O ka Thuša Bjang Ngwana wa “Lehlaswa”?

“Hlalala, xobane . . . ó be a lahlexile, ’me a bônala.”​—LUKA 15:32.

1, 2. (a) Bana ba bangwe ba ile ba arabela bjang therešong ya Bokriste? (b) Batswadi le bana bao ba lego maemong a bjalo ba ka ikwa bjang?

“KE TLOGELA therešo!” Ke mo go tšhošago gakaakang go batswadi bao ba boifago Modimo bao ba lekilego ka thata go godiša bana ba bona ka tsela ya Bokriste go kwa mantšu a, go ngwana wa bona! Bafsa ba bangwe ba fo “aroga” ka ntle le go bolela maikemišetšo a bona. (Ba-Hebere 2:1, NW) Ba bantši ba ba ba swana le morwa wa lehlaswa wa seswantšhong sa Jesu, yo a ilego a tloga ntlong ya tatagwe gomme a ya a senya bohwa bja gagwe nageng ya kgole.​—Luka 15:​11-16.

² Gaešita le ge Dihlatse tša Jehofa tše dintši di se na bothata bjo, go tšeo di nago le bjona, ga go na mantšu a khomotšo ao a ka fedišago manyami a tšona ka mo go feletšego. Gomme seo se sa swanelago go tshedišwa mahlo ke go se thabe moo mofsa wa senganga a ka bago le gona. Ka pelong ya gagwe, letswalo la gagwe le ka mo tshwenya. Seswantšhong sa Jesu, morwa wa lehlaswa mafelelong o ile a ‘boelwa ke kgopolo,’ gomme se se ile sa thabiša tatagwe. Ke bjang batswadi le ba bangwe ka phuthegong ba ka thušago mahlaswa gore ‘a boelwe ke kgopolo’?​—Luka 15:​17, bapiša le NW.

Lebaka Leo ka Lona ba Bangwe ba Kgethago go Tlogela Therešo

3. Ke ka mabaka afe a mangwe ao a dirago gore bafsa ba kgethe go tlogela phuthego ya Bokriste?

³ Go na le bafsa ba dikete tše makgolo bao ba hlankelago Jehofa ka lethabo ka phuthegong ya  Bokriste. Ka gona, ke ka baka la’ng bafsa ba bangwe ba tloga? Ba ka ba ba nagana gore ba lahlegelwa ke selo se itšego seo lefase le se neago. (2 Timotheo 4:​10) Goba ba ka lebelela lešaka la Jehofa leo le šireletšago e le leo le thibelago kudu. Letswalo le molato, kgahlego e tseneletšego ka wa bong bjo bo fapanego goba kganyogo ya go nyaka go amogelwa ke dithaka le tšona di ka dira gore mofsa a aroge mohlapeng wa Jehofa. Mofsa a ka tlogela go hlankela Modimo ka baka la seo se ka bonagalago e le boikaketši ka lehlakoreng la batswadi ba gagwe goba Mokriste yo mongwe.

4. Ke eng seo gantši e lego lebaka la motheo leo le dirago gore bafsa ba aroge?

⁴ Kgopolo ya borabele ya ngwana gotee le mokgwa wa gona gantši ke dika tša go fokola moyeng, e lego diponagatšo tša seo se lego ka pelong ya gagwe. (Diema 15:​13; Mateo 12:​34) Lebaka le ge e le lefe leo le dirago gore mofsa a aroge, modu wa bothata gantši o letše tabeng ya go se be le “tsebô ya therešô.” (2 Timotheo 3:7) Go feta go fo rapela Jehofa ka pelo e sa felelago, ke gabohlokwa gore bana ba hlagolele tswalano ya kgaufsi le yena. Ke eng seo se tlago go thuša bafsa go dira bjalo?

