O ka Phema go Hlaselwa ke Pelo Moyeng

Ramabelo yo a tšwago pele lefaseng, yo a laolago ka mo go tletšego bokgoni bja gagwe gomme ka ponagalo ya ka ntle a bonala e le yo a phetšego gabotse kudu mmeleng, o ile a wa ka nakwana fela nakong ya karolo ya lenaneo la go itokiša gomme a hwa. Ramabelo yo e be e le Sergei Grinkov, mothopi wa mentlele wa gauta wa di-Olympic ka makga a mabedi ka go thedimoga lehlweng, le yo bokgoni bja gagwe bo ilego bja kgaotša gatee-tee ge bo be bo thoma go tšwela pele​—ge a be a e-na le nywaga e 28 feela. A masetlapelo! Sebaki e be e le eng? Go hlaselwa ke pelo. Go boletšwe gore lehu la gagwe le be le sa letelwa ka mo go feletšego ka gobane go be go se na leswao la mohuta le ge e le ofe la go bontšha gore o be a swerwe ke bolwetši ba pelo. Lega go le bjalo, bahlahlobi ba ile ba hwetša gore o be a e-na le pelo e rurugilego gomme e be e thibile ditšhika tšeo di tšeago madi mešifeng ya pelo.

LE GE go ka bonala eka bontši bja ditlhaselo tša pelo di direga ka ntle le go lemoša, ditsebi tša tša maphelo di bontšha gore seo ga se selo se tlwaelegilego. Therešo ke gore dika tše bjalo tša ditemošo le mabaka a tlaleletšago a bjalo ka go se heme, go imela go feta tekano le dihlabi tša kgareng, gantši ga di tšeelwe hlogong. Ka baka leo, le ge ba sa hwe ka nako ya go hlaselwa ga bona ke pelo, ba bantši ba golofala o šoro bophelo bja bona ka moka.

Mo nakong ye, ditsebi tše ntši tša tša maphelo di dumelelana ka gore go thibelwa ga go hlaselwa ke pelo, go nyaka go šetša mo go sa kgaotšego ga seo motho a se jago, tsela ya gagwe ya go phela le go hlahlobja kgafetša ga tša maphelo. * Megato e bjalo, go akaretša le go rata e le ka kgonthe go dira diphetogo mo go nyakegago, go tla thuša kudu go šireletša motho kotsing ya di-tla-morago tše nyamišago tša go hlaselwa ke pelo.

Lega go le bjalo, go na le sebopego se sengwe sa pelo ya rena seo se tlogago se nyaka šedi e kgolo. Beibele e re lemoša gore: “Mo xo  tšohle di dišwaxo, diša pelo y’axo; xobane bophelô bo hlaxa xo yona.” (Diema 4:​23) Go ba gona, lengwalo le le šupile kudu go pelo ya seswantšhetšo. Go nyakega tlhokomelo e le gore re šireletše pelo ya rena ya kgonthe, eupša go bohlokwa le go feta go dula re le šedi ge e ba re nyaka go šireletša pelo ya rena ya seswantšhetšo malebana le malwetši ao a ka lebišago lehung la moya.

Tsheka-tsheko ya go hlaselwa ke pelo ga Seswantšhetšo

Ka go swana le bolwetši bja pelo ya kgonthe, ge re bolela ka tsela ya moya, tsela e nngwe e kgonthišeditšwego ya go thibela go hlaselwa ke pelo ke go ithuta ka dibaki tša yona le go gata megato ya go dira se sengwe ka tšona. Ka gona a re hlokomeleng a mangwe a mabaka a motheo ao a hlolago mathata a pelo​—ya kgonthe goba ya seswantšhetšo.

