Senotlelo se Išago Lefaseng le le Thabilego

MAKASINE wa Time o rile: “Motho yo e bilego yo matla ka go fetišiša​—e sego feela nywaga-keteng ye e mebedi eupša historing ka moka ya batho​—e bile Jesu wa Natsaretha.” Ge Jesu a be a le lefaseng, dikete-kete tša batho ba dipelo tše botegago ba ile ba lemoga, e sego feela bogolo bja gagwe, eupša go kgomega ga gagwe ka ba bangwe. Ka gona, ga go makatše ge ba ile ba nyaka go mo dira kgoši. (Johane 6:​10, 14, 15) Lega go le bjalo, ka ge go hlalositšwe sehlogong se se fetilego, Jesu o ile a gana go akaretšwa dipolitiking.

KARABELO ya Jesu e be e theilwe bonyenyane mabakeng a mararo: pono ya Tatagwe ka ditsela tšeo boipušo bja batho bo bontšhwago ka gona, bjo bo akaretšago pušo ya batho; go lemoga ga Jesu gore go na le madira a matla ao a sa bonagalego, ao a šomago gaešita le malebana le maiteko a kaone-kaone a motho a go buša; le morero wa Modimo wa go hloma mmušo wa legodimong bakeng sa go buša lefase ka moka. Ge re dutše re hlahloba dintlha tše tše tharo ka mo go tseneletšego, re tla bona lebaka leo ka lona maiteko a batho a go dira lefase gore e be lefelo le lekaone a paletšwego. Re tla bona gape le gore katlego e ka fihlelelwa bjang.

Na Batho ba ka Ipuša?

Ge Modimo a be a bopa batho, o ile a ba nea matla a go laola mehuta-huta ya diphoofolo. (Genesi 1:​26) Eupša batho ba be ba le ka tlase ga bogoši bja Modimo. Monna wa pele le mosadi ba be ba swanetše go kgonthišetša boikokobetšo bja bona go Modimo ka go kwa mabapi le go se je seenywa sa sehlare se itšego, e lego “sehlare sa xo tseba botse le bobe.” (Genesi 2:​17) Ka manyami, Adama le Efa ba dirišitše boemo bja bona bja go ba dibopiwa tše di nago le tokologo ya go ikgethela gampe gomme ba se kwe Modimo. Go ja seenywa se se ileditšwego e be e se feela tiro ya bohodu. Go theile  borabele malebana le bogoši bja Modimo. Mongwalo wa ka tlase go Genesi 2:​17 ka go The New Jerusalem Bible o bolela gore Adama le Efa ba dirile boipolelo “bja go itaola ka mo go feletšego boitshwarong moo ka gona motho a ganago go amogela boemo bja gagwe e le sebopiwa . . . Sebe sa mathomo e bile go hlasela bogoši bja Modimo.”

Ka baka la dikgang tše bohlokwa tša boitshwaro tše di akaretšwago, Modimo o ile a dumelela Adama le Efa le ditlogolo tša bona go ikgethela tsela ya bona ya bophelo, gomme ba ile ba hloma ditekanyetšo tša bona mabapi le seo se lokilego le seo se fošagetšego. (Psalme 147:​19, 20; Ba-Roma 2:​14) Ge e le gabotse, boitekelo bja motho bja go ipuša bo thomile ka nako yeo. Na bo atlegile? Ka go thekgwa ke nywaga e dikete ya ditiragalo tše fetilego, re ka re aowa! Mmoledi 8:9 e re: ‘Motho o buša motho gore a mo senye.’ Pego ye e nyamišago ya boipušo bja motho e hlatsela go rereša ga Jeremia 10:​23, e rego: “Morêna, ke a tseba; motho tsela y’axwe xa’ e buše; le monna mo a yaxo xa’ ikiše, le xe a xata a tiiša.” Histori e hlatsetše gore batho ga ba na matla a go buša ka katlego ka ntle le Mmopi wa bona.

Jesu o ile a dumelelana le se ka botlalo. Go ipuša ka ntle le Modimo e be e le mo go sa kgahlišego go yena. O rile: “Xa ke dire selô ka la-ka, . . . ke dira se se . . . kxahlaxo [Modimo].” (Johane 4:​34; 8:​28, 29) Ka gona, ka ntle le tumelelo e tšwago go Modimo ya go amogela bogoši go tšwa bathong, Jesu e bile ga se a ka a nagana le go bo amogela. Lega go le bjalo, se ga se bolele gore o be a sa rate go thuša magagabo. Ka mo go fapanego, o dirile sohle se se lego matleng a gagwe go thuša batho go hwetša lethabo le legolo nakong yeo le nakong e tlago. O ile a ba a gafa bophelo bja gagwe bakeng sa batho. (Mateo 5:​3-11; 7:​24-27; Johane 3:​16) Eupša Jesu o be a tseba gore “tšohle di na le mohla wa tšôna,” go akaretša le nako ya Modimo ya go hloma bogoši bja gagwe go batho. (Mmoledi 3:1; Mateo 24:​14, 21, 22, 36-39) Lega go le bjalo, gopola gore kua Edene batswadi ba rena ba pele ba ile ba ineela thatong ya sebopiwa se kgopo sa moya seo se boletšego ka noga e bonagalago. Seo se re tliša lebakeng la bobedi leo ka lona Jesu a sa kago a akaretšwa dipolitiking.

