E-ba le Pelo e Kwanago le Jehofa

“Modimo, mpopêlê pelo e sekilexo. Buša O nneêlê môya [o mofsa, NW] wa xo tia ka teng xa-ka.”​—PSALME 51:10.

1, 2. Ke ka baka la’ng re swanetše go kgahlegela pelo ya rena?

EBE e le yo motelele yo a nago le sebopego seo se kgahlišago. Ge a se na go mmona, moporofeta Samuele o be a kgahlegile kudu moo a ilego a phetha ka gore morwa yo yo mogolo wa Isai e be e le yena yo Modimo a mo kgethilego go ba kgoši ka morago ga Saulo. Eupša Jehofa o itše: “O se bônê sebopêxô sa [morwa yoo] le botelele bya xaxwe; Nna ke mo nyaditše. . . . Motho ó bôna se se lebanaxo le mahlô a xaxwe; Morêna Yêna ó bôna pelo.” Kgetho ya Jehofa e ile ya ipontšha e le morwa wa Isai yo monyenyane, Dafida​—“monna e a kwanaxo le pelo ya xaxwe.”​—1 Samuele 13:​14; 16:7.

² Modimo o kgona go bala pelo ya motho, bjalo ka ge ka morago a ile a bolela ka mo go kwagalago gore: “Ke nna Jehofa ke fetlekago pelo, ke e a lekago dipshio, gomme ke tlo nea e mongwe le e mongwe ka mo go lekanago mosepelo wa gagwe le dienywa tša mediro ya gagwe.” (Jeremia 17:​10, PK) Ee, “mo-leka-pelo ké Morêna.” (Diema 17:3) Lega go le bjalo, pelo yeo e lego mothong yeo Jehofa a e hlahlobago ke eng? Gomme re ka dira’ng bakeng sa go ba le pelo e kwanago le yena?

“Motho wa xo Ikuta wa Pelong”

3, 4. Ke ka kwešišo efe lentšu “pelo” kudu-kudu le dirišwago ka Beibeleng? Nea mehlala.

³ Lentšu “pelo” le tšwelela mo e ka bago ka makga a sekete ka Mangwalong a Makgethwa. Mabakeng a mantši le dirišwa ka kgopolo ya seswantšhetšo. Ka mohlala, Jehofa o boditše moporofeta Moše gore: “Botša Ba-Isiraele O re, ba nnthšetšê dibexô. Mang le mang a tlišê ka mo pelo ya xaxwe e rataxo; ’me Le amoxêlê dibexo tšeo tša-ka.” “Xomme mang le mang, wa xo tsošwa ke pelo ya xaxwe,” a dira meneelo. (Ekisodo 25:2; 35:​21) Go molaleng gore karolo e nngwe ya pelo ya seswantšhetšo ke tutuetšo​—matla a ka gare ao a re kgothaletšago go tšea kgato. Pelo ya rena ya seswantšhetšo gape e bontšha maikwelo a rena, dikganyogo tša rena le dilo tšeo re di ratago. Pelo e ka tlala pefelo go ba ya tlala poifo, ya gateletšwa ke manyami goba ya tlala ka lethabo. (Psalme 27:3; 39:3; Johane 16:​22; Ba-Roma 9:2) E ka ba e ikgantšhago goba e  ikokobeditšego, e lerato goba e tletšego lehloyo.​—Diema 16:5; Mateo 11:​29; 1 Petro 1:22.

