‘Aparang go se Fele Pelo’

“Aparang kxauxêlô . . . le xo se fêle pelo.”​—BA-KOLOSE 3:12.

1. Anega mohlala o mobotse wa go se fele pelo.

RÉGIS yo a dulago ka borwa-bodikela bja Fora, o bile Hlatse ya Jehofa e kolobeditšwego ka 1952. Mosadi wa gagwe o tšere nywaga e mentši a dira sohle seo a ka se kgonago go šitiša maiteko a gagwe a go hlankela Jehofa. O ile a leka go phunya maotwana a koloi ya gagwe bakeng sa go mo thibela go ba gona dibokeng, gomme lebakeng le lengwe o ile a ba a mo šala morago ge a be a bolela molaetša wa Beibele ka ntlo le ntlo, a dira metlae ka yena ge a dutše a bolela le batho ka ditaba tše dibotse tša Mmušo. Go sa šetšwe tlaišo ye e sa kgaotšego, Régis o ile a tšwela pele a sa fele pelo. Ka gona, Régis ke  mohlala o mobotse bakeng sa Bakriste ka moka, ka ge Jehofa a nyaka gore barapedi ba gagwe ka moka e be ba sa felego pelo ditirišanong tša bona le ba bangwe.

2. Tlhaloso e lebanyago ya lentšu la Segerika bakeng sa “go se fele pelo” ke efe, gomme lentšu le le bolela’ng?

² Lentšu la Segerika bakeng sa “go se fele pelo” ge e le gabotse le bolela “botelele bja moya.” Beibele e fetolela lentšu le e le “xo se fêle pelo” ka makga a 11, ka makga a mabedi e le ‘go kgotlelela’ gomme gatee e le “pelo-telele.” Bobedi mantšu a Sehebere le a Segerika ao a fetoletšwego e le “go se fele pelo” a akaretša kgopolo ya kgotlelelo, go itshwara le go diega go galefa.

3. Pono ya Bokriste ka go se fele pelo e be e fapane bjang le ya ba-Gerika ba lekgolong la pele la nywaga?

³ Ba-Gerika ba lekgolong la pele la nywaga ba be ba sa lebelele go se fele pelo e le go loka. Lentšu ka bolona le ka mohla ga se la ka la dirišwa ke bo-radifilosofi ba ma-Stoiki. Go ya ka seithuti sa Beibele William Barclay, go se fele pelo “ke leganetši la go loka ga Segerika,” moo gare ga dilo tše dingwe go bego go tlaleletša “go gana go kgotlelela thogako goba kgobatšo le ge e le efe.” O re: “Go ba-Gerika monna wa kgonthe e be e le monna yo a bego a tla dira sohle bakeng sa go tsoma tefetšo. Go Bakriste monna wa kgonthe ke yoo gaešita le ge a kgona go tsoma tefetšo a ganago go dira bjalo.” Ba-Gerika ba ka be ba ile ba tšea go se fele pelo e le leswao la bofokodi, eupša mo bjalo ka mabakeng a mangwe, “tša bošilo tšeo di tšwaxo xo Modimo, di phala batho ka bohlale. Le tša phôkôlô di tšwaxo xo Modimo, di phala batho ka matla.”​—1 Ba-Korinthe 1:25.

Mohlala wa Kriste wa go se Fele Pelo

4, 5. Jesu o beile mohlala ofe o mobotse wa go se fele pelo?

⁴ Kriste Jesu e le yena feela yo a latelago Jehofa, o beile mohlala o mobotse wa go se fele pelo. Ge a be a le ka tlase ga kgateletšego e kgolo, Jesu o ile a bontšha go itshwara mo go makatšago. Go ile gwa porofetwa ka yena gore: “A tlaišwa, Yêna a ikokobetša, a se kê a ba a ahlama, a etša kwanyana e išwaxo thlabong, a etša nku xe e ikhomolêla pele xa ba e kotaxo, a se kê a ba a ahlama.”​—Jesaya 53:7.

