Bagolo Tlwaetšang ba Bangwe go Rwala Morwalo wa Boikarabelo

KA DIPHUTHEGONG tša Dihlatse tša Jehofa lefaseng ka bophara, go nyakega ka go akgofa banna bao ba ka hlankelago maemong a bolebeledi. Go na le mabaka a mararo a motheo bakeng sa kgolo ye.

Sa pele, Jehofa o phethagatša kholofetšo ya gagwe ya go dira gore ‘mmotlana a tšwe setšhaba se matla.’ (Jesaya 60:​22) Ka botho bja gagwe bjo bo sa re swanelago, mo e nyakilego go ba barutiwa ba bafsa ba milione o tee ba ile ba kolobetšwa gore e be Dihlatse tša Jehofa nywageng e meraro e fetilego. Go nyakega banna ba ikarabelago bakeng sa go thuša ba ba sa tšwago go kolobetšwa gore ba tšwele pele go ya kgolong ya Bokriste.Ba-Hebere 6:1.

Sa bobedi, ba bangwe bao ba ilego ba hlankela e le bagolo ka nywaga-some, ba gapeleditšwe ke botšofadi goba mathata a tša maphelo gore ba fokotše morwalo wa modiro wo ba o rwelego ka phuthegong.

Sa boraro, ba mmalwa ba bagolo ba mafolofolo ba Bakriste ga bjale ba hlankela e le ditho tša Dikomiti tša go Hloma Kwano le Sepetlele, Dikomiti tša Tikologo tša go Aga goba Dikomiti tša Diholo tša Kopano. Mabakeng a mangwe ba ile ba swanelwa ke go bontšha teka-tekano ka go tlogela a mangwe a maikarabelo ka diphuthegong tša gabo bona.

Ke bjang go nyakega mo go tšwelago pele ga banna ba swanelegago ba oketšegilego go ka fihlelelwago? Go Tlwaetša ke tharollo. Beibele e kgothaletša balebeledi ba Bakriste gore ba tlwaetše “batho ba ba bôtêxaxo, ba ba tl’o xo kxôna xo ruta ba bangwê.” (2 Timotheo 2:2) Go ya ka pukuntšu, lediri “go tlwaetša” le bolela go ruta bakeng sa go dira gore motho e be yo a loketšego, yo a swanelegago le yo a kgonago. A re boneng kamoo bagolo ba ka tlwaetšago banna ba bangwe ba swanelegago.

Latelang Mohlala wa Jehofa

Jesu Kriste ka kgonthe e be e le yo a ‘loketšego, a swanelega,’ gomme a kgona modirong wa gagwele gona seo ga se makatše! O be a tlwaeditšwe ke Jehofa Modimo ka boyena. Ke mabaka afe ao a dirilego gore lenaneo le la go tlwaetša e be le le šomago kudu? Jesu o boletše a mararo, bjalo ka ge go begilwe go Johane 5:​20: “Tate [1] ó rata Morwa ’me [2] ó mo laetša tše a di diraxo tšohle. Ó sa tlo mo laetša [3] medirô e fetaxo yé ka boxolo.” (Mongwalo o sekamego ke wa rena.) Go hlahloba dintlha tše ka e tee ka e tee, go tla re nea temogo tabeng ya go tlwaetša.

Ela hloko gore sa mathomo Jesu o itše: “Tate ó rata Morwa.” (Mongwalo o sekamego ke wa rena.) Go tloga mathomong a tlholo, go bile le tswalano e borutho magareng ga Jehofa le Morwa wa gagwe. Diema 8:​30 e hlabiša seetša tswalanong yeo: “Ké [Jesu] xe kè na naê, kè le mohlankana w’axwe [Jehofa Modimo], kè mo kxahla mehla yohle, kè bapala pele xa xaxwe ka mehla.” (Mongwalo o sekamego ke wa rena.) Jesu o be a sa belaele le ganyenyane gore o be a “kgahla” Jehofa. Le gona Jesu ga se a ka a uta lethabo leo a bego a e-na le lona ge a be a šoma ka lehlakoreng la Tatagwe. Ke mo gobotse gakaakang ge go e-na le tswalano e borutho le ya bolokologi magareng ga bagolo ba Bakriste le bao ba ba tlwaetšago!

