Dipotšišo tše Tšwago go Babadi

Mešikaro ya go rwala areka ya kgwerano e be e beilwe bjang, ka ge 1 Dikxoši 8:8 e bontšha gore e be e bonagala ka mo Sekgethweng?

Ge Jehofa a be a nea Moše thulaganyo ya tabarenakele kua lešokeng, karolo ya motheo e be e le areka ya kgwerano. Lepokisi le la go manegwa ka gauta la khutlo-nne le be le swara matlapana ao go bego go ngwadilwe Molao go wona le dilo tše dingwe. E be e bewa phapošing ya ka gare-gare, e lego Sekgethwa-kgethwa. Mo sekhurumelong sa Areka go be go na le diswantšho tše pedi tša gauta tša bakerubi bao ba phurolotšego maphego. Mahlakore ka bobedi a Areka a be a e-na le mekgoko e le gore e tle e rwalwe ka mešikaro e mebedi, yeo e bego e dirilwe ka kota ya acacia yeo e manegilwego ka gauta. Ka mo go kwalago, mešikaro e be e tsenywa ka gare ga mekgoko le go bapa le botelele bja Areka. Ka gona, ka ge Areka e be e le lefelong la yona Sekgethwa-​kgethweng sa tabarenakele, yeo e bego e lebeletše bohlabela, gomme mešikaro e be e lebišitšwe leboa-borwa. Go ile gwa ba bjalo ka morago ge Areka e be e le ka tempeleng yeo Salomo a bego a e agile.​—Ekisodo 25:​10-22; 37:​4-9; 40:​17-21. *

Seširo se be se aroganya Sekgethwa-kgethwa le Sekgethwa (phapoši ya ka ntle). Baperisita ba ba lego ka Sekgethweng ba be ba sa kgone go lebelela ka Sekgethwa-kgethweng gomme ba bona Areka, moo Modimo a bego a iponagatša gona. (Ba-Hebere 9:​1-7) Ka gona, 1 Dikxoši 8:8 e ka bonala e le e gakantšhago: “Mešikarô e be e le e metelele, dinthla tša yôna tša tšwêlêla tša bônala ka mo sekxethweng mo pele xa sekxêthwa-kxêthwa. E be e se xo bônala wa xo tšwêla mono ntlê.” Ntlha e swanago e begwa go 2 Koronika 5:9. Ke bjang mešikaro e bego e bonala go bohle ka Sekgethweng sa tempele?

Ba bangwe ba be ba nagana gore mešikaro e be e kgomile seširo, e tšweletša dikukuno tše di bonagalago. Eupša seo se be se ka se be bjalo ge e ba mešikaro e be e lebišitšwe ka leboa-borwa, le seširo se bapelane le mešikaro. (Numeri 3:​38) Go na le tlhaloso e kwalago le go feta. Mešikaro e ka ba e be e bonagala ge e ba go be go e-na le lešobana le lenyenyane magareng ga seširo le leboto la tempele goba nakong ya ge moperisita yo mogolo a be a tsena ka Sekgethwa-kgethweng. Seširo se be se širile go bonagala le ge e le gofe ga Areka ka boyona, eupša mešikaro yeo e fetago mahlakore ka bobedi e be e ka bonagala ka lešobana. Le ge tlhaloso ye e le e kgodišago, re ka se gatelele dipono tša rena.

Ka mo go lego molaleng, go na le dintlha tše dintši tšeo re sa dutšego re ka ithuta tšona. Moapostola Paulo o boletše dikarolo tše mmalwa lengwalong la gagwe le le bego le e-ya go Ba-Hebere. Ka morago o ile a hlalosa gore: “Bjale ye ga se nako ya go bolela ditaba ka botlalo mabapi le dilo tše.” (Ba-Hebere 9:5, NW) Tsogo yeo e tlago ya batho ba botegago e swanetše go bula dibaka tše di hlohleletšago go ithuta go tšwa go banna ba swanago le Moše, Arone, Betsaliele le ba bangwe bao ba bego ba tlwaelane ka noši le thulaganyo le go šoma ga tabarenakele.​—Ekisodo 36:1.

[Mengwalo ya ka tlase]