Dijo. Ke mo go amogelwago ka kakaretšo gore dijo tšeo di se nago phepo gaešita le ge di e-na le tatso, di nea mehola e menyenyane bophelong bjo bobotse goba tša se nee selo ka mo go feletšego. Ka mo go swanago, dijo tša monagano tše di se nago phepo ke tše hwetšagalago ga bonolo gomme ke tše di rothišago mare, eupša e le tše senyago bophelong bjo bobotse bja moya bja motho. Go na le didirišwa tše dintši mothopong wa ditaba tšeo di rekišwago ka bohlale gomme di bontšha boitshwaro bjo bo gobogilego bja botona le botshadi le dihlaretagi, bošoro le bonoge. Go fepa monagano wa motho ka dijo tše bjalo go senya pelo ya seswantšhetšo. Lentšu la Modimo le lemoša gore: “Tšohle tše lefaseng, e lexo kxanyoxô ya nama, le kxanyoxô ya mahlô, le xo phela ka xo ikxoxomoša, xa di tšwe xo Tata wešo, di tšwa lefaseng. Xomme lefase le a feta, le yôna kxanyoxô ya lôna. E a tl’o xo dula à le xôna xo ya xo ile, ké eo a diraxo tše Modimo a di rataxo.”​—1 Johane 2:​16, 17.

Dijo tše di nago le phepo, go swana le dienywa le merogo e metala, ga se tšeo di kganyogegago kudu go motho yo a lemaletšego dijo tše di se nago phepo. Ka mo go swanago, dijo tše phedišago le tše tiilego tša moya e ka ba tše kganyogegago ganyenyane go motho yo a itlwaeditšego go fepa monagano le pelo tša gagwe ka dilo tša lefase. A ka phela ka “lebese” la Lentšu la Modimo ka nakwana. (Ba-Hebere 5:​13) Mafelelong, ga a be le kgolo ya moya yeo e nyakegago bakeng sa go rwala boikarabelo bja gagwe bja motheo bja moya ka phuthegong ya Bokriste le bodireding. (Mateo 24:​14; 28:​19; Ba-Hebere 10:​24, 25) Ba bangwe boemong bjoo ba dumeletše matla a bona a moya go fokotšega go fihla ntlheng yeo go yona e thomilego go ba Dihlatse tšeo di sego mafolofolo!

Kotsi e nngwe ke gore ponagalo ya ka ntle e ka fora. Go dira mediro ya Bokriste ka go hloka mafolofolo go ka šira bolwetši bja pelo ya seswantšhetšo yeo e fokodišwago ke go ineela ka sephiring difilosofing tša nama goba boithabišong bjo bo bontšhago boitshwaro bjo bo gobogilego, bošoro goba bonoge. Dijo tše bjalo tše fošagetšego tša moya di ka bonala di e-na le kotsi e nyenyane boemong bja motho bja moya, eupša di ka golofatša pelo ya seswantšhetšo go swana le  ka tsela yeo dijo tše di se nago phepo di ka ngangago ditšhika tša madi gomme di senye pelo ya kgonthe. Jesu o ile a lemoša malebana le go dumelela dikganyogo tša go se loke gore di tsene pelong ya motho. O itše: “Mang le mang e a lebêlêlaxo mosadi à mo kxanyoxa, ó šetše a otswitše pelong ya xaxwe.” (Mateo 5:​28) Ee, dijo tše di se nago phepo tša moya di ka lebiša go hlaselweng ke pelo. Eupša, go sa na le tše dingwe tšeo di swanetšego ke go elwa hloko.