Batamela Kgaufsi le Modimo

5. Ke eng seo se nyakegago bakeng sa gore mofsa a hlagolele tswalano ya motho ka noši le Modimo?

⁵ Morutiwa Jakobo o ngwadile gore: “Batamêlang Modimo, le Yêna a Le batamêlê.” (Jakobo 4:8) E le gore a kgone go dira bjalo, mofsa o swanetše go thušwa go hlagolela go rata Lentšu la Modimo. (Psalme 34:8) O tla thoma ka go nyaka “lebese”​—dithuto tša motheo tša Beibele. Eupša ge a dutše a thabela Lentšu la Modimo gomme ganyenyane-ganyenyane a thoma go rata “dijô tše di tiilexo”​—tsebišo e tseneletšego ya moya​—o tla be a se kgole le go gola moyeng. (Ba-Hebere 5:​11-14; Psalme 1:2) Mofsa yo a dumetšego gore o be a meditšwe ke mokgwa wa lefase o ile a thoma go thabela mehola ya moya. Ke eng seo se mo thušitšego gore a sokologe? Ge a arabela keletšong ya go bala Beibele ka moka, o ile a tšwela pele go kgomarela lenaneo la ka mehla la go bala Beibele. Ee, go bala Lentšu la Modimo ka mehla go bohlokwa bakeng sa go hlagolela tlemo ya kgaufsi le Jehofa.

6, 7. Batswadi ba ka thuša bjang bana ba bona go hlagolela lerato la go rata Lentšu la Modimo?

⁶ Ke gabohlokwa gakaakang gore batswadi ba thuše bana ba bona go hlagolela lerato la go rata Lentšu la Modimo! Go sa šetšwe gore ba be ba e-ba le thuto ya ka mehla ya lapa, mofsa yo mongwe wa ngwanenyana o ile a gwerana le bana ba go se kwe. O gopola mabapi le thuto ya lapa la gabo gore: “Ge tate a be a botšiša dipotšišo, ke be ke fo bala dikarabo ka ntle le go mo lebelela ka mahlong.” Go e na le go fo akaretša taba nakong ya thuto ya lapa, batswadi ba bohlale ba diriša bokgoni bja go ruta. (2 Timotheo 4:2) Mofsa o swanetše go ikwa a akaretšwa e le gore a tle a thabele thuto. Ke ka baka la’ng o sa botšiše dipotšišo tšeo di nyakago pono ya motho ka noši gomme o dire gore a itlhalose? Kgothaletša mofsa go diriša ka mo go holago taba yeo e ahla-ahlwago. *

⁷ Go feta moo, dira gore poledišano ya Mangwalo e be e kgahlišago. Ge go swanetše, dira gore bafsa ba bapale ditiragalo tša Beibele le diterama. Ba thuše go bona ka mahlo a kgopolo mafelo le dibopego tša naga yeo ditiragalo tše di ahla-ahlwago di diragetšego gona. Go diriša mebapa le ditšhate go ka thuša. Ee, thuto ya lapa e nago le kakanyo-kgopolo e nyenyane e ka dirwa gore e be e kgahlišago le e fapanego. Batswadi gape ba dira gabotse go hlahloba tswalano ya bona ka noši le Jehofa. Ge bona ka noši ba batamela kgaufsi le Jehofa, ba ka thuša bana ba bona go dira bjalo.​—Doiteronomio 6:​5-7.

8. Thapelo e thuša bjang motho go batamela kgaufsi le Modimo?

⁸ Thapelo le yona e thuša motho go batamela kgaufsi le Modimo. Ngwanenyana yo a lego nywageng ya gagwe ya mathomong a mahlalagadi o ile a ikwa a le bothateng ka baka la go se kgone go kgetha magareng ga tsela ya Bokriste ya bophelo le bogwera bja gagwe le bagwera bao ba bego ba se na ditumelo tše di swanago le tša gagwe. (Jakobo 4:4) O ile a dira eng ka seo? O ipoletše gore: “E be e le ka lekga la mathomo-thomo ke tloga ke rapela Jehofa mabapi le kamoo ke bego ke ikwa ka gona.” O ile a phetha  ka gore thapelo ya gagwe e ile ya arabja ge mafelelong a hwetša mogwera ka phuthegong ya Bokriste, yoo a bego a kgona go mo ntšhetša sa mafahleng. Ka go lemoga gore Jehofa o be a mo hlahla, o ile a thoma go aga tswalano ya motho ka noši le Modimo. Batswadi ba ka thuša bana ba bona ka go kaonefatša dithapelo tša bona ka noši. Ge ba rapela e le lapa, batswadi ba ka ntšha sa mafahleng a bona e le gore bana ba bona ba ka kwa tswalano ya motho ka noši yeo e lego gona magareng ga batswadi le Jehofa.

