Dipotšišo tše Tšwago go Babadi

Mosadi wa Mokriste a ka leka-lekanya bjang potego e sa kwanantšhego go Modimo le go ikokobeletša monna wa gagwe yo a sa dumelego ge e ba a tšea karolo medirong ya matšatši a maikhutšo a bodumedi?

Go dira ga gagwe bjalo go tla nyaka bohlale le temogo. Eupša o dira selo se se nepagetšego ka go katanela go leka-lekanya boikarabelo bja gagwe ka bobedi. Jesu o neile keletšo mabapi le boemo bjo swanago gore: “Nthšetšang Kesara tše e lexo tsa Kesara; Modimo Le Mo nthšetšê tše e lexo tša Modimo.” (Mateo 22:​21) Ee, o be a bolela ka boikarabelo go mebušo, yeo ka morago Bakriste ba ilego ba botšwa gore ba ikokobeletše yona. (Ba-Roma 13:1) Lega go le bjalo, keletšo ya gagwe e ka dirišwa gape go mosadi yo a leka-lekanyago boikarabelo bja gagwe go Modimo le go ikokobetša ga gagwe ka tsela ya Mangwalo go monna wa gagwe, gaešita le ge e le yo a sa dumelego.

Ga go le o tee yo a tlwaelanego le Beibele yo a ka ganago gore e gatelela gore boikarabelo bja pele bja Mokriste, ke go botegela Modimo Ramatla-ohle ka go se kwanantšhe ka dinako ka moka. (Ditiro 5:​29) Go sa dutše go le bjalo, mabakeng a mantši morapedi wa therešo a ka dumelelana le dikgopelo goba dinyakwa tša yo a sa dumelego yo a nago le matla a taolo mola a sa tšee karolo go robeng melao e phagamego ya Modimo.

Re hwetša mohlala o hlabišago seetša wa ba-Hebere ba bararo, bjalo ka ge o boletšwe go Daniele kgaolo 3. Mmuši wa bona yo a phagamego, Nebukadinetsara, o ile a laela gore bona le ba bangwe ba itšweletše molaleng wa Dura. Ka ge ba be ba lemoga gore go be go rulaganyeditšwe borapedi bja maaka, mohlomongwe ba-Hebere ba bararo ba ka be ba ile ba fo kgetha go široga go ba moo. Mohlomongwe Daniele o be a ka kgona go kgopela go se be gona, eupša ba ba bararo ba be ba ka se kgone. * Ka gona ba  ile ba dumela go fihla bokgoleng bja gore ba be gona, eupša ba be ba ka se​—le gona ga se ba​—tšea karolo tirong le ge e le efe e fošagetšego.​—Daniele 3:​1-18.

Ka mo go swanago, nakong ya matšatši a maikhutšo monna yo a sa dumelego a ka kgopela goba go nyaka gore mosadi wa gagwe yo e lego Mokriste a dire selo seo a ka ratago go se phema. Ela hloko mehlala e mengwe: O mmotša gore a apee sejo se itšego ka letšatši leo yena le ba bangwe ba tlago go keteka letšatši la maikhutšo. Goba o nyaka gore lapa la gagwe (go akaretša le mosadi wa gagwe) ba etele meloko ya gabo letšatšing leo bakeng sa dijo goba feela e le ketelo ya bogwera. Goba mohlomongwe le pele ga letšatši la maikhutšo, a ka bolela gore ge mosadi wa gagwe a e-ya mabenkeleng, o swanetše go mo rekela dilo tše itšego​—dijo tše di kgethegilego tša letšatši la maikhutšo, dilo tšeo di ka dirišwago e le dimpho, goba pampiri ya go phuthela dimpho le dikarata tšeo a tlago go di diriša gotee le dimpho tša gagwe.

