Ditšhegofatšo tša Ditaba tše Dibotse

“Morêna ó mpeetše xo bexêla babôtlana ’taba tše di botse; O nthometše xo alafa ba dipelo tše robexilexo, . . . xore xo homotšwê bohle ba ba nyamilexo.”—JESAYA 61:​1, 2.

1, 2. (a) Jesu o ile a ikutolla e le mang, gomme bjang? (b) Ke ditšhegofatšo dife tšeo ditaba tše dibotse tše di tsebišitšwego ke Jesu di di tlišago?

LETŠATŠING le lengwe la Sabatha mathomong a bodiredi bja gagwe, Jesu o be a le sinagogeng kua Natsaretha. Go ya ka pego, “ba mo nea puku ya Jesaya moporofeta, a e phaya a hwetša mo xo ngwadilwexo mantšu á: Môya wa Morêna o na le nna, ka xobane ó mpeetše xo bexêla babôtlana ’taba tše di botse.” Jesu o ile a tšwela pele go bala ka mo go oketšegilego ka temana ya boporofeta. Ke moka o ile a dula fase gomme a re: “Lehono, xe tše di ngwadilwexo fá di kwala ditsebeng tša lena, ké xore di tšweletše.”—Luka 4:​16-21.

² Ka tsela ye, Jesu o ile a ikutolla e le moebangedi yoo go porofetilwego ka yena, mmoledi wa ditaba tše dibotse le morwadi wa khomotšo. (Mateo 4:​23) Le gona, e be e le ditaba tše dibotse gakaakang tšeo Jesu a bego a tla di bolela! O ile a tsebiša batheetši ba gagwe gore: “Ké Nna seetša sa lefase. E a ntatêlaxo a ka se kê a sepela lefsifsing; ó tlo ba le seetša sa bophelô.” (Johane 8:​12) Gape o itše: “Xe Le nama le Lentšu la-ka, Le barutiwa ba-ka ka xo rereša, La tlo tseba therešô, ’me therešô ya tlo Le lokolla.” (Johane 8:​31, 32) Ee, Jesu o be a e-na le “mantšu a bophelô byo bo sa felexo.” (Johane 6:​68, 69) Seetša, bophelo le tokologoka kgonthe tše ke ditšhegofatšo tšeo di swanetšego go tšeelwa godimo!

3. Barutiwa ba Jesu ba ile ba bolela ditaba dife tše dibotse?

³ Ka morago ga Pentekoste ya 33 C.E., barutiwa ba ile ba tšwetša pele modiro wa Jesu wa go bolela ebangedi. Ba ile ba bolela ‘ditaba tše dibotse tša mmušo’ bobedi go ba-Isiraele le go batho ba ditšhaba. (Mateo 24:​14, NW; Ditiro 15:7; Ba-Roma 1:​16) Bao ba ilego ba arabela ba ile ba tseba Jehofa Modimo. Ba ile ba lokologa bokgobeng bja bodumedi gomme ba ba karolo ya setšhaba se sefsa sa moya, “ba-Isiraele ba Modimo,” seo ditho tša sona di nago le tebelelo ya go buša ka mo go sa felego legodimong le Morena wa tšona, Jesu Kriste. (Ba-Galatia 5:1; 6:​16;  Ba-Efeso 3:​5-7; Ba-Kolose 1:​4, 5; Kutollo 22:5) Tšeo e be e le ditšhegofatšo tše humilego e le ka kgonthe!

