“Batho xe ba Mpolêla ba re ke Mang?”

KE SEHLA sa Keresemose gape. Batho go dikologa lefase ba kgetha go keteka letšatši la matswalo. Letšatši la matswalo a mang? Na ke la Morwa wa Modimo goba ke feela la mo-Juda yo a fišegelago borapedi yo a ikemišeditšego go mpshafatša bodumedi bjo bo bego bo atile tikologong ya gabo lekgolong la pele la nywaga? Na e be e le letšatši la matswalo la moemedi wa badiidi, lerabele leo le bakilego tšhošetšo e bjalo Mmušong wa Roma moo le ilego la bolawa, goba mohlomongwe ke sehlalefi seo se bego se gatelela tsebo ya motho ka noši le matla a sona a ka gare a bohlale? O na le lebaka le le kwagalago la go ipotšiša gore, ‘Ge e le gabotse, Jesu Kriste ke mang?’

Jesu ka boyena o be a kgahlegela karabelo ya batho potšišong yeo. Lebakeng le lengwe o ile a botšiša barutiwa ba gagwe gore: “Batho xe ba mpolêla ba re ke mang?” (Mareka 8:​27) Ke ka baka la’ng a ile a botšiša potšišo yeo? Ba bantši ba be ba šetše ba kgaoditše go mo latela. Ba bangwe go bonala ba be ba gakanegile le go nyama ka morago ga gore a gane maiteko a bona a go mo dira kgoši. Go feta moo, ge a be a hlohlwa ke manaba a gagwe, Jesu ga se a ka a nea pontšho e tšwago legodimong bakeng sa go hlatsela gore ke yena mang. Ka gona, ge ba araba potšišo yeo, ke eng seo barutiwa ba gagwe ba ilego ba se bolela mabapi le gore ke mang? Ba ile ba bolela tše dingwe tša dipono tšeo di bego di atile gare ga

 batho ka gore: “Ba bangwê ba re O Johane Mokolobetši; ba bangwê ba re O Eliya; ba bangwê ba re O Jeremia xoba e mongwê wa baporofeta.” (Mateo 16:​13, 14) Ga se ba bolela selo ka dipolelo tše sa lokago tšeo ka nako yeo di bego di tletše kua Palestina ka Jesu​—⁠morogaki, motho wa go itira tsebanyane, moporofeta wa maaka gaešita le segafsi.

Dibopego tše di sa Swanego tša Jesu

Ge nkabe Jesu a rotošitše potšišo e swanago lehono, o be a ka e bea ka tsela ye: “Diithuti ge di mpolela di re ke mang?” Ka mo go swanago, dikarabo e be e tla ba tše: Go na le dikgopolo tše dintši tše di fapa-fapanego. Go ya ka David Tracy wa Yunibesithi ya Chicago, batho ba fapanego ba bile le dikgopolo tše dintši tše di fapa-fapanego le ditlhaloso mabapi le Jesu le seo a se boletšego le go se dira. Ngwaga-kgolong o fetilego, diithuti di dirišitše mekgwa e mentši le e raraganego ya tša leago, thutamahlale ya batho le ya dipuku e le ge ba leka go hlama dikarabo tša potšišo ya gore ge e le gabotse Jesu e be e le mang. Mafelelong, ba nagana gore ge e le gabotse Jesu e be e le mang?

Diithuti tše dingwe di tšwela pele di bolela gore Jesu wa histori e be e le moporofeta wa mo-Juda wa kahlolo yo a bego a kgothaletša tshokologo. Lega go le bjalo, ba ile ba phema go mmitša gore ke Morwa wa Modimo, Mesia le Molopolodi. Diithuti tše ntši di belaela pego ya Beibele ya go ba ga gagwe legodimong mathomong le tsogo ya gagwe. Go ba bangwe, Jesu e be e le feela monna yo ka bophelo bja gagwe bjo bo beago mohlala le ka dithuto a ilego a tutuetša ditumelo tše dintši tšeo mafelelong di ilego tša golela go beng Bokriste. Le gona bjalo ka ge go begilwe ka go Theology Today, ba bangwe ba sa dutše ba bona Jesu e le “montšha-diphošo, sehlalefi se timetšego, goba motho feela yo a sa kwešišegego; morulaganyi wa setšhaba, sereti sa lerabele seo se thulanago le tlhabologo, goba tlhodi yeo e bolelago dikgopolo tša yona ka bolokologi ge e dutše e le gare ga bao ba galefilego, ba diilago, metseng yeo e lego lekatana ya Palestina ya go ba le bošoro setšhabeng.”