Mo le gona, mosadi wa Mokriste o swanetše go ikemišetša go se tšee karolo ditirong tša bodumedi bja maaka, eupša go thwe’ng ka dikgopelo tše bjalo? Ke hlogo ya lapa, gomme Lentšu la Modimo le re: “Lena Basadi! Kwang banna ba lena; ké sôna se se swanetšexo Moreneng.” (Ba-Kolose 3:​18) Maemong a, na a ka bontšha go ikokobetša ga gagwe bjalo ka mosadi mola ka lehlakoreng le lengwe a botegela Modimo ka go se kwanantšhe? O swanetše go dira phetho ya kamoo a tla leka-lekanyago go kwa ga gagwe monna wa gagwe le go kwa ga gagwe Jehofa ka mo go fetišago.

Ka dinako tše dingwe tše e sego tša maikhutšo, monna wa gagwe a ka mo kgopela gore a apee sejo se itšego, mohlomongwe e le ka gobane e le seo a se ratago goba ka gobane a tlwaetše go ja sejo seo ka sehla se itšego. O tla kganyoga go mmontšha lerato le go bontšha go lemoga bohlogo bja gagwe. Na a ka dira se se swanago ge e ba a dirile kgopelo nakong ya letšatši la maikhutšo? Basadi ba bangwe ba Bakriste ba ka kgona go dira seo ka letswalo le lebotse, ba go lebelela feela e le modiro o tlwaelegilego wa go apea dijo tša letšatši le letšatši. Ka ntle le pelaelo, ga go Mokriste yo a botegago ka go se kwanantšhe yo a ka tswalanyago go ba bohlokwa ga se le letšatši la maikhutšo gaešita le ge monna wa gagwe a dirile. Ka mo go swanago, a ka nyaka gore a be le yena ge a etela ba meloko ya gabo ka dinako tše itšego kgwedi le kgwedi goba ngwaga le ngwaga. Na a ka dira se se swanago le ge e le letšatši la maikhutšo? Goba na a ka ba a rata go mo rekela dilo bjalo ka mehleng ka ge a mo kgopetše ka ntle le go fo ahlola ka gore ke eng seo a ikemišeditšego go se dira ka dilo tšeo a mo rekelago tšona ge a dutše a reka?

Go ba gona, mosadi wa Mokriste o swanetše go nagana ka ba bangwe​—mafelelo a seo go bona. (Ba-Filipi 2:4) O tla phema go nea kgopolo le ge e le efe ya gore o dumelelana le letšatši la maikhutšo bjalo ka ge ba-Hebere ba bararo ba be ba ka ba ba ratile gore ba bangwe ba se ke ba ba bona ge ba e-ya molaleng wa Dura. Ka gona, a ka leka go boledišana ka bohlale le monna wa gagwe go bona ge e ba ka go naganela maikwelo a gagwe, a ka itirela dilo tše dingwe tšeo di tswalanago le letšatši la maikhutšo go dumelelana le mosadi wa gagwe yo a mo ratago le yo a mo hlomphago. A ka ba a bona e le ga bohlale go se ipee ka bobedi bja bona boemong bjo bo ka lešago dihlong ge e ba a tla gana go tšea karolo ditirong tša bodumedi bja maaka. Ee, poledišano e bonolo e sa le pele e ka lebiša tharollong ya khutšo.​—Diema 22:3.

Mafelelong, Mokriste yo a botegago o swanetše go hlahloba ditherešo gomme a dire phetho ya seo a tlago go se dira. Go kwa Modimo go swanetše go tla pele, bjalo ka ge go bile bjalo ka ba-Hebere ba bararo. (1 Ba-Korinthe 10:​31) Eupša a e-na le seo ka kgopolong, Mokriste ka noši o swanetše go tšea phetho ka dilo tšeo e lego tše sa kwanantšhego tšeo di ka dirwago ge e ba di kgopelwa ke motho yo a lego boemong bja taolo ka lapeng goba setšhabeng.

[Mengwalo ya ka tlase]