Boebangedi Lehono

4. Thomo ya go bolela ditaba tše dibotse e phethagatšwa bjang lehono?

⁴ Lehono, Bakriste ba tloditšwego ba thekgwa ke “lešaba le lexolo” leo le golago la “dinku tše dingwê,” ba tšwela pele go phethagatša thomo ya boporofeta yeo e bego e neilwe Jesu mathomong. (Kutollo 7:9; Johane 10:​16) Ka baka leo, ditaba tše dibotse di bolelwa ka tekanyo e sa kago ya bonwa pele. Dinageng le mašemong a 235, Dihlatse tša Jehofa di tšwetše ‘go begela babotlana ditaba tše dibotse; go alafa ba dipelo tše robegilego, gore ba ba thopilwego di ba goelele khunologo, di goelele ba ba tlemilwego go gololwa, di goelele ngwaga wa kgahlego wa Jehofa, le letšatši la tefetšo ya Modimo wa rena, gore go homotšwe bohle ba ba nyamilego.’ (Jesaya 61:​1, 2) Ka gona, modiro wa go bolela ebangedi wa Bokriste o tšwela pele go tliša ditšhegofatšo go ba bantši le khomotšo ya kgonthe go “ba ba lexo mahlokong bohle.”—2 Ba-Korinthe 1:​3, 4.

5. Mabapi le go bolela ditaba tše dibotse, ke bjang Dihlatse tša Jehofa e lego tše fapanego le dikereke tša Bojakane?

⁵ Ke therešo gore dikereke tša Bojakane di thekga mekgwa e fapa-fapanego ya boebangedi. Tše dintši di romela baromiwa go yo dira basokologi dinageng tše dingwe. Ka mohlala, The Orthodox Christian Mission Center Magazine e bega ka modiro wa baromiwa ba Orthodox kua Madagascar, borwa bja Afrika, Tanzania le Zimbabwe. Lega go le bjalo, Kerekeng ya Orthodox bjalo ka dikerekeng tše dingwe tša Bojakane, bontši bja ditho tša yona ga bo tšee karolo modirong o bjalo. Ka mo go fapanego, Dihlatse tša Jehofa ka moka tšeo di ineetšego di katanela go tšea karolo go boleleng ebangedi. Di lemoga gore go tsebatša ditaba tše dibotse ke bohlatse bja go ba ga kgonthe ga tumelo ya tšona. Paulo o itše: “Motho ó dumêla ka pelo a tseb’o lokafala; ó ipolêla ka molomo a tseb’o phološwa.” Ge e le gabotse, tumelo yeo e sa tutueletšego motho go gata mogato e hwile.—Ba-Roma 10:​10; Jakobo 2:17.

Ditaba tše Dibotse Tšeo di Tlišago Ditšhegofatšo tša ka mo go sa Felego

6. Ke ditaba dife tše dibotse tšeo di bolelwago lehono?

⁶ Dihlatse tša Jehofa di bolela ditaba tše dibotse kudu ka mo go ka kgonegago. Di bula Dibeibele tša tšona gomme tša bontšha bao ba amogelago gore Jesu o neetše bophelo bja gagwe e le sehlabelo bakeng sa go nea batho tsela ya go batamela go Modimo, go lebalelwa dibe le kholofelo ya bophelo bjo bo sa felego. (Johane 3:​16; 2 Ba-Korinthe 5:​18, 19) Di tsebatša gore Mmušo wa Modimo o hlomilwe legodimong ka tlase ga Kgoši e tloditšwego, Jesu Kriste le gore kgaufsinyane e tla fediša bobe lefaseng gomme ya okamela go tsošološwa ga Paradeise. (Kutollo 11:​15; 21:​3, 4) Ka go phethagatša boporofeta bja Jesaya, di tsebiša baagišani ba tšona gore ga bjale ke “ngwaxa wa kxahlêxô wa Morêna” ge batho ba sa dutše ba ka arabela ditabeng tše dibotse. Gape di lemoša gore kgaufsinyane go tla tla “ ’tšatši la tefetšô ya Modimo wa rena” ge Jehofa a tla fediša bafoši bao ba sa sokologego.—Psalme 37:​9-11.

