Basenyi ba Dihlare

MEHLENG ya Beibele, dihlare di be di lebelelwa e le dithoto tše bohlokwa. Ka mohlala, ge Aborahama a be a reka lefelo leo go bolokelwago go lona bakeng sa mosadi wa gagwe yo a rategago, Sara, dihlare di be di akareditšwe tumelelanong ya go khudušwa ga thoto.​—Genesi 23:​15-18.

Ka mo go swanago lehono, dihlare di lebelelwa e le tše bohlokwa kudu, gomme šedi e ntši ya ditšhaba-tšhaba e lebišwa pabalelong ya dithokgwa. Puku ya State of the World 1998 e re: “Le ge batho ba bantši dinageng tša ka leboa ba lebelela dithokgwa tša molatšatšing ka kgahlego, ba ka ba ba sa lemoge gore dithokgwa tša tlelaemete ya magareng tša dinageng tša gabo bona ke tše di kgaoganego kudu le tše di lego kotsing ya go senywa go feta mehuta ka moka ya dithokgwa.” Ke eng seo se beago bophelo bjo bobotse bja dithokgwa kotsing dinageng tšeo tša ka leboa la Yuropa le Amerika Leboa? Batho ba bantši ba šupa go go rengwa ga dithokgwa, eupša go na le matla a mangwe ao a senyago dihlare ka mo go sa lemogegego, letlakala ka letlakala goba sehlare ka se tee ka se tee, ge go bolelwa ka mokgwa wa seswantšhetšo. Ke afe? Ke tšhilafalo ya moya le pula ya esiti. Dišilafatši tše di ka fokodiša dihlare ganyenyane-ganyenyane, tša di dira gore di hlaselwe gabonolo ke diji le bolwetši.

Bo-ratikologo le badudi ba bangwe ba tshwenyegilego ba lemošitše ka go nyakega ga go šireletšwa ga tshepedišo ya tswalano ya diphedi le tikologo ya tšona ya lefase. Nywageng ya bo-1980, ka morago ga gore bo-rathutamahlale kua Jeremane ba ithute ka ditla-morago tša tšhilafalo ya moya le pula ya esiti tikologong, ba phethile ka gore: ‘Ge e ba go sa dirwe selo, mo e ka bago ka ngwaga wa 2000, batho ba tla ba ba šaletšwe feela ke go kgahlišwa ke dithokgwa ka go di bona diswantšhong tša kgale le difiliming.’ Ka mo go thabišago, matla a mpshafatšago a lefase ke a matla kudu mo e lego gore sethokgwa se kgonne go emeletšana le bontši bja tshenyo yeo e bego e letetšwe go ka direga.

Lega go le bjalo, mafelelong ke Modimo yo a tlago go dira sohle bakeng sa go boloka tshepedišo ya diphedi tša go ikhola ka tše dingwe le tikologo ya tšona. “Dithaba O di noša meetse a a tšwaxo kwa ngwakong wa xaxo wa maxodimong” gomme “dikxomo O di hloxišetša byang, le dimela tša xo fêpa motho.” Le gona o holofeditše “xo senya basenya-lefase.” (Psalme 104:​13, 14; Kutollo 11:​18) E tla ba mo go kgahlišago gakaakang ge baagi ba lefase ba tla ba ba kgona go thabela lefase le le lokologilego tšhilafalong ka mo go sa felego!​—Psalme 37:​9-11.