Boitšhidullo. Go tsebja gabotse gore mokgwa wa bophelo wa go fetša nako e ntši o dutše o ka tlaleletša go hlaselweng ke pelo ya kgonthe. Ka mo go swanago, mokgwa wa bophelo wa go fetša nako e ntši o dutše ka tsela ya moya, o ka ba le mafelelo a kotsi. Ka mohlala, motho a ka ba le karolo bodireding bja Bokriste eupša a ka lekanyetša se go seo se bitšwago lefelo la boiketlo, a se dire boiteko le ge e le bofe gore e be “modiri e a se naxo bosodi, e a tsebaxo xo ratha Lentšu la therešô à sa kxopamiše.” (2 Timotheo 2:​15) Goba a ka ba gona dibokeng tša Bokriste eupša a ka dira go gonyenyane go di lokišetša le go tšea karolo go tšona. Go ka ba go se na dipakane tša moya goba kganyogo goba mafolofolo bakeng sa dilo tša moya. Go se itšhidulle moyeng mafelelong go fokodiša goba gaešita le go bolaya tumelo le ge e le efe yeo a ka bago a be a e-na le yona pele. (Jakobo 2:​26) Moapostola Paulo o ile a bolela ka kotsi ye ge a be a ngwalela Bakriste ba ba-Hebere, bao ba bangwe ba bona ba bego ba šetše ba wetše mokgweng o bjalo wa bophelo bja moya bja go fo phutha matsogo. Bona ka moo a ilego a lemoša ka gona ka di-tla-morago tšeo se se bego se ka di tliša boemong bja bona bja moya. “Lebêlêlang-xê, lena Bana bešo, xore mo xo lena xo se kê xwa ba wa pelo e mpe ya xo se dumêle, e a kaxo hlanôxêla Modimo e a phelaxo. Sa lena a e bê xo eletšana byale xe xo sa le la “Lehono”, xore Le se bê le e a kaxo retella ka xo forwa ke dibe.”​—Ba-Hebere 3:​12, 13.

Kgateletšego. Le gona selo se sengwe seo e lego sebaki sa go hlaselwa ke pelo ya kgonthe ke kgateletšego e feteletšego. Ka mo go swanago, kgateletšego goba “dipelaêlô tša bophelô,” di ka ipontšha gabonolo e le tše kotsi pelong ya seswantšhetšo gaešita le go dira gore mohlaselwa a kgaotše go hlankela Modimo ka mo go feletšego. Temošo ya Jesu mo tabeng ye ke e lego nakong: “Fela, Le itôtê xore dipelo tša lena di se kê tša imêlwa ke bohori le xo boiwa, le dipelaêlô tša-bophelô byono, ’me letšatši leo la tlo Le wêla sehloxo.” (Luka 21:​34, 35) Gape kgateletšego e ka kgoma pelo ya rena ya seswantšhetšo o šoro ge e ba re lwantšhana le sebe sa ka sephiring ka nako e telele kudu. Kgoši Dafida o ile a ithuta ka phihlelo bohloko bjo bo sepedišanago le  kgateletšego e bjalo e gobatšago ge a be a re: “Xa ke sa na sethô se kaxo iketla, xe ke bôna dibe tša-ka. Xobane melato ya-ka e nthibexetše hlôxô; e nthôba byalo ka morwalô o boima.”​—Psalme 38:​3, 4.

Go ikholofela ka mo go feteletšego. Bahlaselwa ba bantši ba go hlaselwa ke pelo ba be ba na le kholofelo kudu ka boemo bja bona bja tša maphelo pele ga ge ba ka hlaselwa ke pelo. Gantši, tlhahlobo ya tša maphelo e be e phaelwa ka thoko goba gaešita le go se elwe hloko ka ge go naganwa gore ga e bohlokwa. Ka mo go swanago, ba bangwe ba ka nagana gore ka ge e bile Bakriste ka nako e telele, ga go selo seo se ka ba diragalelago. Ba ka hlokomologa go dumelela tlhahlobo ya moya goba go itlhahloba, go fihlela ge go tšwelela masetlapelo. Go bohlokwa go dula re gopola keletšo e botse yeo e neilwego ke moapostola Paulo ya mabapi le go ikholofela ka mo go feteletšego: “E a rexo ke eme, a bônê xore a se kê a wa.” Ke ga bohlale gore re amogele go se phethagale ga rena le go itlhahloba moyeng nako le nako.​—1 Ba-Korinthe 10:​12; Diema 28:14.

