“Etlang Go Nna, . . . Gomme Ke Tla Le Lapološa”

Go Bolela Lentšu’ go a Lapološa

E BE e le motho yo a phethagetšego modirong o bohlokwa. Mekgwa ya gagwe ya go ruta e be e le e atlegago kudu moo “mašaba a batho [a ilego] a tlabya ke thutô ya xaxwe.” (Mateo 7:​28) Gape e be e le mmoledi yo a sa felego matla. Nako ya gagwe, matla a gagwe le matlotlo di be di šomišetšwa kudu go boleleng ka Mmušo wa Modimo. Ka kgonthe, Jesu Kriste o ile a sepela naga ya gabo ka moka e le mmoledi le morutiši yo a sa bapišwego.—Mateo 9:35.

Modiro wa Jesu o akgofilego e be e le wa go bolela “ditaba tše dibotse tša mmušo” bathong ba mehleng ya gagwe le go tlwaetša barutiwa ba gagwe bakeng sa go dira modiro woo lefaseng ka bophara. (Mateo 4:​23; 24:​14, NW; 28:​19, 20) Na boikarabelo bjo boima bja thomo ya bona ya go bolela le go akgofa ga yona gotee le bogolo feela bja modiro o bjalo di be di tla šwalalanya balatedi ba gagwe ba sa phethagalago le ba hlaelelwago?

Le gatee! Ka morago ga go laela barutiwa ba gagwe gore ba rapele “Mong wa punô” e lego Jehofa Modimo, bakeng sa badiri ba oketšegilego, Jesu o ile a ba roma gore ba ye go ruta batho. (Mateo 9:​38; 10:1) Ke moka o ile a ba kgonthišetša gore boikarabelo bja go ba molatedi wa gagwegotee le thomo ya go boleladi be di tla tliša tapološo ya kgonthe le khomotšo. Jesu o itše: “Etlang go nna, . . . gomme ke tla le lapološa.”—Mateo 11:​28, NW.

Mothopo wa Lethabo

Taletšo yeo ke ya kwelobohloko, e lerato le e botho gakaakang! E bontšha go kgomega kudu ga Jesu ka balatedi ba gagwe. Barutiwa ba gagwe ba hwetša tapologo ka go phethagatša boikarabelo bja bona bja go bolela “ditaba tše dibotse” tša Mmušo wa Modimo. Se se ba tlišetša lethabo la kgonthe le kgotsofalo.Johane 4:36.

Kgale pele ga ge Jesu a ka ba lefaseng, Mangwalo a ile a gatelela gore lethabo e swanetše go ba seka sa tirelo e kgethwa go Modimo. Se se ile sa bontšhwa gabotse ge mopsalme a be a opela gore: “Xobêla Morêna mexobô, wêna lefase lohle. Hlankêlang Morêna Lè thabile; Le fihlê pele xa xaxwe ka xo hlalala.” (Psalme 100:​1, 2) Lehono, batho ba ditšhaba ba thabela Jehofa, gomme dipolelo tša bona tša theto di bjalo ka mogobo wa madira a fentšego. Bao ba ineetšego e le ka kgonthe go Modimo ba tla go yena “ka xo hlalala.” Ka kgonthe, seo ke seo se swanelago ka gobane Jehofa ke “Modimo yo a thabilego,” yo a nyakago gore bahlanka ba gagwe ba hwetše lethabo ge ba phethagatša boineelo bja bona go yena.—1 Timotheo 1:​11, NW.

Badiredi Bao ba Lapološitšwego

Go kgonega bjang gore modiro o thata tirelong ya tšhemo o se re imele eupša ge e le gabotse e be o lapološago? Ge e le gabotse, go dira modiro wa Jehofa go be go le bjalo ka dijo tše di matlafatšago lefsa bakeng sa Jesu. O itše: “Sejô sa-ka ké xe ke dira thatô ya E a nthomilexo, xe ke phêtha medirô ya xaxwe.”—Johane 4:34.

