“Tšhegofatšo ya Jehofa e a Humiša”

KA MOKA ga rena re nyaka go šegofatšwa. The American Heritage College Dictionary e re ditšhegofatšo di tšweletša lethabo, boiketlo goba katlego. Ka ge Jehofa e le Monei wa “ ’neô tšohle tše botse, le ’mphô tšôhle di tletšexo,” ditšhegofatšo tšohle tša kgonthe le tša ka mo go sa felego di tšwa go Mmopi wa rena yo lerato. (Jakobo 1:​17) O tšhollela ditšhegofatšo godimo ga batho ka moka, go akaretša le bao ba sa mo tsebego. Jesu o boletše ka Tatagwe gore: “Letšatši la xaxwe ó le hlabišetša ba babe le ba boló; le pula ya xaxwe ó e nešetša baloki le bakxôpô.” (Mateo 5:​45) Lega go le bjalo, Jehofa o bontšha bao ba mo ratago tlhokomelo e kgethegilego.​—Doiteronomio 28:​1-14; Jobo 1:1; 42:12.

Mopsalme o ngwadile gore: “Ba sepelaxo ka xo loka a ka se ba hlokiše tše di botse.” (Psalme 84:​11) Ee, bao ba hlankelago Jehofa ba na le maphelo a humilego le a nago le morero. Ba tseba gore “tšhegofatšo ya Jehofa e a humiša, gomme ga e okeletšwe ka bohloko.” Beibele gape e re: “Bašexofatšwa ba Morêna [Jehofa] e tlo ba beng ba naxa.” (Diema 10:​22, PK; Psalme 37:​22, 29) Seo e tla ba tšhegofatšo e kgolo gakaakang!

Re ka hwetša bjang tšhegofatšo ya Jehofa? Gare ga dilo tše dingwe, re swanetše go hlagolela dika tše di mo kgahlišago. (Doiteronomio 30:​16, 19, 20; Mika 6:8) Re bona se mohlaleng wa ba bararo ba bahlanka ba Jehofa ba mehleng ya bogologolo.

Jehofa o Šegofatša Bahlanka ba Gagwe

Noage e be e le mohlanka yo a beago mohlala wa Modimo. Go Genesi 6:8, re bala gore: “Noaxe yêna ó hweditše Modimo à mo lebeletše ka botho.” Ka baka la’ng? Ka gobane Noage e be e le yo a kwago. Pego e re: “[Noage e be] é le wa xo sepela à na le Modimo.” Noage o latetše melao ya motheo e lokilego ya Jehofa gomme a kwa ditaelo tša gagwe. Ka nako yeo lefase le bego le nweletše bošorong le bokgopong, Noage o ile a tutueletšega go “dira tšôna-tšeo tšohle, a di dira ka mo Modimo a mo laetšexo ka xôna.” (Genesi 6:​9, 22) Ka lebaka leo, Jehofa o ile a mo laela gore a age “areka, [bakeng sa] go phološa ba ngwako wa gagwe.” (Ba-Hebere 11:​7, PK) Ka tsela ye, Noage le ba lapa la gagwe​—bao ka bona merafo ya batho​—e ilego ya phologa phedišo ya moloko woo. Le gona Noage o hwile a e-na le kholofelo ya go tsošetšwa tebelelong ya go phela ka mo go sa felego lefaseng la paradeise. A ditšhegofatšo tše humilego gakaakang tšeo a di amogetšego!

Aborahama le yena o be a e-na le dika tšeo di bego di kgahliša Jehofa. Seo se tumilego kudu gare ga tše e be e le tumelo. (Ba-Hebere 11:​8-10) Aborahama o tlogetše bophelo bja matsaka kua Uri gomme ka morago kua Harane ka gobane o be a e-na le tumelo kholofetšong ya Jehofa ya gore peu ya gagwe e be e tla ata gomme ya ba tšhegofatšo go ditšhaba ka moka. (Genesi 12:​2, 3) Go sa šetšwe nywaga e mentši ya teko, tumelo ya gagwe e ile ya putswa ge morwa wa gagwe Isaka a be a belegwa. Ka yena, Aborahama e bile rakgolo-khukhu wa setšhaba se kgethilwego sa Modimo, e lego Isiraele, gomme mafelelong a ba wa Mesia. (Ba-Roma 4:​19-21) Go feta moo, ke “tata xo bohle ba ba dumêlaxo,” gomme o ile a bitšwa “mogwera wa Modimo.” (Ba-Roma 4:​11; Jakobo 2:​23, PK; Ba-Galatia 3:​7, 29) O phetše bophelo bjo bo nago le morero gakaakang, a ba a šegofatšwa ka mo go humilego!