E-ba yo a sa Felego Pelo Eupša o le yo a Tiilego

9, 10. Jehofa o beile mohlala ofe tabeng ya go se felele ba-Isiraele ba dinganga pelo?

⁹ Ge mofsa a thoma go aroga, a ka leka go ikarola gomme a thibela boiteko le ge e le bofe bja batswadi ba gagwe bja go leka go ba le poledišano ya moya le yena. Batswadi ba ka dira eng boemong bjo bo bjalo bjo bo lekago? Ela hloko seo Jehofa a se dirilego ka Isiraele ya bogologolo. O ile a kgotlelela ba-Isiraele ba “melala e methata” ka nywaga e fetago 900 pele a ba tlogelela tseleng ya bona ya bonganga. (Ekisodo 34:9; 2 Koronika 36:​17-21; Ba-Roma 10:​21) Go sa šetšwe go ‘mo leka’ ga bona leboelela, Jehofa o be a ba ‘gaugela.’ “Ó [be a] xomiša kxalefô xa-ntši, [a] lesa xo tsoša boxale bya xaxwe ka moka.” (Psalme 78:​38-42) Modimo o be a se na bosodi ditirišanong tša gagwe le bona. Batswadi ba lerato ba ekiša Jehofa gomme ga ba fele pelo ge ngwana a sa arabele kapejana maitekong a bona a go mo thuša.

¹⁰ Go se fele pelo go bolela go gana go felelwa ke kholofelo ka moka ya gore tswalano e senyegilego e ka kaonefatšwa. Jehofa o beile mohlala tabeng ya go ba yo a sa felego pelo. O ile a gata mogato wa pele ka go romela batseta ba gagwe go ba-Isiraele “a fêla a boeletša.” Jehofa o ile a “kwêla sethšaba sa xaxwe bohloko,” gaešita le ge ba ile “ba dira bahlanka ba Modimo sekwêrô, ba nyatša se ba se boletšexo.” (2 Koronika 36:​15, 16) O ile a ipiletša go ba-Isiraele ka gore: “Boang! Motho a a lahlê tsela e mpe ya xaxwe.” (Jeremia 25:​4, 5) Lega go le bjalo, Jehofa ga se a ka a kwanantšha melao ya gagwe ya motheo ya go loka. Ba-Isiraele ba be ba laetšwe gore ba ‘boele’ go Modimo le go boela ditseleng tša gagwe.

11. Ke bjang batswadi e ka bago ba sa felego pelo eupša e le ba tiilego ge ba dirišana le ngwana yo a arogago?

¹¹ Batswadi ba ka ekiša Jehofa ka go se fele pelo ka go se felelwe ke kholofelo kapejana ka ngwana yo a arogago. Ka ntle le go lahlegelwa ke kholofelo, ba ka gata mogato wa pele wa go boloka  mekero ya poledišano e bulegile goba go tsošološa poledišano. Le ge ba kgomarela melao ya motheo ya go loka, ba ka ‘fela ba boeletša’ boipiletšo bja bona go ngwana bja gore a boele tseleng ya therešo.

Ge Ngwana yo a se Nago Boikarabelo a Kgaotšwe

12. Ke boikarabelo bofe bjo batswadi ba nago le bjona ka ngwana yo monyenyane yo a dulago le bona eupša e le yo a rakilwego ka phuthegong?