⁴ Ka go dumelelana le seo, “pelo” gantši e tswalanywa le tutuetšo le maikwelo, mola “monagano” ka mo go kgethegilego o tswalanywa le kwešišo. Ye ke tsela yeo ka yona mantšu a a swanetšego go kwešišwa ge a tšwelela tabeng e swanago ka Mangwalong. (Mateo 22:​37; Ba-Filipi 4:7) Eupša pelo le monagano ga se tšeo di sa sepedišanego. Ka mohlala, Moše o kgothaleditše ba-Isiraele gore: “O swanetše go gopola ka pelong ya gago [goba “o swanetše go gopola ka monaganong wa gago,” mongwalo wa tlase ka go NW] gore Jehofa ke Modimo wa therešo.” (Doiteronomio 4:​39, PK) Jesu o itše go ba-mangwalo bao ba bego ba mo logela maano: “Le re’ng Lè eleletša tše mpe dipelong tša lena?” (Mateo 9:4) “Temoxô,” “tsebô” le ‘go eleletša’ le tšona di ka tswalanywa le pelo. (1 Dikxoši 3:​12; Diema 15:​14; Mareka 2:6) Ka gona, pelo ya seswantšhetšo gape e ka akaretša bohlale bja rena​—dikgopolo tša rena goba kwešišo ya rena.

5. Pelo ya seswantšhetšo e emela eng?

⁵ Go ya ka puku e nngwe ya ditšhupetšo, pelo ya seswantšhetšo e emela “karolo ya motheo ka kakaretšo, bokagare, gomme e emela motho wa ka gare bjalo ka ge a iponatša ka mediro ya gagwe ka moka e fapa-fapanego, dikganyogo tša gagwe, lerato la gagwe, maikwelo a gagwe, diphišegelo tša gagwe, merero ya gagwe, dikgopolo tša gagwe, menagano ya gagwe, dikakanyo tša gagwe, bohlale bja gagwe, tsebo ya gagwe, bokgoni bja gagwe le ditumelo gotee le tlhaologanyo, mogopolo wa gagwe le go phakgama ga gagwe.” E emela seo re lego sona e le ka kgonthe ka gare, “motho wa xo ikuta wa pelong.” (1 Petro 3:4) Se ke seo Jehofa a se bonago le go se hlahloba. Lega go le bjalo, Dafida o be a ka rapela ka gore: “Modimo, mpopêlê pelo e sekilexo. Buša O nneêlê môya [o mofsa, NW] wa xo tia ka teng xa-ka.”  (Psalme 51:​10) Re ka ba bjang le pelo e sekilego?

‘Beang Dipelo tša Lena’ Lentšung la Modimo

6. Ke keletšo efe yeo Moše a e neilego ba-Isiraele ge ba be ba hlomile mešaša Melaleng ya Moaba?

⁶ Ge a be a eletša barwa ba Isiraele ge ba be ba kgobokane Melaleng ya Moaba pele ga go tsena Nageng ya Kholofetšo, Moše o itše: “Beang dipelong tša lena mantšung ka moka a ke le tiišetšago ona ka bohlatse lehono, ao le tlogo a laela bana ba lena, gore ba lote mantšu ka moka a molao o ka moka.” (Doiteronomio 32:​46, PK) Ba-Isiraele ba be ba swanetše go “ela hloko gabotse.” (Knox) Ke feela ka go tlwaelana ka mo go tseneletšego le ditaelo tša Modimo ba bego ba ka di tiišetša baneng ba bona.​—Doiteronomio 6:​6-8.

7. Ke eng seo se akaretšwago tabeng ya ‘go bea dipelo tša rena’ Lentšung la Modimo?

⁷ Senyakwa sa motheo bakeng sa go ba le pelo e sekilego ke go ba le tsebo e nepagetšego ka thato ya Modimo le merero ya gagwe. Go na le mothopo o tee feela wa tsebo yeo, Lentšu la Modimo le le buduletšwego. (2 Timotheo 3:​16, 17) Lega go le bjalo, bohlale bo nnoši bo ka se re thuše go ba le pelo yeo e thabišago Jehofa. Bakeng sa gore tsebo e kgome e le ka kgonthe seo re lego sona ka gare, re swanetše go ‘bea dipelo tša rena’ go seo re ithutago sona, goba go se “tšeela pelong.” (Doiteronomio 32:​46, An American Translation) Se se dirwa bjang? Mopsalme Dafida o hlalosa ka gore: “Ke eleletša tša mehla ya kxalê; ke êlêlwa [“naganišiša,” NW] tšohle O kilexo wa di dira, ke xopola medirô ya ’atla tša xaxo.”​—Psalme 143:5.

