Moya wa go Ithapa o Tliša Batho Gilead

SEKOLO sa Beibele sa Watchtower sa Gilead se gona gore se tlwaetše banna le basadi bao ba ineetšego bakeng sa tirelo ya boromiwa. Ke bomang bao ba swanelegago go tla Gilead? Bao ba nago le moya wa go ithapa. (Psalme 110:3) Seo ka kgonthe se bonagetše ka September 8, 2001, ge sehlopha sa bo-111 se aloga.

Barutwana ba bangwe ba sehlopha seo ba be ba šetše ba tlogetše malapa, bagwera le dinaga tša gabo bona bakeng sa go hlankela moo go nago le tlhokagalo e kgolo. Ka go dira bjalo, ba ile ba itlhahloba ge e ba ba be ba ka kgona go dira dipeakanyo tša go dula tikologong e fapanego. Ka mohlala, Richer le Nathalie ba ile ba rulaganya ditaba tša bona e le gore ba khudugele Bolivia, Todd le Michelle ba ya Dominican Republic, gomme David le Monique ba ya nageng ya Asia go yo phatlalatša ditaba tše dibotse tša Mmušo wa Modimo. Barutwana ba bangwe ba be ba šetše ba hlanketše Nicaragua, Ecuador le Albania.

Christy o be a ile a kgothaletšwa go ithuta leleme la Sepaniši sekolong se se phagamego, e le go mo thuša go itokišeletša go tlo fetša nywaga e mebedi kua Ecuador pele a nyalwa. Ba bangwe ba ile ba kopanela le diphuthego tša maleme a šele dinageng tša gabo bona. Ba lebeletšane le tlhohlo e fapanego, Saul le Priscilla ba ile ba bontšha moya wa go ithapa ka go šoma ka thata gore ba bolele Seisemane ga kaone pele ga ge ba ka tla sekolong.

Dibeke tše 20 tša tlwaetšo ya boromiwa di ile tša feta ka lebelo. Letšatši la go aloga le ile la fihla, gomme barutwana ba be ba e-na le bagwera le ba malapa, ba theeditše keletšo e bohlale gomme ba laelana ka mantšu a go kgothatšana.

Modula-setulo wa lenaneo e be e le Theodore Jaracz, sealoga sa sehlopha sa bošupa sa Sekolo sa Gilead, yo ga bjale a hlankelago e le setho sa Sehlopha se Bušago sa Dihlatse tša Jehofa. Mantšung a gagwe a go bula, o ile a gatelela therešo ya gore bjalo ka mokgatlo, ga se ra ka ra širega morerong wa go tlwaetša barutwana Gilead, e lego go bolela ditaba tše dibotse tša Mmušo lefaseng ka moka leo go agilwego go lona. (Mareka 13:​10) Gilead e hlama barutwana ba swanelegago gore ba tšwetše pele modiro wo wa go bolela ka tekanyo e kgolwanyane go feta ka moo ba bego ba dira ka gona pele, le mafelong a mangwe a lefase moo baromiwa bao ba tlwaeditšwego ba nyakegago kudu. Ngwanabo rena Jaracz o ile a kgothaletša barutwana go diriša gabotse tlwaetšo yeo ba e hweditšego Gilead ka ge bjale ba tla be ba tlatša baromiwa bao ga bjale ba hlankelago dinageng tše 19 tšeo go tšona dialoga di bego di abetšwe.

Keletšo e Lego Nakong Bakeng sa Bao ba Alogago

Go ile gwa latela lelokelelo la dipolelo. William Van De Wall, e lego setho sa Komiti ya Lekala la United States , o ile a bolela ka sehlogo se rego “Phišego ya Boromiwa​—Leswao la Bakriste ba Therešo.” O ile a lebiša tlhokomelo go ‘go dira barutiwa,’ mo go begilwego go Mateo 28:​19, 20, gomme a kgothaletša barutwana gore: “Ekišang Jesu, yo a ilego a dira kabelo ya gagwe ya boromiwa ka phišego le mafolofolo.” Bakeng sa go thuša baromiwa ba ka moso go dula ba le mafolofolo modirong wa bona wa boromiwa, o ile a ba kgothatša ka gore: “Kgomarelang lenaneo le šomago; bolokang mekgwa e mebotse ya thuto ya motho ka noši, dulang le  sepedišana le ditaba tša pušo ya Modimo; gomme ka mehla le dule le tsepamišeditše menagano mabakeng ao ka ona le lego kabelong ya lena.”