¹² Go thwe’ng ge e ba ngwana yo monyenyane yo a dulago le batswadi ba gagwe a akaretšwa sebeng se segolo gomme ka baka la boemo bja gagwe bja kgopolo bja go se sokologe a rakwa ka phuthegong? Ka ge ngwana a dula le batswadi ba gagwe, ba sa dutše ba ikarabela ka go mo hlahla le go mo laya ka go dumelelana le Lentšu la Modimo. Se se ka dirwa bjang?​—Diema 6:​20-22; 29:17.

13. Batswadi ba ka leka bjang go fihlelela dipelo tša bana bao ba fošago?

¹³ Go ka kgonega​—ge e le gabotse, go ka ba kaone​—go nea tlhahlo e bjalo le tayo nakong ya ge ba ithuta Beibele ba nnoši. Motswadi o swanetše go lebelela ka kua ga boemo bja kgopolo bjo bo retetšego bja ngwana gomme a leke go bona seo se lego ka pelong ya gagwe. O babja moyeng ka tekanyo e kaaka’ng? (Diema 20:5) Na karolo e bonolo ya pelo ya gagwe e ka fihlelelwa? Ke mangwalo afe ao a ka dirišwago ka mo go atlegago? Moapostola Paulo o re kgonthišetša gore: “Xobane Lentšu la Modimo ké le le phelaxo, ké le matla; ka boxale le phala thšoša efe le efe ya maxale a mabedi; xomme le phololetša la bá la aroxanya pelo le môya, le malokololô le môkô; ’me le tseba xo fênyêka diakanyô le kxopolô tša pelo.” (Ba-Hebere 4:​12) Ee, batswadi ba ka dira se se fetago go fo botša bana ba bona gore ba se bušeletše ba akaretšwa phošong gape. Ba ka leka go gata mogato wa pele le go kaonefatša mogato wa go fola.

14. Ke mogato ofe wa mathomo woo mofsa yo a fošitšego a swanetšego go o gata bakeng sa go tsošološa tswalano ya gagwe le Jehofa, gomme batswadi ba ka thuša ngwana bjang go gata mogato woo?

¹⁴ Mofsa yo a fošitšego o swanetše go tsošološa tswalano ya gagwe le Jehofa. Mogato wa mathomo wo a swanetšego go o gata ke gore a ‘itshole gomme a sokologe.’ (Ditiro 3:​19; Jesaya 55:​6, 7) Ge ba thuša mofsa yo a lego legaeng la bona gore a sokologe, batswadi ba swanetše go ‘kgotlelela bošula gomme ba eletše ka boleta’ ngwana yo a sego boleta. (2 Timotheo 2:​24-26) Ba swanetše go mo “sôla” ka kwešišo ya Beibele. Lentšu la Segerika leo le fetoletšwego e le “sôla” gape le ka fetolelwa e le “go nea bohlatse bjo bo kgodišago.” (Kutollo 3:​19; Johane 16:8) Ka gona, go sola go akaretša go bontšha bohlatse bjo bo lekanego bakeng sa go kgodiša ngwana ka bobe bja tsela ya gagwe. Ke therešo gore go dira bjalo ga go bonolo. Moo go kgonegago, batswadi ba ka ipiletša pelong ya gagwe, ba diriša mekgwa ka moka e swanetšego go ya ka Mangwalo bakeng sa go mo kgodiša. Ba swanetše go leka go mo thuša go kwešiša go nyakega ga go ‘hloya se sebe gomme a rate se sebotse.’ (Amosi 5:​15) A ka boelwa ke ‘tlhaologanyo gomme ba tšwa molabeng wa Diabolo.’​—Bapiša le PK.