8. Re ka naganišiša ka dipotšišo dife ge re dutše re ithuta?

⁸ Le rena ka mo go swanago re swanetše go naganišiša ka tebogo ka modiro wa Jehofa. Ge re bala Beibele goba dipuku tšeo di theilwego Beibeleng, re swanetše go naganišiša ka dipotšišo tše bjalo ka: ‘Se se nthuta’ng ka Jehofa? Ke dika dife tša Jehofa tšeo ke bonago di bontšhwa mo? Pego ye e nthuta eng ka seo Jehofa a se ratago le seo a sa se ratego? Mafelelo a go latela tsela yeo Jehofa a e ratago ke afe ge a bapišwa le go latela tsela yeo a e hloilego? Tsebišo ye e tswalana bjang le yeo ke šetšego ke e tseba?’

9. Thuto ya motho ka noši le go naganišiša di bohlokwa gakaaka’ng?

⁹ Lisa * wa nywaga e 32 o hlalosa kamoo a ilego a thoma go leboga mohola wa thuto e nago le morero le go naganišiša: “Ka morago ga ge ke kolobeditšwe ka 1994, ke ile ka ba mafolofolo kudu therešong ka nywaga e mebedi. Ke be ke e-ba gona dibokeng ka moka tša Bokriste, ke neela diiri tše 30 go ya go tše 40 ka kgwedi bodireding bja tšhemo gomme ke gwerana le Bakriste-gotee. Ke moka ke ile ka thoma go aroga. Ke ile ka fokola kudu moo ke ilego ka ba ka roba molao wa Modimo. Eupša ke ile ka boelwa ke tlhaologanyo gomme ka phetha ka go hlwekiša bophelo bja-ka. Ke thabile gakaakang gore Jehofa o lemogile go itshola ga-ka gomme o nkamogetše gape! Ke be ke fela ke ipotšiša gore: ‘Ke ka baka la’ng ke ile ka wa?’ Karabo yeo ke dulago ke nagana ka yona ke ya gore ke ile ka hlokomologa thuto e nago le morero gotee le go naganišiša. Therešo ya Beibele e be e tloga e sa fihla pelong ya-ka. Go tloga ga bjale go ya pele, thuto ya motho ka noši le go naganišiša di tla dula e le karolo e bohlokwa ya bophelo bja-ka.” Ge re dutše re gola tsebong ya rena ya go tseba Jehofa, Morwa wa gagwe le Lentšu la gagwe, go bohlokwa gakaakang gore re dire nako bakeng sa go naganišiša mo go nago le morero!

10. Ke ka baka la’ng e le mo go akgofilego gore re dire nako bakeng sa thuto ya motho ka noši le go naganišiša?

¹⁰ Lefaseng le la leema-ema, go hwetša nako bakeng sa go ithuta le go naganišiša ke tlhohlo e le ka kgonthe. Lega go le bjalo, Bakriste lehono ba eme mollwaneng wa Naga ya Kholofetšo e kgahlišago​—lefase le lefsa la Modimo la go loka. (2 Petro 3:​13) Ditiragalo tše di makatšago, tše bjalo ka phedišo ya “Babele o moxolo” le tlhaselo ya “Gogo wa naga ya Magogo” ge a hlasela batho ba Jehofa, di tla tloga di direga kgaufsinyane. (Kutollo 17:​1, 2, 5, 15-17; Hesekiele 38:​1-4, 14-16; 39:2) Seo se letšego ka pele se ka bea lerato la rena la go rata Jehofa tekong.  Ke mo go akgofilego gore ga bjale re reke nako le go bea dipelo tša rena Lentšung la Modimo!​—Ba-Efeso 5:​15, 16, bapiša le NW.

