Re Dira Sohle Seo re ka se Kgonago!

“DIRA sohle seo o ka se kgonago.” Keletšo yeo e šomago e kile ya newa moromiwa ke setho sa Sehlopha se Bušago sa Dihlatse tša Jehofa. Eupša ke ka baka la’ng a nea keletšo e bjalo ya motheo go modiredi yo a nago le phihlelo? Na baromiwa ka moka ga se batho bao ba nago le sebete bao letšatši le letšatši ba lebeletšanago le ditšhitšhidi, dinoga, phišo, bolwetši le mathata a fapa-fapanego?

Ge e le gabotse, baromiwa ba Dihlatse tša Jehofa e fo ba banna le basadi bao ba tlwaelegilego, Bakriste bao lerato la bona le le tseneletšego la go rata Jehofa le magagabo bona le ba tutueleditšego go hlankela dinageng di šele. Ba katanela go hlankela Jehofa ka mo ba ka kgonago ka gona, ba botile yena bakeng sa go ba nea matla.​—Ba-Efeso 6:10.

Bakeng sa go ithuta ka mo go oketšegilego ka modiro wa boromiwa, anke re naganeng eka re fetša letšatši re etetše legae le legolo la baromiwa ka Afrika Bodikela.

Letšatši Modirong wa Boromiwa

E šetše e le 7:​00 a.m. Re fihlile legaeng la boromiwa gabotse ka nako ya go tšea karolo poledišanong ya temana ya Lengwalo bakeng sa letšatši. Baromiwa ba lesome ba re amogela ka borutho gomme ba re direla bodulo tafoleng ya difihlolo. Ge re dutše re boledišana, yo mongwe wa baromiwa yo a bilego kabelong ya gagwe ka nywaga e mentši, o thoma go laodiša phihlelo e kgahlišago yeo a bilego le yona bodireding. Eupša poledišano ya rena e ile ya kgaotša ge modula-setulo wa poledišano letšatšing leo a gopotša sehlopha seo se thabilego gore ke nako ya go hlahloba temana ya letšatši. Poledišano e tla swarwa ka se-Fora. Gaešita le ge re sa bolele leleme leo, ke mo go kwagalago go ya ka mokgwa wo ba itlhalosago ka gona gore baromiwa ba bao ba belegetšwego dinageng di šele ba dira gabotse kudu bakeng sa go tseba leleme.

Ka morago ga poledišano ya Mangwalo, go na le thapelo e tšwago pelong, ke moka ke nako ya sefihlolo. Ge re dutše re thabela di-cereal tšeo di lekanego, moromiwa yo a dutšego kgaufsi le rena o re kgothaletša go segelela panana ka gare ga tšona. Re mo hlalosetša gore ga re rate dipanana, eupša o holofetša gore re tla fetoša menagano ya rena ge re jele dipanana tšeo di bjalwago tikologong yeo. Ka gona re tsenya ditsekana tše sego kae ka gare ga di-cereal tša rena. O nepile gakaakang! Dipanana tše di bose​—di bose bjalo ka ice cream! Gomme re kgolwa gore borotho bja mohuta wa se-Fora bjoo bo bego bo sotšwe bo be bo pakilwe e sa le mesong kudu lebenkeleng le lenyenyane go selaganya setarata go tloga legaeng la baromiwa.

Ka morago ga sefihlolo, re tlo fetša letšatši le banyalani ba baromiwa, bao re tla ba bitšago Ben le Karen. Re be re kwele ka tšhemo yeo e nago le tšweletšo nageng ye ya ka Bodikela bja Afrika, gomme re fagahletše go kgonthišetša dipego.

Ge re fihla boema-peseng, re hwetša batho ba bantši ba letile. Go se go ye kae, bagwera ba rena  ba baromiwa ba swere poledišano yeo e phelago le mosadi le morwa wa gagwe ka taba ya Beibele. Ka ge re sa tsebe se-Fora, re be re ka fo ema moo gomme ra myemyela! Ge mosadi a dutše a amogela dikopi tša Morokami le Phafoga!, ke ge pese e fihla, ke moka yo mongwe le yo mongwe a leka go tsena ka gare ga yona, ka moka ka nako e tee! Ge re katanela go tsena ka peseng, lešaba le lentši le re kgorometša ka morago. Ke tlhohlo go dula re itshwareleditše tseleng ya rena ya go ya morago-rago ka peseng. Ge mootledi a thoma a tloša pese, re a itshwareletša bakeng sa go boloka maphelo a rena. Nako le nako, pese e a kgahlametšega boema-peseng, gomme batho ba bantši kudu ba a pateletšana. Re myemyela le bao re nametšego gotee le bona gomme le bona ba re myemyelela. Re be re duma gakaakang ge re ka boledišana le bona!