⁵ A go se fele pelo mo go kgahlišago gakaakang moo Jesu a go bontšhitšego bodireding bja gagwe ka moka mo lefaseng! O ile a kgotlelela dipotšišo tša boradia tša manaba a gagwe le maroga a baganetši ba gagwe. (Mateo 22:​15-46; 1 Petro 2:​23) O be a sa felele barutiwa ba gagwe pelo, gaešita le ge ba ile ba ngangišana leboelela mabapi le gore yo mogolo ke mang. (Mareka 9:​33-37; 10:​35-45; Luka 22:​24-27) Gomme ke go itshwara mo go kgahlišago gakaakang moo Jesu a go bontšhitšego bošegong bja go ekwa ga gagwe ge Petro le Johane ba be ba robala ka morago ga go botšwa gore ba “itišê”!​—Mateo 26:​36-41.

6. Paulo o ile a holwa bjang ke go se fele pelo ga Jesu, gomme re ithuta’ng go se?

⁶ Ka morago ga lehu la gagwe le tsogo, Jesu o ile a tšwela pele a sa fele pelo. Moapostola Paulo o ile a ela se hloko ka mo go kgethegilego, ka ge a be a kile a ba motlaiši wa Bakriste. Paulo o ngwadile gore: “Ké taba ye e tiilexo, ye e swanetšexo xo amoxêlwa ka botlalô, yé ya xore Jesu Kriste ó tlile lefaseng xore a phološê ba-dira-dibe, bao ke lexo thwadi ya bôná. Fêla, ke xauxetšwe, xore ka nna ke lexo thwadi ya ba-dira-dibe Jesu Kriste a bônaxatšê xôna xo se fêle pelo xa paala, xore bohle ba ba tl’o xo dumêla ba swanthšetšwê ka nna, ba išwê bophelong byo bo sa felexo.” (1 Timotheo 1:​15, 16) Go sa šetšwe kamoo tsela ya rena ya bophelo ya nakong e fetilego e bego e le ka gona, ge e ba re thea tumelo ya rena go Jesu, a ka se re felele pelo​—le ge go ba gona a letetše gore re tšweletše “medirô e swanêlaxo thsokoloxô.” (Ditiro 26:​20; Ba-Roma 2:4) Melaetša yeo Kriste a e rometšego go diphuthego tše šupago kua Asia Minor e bontšha gore le ge a sa fele pelo, o lebeletše gore re bontšhe tšwelopele.​—Kutollo, dikgaolo 2 le 3.

Seenywa sa Moya

7. Go se fele pelo go tswalana bjang le moya o mokgethwa?

⁷ Kgaolong ya bo-5 ya lengwalo la gagwe le le yago go ba-Galatia, Paulo o bontšha phapang magareng ga mediro ya nama le dienywa tša  moya. (Ba-Galatia 5:​19-23) Ka ge go se fele pelo e le se sengwe sa dika tša Jehofa, seka se se tšwa go yena gomme ke seenywa sa moya wa gagwe. (Ekisodo 34:​6, 7) Ka kgonthe, go se fele pelo go maemong a bone tlhalosong ya Paulo ya dienywa tša moya, gotee le “leratô, le lethabô, le moláô; . . . le botho, le bonôlô, le pôtêxô le bolêta, le boithswarô.” (Ba-Galatia 5:​22, 23) Ka gona, ge bahlanka ba Modimo ba bontšha go se fele pelo mo go bontšhwago ke Modimo, ba dira bjalo ka tlase ga tutuetšo ya moya o mokgethwa.