‘Lokišeletša Pelo ya Gago go Lebelela ka Lentšung la Modimo’

11. Ke bjang dipelo tša rena di ka swantšhwago le mobu?

¹¹ Pelo ya seswantšhetšo e ka swantšhwa le mobu woo go wona go ka bjalwago peu ya therešo. (Mateo 13:​18-23) Mobu wa kgonthe gantši o a lengwa bakeng sa go kgonthišetša go gola gabotse ga dibjalo. Ka mo go swanago, pelo e swanetše go lokišeletšwa, e le gore e be e amogelago kudu Lentšu la Modimo. Moperisita Esera “pelo ya xaxwe e be [e lokišeletšwa, NW] e sa lese xo hlwa è nyaka molaô wa Morêna, le xo dira se se bolêlwaxo ke wôna.” (Esera 7:​10) Re ka lokišeletša dipelo tša rena bjang?

12. Ke eng seo se tlago go thuša go lokišeletša pelo bakeng sa thuto?

¹² Go lokišeletšwa gabotse ga pelo ge re bala Lentšu la Modimo ke thapelo e tšwago pelong. Diboka tša Bokriste tša barapedi ba kgonthe di bula le go tswalela ka thapelo. Ke mo go swanetšego gakaakang gore le rena nako e nngwe le e nngwe re thome thuto ya motho ka noši ya Beibele ka thapelo e tšwago pelong ke moka re boloke boemo bja kgopolo bja thapelo nakong ya thuto ya rena!

13. Re swanetše go dira’ng bakeng sa go ba le pelo yeo e kwanago le Jehofa?

¹³ Pelo ya seswantšhetšo e swanetše go lokišeletšwa go beela ka thoko dikgopolo tšeo e lego kgale di kgomaretšwe. Baetapele ba bodumedi ba mehleng ya Jesu ba be ba se ba ikemišetša go dira se. (Mateo 13:​15) Ka lehlakoreng le lengwe, mmago Jesu, Maria, o ile a dira diphetho “pelong ya xaxwe” tšeo di theilwego ditherešong tšeo a bego a di kwele. (Luka 2:​19, 51) O ile a ba morutiwa yo a botegago wa Jesu. Lidia wa Thiathira o ile a theetša Paulo gomme “Morêna a bula pelo ya xaxwe, ’me a kwa.” Le yena o ile a ba modumedi. (Ditiro 16:​14, 15) Anke le ka mohla re se ke ra kgomarela ka go se fetoge dikgopolo tša motho ka noši goba dipono tše di ratwago tša thuto ya tumelo. Go e na le moo, anke re ikemišetšeng go ‘tiiša gore morereši ke Modimo, gomme ba maaka ke batho bohle.’​—Ba-Roma 3:4.

14. Re ka lokišeletša bjang dipelo tša rena go theetša dibokeng tša Bokriste?

¹⁴ Go lokišeletša pelo go theetša dibokeng tša Bokriste go bohlokwa kudu. Ditšhitišo di ka tloša tlhokomelo ya rena go seo se bolelwago. Mantšu ao a bolelwago a ka ba le tutuetšo e nyenyane go rena ge e ba re swaregile ka dilo tšeo di diragetšego mosegare goba re tshwenyegile mabapi le seo se re letetšego ka moso. Re swanetše go ikemišetša ka mo go tiilego go theetša le go ithuta ge e ba re tla holwa ke seo se bolelwago. Re ka hwetša mehola e megolo gakaakang ge e ba re ikemišeditše go kwešiša mangwalo ao a hlaloswago le ditlhaloso tša ona!​—Nehemia 8:​5-8, 12.

