Dipotšišo tše Tšwago go Babadi

‘Go khutša’ moo go bolelwago ka gona go Ba-Hebere 4:​9-11 ke eng, gomme ke bjang motho ‘a tsenago khutšong yeo’?

Moapostola Paulo o ngwaletše Bakriste ba ba-Hebere ba lekgolong la pele la nywaga gore: “Xo sa na le khutšô ya Sabatha ye e šaletšexo sethšaba sa Modimo. Xobane e a tsenexo khutšong yeo ya Modimo, le yêna ó khutša à phethile medirô ya xaxwe byalo ka Modimo xe a khutšitše à phethile ya xaxwe. A re phêxêleleng-xê xo tsêna khutšong yeo.”​—Ba-Hebere 4:​9-11.

Ge Paulo a be a bolela ka go khutša ga Modimo modirong wa Gagwe, go bonagala a be a bolela ka seo se boletšwego go Genesi 2:2, moo re balago gore: “Ka letšatši la xo šupa Modimo a ba a phethile modirô wa xaxwe wo a o dirilexo; ’me ka ’tšatši la xo šupa a khutša à feditše modirô wa xaxwe ka moka wo a o dirilexo.” Ke ka baka la’ng Jehofa a ile a tšwela pele ‘go khutša ka letšatši la go šupa’? Ka ntle le pelaelo e be e se ka baka la gore o be a nyaka go khutša go “modirô wa xaxwe ka moka wo a o dirilexo.” Temana e latelago e nea seetša: “ ’Me ’tšatši la xo šupa Modimo ó le šexofaditše a le dira le lekxêthwa, ka xobane ka lôna ó khutšitše à feditše modirô wa xaxwe ka moka wa thlôlô wo a o dirilexo.”​—Genesi 2:3; Jesaya 40:​26, 28.

“ ’Tšatši la go šupa” le be le fapane le letšatši le ge e le lefe la matšatši a tshela a fetilego ka gore e be e le letšatši leo Modimo a le šegofaditšego gomme a le dira le lekgethwa, e lego gore ke letšatši leo le beetšwego ka thoko goba leo le neetšwego morero o kgethegilego. Morero woo e be e le ofe? Pejana, Modimo o be a ile a utolla morero wa gagwe mabapi le batho le lefase. Modimo o ile a botša monna wa pele gotee le mosadi wa gagwe gore: “Tswalang Le atê, tlalang lefase, Le le fenyê Le bušê ’hlapi tša lewatlê le ’nonyana tša xodimo, le nyabanyaba yohle ya diphedi mó ’faseng.” (Genesi 1:​28) Gaešita le ge Modimo a be a neile batho le lefase mathomo a phethagetšego, go be go tla tšea nako gore lefase ka moka le fenywe gomme le fetošwe paradeise e tletšego lapa la batho leo le phethagetšego, bjalo ka ge Modimo a be a rerile. Ka gona, ka “ ’tšatši la xo šupa” Modimo o ile a khutša medirong ya popo ya lefaseng e le gore a dumelele tšeo a šetšego a di bopile gore di gole ka go dumelelana le thato ya gagwe. Mafelelong a ‘letšatši’ leo, tšohle tšeo Modimo a bego a di rerile di be di tla fetoga tša kgonthe. Go khutša moo go tla tšea lebaka le lekaaka’ng?

Ge re boela morago polelong ya Paulo go ba-Hebere, re lemoga gore o ile a bontšha gore “xo sa na le khutšô ya Sabatha ye e šaletšexo sethšaba sa Modimo,” gomme o ile a kgothaletša Bakriste-gotee le yena gore ba dire sohle seo ba ka se kgonago bakeng sa go “tsêna khutšong yeo.” Se se bontšha gore ge Paulo a be a ngwala mantšu ao, “ ’tšatši la xo šupa” la go khutša ga Modimo leo le bego le thomile nywaga e 4 000 pejana, le be le sa dutše le tšwela pele. Le ka se ke la fela go fihlela ge morero wa Modimo mabapi le batho le lefase o phethagetše ka mo go feletšego bofelong bja Pušo ya Nywaga e Sekete ya Jesu Kriste, yoo e lego ‘Mong wa letšatši la sabatha.’​—Mateo 12:8; Kutollo 20:​1-6; 21:​1-4.

