Batswadi​—Kgotsofatšang Dinyakwa tša Bana ba Lena!

BANA ba nyaka tlhahlo le tayo e lerato, kudu-kudu go tšwa go batswadi ba bona. Tabeng ye, morutiši wa mo-Brazil, Tania Zagury o re: “Tshekamelo ya ngwana yo mongwe le yo mongwe ke go tsoma lethabo. Go bohlokwa gore o hlome dithibelo. Ke batswadi bao ba swanetšego go dira se. Ge e ba ba sa dire, bana ba tšwa taolong.”

Lega go le bjalo, dinageng tše dintši tutuetšo ya setšhaba seo se tlogelelago seo se tšeelago godimo tokologo ya motho ka noši go ka dira gore go be thata go latela keletšo ye e lego ka mo godimo. Ka gona, batswadi ba ka retologela kae bakeng sa thušo? Batswadi bao ba boifago Modimo ba a tseba gore bana ba bona ke “neô ya Morêna.” (Psalme 127:3) Ka gona, ba lebelela Lentšung la Modimo, Beibele, bakeng sa tlhahlo ya go ba godiša. Ka mohlala, Diema 13:​24 e re: “Mo-hlokiša-ngwana-kxati ó mo hloile; e a mo rataxo ó tsoxêla xo mo laya.”

Go diriša ga Beibele lentšu “kxati” ga se gwa swanela go kwešišwa e le go otla mmele fela; go emela mokgwa wa phošollo, e ka ba ya sebopego le ge e le sefe. Ka kgonthe, gantši go kgalemela ka mantšu e ka ba sona seo se hlokegago go phošolla mesepelo ya ngwana ya bonganga. Diema 29:​17 e re: “Sôla ngwana wa xaxo, a tlê a Xo axišê, a kwišê pelo y’axo bose.”

Bana ba nyaka tayo e lerato e le gore go tlošwe mekgwa e sa nyakegego. Phošollo e bjalo e tsepamego le e botho e nea bohlatse bja gore motswadi o na le taba le ngwana. (Diema 22:6) Ka gona, batswadi, le se ke la fela matla! Ka go latela keletšo e kwagalago le e šomago ya Beibele, le tla thabiša Jehofa Modimo gomme la hlompšha ke bana ba lena.