Dipotšišo tše Tšwago go Babadi

Na taelo ya Modimo e begilwego go Jeremia 7:​16 e bolela gore Bakriste ba ka se rapelele motho yo a kgaotšwego ka phuthegong ya Bokriste ka gobane e le modiradibe yo a sa itsholego?

Ka morago ga go bolela kahlolo ya gagwe malebana le Juda e sa botegego, Jehofa o boditše Jeremia gore: “Wêna O se kê wa rapêlêla sethšaba sé. O se kê wa hlaba mokxoši wa tliša dithapêlô ka ’baka la sôna; O se kê wa mphêxêlêla, xobane Nna nka se kê ka bá ka Xo kwa.”​—Jeremia 7:16.

Ke ka baka la’ng Jehofa a ile a thibela Jeremia go rapelela ba-Isiraele? Ka ntle le pelaelo, e be e le ka baka la dibe tša bona tšeo di bego di le molaleng tša go tshela Molao wa gagwe. Ba be ba ‘utswa, ba bolaya, ba dira bootswa, ba ena ka maaka, ba thuntšhetša Baali diorelo gomme ba latela medimo e šele’ phatlalatša le ka go se lewe ke dihlong. Ka baka leo, Jehofa o boditše ba-Juda ba sa botegego gore: “Ke tlo Le raka pele xa-ka byalo ka xe ke rakile bála ba-bô-lena bohle, bala ba moloko wa Efuraimi ka moka.” Ruri, e be e tla ba mo go sa swanelago gore Jeremia, goba motho le ge e le ofe yo mongwe, a rapele Jehofa gore a gomiše kahlolo wa Gagwe.​—Jeremia 7:​9, 15.

Go dumelelana le se, moapostola Johane o ngwadile mabapi le thapelo e swanetšego go Modimo. Sa pele, o ile a kgonthišetša Bakriste gore: “Ó a re kwa xe re kxopêla se se amanaxo le thatô ya xaxwe.” (1 Johane 5:​14) Gomme mabapi le go rapelela ba bangwe, Johane o tšwetše pele ka gore: “Xe motho a ka bôna ngwan’abô à dira sebe se se sa išexo lehung, a a mo rapêlêlê, a phedišê ba xo dira dibe tše di sa išexo lehung. Xobane xo na le sebe se se išaxo lehung; e a diraxo tše byalo, xa ke re a rapêlêlwê.” (1 Johane 5:​16) Jesu gape o boletše ka sebe ‘se ka se kego sa lebalelwa,’ e lego, sebe malebana le moya o mokgethwa.​—Mateo 12:​31, 32.

 Na se se bolela gore bohle bao ba kgaotšwego ka phuthegong ya Bokriste ka ge ba dirile dibe ka go se itshole ba dirile dibe tše di “išaxo lehung” gomme ka go rialo ga se ba swanela go rapelelwa? Se se ka se be bjalo ka gobane mabakeng a mangwe dibe tše bjalo ga se dibe tše di išago lehung. Ge e le gabotse, go thata go tseba ge e ba ke tšona. Mohlala o tlwaelegilego ke wa Kgoši Manase wa Juda. O ile a aga dialetare tša medimo ya maaka, a dira dihlabelo ka bana ba gagwe, a dirišana le meoya gomme a bea seswantšho sa go betlwa ka tempeleng ya Jehofa. Ge e le gabotse, Beibele e re Manase le batho ba ile ba dira “bobe ba fetiša ba dithšaba bao Morêna a ba fedišitšexo mola Ba-lsiraele ba fihla.” Bakeng sa dilo tšeo ka moka, Jehofa o ile a otla Manase ka go mo iša bothopja e le mogolegwa kua Babele.​—2 Dikxoši 21:​1-9; 2 Koronika 33:​1-11.

Na dibe tša Manase, gaešita le ge e be e le tše šoro e le ka kgonthe, e be e le tša mohuta wo o išago lehung? Go bonala go be go se bjalo, ka gobane pego e tšwela pele ka go bolela mabapi le yena gore: “Mola a le tlalelong yeo, a rapêla Modimo wa xaxwe, a ikokobetša ruri pele xa Modimo wa bôtat’axwe. A rapêla, Morêna a dumêla thapêlô ya xaxwe, a bá a mmušetša Jerusalêma mmušong wa xaxwe. Ké mo Manase a lemoxilexo xe Modimo e le Yêna Morêna.”​—2 Koronika 33:​12, 13.

Ka gona, ga se ra swanela go kitimela go phetha ka gore motho o na le molato wa sebe se se išago lehung fela ka gobane a kgaotšwe ka phuthegong. Go ka tšea nako gore boemo bja kgonthe bja pelo ya motho bo utollwe. Ge e le gabotse, go bolelwa gantši gore o mongwe wa merero ya go kgaola ke go dira gore modiradibe a phafoge ka kholofelo ya gore a itshole gomme a sokologe.

Ka ge motho yo bjale a se sa hlwa a le ka phuthegong, phetogo le ge e le efe ya pelo le boitshwaro e ka bonwa pele ke bao ba lego kgaufsi le yena, bjalo ka molekane wa lenyalo goba ditho tša lapa. Bao ba bonago diphetogo tše bjalo ba ka phetha ka gore mofoši ga se a dira sebe se se išago lehung. Ba ka tutueletšega go rapelela gore a ka hwetša matla go tšwa Lentšung le le buduletšwego la Modimo le gore Jehofa a dirišane le modiradibe ka go dumelelana le thato ya Gagwe.​—Psalme 44:​21; Mmoledi 12:14.

Le ge ba bangwe ba ka ba boemong bja go bona bohlatse bjo bo lekanego bja go dumela gore modiradibe o itshotše, seo se ka no se be bjalo ka phuthego ka kakaretšo. Ba ka makala, ba huduega, gaešita le go kgopišega ge e ba ba be ba ka kwa yo mongwe a rapelela motho yo a kgaotšwego phatlalatša. Ka baka leo, bao ba ikwago ba tutueletšega go rapelela modiradibe, ba swanetše go dira seo ka sephiring, ba tlogelele ditaba le ge e le dife tše dingwe ka diatleng tša bagolo bao ba ikarabelago ka phuthegong.

[Mothopo wa Seswantšho go letlakala 30]

Reproduced from Illustrierte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s

[Seswantšho go letlakala 31]

Dibe tša Manase tše šoro, di ile tša lebalelwa ge a be a ikokobetša ka pele ga Jehofa