8. Ke eng seo se tla dirago gore re kgone go hlagolela dienywa tša moya, go akaretša go se fele pelo?

⁸ Lega go le bjalo, se ga se bolele gore Jehofa o gapeletša motho moya wa gagwe o mokgethwa. Re swanetše go itumelelanya le tutuetšo ya wona ka go rata. (2 Ba-Korinthe 3:​17; Ba-Efeso 4:​30) Re dumelela moya gore o šome maphelong a rena ka go hlagolela dienywa tša wona go sohle seo re se dirago. Ka morago ga go lokeletša mediro ya nama le dienywa tša moya, Paulo o okeditše ka gore: “Xe re phela ka Môya, xôna a re swareng tsela rè išwa ke wôna Môya. Le se kê la timêla; Modimo xa a kwêrwe. Se motho a se byalaxo, ké sôna se a tl’o xo se buna. E a byalaxo mo nameng ya xaxwe, se a tl’o xo se buna nameng ké thsenyêxô. E a byalaxo Moyeng, se a tl’o xo se buna Moyeng ké bophelô byo bo sa felexo.” (Ba-Galatia 5:​25; 6:​7, 8) Ge e ba re tla atlega go hlagoleleng go se fele pelo, gape re swanetše go hlagolela dienywa ka moka tšeo di tšweletšwago go Bakriste ka moya o mokgethwa.

“Leratô xa le Fêle Pelo”

9. Ke ka baka la’ng mohlomongwe Paulo a ile a botša ba-Korinthe gore “leratô xa le fêle pelo”?

⁹ Paulo o bontšhitše gore go na le tswalano e kgethegilego magareng ga lerato le go se fele pelo ge a be a re: “Leratô xa le fêle pelo.” (1 Ba-Korinthe 13:4) Seithuti se sengwe sa Beibele, Albert Barnes se šišinya gore Paulo o gateletše se ka baka la thulano le kgohlano yeo e bego e le gona ka phuthegong ya Bokriste kua Korinthe. (1 Ba-Korinthe 1:​11, 12) Barnes o bontšha gore: “Lentšu le le dirišitšwego mo [bakeng sa go se fele pelo] le ganetšana le go wela godimo: go befelela mantšu le dikgopolo le go selekega. Le bontšha boemo bja kgopolo bjo bo ka kgotlelelago lebaka le letelele ge o gateletšwe le go rumolwa.” Lerato le go se fele pelo di sa dutše di tlaleletša kudu khutšong ya phuthego ya Bokriste.

10. (a) Lerato le re thuša bjang gore re se ke ra fela pelo, gomme moapostola Paulo o nea keletšo efe tabeng ye? (b) Seithuti sa Beibele se ile sa re’ng ka go se fele pelo ga Modimo le botho bja gagwe? (Bona mongwalo wa tlase.)

¹⁰ “Leratô xa le fêle pelo. Leratô ké le botho. Leratô . . . xa le tsome xo ikhola; xa le hlohloletšexe.” Ka gona, lerato le re thuša ka ditsela tše dintši gore re be bao ba sa felego pelo. *  (1 Ba-Korinthe 13:​4, 5) Lerato le re dira gore re kgone go kgotlelelana ka go se fele pelo le go gopola gore ka moka ga rena ga se ra phethagala gomme re na le diphošo. Le re thuša go naganela le go lebalela. Moapostola Paulo o re kgothaletša go sepela “ka xo ikokobetša-moka, le ka bolêta, le ka xo se fêle pelo, [Re] kwana ka leratô. [Re] phêxêlêlê xo tiêlêla boteeng bya môya, setlêmô è le kaxišô.”​—Ba-Efeso 4:​1-3.

11. Ke ka baka la’ng go le bohlokwa kudu go ba bao ba sa felego pelo dihlopheng tša Bakriste?

¹¹ Go se fele pelo ka lehlakoreng la ditho tša bona go tlaleletša khutšong le lethabong tša dihlopha tša Bakriste, go sa šetšwe gore ke diphuthegong, magaeng a Bethele, magaeng a boromiwa, dihlopheng tša go aga goba dikolong tša bona. Ka baka la go fapana ga dimelo, ditshekamelo, ditsela tša kgodišo, ditekanyetšo tša setho gaešita le mekgwa ya tša maphelo, maemo a lekago a ka tšwelela nako le nako. Se ke se se ka diregago le ka malapa. Go diega go galefa go bohlokwa. (Diema 14:​29; 15:​18; 19:​11) Go se fele pelo​—go kgotlelela ka go se fele pelo, ka kholofelo ya gore maemo a tla kaonefala—​go a nyakega go rena ka moka.​—Ba-Roma 15:​1-6.