A e-na le tebelelo yeo e botse, Paulo o ile a hlalosa kamoo motho a ka tsenago khutšong ya Modimo ka gona. O ngwadile gore: “Xobane e a tsenexo khutšong yeo ya Modimo, le yêna ó khutša à phethile medirô ya xaxwe.” Se se re botša gore gaešita le ge ba bile le mathomo a phethagetšego, batho ka kakaretšo ga se ba tsena khutšong ya Modimo. Se e bile ka gobane Adama le Efa ga se ba ba khutšong ya Modimo ka lebaka le letele ka “ ’tšatši la xo šupa” ka go amogela tokišetšo ya gagwe bakeng sa bona. Go e na le moo, ba ile ba rabela gomme ba nyaka go ipuša ka ntle le Modimo. Ge e le gabotse, ba ile ba sepedišana le maano a Sathane a dilo go e na le go amogela tlhahlo ya Modimo e lerato. (Genesi 2:​15-17) Ka lebaka leo, ba ile ba lahlegelwa ke tebelelo ya go phela ka mo go sa felego lefaseng la paradeise. Go tloga ka nako yeo go ya pele, batho ka moka ba ile ba tsena bokgobeng bja sebe le lehu.​—Ba-Roma 5:​12, 14.

Borabele bja batho ga se bja ka bja thibela morero wa Modimo. Letšatši la gagwe la go khutša le tšwela pele. Lega go le bjalo, Jehofa o dirile tokišetšo e lerato​—topollo​—ka Morwa wa gagwe, Jesu Kriste, e le gore bohle bao ba e amogelago motheong wa tumelo ba ka lebelela pele go lokollwa le go khutša morwalong wa sebe le lehu. (Ba-Roma 6:​23) Ke ka baka leo Paulo a ilego a kgothaletša Bakriste-gotee le yena go ‘khutša medirong ya bona.’ Ba be ba swanetše go amogela tokišetšo ya Modimo bakeng sa phološo gomme ba se ke ba leka go šomela bokamoso bja bona ka tsela ya bona ka noši, bjalo ka ge  Adama le Efa ba dirile. Gape ba be ba swanetše go phema go phegelela mediro ya bona ka noši ya go itokafatša.

Go beela ka thoko mediro ya motho ya boithati goba ya letšatši le letšatši bakeng sa go dira thato ya Modimo ka kgonthe e tla ba mo go lapološago le mo go khutšišago. Jesu o ile a ntšha taletšo ye: “Tlang xo Nna bohle ba Le lapišitšwexo, ba Le imêlwaxo; Nna ke tlo le khutšiša. Le ithweše yoko ya-ka, Le rutwê ke Nna; xobane ke yo boló le wa pelo e kokobetšexo; ’me Le tlo hwetša khutšo ya meôya ya lena. Xobane yoko ya-ka xa e robe, morwalo wa-ka ké o bohwêfê.”​—Mateo 11:​28-30.

Poledišano ya Paulo ka khutšo ya Modimo le kamoo motho a ka tsenago go yona ka ntle le pelaelo e be e le mothopo wa kgothatšo go Bakriste ba ba-Hebere kua Jerusalema, bao ba kgotleletšego tlaišo e kgolo le go kwerwa bakeng sa tumelo ya bona. (Ditiro 8:1; 12:​1-5) Ka mo go swanago, mantšu a Paulo e ka ba mothopo wa kgothatšo go Bakriste lehono. Ka go lemoga gore phethagatšo ya kholofetšo ya Modimo ya go tliša lefase la paradeise lefaseng ka tlase ga Mmušo wa gagwe wa go loka e kgaufsi kudu, le rena re swanetše go khutša medirong ya rena gomme re dire sohle seo re ka se kgonago bakeng sa go tsena khutšong yeo.​—Mateo 6:​10, 33; 2 Petro 3:13.

[Diswantšho go letlakala 31]

Kholofetšo ya Modimo ya lefase la paradeise e tla phethagala bofelong bja letšatši la gagwe la go khutša