Yo a latetšego lenaneong e bile Guy Pierce, yo e lego setho sa Sehlopha se Bušago. O ile a godiša sehlogo se se rego “Tšwelang Pele le Godiša ‘Matla a Lena a go Nagana.’” (Ba-Roma 12:1) O ile a nea sehlopha sa dialoga keletšo yeo e šomago, a se kgothaletša gore se diriše bokgoni bjoo Modimo a se filego bjona bja go nagana. O boletše gore: “Tšwelang pele le naganišiša ka seo Jehofa a le botšago sona ka Lentšu la gagwe. Seo se tla le šireletša.” (Diema 2:​11) Ngwanabo rena Pierce gape o ile a lemoša sehlopha gore se se kgomarele pono e sa fetogego dikgopolong tša sona, e le gore se se ke sa šitiša ‘matla a bona a go nagana.’ Ka ntle le pelaelo, dikgopotšo tše tšeo di lego nakong, di tla ipontšha e le tše thušago ge dialoga di dutše di hlankela e le baromiwa.

Se se latelago modula-setulo o ile a rola yo mongwe wa barutiši ba Gilead, Lawrence Bowen, yo a ilego a bolela ka sehlogo se se rego “Kgetha go se Tsebe Selo.” O ile a bontšha gore malebana le modiro wa gagwe wa boromiwa kua Korinthe, moapostola Paulo o ile a “a kgetha go se tsebe selo . . . kantle le Jesu Kriste, mmapolwa.” (1 Ba-Korinthe 2:2, NW) Paulo o be a tseba gore matla a magolo legohleng, e lego moya o mokgethwa, a thekga  molaetša o bontšhitšwego ka gare ga Beibele ka moka: go godišwa ga bogoši bja Jehofa ka Peu e holofeditšwego. (Genesi 3:​15) Barutwana ba 48 bao ba alogago, ba ile ba kgothaletšwa gore ba swane le Paulo le Timotheo le gore e be baromiwa ba atlegago, ba gomaretše “mantšu ao a se naxo senyalô.”​—2 Timotheo 1:13.

Sehlogo sa mafelelo sa lelokelelo la dipolelo tša go bula e bile se se rego “E ba le Tebogo Bakeng sa Tokelo ya Gago, Mpho e Tšwago go Modimo.” Wallace Liverance, e lego mongwadiši wa Sekolo sa Gilead, o thušitše dialoga go kwešiša gore ditokelo tša tirelo ke dipontšho tša botho bjo bo sa swanelago bja Modimo, e sego selo seo se bego se ba swanetše goba moputso wa bona. A diriša mohlala wa moapostola Paulo, Ngwanabo rena Liverance o ile a bontšha gore: “Go kgetha ga Jehofa Paulo gore e be moapostola wa gagwe go ditšhaba ga se gwa ba bjalo ka baka la mediro, e le gore go se ke gwa tšwelela bjalo ka ge eka Paulo o be a e-na le tshwanelo ya go ba kabelong yeo goba eka o be a e kolotwa. Go be go sa ithekga ka nako yeo a e feditšego a le tirelong goba phihlelo. Go ya ka pono ya motho, go ka ba go ile gwa bonala eka Baranaba ke yena yo a swanetšwego ke go kgethwa. Go be go sa ithekga ka bokgoni bja motho; go molaleng gore Apollo e be e le seboledi se matla go feta Paulo. E be e le pontšho ya botho bjo bo sa swanelago bja Modimo.” (Ba-Efeso 3:​7, 8) Ngwanabo rena Liverance o ile a kgothaletša dialoga go diriša mpho ya tšona, goba tokelo ya tšona ya tirelo, go thuša ba bangwe gore e be bagwera ba Modimo le baamogedi ba “neô ya kxauxêlô ya Modimo . . . bophelô byo bo sa felexo ka Jesu Kriste Mong ’a rena.”​—Ba-Roma 6:23.

Ka morago ga se, Mark Noumair, e lego morutiši yo mongwe gape wa Gilead, o ile a swara poledišano e phelago le barutwana ba mmalwa ka sehlogo se se rego “Go Lokišetša go Lebiša Mafelelong a Mabotse.” (Diema 21:5) Diphihlelo di bontšhitše gore ge modiredi a lokišetša gabotse bakeng sa bodiredi, kudu-kudu ka go lokišetša pelo ya gagwe, o tla kgahlegela batho e le ka kgonthe. A ka se tsoge a lahlegetšwe ke seo a se bolelago. Go e-na le moo, o tla bolela le go dira dilo tšeo di tlago go ba thuša moyeng. Ngwanabo rena Noumair o ile a bontšha se ge a be a diriša phihlelo ya gagwe ka noši bjalo ka moromiwa kua Afrika ge a re: “Se ke sona senotlelo sa go ba moromiwa yo a atlegilego.”