Ge pese e dutše e kitima, re lebelela ka ntle ka lefasetere re bona leema-ema setarateng. Basadi ba babedi ba sepela gotee ka merwalo e boima dihlogong tša bona. Yo mongwe wa bona o swareleditše nkgo e kgolo ya meetse. Monna yo a rekišago o phatlaladitše kobo tsejaneng ya maoto gomme godimo ga yona o beile dilo tša go kgabiša tše sego kae tšeo a holofelago go di rekiša. Kae le kae go na le batho bao ba rekago goba ba rekišago mo e ka bago selo se sengwe le se sengwe seo se ka rekwago goba sa rekišwa.

Kapejana Ben, yo a emego kgaufsi le nna o thoma go lemoga gore go na le selo se se mo thobolago leotong. E ka ba eng? Pese e tletše, eupša ke seo se mo thobola gape. O kgona go lebelela fase. Mokotleng wo o lego leotong la gagwe go na le lepidibidi leo le phelago leo ka dinako tše dingwe le kgonago go ntšha hlogo ya lona ka mokotleng gomme la mo thobola! Ben o hlalosa gore mohlomongwe mong wa lona o ya go le rekiša mmarakeng.

Ge re fihla tšhemong ya rena, re thabišwa ke go lemoga gore re tla be re etela tikologo ya mohuta wa se-Afrika. Ge re batamela ntlo ya pele, Ben o opa magofsi ka matla bakeng sa go phafoša mong wa ntlo. Wo ke mokgwa woo batho ba “kokotago mojako” ka gona karolong ye ya lefase. Lesogana le a tšwelela gomme le hlalosa gore le swaregile eupša le re kgopela gore re boe ka moragonyana mesong.

Ntlong e latelago, re ile ra kopana le mosadi yo a bolelago mmolelo woo Ben a sa o kwešišego. O bitša morwa wa gagwe gomme o mo kgopela gore a fetolele seo Ben a se bolelago. Ge Ben a feditše, mosadi o amogela poroutšha yeo e nago le dihlogo tša Beibele gomme morwa wa gagwe o holofetša gore o tla mo hlalosetša yona. Ntlong ya boraro, go na le bafsa ba mmalwa bao ba dutšego ka pele ka jarateng. Ba babedi ba bona kapejana ba tloga ditulong tša bona e le gore baeng ba ka dula fase. Go latela poledišano e phelago mabapi le go dirišwa ga sefapano borapeding. Go dirwa ditokišetšo bakeng sa go tšwetša pele poledišano bekeng e latelago. Ga bjale ke nako ya go etela gape lesogana leo le bego le swaregile leo re gahlanego le lona ntlong ya mathomo. Ka tsela e itšego o be a šetše a kwele ka poledišano ya rena le bafsa ba setarateng sona seo kua tlase. O na le dipotšišo tše dintši tša Beibele gomme a kgopela go ba le thuto ya Beibele. Ka morago ga go lebelela lenaneo la gagwe, Ben o dumela go boela ka nako e swanago bekeng e tlago. Ge ba boela legaeng la baromiwa bakeng sa dijo tša mosegare, Ben le Karen ba hlalosa gore ba swanetše go rulaganya modiro wa bona wa thuto ya Beibele ka kelohloko kudu ka gobane ba ka thoma gabonolo dithuto tše oketšegilego tša Beibele go feta tšeo ba ka kgonago go di swara.

Re ba reta ka go bolela ga bona ka go thelela se-Fora. Ben o hlalosa gore yena le Karen ba be ba dutše ba hlankela e le baromiwa ka nywaga e tshela, gomme ba thoma go ikwa ba phuthologile ka leleme la se-Fora. Ba re kgonthišetša gore go ithuta leleme le lefsa go be go se bonolo, eupša go phegelela go tšweleditše meputso.

Ka 12:30 p.m., baromiwa ka moka ba bokana tafoleng bakeng sa dijo tša mosegare. Re ile ra tseba gore letšatši le lengwe le le lengwe, moromiwa yo a fapanego o abelwa go lokišeletša dijo tša mesong le mantšiboa le go hlatswa dibjana ka morago ga moo. Lehono, yo mongwe  wa baromiwa o apeile dijo tšeo di rothišago mare e lego kgogo yeo e gadikilwego le di-chips tšeo di gadikilwego gotee le salate ya tamati​—tšeo a di kgonago kudu!