Go sa dutše go e na le dikgopolo tše dintši tše sa tlwaelegago. Seswantšho sa Jesu o moso se tšwelela mminong wa rap, bokgabong bja setoropong gaešita le go motantsho. * Ba bangwe ba akanya gore Jesu ge e le gabotse e be e le mosadi. Selemong sa 1993, baeti ba ba ilego ba ya Orange County Fair e lego California ba ile ba bona sehlwa-seeme sa “Christie,” “Kriste” wa mosadi yo a hlobotšego a le sefapanong. Mo e ka bago ka nako e swanago kua motseng wa New York​—⁠go be go kgabišitšwe ka “Christa”​—⁠e lego “Kriste” yo a bapotšwego wa mosadi. Dihlwa-dieme tše ka bobedi di ile tša rotoša ngangišano e kgolo. Gomme mathomong a 1999, bareki ba be ba ka hwetša bolumo “yeo e bego e le mabapi le lerato [leo] Mošemane Jesu a bego a le abelana le mpša ya gagwe, Morongwa.” Tswalano ya bona e hlaloswa e le e “tutuetšago moyeng gomme e bontšha ka tsela yeo mošemane le mpša ba ikemišeditšego go neela maphelo a bona bakeng sa yo mongwe le yo mongwe wa bona.”

Na go Tloga go le Bohlokwa go Tseba Gore Jesu e be e le Mang?

Ke ka baka la’ng o swanetše go kgahlegela go tseba gore Jesu e be e le mang le gore gona bjale ke mang? Lebaka le lengwe ke ka gobane, ka go tsopola mantšu a Napoleon, “Jesu Kriste o tutueditše le go laela balata ba Gagwe ka ntle le go ba gona ga Gagwe ka mmele o bonagalago.” Ka dithuto tša gagwe tše matla le ka tsela yeo a ilego a phela ka yona, Jesu o kgomile ka matla maphelo a batho ba dikete tše dimilione ka nywaga e nyakilego e e-⁠ba e dikete tše pedi. Mongwadi yo mongwe o boletše gabotse gore: “Go madira ka moka a kilego a gwanta, dikepeng ka moka tša ntwa tšeo di kilego tša agwa, dipalamenteng ka moka tšeo di kilego tša dula, dikgoši ka moka tšeo di kilego tša buša, ge di kopanywa ka moka ga se tša ka tša kgoma bophelo bja motho ka tsela e bjalo e matla.”

Godimo ga fao, o swanetše go tseba gore Jesu e be e le mang le gore ke mang gona bjale ka gobane o tla kgoma bokamoso bja gago ka go lebanya. O na le sebaka sa go ba molata wa mmušo o hlomilwego wa legodimong​—⁠Mmušo wa Modimo ka tlase ga Jesu. Polanete ya rena yeo e nago le mathata e tla bušetšwa boemong bja yona bjo bobotse le teka-tekano ya tswalano ya diphedi le tikologo ya tšona ka tlase ga tlhahlo ya Jesu. Boporofeta bja Beibele bo re kgonthišetša gore Mmušo wa Jesu o tla fepa bao ba bolawago ke tlala, wa hlokomela badiidi, wa fodiša balwetši gomme wa bušetša bahu bophelong.

Ka ntle le pelaelo o nyaka go tseba gore ke motho wa mohuta mang yo a eteletšego pele mmušo o bjalo o nyakegago kudu. Sehlogo se se latelago se tla go thuša go ba le temogo ka Jesu wa kgonthe.

[Mengwalo ya ka tlase]