“Sehlare sa xo Tlotša Mahlô ’Axo”

TAELO yeo e neilwe ke Jesu Kriste a e nea phuthego ya Bokriste ya lekgolong la pele la nywaga ya Laoditsea, Asia Minor.

Jesu o ile a re: “O rêkê sehlare sa xo tlotša mahlô ’axo, O tlê O bônê.” (Mongwalo o sekamego ke wa rena.) E be e se bolwetši bja kgonthe bja mahlo, eupša e le bofofu bja moya bjo bo bego bo nyaka kalafo. Bakriste ba Laoditsea ba be ba tutueditšwe ke moya wa motse o atlegilego ka dilo tše di bonagalago woo ba bego ba dula go wona gomme ba be ba sa re selo ka dinyakwa tša kgonthe tša bona tša moya.

Ge a be a bolela ka se e le sebaki sa bofokodi bja mahlo a bona, Jesu o itše: “O re: Ke mohumi, ke ruile! Xa ke hloke selô!​—’me xa O tsebe xe O le yo madi-mabe, xe O nyamiša, xe O le modiitšana, xe O le sefofu, xe O hlobotše.” (Mongwalo o sekamego ke wa rena) Le ge ba be ba sa lemoge seo, ditho tša phuthego di be di nyaka ‘sehlare se se fodišago sa mahlo’ se se bego se ka hwetšagala feela ka go amogela thuto le tayo tša Jesu Kriste. Jesu o itše: “Rêka xo Nna.” (Mongwalo o sekamego ke wa rena.)​—Kutollo 3:​17, 18.

Go etša ge go be go le bjalo ka bao ba bego ba le Laoditsea, Bakriste ba kgonthe lehono ba swanetše go itiša malebana le go tutuetšwa ka mo go sa lokago, mohlomongwe ba sa lemoge, ke tikologo ya go rata dilo tše di bonagalago le e sekametšego maipshinong yeo ba phelago go yona. Taelo ya tša kalafo bakeng sa go kgomarela pono e phedilego ya moya e bontšhwa keletšong e rego: “Rêka xo [Jesu] . . . sehlare sa xo tlotša mahlô ’axo, O tlê O bônê.”

Seo se swanetšego go elwa hloko ke taba ya gore ‘sehlare se sa mahlo’ se swanetše go rekwa. Go na le tshenyagalelo yeo e akaretšwago. Nako e swanetše go dirišwa bakeng sa go ithuta le go naganišiša ka Lentšu la Modimo. Lentšu le, mopsalme o re kgonthišetša gore ‘le sekile, le boniša mahlo [a moya].’​—Psalme 19:8.