“Ke Lemogile Seo se Fošagetšego ka Nna Mafelelong!”

KE KA tsela yeo monna yo a tšwago Tokyo a ikwelego ka yona ge a be a bala phihlelo tokollong ya Morokami wa December 1, 2000. Sehlogo se be se re “Ga le Tsebe Gore Bophelo bja Lena bo tla ba Bjang Gosasa,” gomme se be se laodiša phihlelo ya yo e kilego ya ba moromiwa yo a tlaišwago ke bolwetši bjo bo tsebjago go tša kalafo gore ke tšharakano ya megalatšhika ya monagano [manic-depressive psychosis].

Monna yo a tšwago Tokyo o boletše ka lengwalong leo le bego le lebišitšwe go bagatiši ba makasine wo gore: “Dika tše di hlalositšwego di ntshwanela ka go lebanya. Ka gona ke ile ka ya sepetlele sa tša menagano gomme ka lemoga gore ke na le tšharakano ya monagano. Ngaka yeo e ilego ya ntlhahloba e ile ya makala. E rile, ‘Batho ba ba nago le bolwetši bjo ga se gantši ba naganago gore ba a babja.’ Ke ile ka thušwa go utolla bolwetši pele ga ge bo ka ba kotsi kudu.”

Dimilione tša batho go dikologa lefase di holega ka ditsela tše dintši ka go bala tokollo e nngwe le e nngwe ya Morokami le makasine wo e lego mogwera wa wona, Phafoga! Ba hwetša dihlogo e le tše di rutago le go kgotsofatša. Makasine wa Morokami ga bjale o gatišwa ka maleme a 141, gomme Phafoga! e gatišwa ka maleme a 86. Le wena o tla thabela go bala Morokami le Phafoga! ka mehla.