15. Thapelo e kgatha tema efe go tsošološeng tswalano ya mofoši le Jehofa?

¹⁵ Thapelo e bohlokwa bakeng sa go tsošološa tswalano ya motho le Jehofa. Ke therešo gore ga go na yo a swanetšego go ‘rapelelwa’ mabapi le sebe seo se lego pepeneneng seo go lego molaleng gore se dirwa ka go se itshole ke motho le ge e le ofe yo a kilego a kopanela le phuthego ya Bokriste. (1 Johane 5:​16, 17; Jeremia 7:​16-20; Ba-Hebere 10:​26, 27) Lega go le bjalo, batswadi ba ka kgopela Jehofa gore a ba nee bohlale bja go lebeletšana le boemo ka katlego. (Jakobo 1:5) Ge mofsa yo a kgaotšwego a bontšha go itshola eupša a sa ‘boledišane ka bolokologi le Modimo,’  batswadi ba ka rapelela gore ge e ba Modimo a hwetša go e-na le mabaka a go ka lebalela ngwana yo a fošitšego, gona thato ya Gagwe e dirwe. (1 Johane 3:​21, NW) Go kwa dithapelo tše go swanetše go thuša mofsa go bona Jehofa e le Modimo wa kgaugelo. *​—Ekisodo 34:​6, 7; Jakobo 5:16.

16. Re ka thuša bjang ditho tša malapa a gabo bana ba banyenyane bao ba kgaotšwego?

¹⁶ Ge e ba mofsa yo a kolobeditšwego a kgaotšwe, ditho tša phuthego di letetšwe gore di ‘se hlakane’ le yena. (1 Ba-Korinthe 5:​11; 2 Johane 10, 11) Mafelelong se se ka mo thuša gore a ‘boelwe ke kgopolo’ ke moka a boele mohlapeng o šireletšago wa Modimo. (Luka 15:​17, NW) Lega go le bjalo, go sa šetšwe gore mofsa yo a kgaotšwego o a boa goba go se bjalo, ditho tša phuthego di ka kgothatša lapa la gabo. Ka moka ga rena re ka nyaka dibaka tša go bontšha ‘kwelobohloko’ le go ba ba “bonôlô” go bona.​—1 Petro 3:​8, 9.

Kamoo ba Bangwe ba ka Thušago ka Gona

17. Ditho tša phuthego di swanetše go dula di gopola’ng ge di leka go thuša ngwana yo a arogago?

¹⁷ Go thwe’ng ka mofsa yo a sego a kgaolwa ka phuthegong ya Bokriste eupša e le yo a fokolago tumelong? Moapostola Paulo o ngwadile gore: “Xe sethô se tee sè hlokofala, dithô ka moka di . . . hlokofala [le sona].” (1 Ba-Korinthe 12:​26) Ba bangwe ba ka bontšha go kgahlegela mofsa yo bjalo. Go ba gona, go nyakega tekanyo e itšego ya temogo, ka ge mofsa yo a babjago moyeng a ka ba le tutuetšo e mpe go bafsa ba bangwe. (Ba-Galatia 5:​7-9) Phuthegong e nngwe, batho ba bagolo bao ba nago le maikemišetšo a mabotse bao ba bego ba nyaka go thuša bafsa ba bangwe bao ba bego ba fokola moyeng ba ile ba ba laleletša dipokanong gore ba yo bapala mmino o ratwago ba le gotee. Gaešita le ge bafsa ba ile ba dumelelana le seo gomme ba thabela dinako tše bjalo, tutuetšano ya bona mafelelong e ile ya feleletša ka gore ba kgaotše go kopanela le phuthego. (1 Ba-Korinthe 15:​33; Juda 22, 23) Seo se ka thušago go fodiša ngwana yo a babjago moyeng ga se dipokano tša bogwera tšeo di se nago tlhahlo ya moya, eupša ke segwera seo se mo thušago go hlagolela go rata dilo tša moya. *

18. Re ka ekiša bjang boemo bja kgopolo bja tatago lehlaswa seswantšhong sa Jesu?

 ¹⁸ Ge mofsa yo a tlogetšego phuthego a boela Holong ya Mmušo goba a e-ba gona kopanong, nagana kamoo a ka bago a ikwa ka gona. Na ga se ra swanela go bontšha boemo bja kgopolo bja kamogelo bja tatago lehlaswa wa seswantšhong sa Jesu? (Luka 15:​18-20, 25-32) Mofsa yo a lego mahlalagading yo a tlogetšego phuthego ya Bokriste le yoo ka morago a ilego a ba gona kopanong ya selete o itše: “Ke be ke nagana gore motho yo mongwe le yo mongwe o tla hlokomologa motho yo a swanago le nna, eupša banababo rena le dikgaetšedi ba ile ba tla go nna gomme ba nkamogela. Ke be ke kgomegile kudu.” O ile a thoma go ithuta Beibele gape gomme ka morago o ile a kolobetšwa.