15. Boikokobetšo bo re thuša bjang go ba bao ba rutegago kudu?

¹⁵ Bjalo ka ge go tšhela menontšha e swanetšego go ka kaonefatša mobu wa kgonthe, ka gona go hlagolela ga rena boikokobetšo, tlala bakeng sa dilo tša moya, kholofelo, poifo ya go boifa Modimo le lerato la go rata Modimo go ka humiša dipelo tša rena tša seswantšhetšo. Boikokobetšo bo letefatša pelo, bo re thuša go ba bao ba rutegago kudu. Jehofa o ile a botša Kgoši ya Juda Josia gore: “Xe e le wêna​—ka xobane pelo ya xaxo e lêtafetše, wa ikokobetša pele xa Morêna mola Ò e-kwa tše ke boletšexo . . . ’me wa ntelêla​—wêna ke Xo kwile!” (2 Dikxoši 22:​19) Pelo ya Josia e be e ikokobeditše e bile e le e amogelago. Boikokobetšo bo ile bja dira gore barutiwa ba Jesu ‘bao e sego ba mangwalo le ba go se rutege’ ba kgone go kwešiša le go diriša ditherešo tša moya tšeo banna “ba bohlale le ba thlaloxanyô” ba paletšwego ke go di kwešiša. (Ditiro 4:​13; Luka 10:​21) Anke re “ikokobetšê pele xa Modimo wa rena” ge re le gare re leka go ba le pelo e kwanago le Jehofa.​—Esera 8:21.

16. Ke ka baka la’ng go nyakega boiteko bja go hlagolela go swarwa ke tlala ya dijo tša moya?

¹⁶ Jesu o itše: “Go thabile bao ba lemogago dinyakwa tša bona tša moya.” (Mateo 5:3, NW) Le ge re neilwe bokgoni bja go hlagolela boemo bja moya, dikgateletšo tše di tšwago lefaseng le le kgopo goba mekgwa e bjalo ka bobodu e ka retetša go kgomega ga rena ka dinyakwa tša rena.  (Mateo 4:4) Re swanetše go hlagolela kganyogo e botse bakeng sa dijo tša moya. Gaešita le ge mathomong re sa hwetše lethabo ge re bala Beibele le thutong ya motho ka noši, ka go phegelela re tla hwetša gore ‘tsebo e tlo natefela moya wa rena,’ e le gore re lebelele pele ka phišego dinakong tša go ithuta.​—Diema 2:​10, 11.

17. (a) Ke ka baka la’ng Jehofa a swanelwa ke gore re mmote ka mo go feletšego? (b) Re ka hlagolela bjang go bota Modimo?

¹⁷ Kgoši Salomo o eleditše ka gore: “Bô’ta Modimo ka pelo ka moka; O se ké wa ithêkxa ka xo fo re: Ke n’e thlaloxanyô.” (Diema 3:5) Pelo yeo e botago Jehofa e tseba gore selo le ge e le sefe seo A se kgopelago goba a se laelago ka Lentšu la gagwe ka mehla se nepagetše. (Jesaya 48:​17) Ka ntle le pelaelo Jehofa o swanelwa ke gore re mmote ka mo go feletšego. O kgona go phetha tšohle tšeo a di rerilego. (Jesaya 40:​26, 29) Ka baka leo, leina la gagwe ka go lebanya le bolela gore “Yo a Bakago go ba Gona,” e lego seo se agago kholofelo bokgoning bja gagwe bja go phetha seo a se holofeditšego! O ‘lokile ditseleng tša gagwe tšohle gomme o botho ditirong tša gagwe tšohle.’ (Psalme 145:​17) Ke therešo gore bakeng sa go hlagolela kholofelo go yena, re swanetše go ‘leka gomme re bone gore Jehofa ke yo bolo’ ka go diriša seo re ithutago sona ka Beibeleng maphelong a rena ka noši le ka go lebiša tlhokomelo meholeng yeo se se e tšweletšago.​—Psalme 34:8.