7. Ke phihlelo efe yeo e bontšhago botee bja Dihlatse tša Jehofa, gona ke ka baka la’ng di thabela botee bjoo?

⁷ Tše ke ditaba tše dibotse di nnoši tšeo di nago le mehola ya ka mo go sa felego, lefaseng leo le hlasetšwego ke masetla-pelo le kotsi. Bao ba di amogelago ba fetoga karolo ya botee bja borwarre bja lefase ka bophara bja Bakriste bao ba sa dumelelego botšhaba, meloko goba go fapana ga maemo a tša boiphedišo go ba aroganya. Ba ‘ikapešitše lerato, ka gobane ke tlemo e phethagetšego ya botee.’ (Ba-Kolose 3:​14, NW; Johane 15:​12) Se se bonwe ngwagola nageng e nngwe ya Afrika. Mesong e mengwe motse-mošate o ile wa phafošwa ke sethunya. Maitekelo a go menola mmušo a be a tšwela pele. Ge ditiragalo di be di lebiša tlhokomelo ka lehlakoreng la morafo, lapa la Dihlatse le ile la swawa diphošo ka go šireletša Dihlatse-gotee tša sehlopha se fapanego sa morafo. Lapa le ile la araba ka gore: “Re dula le Dihlatse tša Jehofa feela ka ntlong ya rena.” Go tšona, phapano ya morafo e be e se bohlokwa; lerato la Bokristego nea khomotšo go bao ba e nyakagogo be go le bohlokwa. Wa leloko yo e sego Hlatse o ile a re: “Ditho tša madumedi ka moka di ile tša lahletša barapedi-gotee le tšona. Ke Dihlatse tša Jehofa feela tše di sa ka go  tša dira seo.” Ditiragalo tše dintši tše di swanago di begilwe go tšwa dinageng tšeo di arogantšwego ke ntwa ya selegae, di bontšha gore Dihlatse tša Jehofa ka kgonthe di “bontšha lerato bakeng sa mokgatlo ka moka wa barwarre.”—1 Petro 2:​17, NW.

Ditaba tše Dibotse di Fetola Batho

8, 9. (a) Ke diphetogo dife tšeo bao ba amogelago ditaba tše dibotse ba di dirago? (b) Ke diphihlelo dife tšeo di bontšhago matla a ditaba tše dibotse?

⁸ Ditaba tše dibotse di tswalana le seo Paulo a se biditšego ‘bophelo bjono le bjo bo tlogo tla.’ (1 Timotheo 4:8) Ga di nee feela kholofelo e thabišago le e kgonthišeditšwego ya bokamoso, eupša gape di tliša dikaonefatšo ‘bophelong bjono.’ Bjalo ka motho ka o tee ka o tee, Dihlatse tša Jehofa di hlahlwa ke Lentšu la Modimo, Beibele bakeng sa go dumelelanya maphelo a tšona le thato ya Modimo. (Psalme 119:​101) Dimelo tša tšona di mpshafatšwa ge di dutše di hlagolela dika tše bjalo ka go loka le potego e sa kwanantšhego.—Ba-Efeso 4:24.

⁹ Ela hloko mohlala wa Franco. O be a e-na le bothata bja go galefa. Nako e nngwe le e nngwe ge dilo di sa sepele gabotse, o be a galefa o šoro gomme a thuba dilo. Mosadi wa gagwe o ile a ithuta Beibele le Dihlatse tša Jehofa, gomme mohlala wa tšona wa Bokriste o ile wa thuša Franco ganyenyane-ganyenyane go bona gore o swanetše go fetoga. O ile a ithuta Beibele le tšona gomme mafelelong o ile a kgona go hlagolela dienywa tša moya o mokgethwa tša khutšo le boitshwaro. (Ba-Galatia 5:​22, 23, NW) O be a le gare ga ba 492 bao ba ilego ba kolobetšwa kua Belgium ngwageng wa tirelo wa 2001. Nagana gape ka Alejandro. Lesogana leo le ile la lemalela dihlare-tagi moo le ilego la fihla ntlheng ya go dula lefelong la ditlakala, le fata-fata seo le ka se hwetšago bakeng sa go se rekiša e le gore le thekge mokgwa wa lona wa dihlare-tagi. Ge Alejandro a be a e-na le nywaga e 22, Dihlatse tša Jehofa di ile tša mo laletša go ithuta Beibele gomme o ile a dumela. O be a bala Beibele letšatši le letšatši gomme a e-ba gona dibokeng tša Bokriste. O ile a hlwekiša bophelo bja gagwe kapejana moo e lego gore ka nako ya ka tlase ga dikgwedi tše tshela, o be a kgona go tšea karolo modirong wa go bolela ebangedike yo mongwe wa ba 10 115 ba go dira bjalo ngwagola kua Panama.