Mmuši wa Lefase yo a sa Tsebjego

Beibele e re botša gore, Sathane o ile a holofetša Jesu “mebušô ka moka ya lefase le letaxô la yona” ka gore a dire tiro e tee ya borapedi. (Mateo 4:​8-10) Go ba gona, Jesu o be a holofeditšwe pušo ya lefase​​—eupša go ya ka maemo a Diabolo. Jesu ga se a ka a ineela tekong ye. Lega go le bjalo, na e be e le teko e le ka kgonthe? Na Sathane o be a ka dira kholofetšo e bjalo ya boikgantšho e le ka kgonthe? Ee, ka gobane Jesu o biditše Diabolo “mmuši wa lefase,” gomme moapostola Paulo o mo hlalositše e le “modimo wa  lefase lé.”—Johane 14:​30; 2 Ba-Korinthe 4:4; Ba-Efeso 6:12.

Go ba gona, Jesu o be a tseba gore Diabolo ga a kgahlegele batho dilo tše dibotse e le ka kgonthe. O hlalositše Sathane e le “mmolai” e bile e le “tatago maaka le wa sohle se e lego maaka.” (Johane 8:​44, The Amplified Bible) Go molaleng gore lefase ‘le le rapaletšego matleng’ a moya o bjalo o kgopo le ka se tsoge le thabile e le ka kgonthe. (1 Johane 5:​19) Eupša Diabolo a ka se be le matla a a taolo ka mo go sa felego. Jesu, yo ga bjale e lego sebopiwa se matla sa moya, go se go ye kae o tla tloša Sathane gomme a fediša tutuetšo ya gagwe ka mo go feletšego.​—Ba-Hebere 2:​14; Kutollo 20:​1-3.

Sathane ka boyena o tseba gore matšatši a gagwe e le mmuši wa lefase a fela ka lebelo. Lega go le bjalo, o ikemišeditše kudu go dira maiteko ohle kamoo a ka kgonago ka gona gore a senye batho go fihlela ba se sa kgona go loka, bjalo ka ge a dirile pele ga Meetse-fula a mehleng ya Noage. (Genesi 6:​1-5; Juda 6) Kutollo 12:​12 e re: “Ba madi-mabe ké lena ba Le axilexo lefaseng le lewatleng, xobane Diabolo ó theoxetše xo lena à tuka boxale ka kudu; ó tseba xe a sa šaletšwe ke lebakanyana fêla.” Boporofeta bja Beibele le ditiragalo tša lefase di bontšha gore re phela kgaufsi le mafelelo a ‘nako ye e kopana.’ (2 Timotheo 3:​1-5) Kimologo ga bjale e kgaufsi.

Mmušo wo o Tlago go Tliša Lethabo

Lebaka la boraro leo ka lona Jesu a ilego a emela kgole le dipolitiki ke gore o be a tseba gore nakong e beilwego e tlago, Modimo o be a tla hloma mmušo wa legodimong wa go buša godimo ga lefase. Beibele e bitša mmušo wo gore ke Mmušo wa Modimo, gomme e be e le sehlogo se segolo sa thuto ya Jesu. (Luka 4:​43; Kutollo 11:​15) Jesu o rutile barutiwa ba gagwe go rapelela Mmušo woo gore o tle, gobane e tla ba feela ka tlase ga pušo ya wona moo ‘thato ya Modimo e tlago go dirwa mo lefaseng bjalo ka ge e dirwa legodimong.’ (Mateo 6:​9, 10) O ka ipotšiša, ‘Ge e ba Mmušo wo o tla buša godimo ga lefase ka moka, go tla direga’ng ka mebušo yeo e hlomilwego ke batho?’