Lebaka la bobedi leo Jesu a le boletšego ke la gore Tate “ó mo laetša tše a di diraxo tšohle.” Mantšu a a tiišetša seo se boletšwego go Diema 8:​30, a gore Jesu ‘o be a le kgaufsi’ le Jehofa ge legohle le be le hlolwa. (Genesi 1:​26, mongwalo o sekamego ke wa rena.) Bagolo ba ka latela mohlala o bjalo o kgahlišago ka go šoma kgaufsi le bahlanka ba bodiredi, ba ba bontšha kamoo ba ka swaraganago le dikabelo tša bona ka bokgoni. Lega go le bjalo, bahlanka ba bodiredi bao ba sa tšwago go kgethwa ga se bona fela bao ba nyakago tlwaetšo e tšwelago pele. Go thwe’ng ka bana babo rena ba  botegago bao ba bego ba dutše ba katanela tokelo ya bolebeledi ka nywaga e mentši, eupša ba sa ka ba kgethwa? (1 Timotheo 3:1) Bagolo ba swanetše go neelana ka keletšo e lebanyago go banna ba bjalo e le gore ba tsebe gore ke karolong efe moo ba swanetšego go kaonefatša.

Ka mohlala, mohlanka wa bodiredi e ka ba e le motho yo a ka botwago, yo a bolokago nako gomme e le sethakga go hlokomeleng mediro ya gagwe. Gape e ka ba morutiši yo a nago le bokgoni. A ka ba a dira modiro o mobotse dibopegong tše dintši ka phuthegong. Lega go le bjalo, a ka ba a sa hlokomele gore o ba bogale ditirišanong tša gagwe le Bakriste-gotee le yena. Bagolo ba swanetše go bontšha “boleta bja bohlale.” (Jakobo 3:​13, PK) Na e ka se be ga botho gore mogolo a bolele le mohlanka wa bodiredi, a mmontšha gabotse seo e lego bothata, a nea mehlala e lebanyago le go nea ditšhišinyo tše di šomago bakeng sa gore a kaonefatše? Ge e ba mogolo ka bohlale ‘a noka keletšo ya gagwe ka letswai,’ ditlhaloso tša gagwe ka ntle le pelaelo di tla amogelwa gabotse. (Ba-Kolose 4:6) Ge e le gabotse, mohlanka wa bodiredi o tla dira gore modiro wa mogolo o be o kgahlišago le go feta ka go ba yo a ikemišeditšego go kwa le go amogela keletšo le ge e le efe yeo a e hwetšago.—Psalme 141:5.

Diphuthegong tše dingwe, bagolo ba neelana ka tlwaetšo e šomago le e tšwelago pele go bahlanka ba bodiredi. Ka mohlala, ba sepela le bahlanka ba bodiredi bao ba swanelegago ge ba etela balwetši goba batšofadi. Ka tsela ye mohlanka wa bodiredi o hwetša phihlelo modirong wa bodiši. Go ba gona, go na le mo gontši moo mohlanka wa bodiredi a ka go dirago go tšwetša pele kgolo ya gagwe ya moya.Bona lepokisi le le lego ka mo tlase leo le nago le sehlogo se se rego “Seo Bahlanka ba Bodiredi ba ka se Dirago.”

Lebaka la boraro leo le dirilego gore tlwaetšo ya Jesu e be e šomago ke gore Jehofa o ile a mo tlwaetša a gopotše ka tšwelopele ya nakong e tlago. Jesu o boletše ka Tate gore o be a bontšha Morwa “medirô e fetaxo yé ka boxolo.” Phihlelo yeo Jesu a e hweditšego ge a be a sa le mo lefaseng e mo dirile gore a kgone go godiša dika tšeo a bego a tla di nyaka bakeng sa go phetha dikabelo tša ka moso. (Ba-Hebere 4:​15; 5:​8, 9) Ka mohlala, e tla ba kabelo e boima gakaakang yeo Jesu a tlago go e amogela kgaufsinyanekabelo ya go tsoša le go ahlola dimilione tše dikete tša batho bao ga bjale ba hwilego!—Johane 5:​21, 22.