Ditaba tše Dibotse Tšhegofatšo go Baikokobetši

10. Ke bomang bao ba arabelago ditabeng tše dibotse, gomme pono ya bona e fetoga bjang?

¹⁰ Jesaya o ile a porofeta gore ditaba tše dibotse di tla bolelwa go bao ba ikokobeditšego. Bao ba ikokobeditšego, ke bomang? Ke bao ba hlalositšwego ka pukung ya Ditiro e le ‘bao ba sekametšego ka mo go swanetšego bophelong bjo bo sa felego.’ (Ditiro 13:​48, NW) Ke batho bao ba ikokobeditšego bao ba hwetšwago maemong ka  moka a setšhaba bao ba arabelago molaetšeng wa therešo. Ba ba bjalo ba ithuta gore go dira thato ya Modimo go tliša ditšhegofatšo tšeo di humilego kudu go feta selo le ge e le sefe seo lefase le ka se neago. (1 Johane 2:​15-17) Lega go le bjalo, ke bjang Dihlatse tša Jehofa di fihlelelago dipelo modirong wa tšona wa go bolela ebangedi?

11. Go ya ka Paulo, ditaba tše dibotse di swanetše go bolelwa bjang?

¹¹ Ge e le gabotse, ela hloko mohlala wa moapostola Paulo yo a ngwaletšego ba-Korinthe gore: “Nna, Bana bešo, mola kè e-tla xo lena xa nka ka tla ka bonatla bya polêlô le bohlale xe ke Le tsebiša bohlatse bya Modimo. Xobane xa nka ka ithsema matsebe wa selô, xe e se Kriste, kè bolêla Yêna Mmapolwa.” (1 Ba-Korinthe 2:​1, 2) Paulo ga se a leka go kgahliša batheetši ba gagwe ka thuto ya gagwe. O ile a ruta feela ditherešo tšeo di kgonthišeditšwego ke Modimo, ditherešo tšeo lehono di begilwego ka Beibeleng. Ela hloko gape kgothatšo ya Paulo go moebangedi-gotee le yena Timotheo e rego: “Baa sexoeledi sa Lentšu, O le êmêlê.” (2 Timotheo 4:2) Timotheo o be a swanetše go bolela “lentšu,” molaetša wa Modimo. Paulo gape o ngwaletše Timotheo gore: “Se O swanetšexo xo se phêxêlêla ké xore Modimo a bônê Ò le mmotexi, Ò le modiri e a se naxo bosodi, e a tsebaxo xo ratha Lentšu la therešô à sa kxopamiše.”—2 Timotheo 2:15.

12. Ke bjang Dihlatse tša Jehofa lehono di elago hloko mantšu le mohlala wa Paulo?

¹² Dihlatse tša Jehofa di ela hloko mohlala wa Paulo gotee le mantšu a gagwe go Timotheo. Di lemoga matla a Lentšu la Modimo gomme di a diriša ka mo go holago ge di tsoma go bontšha baagišani ba tšona mantšu a swanetšego a kholofelo le khomotšo. (Psalme 119:​52; 2 Timotheo 3:​16, 17; Ba-Hebere 4:​12) Ke therešo gore di diriša dipuku tšeo di theilwego Beibeleng ka mo go holago e le gore batho bao ba thabelago ba ka hwetša tsebo e oketšegilego ya Beibele nakong ya bona ya go iketla. Eupša ka mehla di tsoma go bontšha batho mantšu a Mangwalo. Di tseba gore Lentšu la Modimo leo le buduletšwego le tla tutuetša dipelo tša batho ba ikokobeditšego. Gomme go le diriša ka tsela ye go matlafatša tumelo ya tšona ka botšona.