18. Poifo ya go boifa Modimo e re thuša bjang gore re be bao ba amogelago tlhahlo ya Modimo?

¹⁸ Ge a šupa sekeng se sengwe seo se dirago dipelo tša rena gore e be tšeo di amogelago tlhahlo ya Modimo, Salomo o itše: “Boifa Morêna; ila sebe.” (Diema 3:7) Jehofa o ile a bolela mabapi le Isiraele ya bogologolo gore: “A dipelo tša bôná e ka bê e le tše byalo ka mehla, ba mpoifa, ba hlôkômêla ditaêlô tša-ka ka moka; ké mo ba ka bexo ba dula bà thabile, bôná le bana ba bôná neng le neng.” (Doiteronomio 5:​29) Ee, bao ba boifago Modimo ba a mo kwa. Jehofa o na le bokgoni bja gore a “bônatšê matla a xaxwe ka bao ba lebeletšexo Yêna ka pelo ka moka” le go tliša kotlo go bao ba sa mo kwego. (2 Koronika 16:9) Eka poifo ya borapedi ya go boifa go nyamiša Modimo e ka laola ditiro tša rena ka moka, dikgopolo le maikwelo.

‘Rata Jehofa ka Pelo ya Gago ka Moka’

19. Ke tema efe yeo lerato le e kgathago go direng gore dipelo tša rena di arabele tlhahlong ya Jehofa?

¹⁹ Go feta dika tše dingwe ka moka, lerato ka kgonthe le dira dipelo tša rena gore di arabele tlhahlong ya Jehofa. Pelo yeo e tladitšwego ka lerato la go rata Modimo e dira motho gore a fagahlele go ithuta seo se kgahlišago Modimo le seo se sa mo kgahlišego. (1 Johane 5:3) Jesu o itše: “Morêna Modimo wa xaxo O mo ratê ka pelo ya xaxo ka moka, le ka môya wa xaxo ka moka, le ka thlaoloxanyô ya xaxo ka moka.” (Mateo 22:​37) Eka re ka nweletša lerato la rena la go rata Modimo ka go go dira gore e be mokgwa go lebiša tlhokomelo go lokeng ga gagwe, ka go bolela le yena ka mehla bjalo ka mogwera wa kgaufsi le ka go bolela ka yena ka phišego go ba bangwe.

20. Re ka hwetša bjang pelo yeo e kwanago le Jehofa?

²⁰ E le pušeletšo: Go ba le pelo yeo e kwanago le Jehofa go akaretša go dumelela Lentšu la Modimo le tutuetša seo re lego sona ka gare, motho wa go ikuta wa pelong. Thuto ya motho ka noši e nago le morero ya Mangwalo le go naganišiša ka tebogo di a nyakega. Se se dirwa gakaone ka pelo e lokišeleditšwego​—pelo yeo e se nago dikgopolo tšeo e lego kgale re di kgomaretše, yeo e tletšego ka dika tšeo di dirago gore re rutege! Ee, ka thušo ya Jehofa, pelo e botse e ka hwetšwa. Lega go le bjalo, ke megato efe yeo re ka e gatago bakeng sa go diša dipelo tša rena?

[Mengwalo ya ka tlase]

O tla Araba Bjang?

• Pelo ya seswantšhetšo yeo Jehofa a e hlahlobago ke eng?

• Re ka ‘bea dipelo tša rena’ bjang Lentšung la Modimo?

• Re swanetše go lokišeletša dipelo tša rena bjang bakeng sa go bala Lentšu la Modimo?

• Ka morago ga ge o etše hloko taba ye, o kwa o tutueletšega go dira’ng?

[Dipotšišo tša Thuto]

[Seswantšho go letlakala 17]

Dafida o ile a naganišiša ka tebogo ka dilo tša moya. Na o dira bjalo?

[Diswantšho go letlakala 18]

Lokišeletša pelo ya gago pele o ithuta Lentšu la Modimo