Go se Fele Pelo go re Thuša go Kgotlelela

12. Ke ka baka la’ng go se fele pelo go le bohlokwa maemong a lekago?

¹² Go se fele pelo go re thuša gore re kgotlelele maemo a lekago ao a bonagalago a sa fele goba a se na tharollo ya kapejana. Se e be e le sa therešo ka Régis, yo go boletšwego ka yena mathomong. Ka nywaga e mentši, mosadi wa gagwe o ile a ganetša maiteko a gagwe a go hlankela Jehofa. Lega go le bjalo, ka letšatši le lengwe o ile a tla go yena a lla gomme a re: “Ke a tseba gore ke therešo. Nthuše. Ke nyaka thuto ya Beibele.” O ile a feleletša a kolobeditšwe e le Hlatse. Régis o re: “Se se ile sa bontšha gore Jehofa o šegofaditše nywaga yeo ya tlaišego, go se fele pelo le kgotlelelo.” Go se fele pelo ga gagwe go ile gwa putswa.

13. Ke eng seo se thušitšego Paulo go kgotlelela, gomme mohlala wa gagwe o ka re thuša bjang go kgotlelela?

¹³ Morago kua lekgolong la pele la nywaga C.E., moapostola Paulo e be e le mohlala o mobotse wa go se fele pelo. (2 Ba-Korinthe 6:​3-10; 1 Timotheo 1:​16) Go ya mafelelong a bophelo bja gagwe ge a be a nea modirišani wa gagwe yo monyenyane Timotheo keletšo, Paulo o ile a mo lemoša gore Bakriste ka moka ba be ba tla lebeletšana le diteko. Paulo o ile a tsopola mohlala wa gagwe gomme a kgothaletša dika tša motheo tša Bokriste tšeo di lego bohlokwa bakeng sa kgotlelelo. O ngwadile gore: “O lotile thutô ya-ka wa e latêla, wa etša mokxwa wa-ka le phêxêlêlô ya-ka, le tumêlô ya-ka, le xo se fêle pelo xa-ka, le leratô, le kxôtlêlêlô. Wa etša nna ka xo hlomarêlwa le xo tlaišwa ka tše di etšaxo tšela tša xo ntirêxêla Antiokia, le Ikonio le Lisitara. Ke kxotleletše dithlomarêlô tše byalo, ’me Morêna ó nnamoletše xohle. Ké tše di tl’o xo dirêxêla bohle ba ba rataxo xo phela ka borapedi ka Kriste Jesu; le bôná ba tlo hlomarêlwa.”  (2 Timotheo 3:​10-12; Ditiro 13:​49-51; 14:​19-22) E le gore re kgotlelele, ka moka ga rena re nyaka tumelo, lerato le go se fele pelo.

Go Apara go se Fele Pelo

14. Paulo o ile a swantšha dika tša Modimo tše bjalo ka go se fele pelo le eng, gomme ke keletšo efe yeo a e neilego Bakriste ba ba-Kolose?

¹⁴ Moapostola Paulo o ile a swantšha go se fele pelo gotee le dika tše dingwe tša Modimo le diaparo tšeo Mokriste a swanetšego go di apara ka morago ga go apola mekgwa yeo e bontšhago “motho e motála.” (Ba-Kolose 3:​5-10) O ngwadile gore: “Lè le bahlaolwa ba Modimo, Lè le bakxêthwa le baratiwa, aparang kxauxêlô le botho le boikokobetšô le bolêta le xo se fêle pelo. Le fêlê Lè rwalana; Le lebalêlanê xe xo na le e a naxo le taba le e mongwê; bo-ka Kriste xe a Le lebaletše, le lena Le dirê ka mokxwa woo. Se sexolo mo xo tšeo ka moka ké xore Le aparê leratô, yôna tlêmô ya botlalô.”​—Ba-Kolose 3:​12-14.