‘Khomotšo go Bohle ba ba Nyamilego’

13. Ngwageng wa 2001, ke ditiragalo dife tšeo di ilego tša oketša go nyakega kudu ga go nea khomotšo go bao ba nyamilego?

¹³ Ngwaga wa 2001 o bile le karolo ya wona ya dikotsi, gomme ka baka leo batho ba bantši ba be ba nyaka khomotšo. September e fetilego e bile mohlala o mogolo kua United States, ka ditlhaselo tša botšhošetši go World Trade Center kua New York le Pentagon kgaufsi le Washington, D.C. Ditlhaselo tšeo e bile tše tšhošago gakaakang nageng ka moka! Ge di lebeletšane le ditiragalo tše bjalo, Dihlatse tša Jehofa di katanela go phethagatša thomo ya tšona bakeng sa go nea ‘khomotšo go bohle ba ba nyamilego.’ Diphihlelo tše sego kae di tla bontšha kamoo di dirago se.

14, 15. Ke bjang mabakeng a mabedi a fapanego Dihlatse di ilego tša kgona go diriša mangwalo ka mo go holago go homotša bao ba nyamilego?

¹⁴ Hlatse yeo e lego moebangedi wa nako e tletšego e ile ya batamela mosadi tsejaneng ya maoto ya ka thoko ga tsela gomme ya mmotšiša gore o nagana’ng ka ditlhaselo tša botšhošetši tša morago bjale. Mosadi o ile a thoma go lla. O boletše gore o ile a ikwa a nyamile gomme o ile a kganyoga ge nkabe a be a ka thuša ka tsela e itšego. Hlatse e ile ya mmotša gore Modimo o re kgahlegela kudu ka moka ga rena, gomme a bala Jesaya 61:​1, 2. Mantšu a a buduletšwego ke Modimo a ile a kwagala a e-na le tlhaologanyo go mosadi yoo a ilego a bolela gore yo mongwe le yo mongwe o be a nyamile. O ile a amogela pampišana gomme a kgopela gore Hlatse e mo etele legaeng la gagwe.

¹⁵ Dihlatse tše pedi tšeo di bego di le modirong wa go bolela ebangedi di ile tša gahlana le monna a šoma ngwakong wa gagwe wa polokelo. Di ile tša ithapela go mmontšha mantšu a khomotšo a tšwago Mangwalong mabapi le kotsi e sa tšwago go direga go World Trade Center. Ka tumelelo ya gagwe di ile tša bala 2 Ba-Korinthe 1:​3-7, e nago le mantšu a rego: “Khomotšô e re atetše ka Yêna Kriste.” Monna o ile a leboga gore baagišani ba gagwe ba Dihlatse ba be ba abelana le ba bangwe selo se itšego seo se homotšago gomme a re: “Eka Modimo a ka šegofatša modiro o kgahlišago wo le o dirago.”

16, 17. Ke diphihlelo dife tše pedi tšeo di bontšhago matla a Beibele bakeng sa go thuša batho bao ba nyamišitšwego goba bao ba tshwentšwego ke dikotsi?

¹⁶ Hlatse yeo e bego e boela go motho yo a thabelago e ile ya gahlana le morwa wa mosadi yoo nakong e fetilego a ilego a bontšha kgahlego gomme a hlalosa gore o be a kgomegile mabapi le kamoo baagišani ba phelago ka gona ka morago ga kotsi ya morago bjale. Monna o ile a makatšwa ke gore Hlatse e tšere nako ya yona bakeng sa go etela batho le go bona gore ba phela bjang. O ile a bolela gore o be a šoma kgaufsi kudu le World Trade Center ge tlhaselo e be e direga gomme a bona ge tiragalo ka moka e direga. Ge a be a botšiša gore ke ka baka la’ng Modimo a dumelela tlaišego, Hlatse e ile ya bala ditemana go tšwa ka Beibeleng go akaretša Psalme 37:​39 yeo e rego: “Thlakodišô ya baloki e tšwa xo Morêna, Yêna sebô sa bôna mohla wa tlalêlô.” Ka botho monna o ile a botšiša gore Hlatse le lapa la yona ba phela bjang, a mo laletša gore a boe gomme a bontšha tebogo e tšwago pelong ka ketelo.

