Tumelo ya kgonthe—Na e sa Kgonega?
Tumelo ya kgonthe—Na e sa Kgonega?
“Tumelo ke kholofelo e phelago, e sa boifego ya go dumela kgaugelong ya Modimo, e lego e kgodišegilego le e kgonthišeditšwego mo e lego gore modumedi a ka bea bophelo bja gagwe kotsing mabapi le yona ka makga a dikete.”—MARTIN LUTHER, 1522.
“Mo e nyakilego e le ka mo go feletšego re šetše re le lekoko la batho leo le sekametšego dilong tša lefase leo go lona tumelo le mediro ya Bokriste di fetogilego dilo tšeo di hwelelago ka tekanyo e kgolo.”—LUDOVIC KENNEDY, 1999.
DIKGOPOLO mabapi le tumelo ke tše di fapanego kudu. Nakong e fetilego, go ba le tumelo go Modimo e be e le selo se se tlwaelegilego. Matšatšing a lehono, lefaseng la dipelaelo le tlaišego, go ba le tumelo ya kgonthe go Modimo le Beibeleng go nyamelela ka lebelo.
Tumelo ya Kgonthe
Go ba bantši, “tumelo” e bolela feela go ba le tumelo ya bodumedi goba go latela sebopego sa borapedi. Lega go le bjalo, ka ge e dirišwa ka Beibeleng, “tumelo” ge e le gabotse e bolela kholofelo yohle—kgodišego e feletšego, e sa šišinyegego go Modimo le dikholofetšong tša gagwe. Ke seka seo se swayago morutiwa wa Jesu Kriste.
Nakong e nngwe, Jesu Kriste o ile a bolela ka go nyakega ga go rapela le ‘go se lape.’ Ka go dira bjalo, o rotošitše potšišo mabapi le ge e ba tumelo ya kgonthe e be e tla ba gona mehleng ya rena. O botšišitše ka gore: “Morwa-motho mohla a tlaxo a Le re ó tlo hwetša lefaseng xò sa na le tumêlô [ye]?” Ke ka baka la’ng a ile a rotoša potšišo e bjalo?—Luka 18:1, 8, bapiša le mongwalo wa ka tlase wa Reference Bible.
Tumelo e Lahlilwego
Dilo tše dintši di ka dira gore batho ba lahlegelwe ke tumelo le ge e le efe yeo ba ka bago ba e-na le yona. Gare ga dilo tšeo go na le kgateletšego ya maikwelo le diteko tša bophelo bja letšatši le letšatši. Ka mohlala, moprofesara Michael Goulder, e be e le moruti wa kereke kua Manchester, Engelane, nakong ya ge go direga kotsi ya sefofane kua Munich ka 1958 moo bontši bja sehlopha sa kgwele ya maoto sa Manchester United se ilego sa bolawa. Lenaneong la thelebišene la BBC, mogaši e lego Joan Bakewell o ile a hlalosa gore Goulder “o ile a ikwa a se na thušo ge a be a bona tekanyo ya kamoo batho ba bego ba nyamile ka gona.” E nngwe ya ditla-morago e bile gore “o be a lahlegetšwe ke tumelo go
Modimo yo a tsenago ditaba tša pheletšo ya batho gare.” Goulder o bolela tumelo ya gagwe ya gore “Beibele ga se . . . lentšu le le nepagetšego la Modimo” eupša, go e na le moo, “ke lentšu le le fošagetšego la motho, mohlomongwe le buduletšwe ke Modimo mo le mola.”Ka dinako tše dingwe tumelo e ka pona. Se ke seo se ilego sa direga go mongwadi le mogaši Ludovic Kennedy. O bolela gore go tloga bjaneng “dipelaelo [tša gagwe] le go se kgodišege [ka Modimo] di be di e-ya pele le morago gomme go se dumele [ga gagwe] go ile gwa gola.” Go bonala go be go se na motho yo a ka mo neago dikarabo tše di kwagalago tša dipotšišo tša gagwe. Go hwela ga tatagwe lewatleng e bile kgateletšo e kgolo tumelong yeo e bego e šetše e fokola kudu. Dithapelo tša go rapela Modimo gore “a re šireletše dikotsing tša lewatle le bošorong bja lenaba” di ile tša se arabje mola sekepe seo se bego se fetotšwe go ba sekepe sa batho bohle seo tatagwe a bego a le ka go sona se be se hlaselwa le go senywa ke dikepe tša ntwa tša Jeremane nakong ya Ntwa ya II ya Lefase.—All in the Mind—A Farewell to God.
Diphihlelo tše bjalo ga se tšeo di sa tlwaelegago. Moapostola Paulo o re: “Tumêlô xa se ya bohle.” (2 Ba-Thesalonika 3:2) O nagana’ng? Na go ba le tumelo ya kgonthe go Modimo le Lentšung la gagwe go sa kgonega lefaseng le la dipelaelo tše di oketšegago? Hlahloba seo sehlogo se se latelago se tlago go se bolela ka taba ye.