Lehono bagolo ba swanetše go gopola ka dinyakwa tša nakong e tlago ge ba tlwaetša bahlanka ba bodiredi. Le ge go ka bonagala go e-na le bagolo le bahlanka ba bodiredi ba lekanego bakeng sa go hlokomela dinyakwa tša mo nakong ye, na go tla ba le bagolo le bahlanka ba bodiredi ba lekanego ge e ba phuthego e mpsha e hlongwa? Na go tla ba le ba lekanego ge diphuthego tše mmalwa di hlongwa? Nywageng e meraro e fetilego, go bile le diphuthego tše difsa tše fetago 6 000 lefaseng ka bophara. A palo e kgolo gakaakang ya bagolo le bahlanka ba bodiredi yeo e nyakegago bakeng sa go hlokomela diphuthego tšeo tše difsa!

Bagolo, na le latela mohlala wa Jehofa ka go hlagolela tswalano e borutho ya motho ka noši le banna bao le ba tlwaetšago? Na le ba bontšha kamoo ba swanetšego go dira modiro wa bona ka gona? Na le gopotše ka dinyakwa tša ka moso? Go latela mohlala wa Jehofa go tlwaetšeng ga gagwe  Jesu, go tla feleletša ka ditšhegofatšo tše di humilego go ba bantši.

Le se ke la Boifa go Aba Boikarabelo

Bagolo ba nago le bokgoni bao ba tlwaetšego go swaragana le maikarabelo a mmalwa a boima ka nako e tee, ba ka ba ba dika-dika ka tekanyo e itšego go abela ba bangwe boikarabelo. Ba ka ba ba ile ba leka go dira seo nakong e fetilego eupša ka mafelelo a sa kgotsofatšego. Ka gona ba ka ba le boemo bja kgopolo bja gore, ‘Ge e ba o nyaka gore modiro o dirwe gabotse, o swanetše go itirela wona ka noši.’ Eupša na boemo bjo bjalo bja kgopolo bo dumelelana le thato ya Jehofa, go etša ge e boletšwe ka Mangwalong, gore banna ba nago le phihlelo e nyenyane ba hwetše tlwaetšo go tšwa go bao ba nago le phihlelo e ntši?—2 Timotheo 2:2.

Moapostola Paulo o ile a nyamišwa ke ge yo mongwe wa basepedi-gotee le yena, Johane Mareka, a be a tlogela boikarabelo bja gagwe kua Pamfilia gomme a boela gae. (Ditiro 15:​38, 39) Lega go le bjalo, Paulo ga se a ka a dumelela go boela morago moo go mo fetša matla a gore a tlwaetše ba bangwe. O ile a kgetha lesogana le lengwe, e lego Timotheo, gomme a mo tlwaetša modirong wa boromiwa. * (Ditiro 16:​1-3) Kua Berea baromiwa ba ile ba kopana le kganetšo e šoro mo e lego gore go ile gwa se sa kgonega gore Paulo a tšwele pele a le moo. Ka gona, o ile a tlogela phuthego e mpsha ka tlase ga tlhokomelo ya Silase, ngwanabo rena yo mogolo le yo a gotšego ka tsebo le Timotheo. (Ditiro 17:​13-15) Ga go pelaelo gore Timotheo o ile a ithuta mo gontši go Silase. Ka morago, ge Timotheo a be a loketše go rwala boikarabelo bjo bongwe bjo bo oketšegilego, Paulo o ile a mo romela Thesalonika gore a ye go kgothatša phuthego yeo.—1 Ba-Thesalonika 3:​1-3.

