Bagoeledi Ba Mmušo Ba A Bega

Go Fihlelela Bao go Lego Thata go ka Fihlelelwa

DIHLATSE TŠA JEHOFA di katanela go ikopanya le motho le ge e le ofe kamoo di ka kgonago ka molaetša wa Mmušo. Ka dinako tše dingwe, go nyakega boiteko bjo bo sa tlwaelegago bakeng sa go fihlelela bao ba hwetšwago ka sewelo ka gae. (Mareka 13:​10) Tabeng ye, modiredi yo e lego mmulamadibogo yo a kgethegilego nageng ya Amerika Borwa o laodiša phihlelo e latelago.

“Ka letšatši le lengwe ke ile ka lemoga gore mmušiši wa selete o tla be a etela tikologo yeo nna le mosadi wa-ka re e abetšwego. Ka ge go be go le molaleng gore e be e le yo mongwe wa bao ba hwetšwago ka sewelo ka gae, ke ile ka mo ngwalela lengwalo gommme ka tsenya dikgatišo tše mmalwa tša Beibele ka gare, go akaretša le poroutšha ya Ke Eng Seo Modimo a se Nyakago go Rena? le dipuku tša Go Tsoma ga Batho Modimo le Tsebo e Išago Bophelong bjo bo sa Felego. Lengwalo la-ka le hlalositše morero wa e nngwe le e nngwe ya dikgatišo tše.

“Ka gobane ke be ke nyaka go tseba maikwelo a gagwe ka dipuku, ke ile ka kgopela go kopana le yena. Dibeke tše mmalwa ka morago ke ile ka dumelelwa go kopana le yena, gomme ke ile ka ya le kopi ya bidio ya Jehovah’s Witnesses​—The Organization Behind the Name. Go kopana ga rena go tšere mo e ka bago diiri tše pedi. Ka morago ga go bogela bidio le mmušiši, ke ile ka mmotšiša seo a bego a se nagana ka yona. O fetotše ka gore: “Ga go na mokgatlo o mongwe lefaseng wo o swanago le wa lena. Ke duma ge nkabe ke e-na le batho ba go swana le lena bao ba bego ba ka nthuša go fetša mediro ya-ka ya mmušo!’ Ke moka o ile a mpotšiša ge e ba nkile ka ya ntlong-kgolo ya lefase ya mokgatlo wa rena. Ke ile ka mmotša gore gaešita le ge e bile pakane ya-ka go tloga mola ke sa na le nywaga e 14, ga se ka ka ka ba le sebaka sa go etela ntlong-kgolo ya rena ya lefase ya Brooklyn, New York. E be e le e nngwe ya dipakane tšeo go sego bonolo go ka di fihlelela. O ile a ntebelela ka kelohloko lebakanyana. Ke moka a re o be a nyaka gore ke be le sebaka seo. O ile a kgonthišetša gore re hwetša mangwalo a tumelelo a molao gomme a re fa dithekethe tša sefofane e le mpho!

Ga bjale mmušiši o amogela dimakasine tša Morokami le Phafoga! ka mehla. Re holofela gore go se go ye kae re tla kgona go thoma thuto ya Beibele le yena.”