15. Mafelelo e ba afe ge Bakriste ba ‘apere’ go se fele pelo le dika tše dingwe tša Modimo?

¹⁵ Ge ditho tša phuthego di ‘apere’ kwelobohloko, botho, boipoetšo, bonolo, go se fele pelo le lerato, di kgona go rarolla mathata le go tšwela pele ka botee tirelong ya Jehofa. Balebeledi ba Bakriste ka mo go kgethegilego ba swanetše go se fele pelo. Go ka ba le dinako tšeo ka tšona ba swanetšego go kgalema Mokriste yo mongwe, eupša go na le ditsela tše di fapanego tša go dira se. Paulo o ile a hlalosa boemo bjo bokaone bja kgopolo ge a be a ngwalela Timotheo gore: “O kxothatšê, O eletšê, O kxalemê Ò sa fêle pelo Ò ruta.” (2 Timotheo 4:2) Ee, ka mehla dinku tša Jehofa di swanetše go swarwa ka go se felelwe pelo, ka seriti le ka bonolo.​—Mateo 7:​12; 11:​28; Ditiro 20:​28, 29; Ba-Roma 12:10.

“Le se kê la Fêlêla Motho Pelo”

16. Mafelelo e ka ba afe ge e ba ‘re sa felele motho pelo’?

¹⁶ Go se felele batho pelo ga Jehofa go re bea ka tlase ga tlamo ya gore “[re] se kê [ra] fêlêla motho pelo.” (1 Ba-Thesalonika 5:​14) Se se bolela go se felele ditho tša lapa pelo tšeo e sego Dihlatse, baagišani, bao re šomago le bona le bao re tsenago le bona ka klaseng. Dikgethollo tše dintši di ile tša fenywa ke Dihlatse tšeo ka dinako tše dingwe ka nywaga e mentši, di ilego tša kgotlelela dipolelo tša kgegeo go tšwa go batho bao ba bego ba kopana le bona mošomong goba sekolong. (Ba-Kolose 4:​5, 6) Moapostola Petro o ngwadile gore: “Tsela ye Le tšeaxo ka yôna Lè le xare xa ba-ntlê, a e bê e botse, xore xe ba Le phara ba re Le disenyi, e tlê e re xe ba lebeleša, ba bônê medirô e botse ya lena ’me ba rêtê Modimo, è le letšatši le a ba etetšexo ka lôna.”​—1 Petro 2:12.

17. Re ka ekiša bjang lerato la Jehofa le go se fele pelo ga gagwe, gomme ke ka baka la’ng re swanetše go dira bjalo?

¹⁷ Go se fele pelo ga Jehofa go tla bolela phologo go ba dimilione. (2 Petro 3:​9, 15) Ge e ba re ekiša lerato la Jehofa le go se fele pelo ga gagwe, re tla tšwela pele re bolela ditaba tše  dibotse tša Mmušo wa Modimo ka go se fele pelo le go ruta ba bangwe go ikokobeletša pušo ya Mmušo wa Kriste. (Mateo 28:​18-20; Mareka 13:​10) Ge e ba re be re ka emiša go bolela, go be go tla ba bjalo ka ge eka re be re nyaka go fokotša go se fele pelo ga Jehofa gomme ra palelwa ke go lemoga morero wa gona, e lego gore batho ba itshole.​—Ba-Roma 2:4.