Dithulaganyo tša Ben le Karen ke dife bakeng sa mantšiboa? Ba hlalosa gore yo mongwe le yo mongwe o tšhabela letšatši go tloga ka 1:​00 p.m go ya go 3:​00 p.m., ka gona baromiwa ka kakaretšo ba diriša karolo ya nako yeo bakeng sa go ithuta goba go robala. Ga re makale ge Karen a re botša gore ga go tšee nako e telele gore baromiwa ba bafsa ba tlwaele mokgwa wo!

Ka morago ga go robala, re boela bodireding bja tšhemo. Motho yo a thabelago yoo Ben a ilego a leka ka makga a mantši go ikopanya le yena o sa dutše a se gona gae, eupša masogana a mabedi a tla mojako ge Ben a opa magofsi. Ba re botša gore mong wa ntlo o boletše ka maeto a Ben gomme a ba kgothatša ka matla gore ba hwetše thušo ya go ithuta Beibele e lego Tsebo e Išago Bophelong bjo bo sa Felego. Re thabela go ba tlogelela kopi ya puku yeo. Ka morago ga moo, re namela pese yeo e tlago go re iša tikologong yeo Karen a tlago go swara thuto le mosadi yo a thabelago.

Ge re dutše re sepela ditarateng tšeo di tletšego kudu, Karen o re botša gore o ile a kopana le mosadi yo ka letšatši le lengwe ge bobedi bja bona ba be ba sepela ka thekisi le banamedi ba bangwe ba sego kae. Karen o ile a nea mosadi pampišana gore a e bale ge ba dutše ba le leetong. Mosadi o ile a bala pampišana gomme a kgopela mohuta o mongwe. O ile a bala e nngwe yeo ka kgahlego e kgolo kudu. Mafelelong a leeto, Karen o ile a dira dithulaganyo tša go etela mosadi legaeng la gagwe gomme a thoma thuto ya Beibele e atlegago ka poroutšha ya Ke Eng Seo Modimo a se Nyakago go Rena? Lehono, Karen o ya go akaretša thuto ya bohlano ka poroutšheng yeo.

Re thabetše kudu letšatši la rena tirelong ya tšhemo, eupša re na le dipotšišo tšeo di sa šaletšego mabapi le modiro wa boromiwa. Batho ba re ba etetšego ba re kgonthišetša gore ge re boela gae, ba tla lokišetša dijo tše bonolo e le gore ba ka araba dipotšišo tša rena.

Kamoo ba Bolokago Khutšo

Ge re dutše re e-ja mae ao a gadikilwego, borotho bja se-Fora le tšhese, re ithuta ka mo go oketšegilego ka bophelo bja baromiwa. Mošupologo ka kakaretšo ke letšatši leo baromiwa ba khutšago ka lona goba go šetša ditaba tša motho ka noši. Bontši bja baromiwa ba fetša nako e itšego ka letšatši leo ba ngwalela malapa a gabo bona le bagwera. Ditaba tše di tšwago gae di bohlokwa kudu go bona, gomme baromiwa ba thabela go romela le go amogela mangwalo.

Ka ge baromiwa ba dula le go šoma ba bapelane, go bohlokwa gore ba boloke poledišano e botse ka go boledišana le baromiwa gotee le bona le ka go ahla-ahla ditaba tša moya. Go fihla ntlheng yeo, go tlaleletša go go boloka lenaneo la ka mehla la thuto ya Beibele ya motho ka noši, Mošupologo o mongwe le o mongwe baromiwa ba ithuta Beibele gotee le makasine wa Morokami. Ben o bontšha gore ge baromiwa bao ba tšwago ditlogong tše di fapa-fapanego ba dula gotee, diphapano tše dinyenyane tša go se swane ga di phemege, eupša tokišetšo ya moya ya thuto ya lapa e ba thuša go boloka boemo bja khutšo le bja botee. Gape o gatelela gore go a thuša go se itšee o le bohlokwa kudu.

Boikokobetšo le bjona bo bohlokwa. Baromiwa ba rongwa go yo hlankela e sego go  hlankelwa. Bagwera ba rena ba lemoga gore e nngwe ya dilo tše thata kudu go di bolela ka leleme le ge e le lefe ke gore “Ke kgopela tshwarelo,” ka mo go kgethegilego ge motho a kgopela tshwarelo bakeng sa selo se itšego seo a se boletšego goba a se dirilego a se a ikemišetša. Ben o re gopotša ka mohlala wa Beibele wa Abigaile, yoo a ilego a kgopela tshwarelo bakeng sa mokgwa wa monna wa gagwe wa bošoro gomme ka go rialo a letefatša boemo bjo bo ka bego bo ile bja lebiša masetla-pelong. (1 Samuele 25:​23-28) Bokgoni bja go “dula ka khutšo” ke karolo e bohlokwa ya go ba moromiwa yo mobotse.​—2 Ba-Korinthe 13:​11, NW.