 Gape, ela hloko monna yo a botegago e lego Moše. Se segolo go tše dingwe tša dika tša gagwe e be e le tebogo ya gagwe ya go leboga dilo tša moya. Moše o ile a gana mahumo ka moka a Egipita gomme “a xomarêla Eo a sa bonwexo byalo ka e ke ó a mmôna.” (Ba-Hebere 11:​27) Ka morago ga nywaga e 40 a le Midiane, o ile a boela Egipita e le mokgalabje gomme a lebeletšana ka sebete le mmuši yo matla wa nakong yeo, e lego Farao, bakeng sa go nyaka ka tsela ya go phegelela gore bana babo ba lokollwe. (Ekisodo 7:​1-7) O bone dikotlo tše lesome, go arolwa ga Lewatle le Lehwibidu, le go fedišwa ga madira a Farao. Jehofa o mo dirišitše gore a nee Isiraele Molao le go boelanya kgwerano ya Gagwe le setšhaba se sefsa. Moše o ile a etelela setšhaba sa Isiraele pele lešokeng ka nywaga e 40. Bophelo bja gagwe bo be bo e-na le morero wa kgonthe, gomme o thabetše ditšhegofatšo tše di humilego ka mo go kgahlišago tša tirelo.

Ditšhegofatšo tša Mehleng Yeno

Dipego tše di bontšha gore maphelo a bao ba hlankelago Modimo ke ao a nago le morero e le ka kgonthe. Ge batho ba Jehofa ba dutše ba hlagolela dika tše bjalo ka go kwa, tumelo le go leboga dilo tša moya, ba šegofatšwa ka mo go humilego.

Re šegofatšwa bjang? Go ba gona, le ge ba dimilione ka gare ga Bojakane ba tlaišwa ke tlala ya moya, re ka “hlalala ka baka la botho bja Jehofa.” (Jeremia 31:​12, NW) Jehofa o re file kabo e ntši ya dijo tša moya tšeo di re thušago go dula  re le ‘tseleng e išago bophelong’ ka Jesu Kriste le “molaki e a bôtêxaxo yo bohlale.” (Mateo 7:​13, 14; 24:​45; Johane 17:3) Go tlwaelana le borwarre bja Bokriste ke tšhegofatšo e nngwe e humilego. Dibokeng le ditiragalong tše dingwe, go ba le barapedi-gotee bao ba bontšhago lerato le bao ba katanelago ka phišego go apara “motho e mofsa” ke mothopo wa lethabo le legolo. (Ba-Kolose 3:​8-10; Psalme 133:1) Lega go le bjalo, tšhegofatšo ya rena e kgolo ke tokelo e kgahlišago ya go ba le tswalano ya motho ka noši le Jehofa Modimo le go latela dikgatong tša Morwa wa gagwe, Jesu Kriste.​—Ba-Roma 5:​1, 8; Ba-Filipi 3:8.

Ka go naganišiša ka ditšhegofatšo tše bjalo, re lemoga kamoo tirelo ya rena go Modimo e lego e bohlokwa ka gona. Mohlomongwe re nagana ka seswantšho sa Jesu sa mmapatši yo a bego a tsoma dipheta tše botse. Jesu o boletše ka monna yo gore: “Xe a hweditše pheta ya thêkô e kxolo, a tloxa a y’o rekiša thoto ya xaxwe ka moka, a rêka yôna pheta yeo.” (Mateo 13:​46) Ka kgonthe ke ka tsela yeo re ikwago ka gona ka tswalano ya rena le Modimo, tokelo ya rena ya go mo hlankela, bogwera bja rena bja Bokriste, kholofelo ya rena ya Bokriste le ditšhegofatšo tše dingwe ka moka tše tswalanago le tumelo ya rena. Ga go sa na selo se sengwe seo se lego bohlokwa kudu maphelong a rena.

Bušetša go Jehofa

Ka ge re lemoga Jehofa e le Monei wa dimpho ka moka tše dibotse, dipelo tša rena di hlohleletšega go bontšha tebogo bakeng sa ditšhegofatšo tšeo re di amogelago. Re ka dira seo bjang? Tsela e nngwe ke ka go thuša ba bangwe gore ba thabele ditšhegofatšo tše tše swanago. (Mateo 28:​19) Dihlatse tša Jehofa di etela baagišani ba tšona go dira sona seo dinageng tša ka godimo ga  tše 230. Ge di dutše di dira sona seo, di diriša mahumo a tšona ka noši a lekaneditšwego​—nako, matla le dilo tše di bonagalago​—go thuša ba bangwe gore “ba fihlêlê tsebô ya therešô.”​—1 Timotheo 2:4.