O se ke wa Lapa

19, 20. Ke ka baka la’ng re swanetše go boloka boemo bjo bo nepagetšego bja kgopolo mabapi le ngwana wa lehlaswa?

¹⁹ Go thuša ngwana wa “lehlaswa” ‘go boelwa ke kgopolo’ go nyaka go se fele pelo gomme e ka ba tlhohlo go batswadi le ba bangwe. Eupša o se ke wa lapa. “Morêna xa a diexiše tše a di boletšexo a re di tlo tla, bo-ka ba bangwê xe ba re ké xo diexiša; sa xaxwe ké xo se Le fêlêle pelo, xobane xa a rate xe xo na le ba ba lahlêxaxo; ó rata xe bohle ba ka fihlêla thsokoloxô.” (2 Petro 3:9) Re na le kgonthišetšo ya Mangwalo ya gore Jehofa o nyaka gore batho ba sokologe gomme ba phele. Ge e le gabotse o gatile mogato wa pele go direng ditokišetšo tša go boelana le batho ka noši. (2 Ba-Korinthe 5:​18, 19) Go se fele pelo ga gagwe go dirile gore e be mo go kgonegago go ba dimilione gore ba boelwe ke kgopolo.​—Jesaya 2:​2, 3.

²⁰ Ka gona, na batswadi ga se ba swanela go diriša mokgwa o mongwe le o mongwe wa Mangwalo wo o ka kgonegago go thuša ngwana wa bona yo monyenyane wa lehlaswa go boelwa ke kgopolo? Ge o ekiša Jehofa, o se ke wa fela pelo ge o dutše o gata megato e nepagetšego ya go thuša ngwana wa gago go boela go Jehofa. Kgomarela ka go tia melaong ya motheo ya Beibele gomme o leke go bonagatša dika tša Jehofa tša lerato, toka le bohlale ge o dutše o mo rapela gore a go thuše. Go fo swana le ge marabele a mantši a melala e methata a ile a arabela taletšong e lerato ya Jehofa ya gore a boe, morwa goba morwedi wa gago wa lehlaswa a ka boela gabotse mohlapeng wa Modimo woo o šireletšago.​—Luka 15:​6, 7.

[Mengwalo ya ka tlase]

Na o a Gopola?

• Ke eng seo e ka bago e le lebaka la motheo la bothata bja ge bafsa ba tlogela phuthego?

• Bafsa ba ka thušwa bjang go hlagolela tswalano ya motho ka noši le Jehofa?

• Ke ka baka la’ng batswadi ba swanetše gore ba se ke ba fela pelo eupša e be ba tiilego ge ba thuša ngwana wa lehlaswa?

• Ke bjang bao ba lego ka phuthegong ba ka thušago mofsa wa lehlaswa gore a boe?

[Dipotšišo tša Thuto]

[Seswantšho go letlakala 15]

Go bala Lentšu la Modimo go bohlokwa bakeng sa go hlagolela tswalano ya kgaufsi le Jehofa

[Seswantšho go letlakala 15]

Thapelo ya batswadi e tšwago pelong e ka thuša bana ba bona gore ba lemoge tswalano ya motho ka noši ya batswadi le Jehofa

[Seswantšho go letlakala 17]

Amogela ngwana wa lehlaswa ge a ‘boelwa ke kgopolo’

[Seswantšho go letlakala 18]

Gata megato e nepagetšego bakeng sa go thuša ngwana wa gago go boela go Jehofa