Gatee ka kgwedi baromiwa ba swara seboka bakeng sa go ahla-ahla ditaba tšeo di kgomago lapa gotee le go beakanya diphetogo. Ka morago ga moo, bohle ba thabela dijo tša go fološetša tše kgethegilego. Se go rena se bonala e le tokišetšo​—yeo e šomago kudu​—le e bose.

Ge re feditše go ja dijo tša mantšiboa, re sepela-sepela bakeng sa go boga meago ya legae la boromiwa ka bokopana. Re lemoga gore, gaešita le ge legae e le la bobotlana, baromiwa ba a dirišana bakeng sa go le boloka le hlwekile e le ka kgonthe. Go na le setšidifatši, motšhene wa go hlatswa diaparo le setofo. Karen o re botša gore dinageng tša molatšatšing tše bjalo ka ye ya Afrika Bodikela, tshepedišo ya go laola go tonya le go fiša ga moya le yona e ka hwetšagala. Marobalo a swanetšego, dijo tša phepo le megato ya temogo e bonolo bakeng sa tlhokomelo ya tša maphelo di thuša baromiwa go dula ba phetše gabotse le go ba bao ba atlegago.

Lebiša Tlhokomelo Dilong Tšeo di Nepagetšego

Re ile ra kgahlišwa ke dilo tšeo re di bonego ka moka. Na e ka ba e le gore modiro wa boromiwa o re swanetše? Re ka kgonthišega bjang? Bao re ba etetšego ba re nea dilo tše mmalwa tšeo re swanetšego go naganišiša ka tšona.

Sa pele, ba re botša gore baromiwa ba Bakriste ga ba tšwe bakeng sa go iteka mahlatse. Ba tsoma batho ba dipelo tše di botegago bao ba nyakago go ithuta ka dikholofetšo tše di makatšago tša Modimo. Baromiwa ba neela mo e ka bago diiri tše 140 ka kgwedi tirelong ya tšhemo, ka gona lerato la go rata bodiredi le bohlokwa kudu.

‘Eupša,’ re ipotšiša gore ‘go thwe’ng ka dinoga, mekgaditswane le ditšhitšhidi?’ Le ge tše di ka hwetšwa dikabelong tše dintši tša boromiwa, Ben o re botša gore baromiwa ba a di tlwaela. O oketša ka gore kabelo e nngwe le e nngwe ya boromiwa e na le botse bja yona bja moswana-noši, gomme ge nako e dutše e tšwela pele baromiwa ba lebiša tlhokomelo dikarolong tše di thabišago tša kabelo ya bona. Maemo ao pejana a ka bego a ile a lebelelwa e le a “fapanego” kapejana e ba ao a tlwaelegilego, gomme mabakeng a mangwe gaešita le go ba ao a thabišago. Moromiwa yo mongwe yo a ilego a hlankela Afrika Bodikela ka nywaga e mentši pele maikarabelo a motho ka noši a mo gapeletša go boela gae o boletše gore go be go le thata go yena go tlogela kabelo ya gagwe go feta go tlogela naga ya gabo nywaga pejana. Kabelo ya gagwe ya boromiwa e be e fetogile legae la gagwe.

Na o Itokišitše?

Ben le Karen ba be ba re neile mo gontši moo re ka naganišišago ka gona. Go thwe’ng ka wena? Na o kile wa naganišiša ka go hlankela o le moromiwa tšhemong e šele? Ge e ba go le bjalo, o ka be o le kgaufsi le pakane yeo go feta ka moo o bego o nagana ka gona. E nngwe ya dilo tša motheo tšeo di nyakegago ke go ba le lerato la go rata bodiredi bja nako e tletšego le go thabela mošomo wa go thuša batho. Gopola, baromiwa ga se batho ba nago le matla a fetago a tlwaelegilego, eupša ke banna le basadi bao ba tlwaelegilego. Ba dira sohle seo ba ka se kgonago go phetha modiro o bohlokwa kudu.

[Diswantšho go letlakala 27]

Letšatši le lengwe le le lengwe le thoma ka poledišano ya temana ya Beibele

[Diswantšho go letlakala 29]

Bophelo o le moromiwa e ka ba bjo bo kgotsofatšago kudu

[Seswantšho go letlakala 29]

Diswantšho tša Afrika