Tirelo ya Boromiwa​—Mošomo wo o Kgotsofatšago

Ralph Walls le Charles Woody ba ile ba ba le poledišano le baromiwa ba bangwe ba nago le phihlelo, bao le bona ba bego ba le Lefelong la tša Thuto la Patterson bakeng sa tlwaetšo e kgethegilego. Dipoledišano di ile tša gatelela gore ke lerato la go rata batho leo le tlišago lethabo tirelong ya boromiwa. E be e le mo go kgonthišetšago go barutwana le ba malapa a gabo bona le bagwera bao ba bego ba le gare ga batheetši, go kwa baromiwa bao ba nago le phihlelo ge ba dutše ba hlalosa ka bobona lebaka leo ka lona tirelo ya boromiwa e lego mošomo o kgotsofatšago.

John E. Barr, yo a hlankelago Sehlopheng se Bušago, o ile a nea polelo ya thwadi ya letšatšing leo, e nago le sehlogo se se rego “Hlabêlang Morêna Sefela se Sefsa.” (Jesaya 42:​10) Ngwanabo rena Barr o ile a bontšha gore polelwana “sefela se sefsa,” e tšwelela ka makga a senyane ka Beibeleng. O ile a botšiša potšišo e rego, “Ke eng seo sefela se se sefsa se se huperego?” Gomme o ile a araba ka gore: “Taba e dikologilego e utolla gore sefela se sefsa se opelwa ka baka la ditiragalo tše difsa ka go bontšhwa ga bogoši bja Jehofa.” O ile a kgothaletša barutwana go tšwela pele ba opela gotee ditumišo tša Mmušo o fenyago wa Modimo ka diatleng tša Kgoši Mesia, e lego Jesu Kriste. Ngwanabo rena Barr o boletše le gore tlwaetšo yeo ba e hweditšego Gilead e ba thušitše go kwešiša ka mo go tseneletšego go feta le ge e le neng pele dikarolo tše fapa-fapanego tša “sefela se sefsa.” “Sekolo se gateletše bohlokwa bja gore le ‘opeleng’ ditumišo tša Jehofa ka go dumelelana le bana babo lena le dikgaetšedi kae le kae mo le yago gona; ka mehla le hlagoleleng botee le ba bangwe dikabelong tša lena.”

Ka morago ga ge barutwana ba filwe di-diploma tša bona, seboleledi sa sehlopha se ile sa bala lengwalo la tebogo ya kgonthe bakeng sa tlwaetšo yeo ba e hweditšego Gilead.

Na o ka katološa tirelo ya gago go Modimo gomme wa e dira e enywago kudu? Ge e ba go le bjalo, katana go swana le ge barutwana ba bao ba alogago ba dirile. Se ke seo se ba thušitšego go swanelega bakeng sa tšhemo ya boromiwa. Go hwetšwa lethabo le legolo ge yo mongwe ka lethabo a ithapa ka go rata tirelong ya Modimo.​—Jesaya 6:8.

[Lepokisi go letlakala 25]

DIPALO-PALO TŠA SEHLOPHA

Palo ya dinaga tše di emetšwego: 10

Palo ya dinaga tšeo ba abetšwego go tšona: 19

Palo ya barutwana: 48

Palogare ya nywaga: 33.2

Palogare ya nywaga therešong: 16.8

Palogare ya nywaga tirelong ya nako e tletšego: 12.6

[Seswantšho go letlakala 26]

Sehlopha se se Alogago sa bo-111 sa Sekolo sa Beibele sa Watchtower sa Gilead

Lelokelelong leo le lego ka mo tlase, methaladi e balwa go tloga ka pele go ya ka morago, gomme maina a lokeleditšwe go tloga go le letshadi go ya go le letona mothalading o mongwe le o mongwe.

(1) Yeomans, C.; Toukkari, A.; Nuñez, S.; Phillips, J.; Dawkin, M.; Silvestri, P. (2) Morin, N.; Biney, J.; López, M.; Van Hout, M.; Cantú, A.; Szilvassy, F. (3) Williams, M.; Itoh, M.; Van Coillie, S.; Levering, D.; Fuzel, F.; Geissler, S. (4) Yeomans, J.; Moss, M.; Hodgins, M.; Dudding, S.; Briseño, J.; Phillips, M. (5) López, J.; Itoh, T.; Sommerud, S.; Kozza, C.; Fuzel, G.; Moss, D. (6) Williams, D.; Dudding, R.; Geissler, M.; Morin, R.; Biney, S.; Cantú, L. (7) Dawkin, M.; Hodgins, T.; Levering, M.; Silvestri, S.; Van Hout, D.; Briseño, A. (8) Van Coillie, M.; Nuñez, A.; Kozza, B.; Sommerud, J.; Toukkari, S.; Szilvassy, P.