Nagana ka babulamadibogo ba dulago Glendale, California, U.S.A. Mesong e mengwe le e mengwe ya Mokibelo, ba sepela leeto la go ya le go boa la dikhilomithara tše 100 ba etela kgolego ya bo-Federal. Gaešita le ge ba be ba ka se fetše diiri tše mmalwa le bagolegwa ketelong e nngwe le e nngwe, ga ba nyame. Yo mongwe wa bona o re: “Ke mo go putsago kudu go šoma tšhemong ye ya moswana-noši. Re e šoma ka lethabo le legolo. Re na le batho ba bantši ba thabelago mo e lego gore go thata go ka ba etela ka mehla. Mo nakong ye, re ithuta le batho ba bahlano, gomme ba bangwe ba bane ba kgopetše thuto ya Beibele.”

Badiredi ba Bakriste ba mafolofolo ba thabela go neela ditirelo tša bona ka ntle le tefo gore ba phethe modiro wo wa go phološa maphelo. Ba bonagatša boemo bja kgopolo bja Jesu, yo a rilego: “Le filwe fêla; le lena fang fêla.” (Mateo 10:8) Ba dimilione go dikologa lefase ba swaregile tirelong e swanago ya go hloka boithati, gomme ka lebaka la seo, mašaba-šaba a batho ba botegago a arabela gomme a fetoga barutiwa. Nywageng e mehlano feela e fetilego, ba e ka bago ba dimilione tše 1,7 ba neetše maphelo a bona go Jehofa. Go hlokomela dinyakwa tša koketšego ye e tšwelago pele go nyakega go tšweletšwa ga Dibeibele le dipuku tše di theilwego Beibeleng gotee le Diholo tša Mmušo le mafelo a mangwe a go kopanela. Tšhelete ya go thuša dinyakwa tše e tšwa kae? E tšwa ka botlalo meneelong ya boithatelo.

Ka baka la maemo a mabe a tša boiphedišo dikarolong tše dingwe tša lefase, ba bantši ba goga ka kgara go hweletša malapa a bona dinyakwa tše lekanego tša bophelo. Go ya ka makasine wa New Scientist, batho ba dimilione tše sekete ba diriša bonyenyane 70 lekgolong ya ditseno tša malapa a bona dijong. Bontši bja bana babo rena le dikgaetšedi ba Bakriste ba boemong bjo bo swanago. Ka ntle le thušo go tšwa go badumedi-gotee le bona, ba be ba ka se kgone go fihlelela dilo tše swanago le dikgatišo tša Bokriste goba Diholo tša Mmušo tše swanetšego.

Go ba gona, seo ga se bolele gore ba bjalo ba kgotsofalela go tlogelela ba bangwe ba rwala morwalo wa bona. Eupša ba nyaka thušo. Ge Moše a be a kgothaletša ba-Isiraele gore ba ntšhe meneelo ya dilo tše di bonagalago e le mokgwa wa go leboga Jehofa bakeng sa ditšhegofatšo tša bona, o rile: “Mang le mang a tlê à swere neô ya xaxwe ka mo thšexofatšô ya Morêna Modimo wa xaxo e mo neilexo ka xôna.” (Doiteronomio 16:​17) Ka gona, ge Jesu a be a bona mohlologadi a neela ka “dithšêlêtyana tše pedi” ka tempeleng, o ile a mo reta pele ga barutiwa ba gagwe. O dirile seo a bego a ka se kgona. (Luka 21:​2, 3) Ka mo go swanago, Bakriste ba lego maemong a bodiidi ba dira seo ba ka se kgonago. Le gona ge e ba go e-na le tlhaelelo, e ka lefša ka meneelo go tšwa go Bakriste-gotee le bona bao ba sa napego ba diila kudu ka dilo tše di bonagalago.​—2 Ba-Korinthe 8:​13-15.

Ge re bušetša go Modimo ka ditsela tše bjalo, ke gabohlokwa gore re be le maikemišetšo a nepagetšego. (2 Ba-Korinthe 8:​12) Paulo o rile: “E mongwê le e mongwê a nthšê ka mo a kwanexo le pelo ya xaxwe; a se nthšê ka xo belaêla le ka xo xapeletšwa, xobane Mo-nea-à-thabile, Modimo ó a mo rata.” (2 Ba-Korinthe 9:7) Ka go nea ka bolokologi go tšwa pelong, re thekga bobedi koketšego ya mokgatlo wa Modimo yeo e diregago ga bjale le go oketša lethabo la rena.​—Ditiro 20:35.