O se ke wa Hlokomologa Maswao a Temošo

Ke ka lebaka le le swanetšego ge Mangwalo a etiša pele kudu boemo bja pelo ya seswantšhetšo. Go Jeremia 17:​9, 10, re bala gore: “Pelo ké yôna mmata-mano-mabe, ké yôna lešaedi; e hlathwa ke mang? E hlathwa ke Nna Morêna, ke fêtlaxo letswalô, ke tl’o xo nea motho tše di lebanexo ’tsela tš’axwe, tše di lekanexo dikenyô tša medirô y’axwe.” Eupša ka ntle le go fetleka pelo ya rena, Jehofa gape o dira ditokišetšo tše lerato bakeng sa go re thuša go dira boitlhahlobo bjo bo nyakegago.

Ka “molaki e a bôtêxaxo yo bohlale,” re fiwa dikgopotšo tšeo di lego nakong. (Mateo 24:​45) Ka mohlala, tsela e nngwe ya motheo yeo ka yona pelo ya rena ya seswantšhetšo e ka re foretšago ke ka go re dira gore re nwelele boikgopolelong bja lefase. Tše ke dikakanyo tše e sego tša kgonthe, ke ditoro tša mosegare, dikgopolo tša monagano tše e sego tša kgonthe. Dilo tše bjalo e ka ba tše kotsi kudu, kudu-kudu ge e ba di tsoša dikgopolo tše sa hlwekago. Ka gona, re swanetše go di gana ka mo go feletšego. Ge e ba re hloya go hloka molao go swana le ge Jesu a dirile, re tla šireletša pelo ya rena malebana le go nwelela boikgopolelong bja lefase.​—Ba-Hebere 1:​8, 9.

Go oketša moo, re na le thušo ya bagolo ba nago le lerato ka phuthegong ya Bokriste. Le ge go kgomega ga ba bangwe go lebogwa e le ka kgonthe, mafelelong boikarabelo bja go hlokomela pelo ya rena ya seswantšhetšo bo magetleng a yo mongwe le yo mongwe wa rena ka noši. Go magetleng a rena re le motho ka o tee ka o tee go ‘leka tšohle’ le go ‘itebelediša rena beng go bona ge re na le tumelo.’​​—1 Ba-Thesalonika 5:​21; 2 Ba-Korinthe 13:5.

Šireletša Pelo

Molao-motheo wa Beibele wa gore “se motho a se byalaxo, ké sôna se a tl’o xo se buna” o šoma gape bophelong bjo bobotse bja pelo ya rena ya seswantšhetšo. (Ba-Galatia 6:7) Seo gantši go bonalago e le tshenyego ya kapejana ya moya, se bonala e bile ditla-morago tša tiragalo ya kgale ya ka sephiring ya go nwelela medirong e gobatšago moyeng e bjalo ka go lebelela diswantšho tšeo di kgothaletšago bootswa, go ba yo a tshwenyegilego kudu ka dilo tšeo di bonagalago goba go katanela maemo a phagamego goba matla a taolo.

Ka gona, gore a šireletše pelo, go bohlokwa gore motho a hlokomele dijo tšeo a iphepago ka tšona moyeng. Fepa monagano le pelo ka go iphepa ka Lentšu la Modimo. Phema dijo tša monagano tšeo di se nago phepo tšeo di hwetšagalago ga bonolo le tšeo di ipiletšago nameng eupša e le tšeo di feleletšago ka go dira gore pelo ya seswantšhetšo e retele. Mopsalme o lemoša ka seswantšho​—se se swanelago​—le se kwalago ge go tliwa tabeng ya tša kalafo, ge a re: “Dipelo tša bôná di reteletše wa makhura.”​—Psalme 119:70.

