona?
[Dipotšišo tša Thuto]
[Seswantšho go letlakala 16]
Na o bontšha tebogo bakeng sa mpho ya Modimo ya Lentšu la gagwe le le ngwadilwego?
[Seswantšho go letlakala 17]
Go sa šetšwe maemo a thata kudu, Laurel Nisbet o ile a hlankela Modimo ka mafolofolo
[Diswantšho go letlakala 18]
Ka go swana le Thabitha, Bakriste ba mehleng yeno ba tsebja gabotse ka ditiro tša bona tša lerato
[Seswantšho go letlakala 19]
Bagolo ba Bakriste ba kgomega ka lerato bakeng sa badumedi-gotee le bona