Karabo e hwetšwa go Daniele 2:​44: “Mehleng ya dikxoši tšeo [tše di bušago bofelong bja tshepedišo ya gona bjale], ké mo Modimo a tl’o xo tsoša mmušô wo o ka se kexo wa šwalalanywa neng le neng, wo o ka se kexo wa selêla xo sethšaba se sengwê. O tlo phšatla mebušô e mengwê ka moka [yeo e hlomilwego ke batho] wa e fediša; ge e le wôna, o tlo êma xo ya xo ile.” (Mongwalo o sekamego ke wa rena.) Ke ka baka la’ng Mmušo wa Modimo o tla swanelwa ke go “phšatla” mebušo ya lefase? Ka gobane e phegelela go tšwetša pele moya wa go nyatša Modimo wa boipušo wo o ilego wa tšweletšwa ke Sathane morago kua tšhemong ya Edene. Go okeletša go go ganetšana le dikgahlego tše kaone tša batho, bao ba katanelago go tšwetša pele moya woo ba ipea boemong bja go thulana le Mmopi. (Psalme 2:​6-12; Kutollo 16:​14, 16) Ka gona, re swanetše go ipotšiša, ‘Na re ba pušo ya Modimo goba re lwantšhana le yona?’

Ke Bogoši bja Mang bjo o Tlago go bo Kgetha?

E le gore a thuše batho go dira phetho e theilwego tsebong ya therešo mabapi le pušo, Jesu o laetše barutiwa ba gagwe gore ba bolele “ditaba . . . tše dibotse tša mmušo . . . lefaseng ka moka leo go agilwego go lona gore e be bohlatse go ditšhaba ka moka” pele bofelo bja tshepedišo ya gona bjale bo fihla. (Mateo 24:​14, NW) Ke bomang lehono bao ba tsebjago lefaseng ka bophara ka go bolela ka Mmušo wa Modimo? Ke Dihlatse tša Jehofa. Ge e le gabotse, letlakala la ka ntle la makasine wo ke kgale le e-na le mantšu a rego “O Tsebatša Mmušo wa Jehofa.” Lehono, Dihlatse tše ka bago dimilione tše tshela dinageng tša ka godimo ga 230 di thuša batho go hwetša tsebo e nepagetšego ya Mmušo woo. *

Ditšhegofatšo Bakeng sa Balata ba Mmušo

Jesu o be a fela a dira dilo ka tsela ya Modimo. Ka gona, go e na le go kgetha tsela ya boipušo le go leka go thekga goba go tšwetša pele tshepedišo ya gona bjale ya dilo ka tsela ya dipolitiki, o ile a  šoma ka thata go tšwetša dikgahlego tša Mmušo wa Modimo pele, e lego tharollo e nnoši bakeng sa mathata a lefase. Ka baka la potego ya gagwe e sa kwanantšhego, o ile a putswa ka sedulo sa letago sa bogoši legodimong e le Kgoši ya kgonthe ya Mmušo woo. A moputso o kgahlišago gakaakang wa go ikokobeletša ga gagwe Modimo!​—Daniele 7:​13, 14.

Ba dimilione lehono bao ba ekišago Jesu ka go etiša Mmušo wa Modimo pele le ka go ikokobeletša thato ya Modimo le bona ba tla thabela mpho e kgahlišago​—tokelo ya go ba balata ba lefaseng ba Mmušo wa Modimo. (Mateo 6:​33) Ka tlase ga pušo ya wona e lerato, ba tla išwa phethegong, ka tebelelo ya bophelo bjo bo sa felego. (Kutollo 21:​3, 4) Johane wa Pele 2:​17 e re: “Lefase le a feta, le yôna kxanyoxô ya lôna. E a tl’o xo dula à le xôna xo ya xo ile, ké eo a diraxo tše Modimo a di rataxo.” E tla ba mo go thabišago gakaakang go dula mo ka mo go sa felego, ge Sathane le balatedi ba gagwe ba tla be ba fedišitšwe gomme lefase le fetošitšwe paradeise ya lefase ka bophara yeo e lokologilego botšhabeng bjo bo aroganyago, ditshepedišong tše di gobogilego tša tša kgwebo le bodumeding bja maaka!​—Psalme 37:​29; 72:16.

Ee, Mmušo wa Modimo ke senotlelo sa kgonthe se išago lefaseng le le thabilego e le ka kgonthe, gomme molaetša wo o o tsebatšago o hlaloswa ka tshwanelo e le ditaba tše dibotse. Ge e ba o sešo wa dira se, nakong e tlago ge yo mongwe wa Dihlatse tša Jehofa a etela legaeng la gago, ke ka baka la’ng o sa amogele ditaba tše tše dibotse tšeo o di tlišeditšwego?

[Mengwalo ya ka tlase]

[Diswantšho go letlakala 5]

Histori e hlatsela gore batho ba ka se kgone go buša ka katlego ka ntle le Modimo

[Seswantšho go letlakala 5]

Sathane o be a ka holofetša Jesu “mebušô ka moka ya lefase,” ka gobane o buša ‘tshepedišo ya gona bjale ya dilo’

[Diswantšho go letlakala 7]

Jesu o rutile gore ka tlase ga thulaganyo ya Mmušo wa Modimo, lefase e tla ba lefelo le le kgahlišago