Bagoeledi Ba Mmušo Ba A Bega

“O Leleditše Nomorong e Šele”

JOHANNESBURG, Afrika Borwa, Leslie le Caroline ba be ba šiedišana ka go nea bohlatse ka mogala go batho bao ba dulago lefelong la batho bao ba rotšego modiro moo go bego go na le taolo ya tšhireletšo kgorong ya gona. Ba hweditše ba sego kae ka gae gotee le kgahlego e nyenyane molaetšeng wa bona wa Bokriste, ka gona Caroline o ile a hwetša mafolofolo ge mohumagadi yo mongwe a araba mogala.

Caroline o ile a botšiša: “Na e ka ba ke bolela le Moh. B​—?”

Lentšu la bogwera le ile la re: “Aowa, ke nna Moh. G—. O leleditše nomorong e šele.”

Ka go lemoga borutho lentšung la gagwe, Caroline o ile a re: “Go lokile, e re ke go hlalosetše seo ke bego ke nyaka go se botša Moh. B​—.” Ka gona o ile a tšwela pele go bolela ka ditšhegofatšo tša Mmušo o tlago wa Modimo. Ka morago ga ge go dirilwe ditokišetšo tša go mo išetša poroutšha ya Ke Eng Seo Modimo a se Nyakago go Rena?, Moh. G— o ile a botšiša: “Ge e le gabotse, le ba bodumedi bofe?”

Caroline o ile a araba ka gore: “Re Dihlatse tša Jehofa.”

“Aowa, e sego bjoo bodumedi! Ga ke nagane gore ke tla rata go go bona.”

Caroline o ile a ipiletša ka gore: “Eupša Moh. G— metsotsong e 20 e fetilego, ke ile ka abelana le wena kholofelo e kgahlišago kudu, ke go hlalosetša go tšwa Beibeleng seo Mmušo wa Modimo kgaufsinyane o tlago go se direla batho. O be o thabetše go kwa dilo tše​—e bile o thakgetše​—gomme o nyaka go ithuta ka mo go oketšegilego. Ge e le gabotse ke eng seo o se tsebago ka Dihlatse tša Jehofa? Ge e ba o be o babja, na o be o ka ya go molokiši? Ke ka baka la’ng o sa ntumelele gore ke go botše seo Dihlatse tša Jehofa di se dumelago?”

Ka morago ga motsotso wa setu karabo e ile ya tšwelela: “Ke nagana gore o nepile. Go ka ba kaone ge o ka tla. Eupša ke nyaka gore o kwešiše gore o ka se ke wa ntshokolla!”

Caroline o arabile ka gore: “Moh. G​​—, nka se ke ka go sokolla le ge ke be nka rata go dira bjalo. Ke Jehofa feela yo a ka kgonago go dira seo.”

Ketelo ya go iša poroutšha e sepetše gabotse, gomme Moh. G— (Betty) a dumela gore a etelwe gape. Ge Caroline a boa, Betty o ile a bolela gore o boditše bahumagadi bao a dulago le bona tafoleng e tee ka phapošing ya go jela gore o bile le dipoledišano le Dihlatse tša Jehofa. Ba ile ba botšiša ba hlabošitše mantšu, e bile ba kgapha le matsogo ba re: “O ka dira seo bjang? Batho bale e bile ga ba dumele go Jesu!”

Caroline kapejana o ile a gopotša Betty ka ntlha e kgolo yeo ba ithutilego yona go tšwa poledišanong ya bona ya go feta ka Mmušo wa Modimo.

Caroline o ile a botšiša ka gore: “Ke mang yo e tlago go ba Kgoši?”

Betty a araba ka gore: “Go molaleng gore ke Jesu.”

Caroline o ile a re: “Ee, go bjalo.” O ile a tšwela pele a hlalosa gore Dihlatse tša Jehofa di dumela gore Jesu ke Morwa wa Modimo, eupša ga a lekane le Modimo e le karolo ya Boraro botee.​​—Mareka 13:​32; Luka 22:​42; Johane 14:28.

Ka morago ga diketelo tše mmalwa, go ile gwa thoma go bonagala gore le ge a be a e-na le boemo bjo bo nepagetšego bja kgopolo le moya wa lethabo, Betty o be a tlaišwa ke go hloka bophelo bjo bobotse bja mmele. Ge e le gabotse, o be a swerwe ke kankere gomme a tšhaba go hwa. O ile a ipobola ka gore: “Ke kganyoga eka nkabe ke kwele dilo tše nywageng e fetilego gomme ke bile le tumelo e swanago le ya gago.” Caroline o ile a mo homotša ka go mmontšha mangwalo ao a hlalosago lehu e le boroko bjo bogolo bjoo motho a tla kgonago go tsoga go bjona tsogong. (Johane 11:​11, 25) Se se ile sa kgothatša Betty kudu, yoo ga bjale a thabelago thuto ya ka mehla ya Beibele. Ke feela boemo bja gagwe bja bophelo bjo bo mpefalago le go feta bjo bo mo thibetšego go kopanela dibokeng kua Holong ya Mmušo.

Caroline o re: “Go molaleng go nna gore barongwa ke bao ba etelelago pele modiro wo. Nomoro ya Betty ya mogala e be e ‘leleditšwe ka phošo’ gomme go oketša moo, o na le nywaga e 89!”​​—Kutollo 14:6.