¹⁷ Yo mongwe wa ba dikete bao ba nyamilego bao ba ilego ba homotšwa ke Dihlatse tša Jehofa matšatšing a ka morago ga ditlhaselo tša botšhošetši e be e le mosadi yoo Dihlatse di ilego tša kopana le yena ge di be di etela baagišani ba tšona. O be a ferekantšwe kudu ke seo se diragetšego gomme a theetša ge di bala Psalme 72:​12-14: “Ó tlo hlakodiša modiitšana xe a lla, le mohlaki xe a hlôka monamodi. Ó tlo xauxêla mosenyi le mohloki; meôya ya bahumanexi ó tlo e phološa. Meôya ya bôná ó tlo e lokolla mohlakong, bošorong; ’me madi a bôná ó tlo a sema selô se bohlôkwa.” Mantšu ao a be a e-na le morero gakaakang! Mosadi o ile a kgopela Dihlatse gore di bale ditemana gape gomme a di laletša go tsena ka ntlong ya gagwe bakeng sa go tšwetša poledišano pele. Mafelelong a poledišano, thuto ya Beibele e ile ya thongwa.

18. Hlatse e ile ya thuša bjang baagišani ba yona ge e be e laletšwa go ba rapelela?

¹⁸ Hlatse e nngwe e šoma lebenkeleng la go jela setšhabeng se humilego kudu moo batho nakong e fetilego ba sa kago ba bontšha kgahlego e kgolo ka ditaba tše dibotse tša Mmušo. Ka morago ga ditlhaselo tša botšhošetši, setšhaba se ile sa bonagala se šišintšwe. Ka Labohlano bošego ka morago ga tlhaselo, molaodi wa lebenkele la go jela o ile a laletša motho yo mongwe le yo mongwe go tšwela ka ntle gomme a sware dikerese, ba be le nako ya setu bakeng sa go gopola bahlaselwa. Ka go hlompha maikwelo a bona,  Hlatse e ile ya tšwela ka ntle gomme ya ema ka go homola tsejaneng ya maoto ya ka thoko ga tsela. Molaodi o be a tseba gore e be e le modiredi wa Dihlatse tša Jehofa, ka gona ka morago ga nako ya setu, o ile a mo kgopela gore a emele yo mongwe le yo mongwe ka thapelo. Hlatse e ile ya dumela. Thapelong ya yona, e ile ya bolela ka go nyama mo go apareditšego eupša ya bolela gore bao ba nyamilego ga se ba swanela go nyama ka go hloka kholofelo. O ile a bolela ka nako ya ge ditiragalo tše bjalo tše šoro di ka se hlwe di sa direga gomme a re bohle ba ka batamela kgaufsi le Modimo wa khomotšo ka tsebo e nepagetšego e tšwago ka Beibeleng. Ka morago ga gore “Amene,” molaodia latelwa ke batho ba bangwe ba fetago 60 bao ba bego ba le ka ntle ga lebenkele la go jelao ile a tla go Hlatse, a mo leboga gomme a mo gokarela, a bolela gore thapelo e be e le e botse kudu go tšeo a kilego a di kwa.