Ge e ba go na le diphošo tša ka sephiring tšeo e lego kgale di dutše, leka ka matla go di fediša pele di ka thiba ditšhika tša gago tša seswantšhetšo. Ge e ba lefase le thoma go lebelega le kgahliša gomme le bonala le fana mo gontši ka menate le boipshino, naganišiša ka keletšo e bohlale e neilwego ke moapostola Paulo. O ngwadile gore: “Ke rata xo botša lena bana bešo, xore lebaka ké la pitlaxanô wa xo re . . . ba ba phelaxo ka tša lefase ba etšê ba ba sa phelexo ka tšôna, xobane sebopêxô sa lefase leno se a lôba.” (1 Ba-Korinthe 7:​29-31) Le gona, ge e ba mahumo a dilo tše di bonagalago a thoma go re goketša, ela hloko mantšu a Jobo: “Xe nkabe ke botile dixauta, ka re: Xauta, ke Xo holofetše! Ké mo le tšôna-tšeo e ka bexo è le molato mo-ôba-kôtlô, ka xobane nkabe ke hladile Modimo wa maxodimong.”​—Jobo 31:​24, 28; Psalme 62:​10; 1 Timotheo 6:​9, 10.

Beibele ge e bontšha kotsi ya go tlwaela go hlokomologa keletšo e theilwego Beibeleng, e lemoša ka gore: “Pala-balai ó tlo thšoxa a robêxa xo se bê le moreku.” (Diema 29:1) Ka mo go fapanego, ka go hlokomela gabotse pelo ya rena ya seswantšhetšo, re ka hwetša lethabo le khutšo ya monagano tšeo di tlišwago ke go phela bophelo bjo bonolo le bjo bo rulagantšwego. Ye e bile tsela e holago ka dinako tšohle ya Bokriste bja therešo. Moapostola Paulo o ile a budulelwa go ngwala gore: “Xomme borapedi ké leruô le lexolo xe bo na le xo kxôlwa ke tše O naxô le tšôna. Xobane mola rè e-tla lefaseng, xa ra ka ra tla le selô; le xo tloxa re ka se kxône xo tloxa le selô. Ké xôna, xe re na le dijô le diaparô, a re kxolweng ke tšôna.”​—1 Timotheo 6:​6-8.

Ee, go itlwaetša ka tsela ya boineelo go Modimo go tla kgonthiša gore re na le pelo ya seswantšhetšo e tiilego le e phetšego gabotse. Ka go dula re etše hloko kudu dijo tša rena tša moya, re ka se dumelele selo le ge e le sefe sa ditsela tše senyago le dikgopolo tša lefase le, go baka kotsi goba tshenyo boemong bja rena bja moya. Sa bohlokwa le go feta, ke go amogela ditokišetšo tša Jehofa ka mokgatlo wa gagwe, eka ka mehla re ka ikokobeletša ditlhahlobo tša pelo ya rena ya seswantšhetšo. Go dira bjalo ka mafolofolo go tla thuša go phemeng di-tla-morago tše di nyamišago tša go hlaselwa ga pelo ya moya.

[Mengwalo ya ka tlase]

[Ntlhakgolo go letlakala 10]

DIJO TŠE FOŠAGETŠEGO TŠA MOYA DI KA GOLOFATŠA PELO YA SESWANTŠHETŠO GO SWANA LE KA TSELA YEO DIJO TŠE DI GOBATŠAGO DI KA DIRAGO GORE DITŠHIKA TŠA MADI E BE TŠE DI NGANGEGILEGO GOMME TŠA SENYA PELO YA KGONTHE

[Ntlhakgolo go letlakala 10]

MOHUTA WA BOPHELO BJA MOYA WA GO FETŠA NAKO E NTŠI O DUTŠE O KA BA LE MAFELELO A KOTSI

[Ntlhakgolo go letlakala 11]

“DIPELAELO TŠA BOPHELO” DI KA IPONTŠHA GABONOLO DI LE KOTSI PELONG YA SESWANTŠHETŠO

[Seswantšho go letlakala 11]

Go hlokomologa boemo bja bophelo bja rena bjo bobotse bja moya go ka lebiša mahlokong a magolo

 [Diswantšho go letlakala 13]

Go hlagolela mekgwa e mebotse ya moya go šireletša pelo ya seswantšhetšo

[Mothopo wa Seswantšho go letlakala 9]

AP Photo/David Longstreath