Ka mo go swanago, baboledi ba Bakriste bao ba lego mafolofolo lehono ba hwetša lethabo ge ba ‘bolela lentšu.’ (2 Timotheo 4:2, NW) Connie e lego mosadi wa Mokriste yo a lego nywageng ya magareng yo a dirišago diiri tše fetago 70 ka kgwedi modirong wa boboledi o re: “Ka morago ga ge ke bile le karolo bodireding, ke na le maikwelo a kgotsofalo le maikwelo a lethabo le kgotsofalo gaešita le ge ke lapile mafelelong a letšatši.”

Go thwe’ng ge e ba molaetša wa Mmušo o sa amogelwe gabotse? Connie o tšwela pele: “Go sa šetšwe karabelo, le ka mohla ga se gwa ba le nako yeo ke ilego ka itshola ka go tšea karolo bodireding. Ka ntle le go tseba gore ke dira seo se thabišago Jehofa, ke go lebelela e le lethabo go bolela ka therešo  ka gobane ge ke dira bjalo, kholofelo e kgahlišago e tšwago ka Beibeleng e tiišetšwa ka pelong ya-ka.”

Ba bangwe ba lemoga gore go thuša batho go ba le tsebo e nepagetšego ya Modimo go nea morero maphelong a bona ka noši. Meloney e lego mosadi yo mofsa yoo ka mehla a fetšago diiri tše fetago 50 ka kgwedi modirong wa boboledi o re: “Bodiredi ke bjoo bo lapološago ka gobane bo nea bophelo bja-ka tlhahlo le morero. Mathata a motho ka noši le dikgateletšego tša letšatši le letšatši di a fokotšega ge ke tšea karolo tirelong.”

Millicent e lego modiredi yo mongwe yo a fišegago wa Dihlatse tša Jehofa o re: “Bodiredi bo dira gore letšatši le lengwe le le lengwe leo ke le fetšago ke bolela le ba bangwe ka morero wa Modimo bakeng sa batho le go hlalosa kamoo Paradeise e tla tsošološwago ka gona mo lefaseng le be le mohola. Bo dira gore Jehofa e be wa kgonthe go nna ka mehla gomme bo nnea khutšo le tekanyo ya lethabo la ka gare leo le ka se hwetšwego ka tsela le ge e le efe.”

Baamogedi ba Lapološitšwego

Baboledi ba Mmušo ka ntle le pelaelo ba lapološwa ke bodiredi bja Bokriste, gomme bao ba amogelago molaetša o neago bophelo o a ba homotša. Gaešita le ge morutiši wa kua Portugal a ile a tlwaetšwa ke baitlami ba basadi le baruti, o ile a ikwa gore dinyakwa tša gagwe tša moya di be di sa kgotsofatšwe ke kereke ya gagwe. Dipotšišo tša gagwe tša Beibele di be di dutše di sa arabja. Thuto ya Beibele ya ka mehla yeo e ilego ya swarwa ke yo mongwe wa Dihlatse tša Jehofa e ile ya mo tlišetša temogo ya Mangwalo e tšwelago pele. Morutiši o be a thabile kudu. O itše: “Ke be ke letela thuto ya-ka ka phišego Laboraro le lengwe le le lengwe ge dipotšišo tša-ka di be di arabja ka e tee ka e tee ka bohlatse bjo bo kgodišago bja Beibele.” Lehono, mosadi yo ke mohlanka yo a ineetšego wa Jehofa, gomme le yena o lapološa ba bangwe ka therešo ya Beibele.

Ka gona, ke mo go lego molaleng gore Dihlatse tša Jehofa ga di imelwe ke go ba ga kgonthe ga thomo ya tšona ya go bolela goba bogolo bja tšhemo ya tšona ya lefaseng ka bophara. Ga di nolwe moko ke go se thabele goba kganetšo. Di ineetše ka mafolofolo go phethagatša thomo ya tšona ya go bolela ka Mmušo. Di abelana ditaba tše dibotse le batho kae le kae moo ba ka hwetšwago gonamoo go emago dilori kua United States (1), boema-fofaneng bja Korea (2), kua Andes (3) goba mmarakeng wa London (4). Balatedi ba Jesu ba mehleng yeno ba tšwetša pele modiro wa bona o putsago lefaseng ka bophara. Le gona, ka go dumelelana le kholofetšo ya gagwe, o ba lapološitše gomme o ba dirišitše go lapološa ba bangwe ba bantši.—Kutollo 22:17.