Tswalano magareng ga Paulo le Timotheo e be e se ya go se sege, ye e sego borutho goba e se nago botho. Go be go e-na le tswalano e borutho magareng ga bona. Ge a be a ngwalela phuthego ya Korinthe, Paulo o ile a bolela ka Timotheo yo a bego a gopotše go mo romela moo gore ke ‘ngwana wa gagwe moratwa, mmotegi Moreneng.’ O okeditše ka gore: “Ké yêna [Timotheo] a tl’o xo Le eletša ditsela tša-ka tše ke di swerexo kè le wa Kriste Jesu.” (1 Ba-Korinthe 4:​17, mongwalo o sekamego ke wa rena.) Timotheo o ile a arabela gabotse tlwaetšong yeo a e hweditšego go Paulo, a ba yo a swanelegago go phetheng dikabelo tša gagwe. Bana babo rena ba bantši ba bafsa ba kgonne go ba bahlanka ba bodiredi, bagolo, goba gaešita le balebeledi ba basepedi ka gobane ba ile ba holega tlwaetšong yeo ba e hweditšego go tšwa go bagolo bao ba hlokomelago bao ba ilego ba bontšha kgahlego ya kgonthe go bona, bjalo ka ge Paulo a dirile tabeng ya Timotheo.

Bagolo, Tlwaetšang ba Bangwe!

Ka ntle le pelaelo, boporofeta bjo bo lego go Jesaya 60:​22 bo phethagaditšwe lehono. Jehofa o dira ‘mmotlana setšhaba se matla.’ E le gore setšhaba seo se dule e le se ‘matla,’ se swanetše go ba seo se rulagantšwego gabotse. Bagolo, ke ka baka la’ng le sa ele hloko ditsela tše dingwe tšeo ka tšona tlwaetšo e oketšegilego e ka newago banna ba ineetšego bao ba swanelegago go e hwetša? Kgonthišetšang gore mohlanka yo mongwe le yo mongwe wa bodiredi o tseba gabotse ka kaonefatšo le ge e le efe yeo a swanetšego go e dira gore a dire tšwelopele. Gomme lena bana babo rena bao ba kolobeditšwego, dirišang gabotse tlhokomelo le ge e le efe ya motho ka noši yeo le e hwetšago. Dirišang gabotse dibaka tša lena tša go ka oketša bokgoni, tsebo le phihlelo. Ka kgonthe Jehofa o tla šegofatša lenaneo le bjalo la thušo e lerato.—Jesaya 61:5.

[Mengwalo ya ka tlase]

[Lepokisi go letlakala 30]

Seo Bahlanka ba Bodiredi ba ka se Dirago

Le ge bagolo ba swanetše go nea bahlanka ba bodiredi tlwaetšo, go na le mo gontši moo bahlanka ba bodiredi ba ka go dirago bakeng sa go tšwetša pele tšwelopele ya bona ya moya.

—Bahlanka ba bodiredi ba swanetše go ba ba mafolofolo le bao ba ka botwago go hlokomeleng dikabelo tša bona. Gape ba swanetše go hlagolela mekgwa e mebotse ya go ithuta. Go fihla bokgoleng bjo itšego, tšwelopele e ithekgile ka go ithuta le go diriša dilo tšeo di ithutilwego.

—Ge mohlanka wa bodiredi a lokišeletša go nea polelo dibokeng tša Bokriste, ga se a swanela go dika-dika go kgopela mogolo yo a nago le bokgoni ditšhišinyo tša kamoo a ka alago taba ka gona.

—Gape mohlanka wa bodiredi a ka kgopela mogolo gore a mo nee šedi e kgolo ge a dutše a nea polelo ya Beibele le go mo nea keletšo bakeng sa go kaonefatša.

Bahlanka ba bodiredi ba swanetše go tsoma, go amogela le go diriša keletšo e tšwago go bagolo. Ka tsela ye, tšwelopele ya bona e tla “bonagala go batho bohle.”—1 Timotheo 4:​15, NW.