18. Paulo o ile a re’ng ge a be a rapelela ba-Kolose?

¹⁸ Lengwalong la gagwe le le yago go Bakriste kua Kolose, Asia Minor, Paulo o ngwadile gore: “Byale le rena, è sa le mola rè di kwa, xa re kxaotše xo Le rapêlêla le xo Le kxopêlêla xore Le tlatšwê tsebô ya xo tseba thatô ya xaxwe, Le bê le bohlale ka moka le thlaoloxanyô ya Môya. Re Le rapêlêla xore Le swarê ka tsela ye e loketšexo ba Morêna, e bê xo mo kxahla xohle, le xo enywa dienywa ka medirô e botse yohle, la tšwêlêla pele tsebong ya xo tseba Modimo, la tlo ba ba-fiwa-matla dilong ka moka, ka mo xo kxônaxo letaxô la xaxwe, la tlo kxôna xo kxôtlêlêla xohle, Le se fêlê pelo [ka thabo, PK].”​—Ba-Kolose 1:​9-11.

19, 20. (a) Re ka phema bjang go lebelela go se fele pelo ga Jehofa mo go tšwelago pele e le teko? (b) Re tla hwetša mehola efe ka go se fele pelo ga rena?

¹⁹ Go se fele pelo ga Jehofa mo go tšwelago pele e ka se be teko bakeng sa rena ge e ba re ‘tladitšwe tsebo ya go tseba thato ya gagwe,’ e lego gore “batho bohle ba phološwê ba fihlêlê tsebô ya therešô.” (1 Timotheo 2:4) Re tla “enywa dienywa ka medirô e botse yohle,” kudu-kudu modirong wa go bolela “ditaba tše tše dibotse.” (Mateo 24:​14, NW) Ge e ba re tšwela pele go dira se ka potego, Jehofa o tla re dira ba “matla dilong ka moka,” bakeng sa go dira gore re kgone ‘go kgotlelela gohle le go se fele pelo ka lethabo.’ Ge re dira bjalo, re tla ‘swara ka tsela e loketšego ya Jehofa,’ gomme re tla ba le khutšo ye e tšwago go go tseba gore re “mo kxahla xohle.”

²⁰ Anke re kgodišegeng ka mo go feletšego ka bohlale bja go se fele pelo ga Jehofa. Go feleletša ka go phološwa ga rena le go phološwa ga bao ba theetšago ge re bolela le ge re ruta. (1 Timotheo 4:​16) Go hlagolela dienywa tša moya​—lerato, botho, go loka, bonolo le go se fele pelo​—go tla dira gore re se fele pelo ka lethabo. Re tla kgona gakaone go dula khutšong le ditho tša malapa a rena gotee le bana babo rena le dikgaetšedi ka phuthegong. Go se fele pelo gape go tla re thuša go se felele bašomi-gotee le rena pelo goba bao re tsenago le bona sekolo. Le gona go se fele pelo ga rena go tla ba le morero, e lego wa go phološa badiradibe le go tumiša Modimo wa go se fele pelo, Jehofa.

[Mengwalo ya ka tlase]

Na o ka Hlalosa?

• Ke ka ditsela dife Kriste e lego mohlala o mobotse wa go se fele pelo?

• Ke eng seo se tlago go re thuša go hlagolela go se fele pelo?

• Go se fele pelo go thuša bjang malapa, dihlopha tša Bakriste le bagolo?

• Ke bjang go se fele pelo go tla tlišetšago rena le ba bangwe mehola?

[Dipotšišo tša Thuto]

[Seswantšho go letlakala 15]

Gaešita le ge a be a le ka tlase ga kgatelelo e kgolo, Jesu o ile a se ke a felela barutiwa ba gagwe pelo

[Seswantšho go letlakala 16]

Balebeledi ba Bakriste ba kgothaletšwa gore ba bee mohlala o mobotse wa go se fele pelo ge ba dirišana le bana babo bona

[Seswantšho go letlakala 17]

Ge e ba re ekiša lerato la Jehofa le go se fele pelo, re tla tšwela pele re bolela ditaba tše dibotse

[Seswantšho go letlakala 18]

Paulo o ile a rapelela gore Bakriste ba ‘se fele pelo ka lethabo’