Na o a Gopola?

Na o thabetše go bala ditokollo tša morago bjale tša Morokami? Ge e ba go le bjalo, bona ge e ba o ka kgona go araba dipotšišo tše di latelago:

• Kgoro ya Tsheko ya Molao-theo ya Mmušo wa Jeremane e thušitše phenyong efe ya molao yeo e akaretšago bodumedi?

Kgoro yeo e ile ya fetoša kahlolo e nngwe e bego e sa thekge Dihlatse tša Jehofa le go tsebja ga tšona bjalo ka mokgatlo wa molao wa phatlalatša. Kahlolo ya phenyo e bontšhitše gore ka kua ga tekanyo ya tokologo ya bodumedi motho a ka ‘latela ditumelo tša bodumedi’ go feta dinyakwa tša Mmušo.​—8/15, letlakala 8.

• Jobo o tlaišegile lebaka le le kaaka’ng?

Puku ya Jobo ga e bontšhe gore o tlaišegile ka nywaga e mentši. Tlaišego ya Jobo le mafelelo a yona e ka ba e diragetše ka dikgwedi tše sego kae, mohlomongwe ka tlase ga ngwaga.​—8/15, letlakala 31.

• Ke ka baka la’ng re ka kgodišega gore Diabolo ke yo a fetago go fo ba wa tumela-khwele?

Jesu Kriste o be a tseba gore Diabolo ke wa kgonthe. Jesu o ile a lekwa ke motho wa kgonthe, e sego bobe bjo bo bego bo le ka gare go yena. (Mateo 4:​1-​11; Johane 8:​44; 14:​30)​—9/1, matlakala 5-6.

• Diema 10:​15 e re: “Thoto ya mohumi ke sebô sa xaxwe; thšexo ya badiidi ké bosenyêxêlô.” Ke bjang se se ipontšhago e le therešo?

Mahumo a ka dira e le tšhireletšo malebana le maemo ao go sa kgodišegego ka wona bophelong, go fo swana le ge toropo ya dibo e nea tekanyetšo ya tšhireletšego go bao ba dulago go yona. Ka lehlakoreng le lengwe, bodiidi e ka ba bjo bo senyago ge e ba go e ba le ditiragalo tšeo di dirago gore maemo a fetoge.​—9/15, letlakala 24.

• Ke ka kgopolo efe ‘go ilego gwa thongwa go bitšwa ga leina la Jehofa’ mehleng ya Enose? (Genesi 4:26)

Leina la Modimo le dirišitšwe ga e sa le go tloga mathomong a histori ya motho; lega go le bjalo, go bitšwa ga leina la Modimo mo go thomilego mehleng ya Enose e be e se go bitšwa ga Jehofa ka tumelo. Batho ba ka ba ba ile ba dirišetša leina la Modimo ka lenyatšo go bona ka noši goba go batho ba bangwe e le ge ba itira eka ba rapela Modimo.​—9/15, letlakala 29.

• Lentšu “tayo” le bolela’ng, bjalo ka ge le dirišwa ka Beibeleng?

Lentšu le ga le bolele mohuta le ge e le ofe wa tshwaro e mpe goba sehlogo. (Diema 4:​13; 22:​15) Lentšu la Segerika bakeng sa “tayo” le tswalana kudu-kudu le tayo, thuto, phošollo gomme ka dinako tše dingwe le tswalana le kotlo e tiilego eupša e le ya lerato. Tsela ya bohlokwa yeo ka yona batswadi ba ka ekišago Jehofa ke ka go katanela go dula ba butše mekero ya poledišano le bana ba bona. (Ba-Hebere 12:​7-10)​—10/1, matlakala 8, 10.

• Bakriste ba therešo lehono ba bontšha bjang gore ke ba pušo ya Modimo?

E le mabapi le go thekga Mmušo wa Modimo, Dihlatse tša Jehofa ga di itšhunya-tšhunye dipolitiking goba go hlohleletša borabele, gaešita le dinageng tšeo go tšona Dihlatse di thibetšwego. (Tito 3:1) Di kgatha tema e bohlokwa ka tsela yeo Jesu le barutiwa ba gagwe ba pele ba ilego ba dira ka yona gomme di katanela go thuša batho go amogela ditekanyetšo tše di lokilego tša Beibele, tše bjalo ka potego, go hlweka boitshwarong le mekgwa e mebotse ya boitshwaro mošomong.​—10/15, letlakala 6.

• Ke bjang meetse a neago bophelo a elago kua Andes?

Dihlatse tša Jehofa moo di dira boiteko bja go tlišetša batho ditherešo tša Beibele, go akaretša le ka maleme a mabedi a lefelong leo, se-Quechua le se-Aymara. Dihlatse di etela batho bao ba dulago dihlakahlakeng Letsheng la Titicaca, go akaretša le dithala tša sehlakahlaka se “phaphamalago” tšeo di dirilwego ka mahlaka ao a golelago ka meetseng a letsha.​—10/15, matlakala 8-10.

• Ke eng seo Modimo a re filego sona bakeng sa go re hlahla seo se ka bapišwago le tshepedišo ya tlhahlo ya computer yeo e lego ka difofaneng tša banamedi tša mehleng yeno?

Modimo o hlamile batho ka tekanyo ya tlhahlo ya boitshwaro, pono ya ka gare ya boitshwaro. Le ke letswalo la rena leo re le abetšwego. (Ba-Roma 2:​14, 15)​—11/1, matlakala 3-4.

• Ke ka baka la’ng lehu la Jesu le e-na le mohola o mogolo?

Ge motho yo a phethagetšego Adama a be a senya, o ile a lahla bophelo bja batho bakeng sa gagwe le ditlogolo tša gagwe. (Ba-Roma 5:​12) Bjalo ka motho yo a phethagetšego, Jesu o ile a dira sehlabelo ka bophelo bja gagwe e le motho, ka go rialo a neelana ka topollo yeo e dirago gore go kgonege go batho bao ba botegago gore ba hwetše bophelo bjo bo sa felego.​—11/15, matlakala 5-6.

• Ma-Scythia ao go bolelwago ka wona go Ba-Kolose 3:​11 e be e le bomang?

Ma-Scythia e be e le setšhaba seo se bego se ralala megoleng ya Yuropa le Asia, ba buša go tloga mo e ka bago ka 700 go ya go 300 B.C.E. E be e le banamedi ba dipitsi le bahlabani ba matla. Ba-Kolose 3:​11 e ka fo ba e be e šupa, e sego setšhaba se itšego, eupša batho ba šoro kudu.​—11/15, matlakala 24-5.

• Ke ka baka la’ng re ka bolela gore Molao wa Gauta ke thuto yeo e swanetšwego ke tlhokomelo ya rena ya ka mehla?

Tekanyo ye e lokilego ya boitshwaro e hlaloswa ke Bojuda, bo-Buddha, filosofi ya Segerika le bo-Confucius. Lega go le bjalo, seo Jesu a se laetšego Thutong ya Thabeng se nyaka mediro e nepagetšego, gomme se kgoma bophelo bja batho kae le kae le historing ka moka. (Mateo 7:​12)​—12/1, letlakala 3.