Go tšea karolo modirong wa boboledi le go ntšha meneelo ya boithatelo ke ditsela tše pedi tšeo re ka bušetšago go Jehofa ka baka la ditšhegofatšo tšeo a re neilego tšona. Le gona ke mo go kgothatšago gakaakang go tseba gore Jehofa o rata go nea batho ba bantši ba dipelo tše botegago tšhegofatšo ya gagwe, bao ga bjale ba ka bago ba sa mo tsebe! (2 Petro 3:9) Ka gona, a re tšweleng pele go diriša matlotlo a rena tirelong ya Modimo e le gore re ka hwetša batho ba dipelo tše botegago gomme re ba thuše go hlagolela dika tše bjalo ka go kwa, tumelo le tebogo. Ka tsela yeo, re tla ba le lethabo la go thabela go ba thuša gore ba ‘leke le go bona gore Jehofa ke yo botho.’​—Psalme 34:8, bapiša le PK.

[Lepokisi go letlakala 28, 29]

Ditsela Tšeo ka Tšona ba Bangwe ba Kgethago go Nea Meneelo Bakeng Sa Modiro Wa Lefase Ka Bophara

Ba bantši ba beela ka thoko, tekanyo ya tšhelete yeo ba e tsenyago ka mapokising ao a ngwadilwego “Meneelo Bakeng sa Modiro wa Lefase ka Bophara​—Mateo 24:​14.”

Kgweding e nngwe le e nngwe diphuthego di romela ditšhelete tše ntlong-kgolo ya Dihlatse tša Jehofa ya Brooklyn, New York, goba ofising ya lekala ya lefelong leo. Meneelo ya go ithatela ya ditšhelete e ka romelwa ka go lebanya go Accounting Office, Watch Tower Bible and Tract Society of Pennsylvania, Private Bag X2067, Krugersdorp, 1740, South Africa, goba ofising ya lekala yeo e hlankelago naga ya geno. Mabenyabje le dilo tše dingwe tše bohlokwa le tšona di ka neelwa. Lengwalo le lekopana leo le bolelago gore selo se se bjalo ke mpho e neelwago ka go lebanya le swanetše go sepela le meneelo ye.

THULAGANYO YA MENEELO YEO E ITHEKGILEGO KA MAEMO

Tšhelete e ka neelwa ka tlase ga thulaganyo e kgethegilego yeo go yona ge e ba monei a e-na le tšeo a di nyakago, moneelo o tla bušetšwa go yena. Bakeng sa tsebišo e oketšegilego, hle ikopanye le Accounting Office ya ofisi ya lekala ya lefelong la geno atereseng e bontšhitšwego ka mo godimo.

GO NEA MO GO RULAGANYEDITŠWEGO

Go tlaleletša go dimpho tša ditšhelete tše di newago ka go lebanya le meneelo ya tša ditšhelete yeo e ithekgilego ka maemo, go na le mekgwa e mengwe ya go nea bakeng sa go hola tirelo ya Mmušo ya lefase ka bophara. Ye e akaretša:

Phemelo: Mokgatlo wa Watch Tower o ka ngwadišwa e le moja-bohwa wa thulaganyo ya tša phemelo ya bophelo goba thulaganyo ya go rola modiro/phenšene.

Di-Stock le di-Bond: Di-Stock le di-bond di ka neelwa go Mokgatlo wa Watch Tower.

Dintlo le Mafelo ao e Lego Dithoto: Dintlo le mafelo ao e lego dithoto tšeo di ka rekišwago di ka neelwa Mokgatlo wa Watch Tower e le mpho e neelwago ka go lebanya goba ka go boloka thoto e le go monei, yo a ka tšwelago pele a dula go yona ge a sa dutše a phela. Ikopanye le ofisi ya lekala ya nageng ya geno pele o fetiša ntlo le ge e le efe goba lefelo leo e lego thoto.

Dikeno: Dithoto goba tšhelete di ka tlogelelwa Mokgatlo wa Watch Tower e le bohwa ka go dirišwa ga keno e dirilwego ke molao.

Ge e ba o na le kgahlego go le ge e le efe ya dithulaganyo tše tša go nea, o swanetše go ikopanya le Accounting Office, e ka ba ka go ngwala goba ka mogala atereseng yeo e lokeleditšwego ka mo tlase goba ofising ya Mokgatlo yeo e hlankelago naga ya geno.

ACCOUNTING OFFICE

Watch Tower Bible and Tract Society of Pennsylvania

Private Bag X2067, Krugersdorp, 1740

Mogala: (011) 761 1000