Tšhegofatšo Setšhabeng

19. Ke phihlelo efe e bontšhago gore ba bangwe ba lemoga ditekanyetšo tše phagamego tša Dihlatse tša Jehofa?

¹⁹ Mehleng yeno, kudu-kudu ditšhabeng tšeo Dihlatse tša Jehofa di lego mafolofolo di holega ka go ba gona ga tšonabjalo ka ge ba bantši ba boletše. Ke bjang motho yo a godišago khutšo, potego le mekgwa e hlwekilego a ka se bego tutuetšo e holago? Nageng e nngwe Bogareng bja Asia, Dihlatse di ile tša kopana le mohlankedi yo a rotšego modiro wa tirelo ya tša tšhireletšo ya motse ya nakong e fetilego. O ile a bolela gore ka nako e nngwe o ile a newa mošomo wa go nyakišiša mekgatlo e fapanego ya bodumedi. Ge a be a dira nyakišišo ka Dihlatse tša Jehofa, o ile a kgahlišwa ke potego ya tšona le boitshwaro bjo bobotse. O ile a reta tumelo ya tšona e tiilego le therešo ya gore dithuto tša tšona di theilwe Mangwalong. Monna yo o ile a amogela thuto ya Beibele.

20. (a) Ke eng seo modiro o begilwego ke Dihlatse tša Jehofa ngwagola o se bontšhago? (b) Ke eng seo se bontšhago gore go sa na le modiro o mogolo kudu o swanetšego go dirwa, gomme re lebelela bjang tokelo ya rena ya go bolela ebangedi?

²⁰ Go tšwa diphihlelong tše sego kae tšeo di anegilwego sehlogong se go tše dikete tšeo di ka anegwago, ke mo go kwagalago gore Dihlatse tša Jehofa di be di swaregile kudu ngwageng wa tirelo wa 2001. * Di ile tša bolela le batho ba dimilione, di ile tša homotša ba bantši bao ba bego ba nyamile gomme modiro wa tšona wa go bolela ebangedi o ile wa šegofatšwa. Go na le ba 263 431 bao ba ilego ba bontšha boineelo bja bona go Modimo ka go kolobetšwa. Lefaseng ka bophara, palo ya baebangedi e oketšegile ka 1,7 lekgolong. Le gona taba ya gore ba 15 374 986 ba bile gona Segopotšong sa lehu la Jesu sa ngwaga le ngwaga, e bontša gore go sa na le modiro o mogolo o swanetšego go dirwa. (1 Ba-Korinthe 11:​23-26) Anke re tšweleng pele go tsoma bao ba ikokobeditšego bao ba arabelago ditabeng tše dibotse. Gomme ge feela ngwaga wa Jehofa wa kgahlego o sa tšwela pele, anke re tšweleng pele re homotša “ba dipelo tše robexilexo.” A tokelo e šegofaditšwego gakaakang yeo re nago le yona! Ka kgonthe ka moka ga rena re galagatša mantšu a Jesaya a rego: “A nke ke thabêlê Morêna; môya wa-ka a o hlalalêlê Yêna Modimo wa-ka.” (Jesaya 61:​10) Eka Modimo a ka tšwela pele a re diriša ge a phethagatša mantšu a a boporofeta: “Xobane Morêna Mong’a bohle ó tlo mediša tokô le xo rêtwa pele xa dithšaba tšohle.”—Jesaya 61:11.

[Mengwalo ya ka tlase]

Na o a Gopola?

• Bao ba ikokobeditšego ba ile ba šegofatšwa bjang ke ditaba tše dibotse tšeo Jesu a ilego a di bolela?

• Ke ditšhegofatšo dife tšeo di ilego tša tlela bao ba ilego ba arabela modirong wa go bolela ebangedi wa barutiwa ba Jesu ba lekgolong la pele la nywaga?

• Ke bjang bao ba arabelago lehono ba ilego ba šegofatšwa ka ditaba tše dibotse?

• Re lebelela bjang tokelo ya rena ya go ba baebangedi?

[Dipotšišo tša Thuto]

[Diswantšho go letlakala 15]

Dihlatse tša Jehofa ka mehla di gopola boikarabelo bja tšona bja go bolela ebangedi

 [Diswantšho go letlakala 17]

Bao ba arabelago ditabeng tše dibotse e ba karolo ya borwarre bjo bo kopanego bja lefase ka bophara