Jehofa—Mohlala o Mogolo wa go Loka
Jehofa—Mohlala o Mogolo wa go Loka
“Lebogang Jehofa wa mašaba, gobane Jehofa o lokile!”—JEREMIA 33:11, NW.
1. Ke ka baka la’ng re tutueletšega go reta Modimo ka baka la go loka ga gagwe?
JEHOFA MODIMO o lokile ka mo go feletšego. Moporofeta Sakaria o kgotsitše ka gore: “Ka kgonthe go loka ga gagwe ke mo gogolo gakaakang!” (Sakaria 9:17, NW) Ka kgonthe, go loka go bontšhwa selong se sengwe le se sengwe seo Modimo a se dirilego go lokišeletša lefase gore re le thabele. (Genesi 1:31) Le ka mohla re ka se kgone go kwešiša melao ka moka e raraganego yeo Modimo a e dirišitšego ge a be a bopa legohle. (Mmoledi 3:11; 8:17) Eupša bonyenyane bjoo re bo tsebago bo re tutueletša go reta Modimo ka go loka ga gagwe.
2. O be o ka hlalosa go loka bjang?
2 Go loka ke eng? Ke boemo bjo bo phagamego bja boitshwaro goba bokwala. Lega go le bjalo, ke selo seo se fetago go fo hlokega ga bobe bjohle. Go loka e lego karolo ya dienywa tša moya, ke seka seo se nago le mohola. (Ba-Galatia 5:22, 23, bapiša le NW.) Re bontšha go loka ge re direla ba bangwe dilo tše dibotse le tšeo di holago. Tshepedišong ye ya dilo, seo se lebelelwago e le go loka go batho ba bangwe se ka lebelelwa e le se sebe go ba bangwe. Lega go le bjalo, ge e ba re tla thabela khutšo le lethabo, go swanetše go ba le tekanyetšo e tee ya go loka. Ke mang yo a ka theago tekanyetšo ye ka mo go swanetšego?
3. Genesi 2:16, 17 e bontšha’ng mabapi le tekanyetšo ya go loka?
3 Modimo o beile tekanyetšo ya go loka. Mathomong a histori ya motho, ke Jehofa yo a laetšego motho wa mathomo gore: “Dihlare ka moka tša thšemo yé O ka di ja. Fêla, sehlare sa xo tseba botse le bobe sôna O se kê wa se ja; ka xobane mohla ò tl’o xo se ja O tlo hwa lehu.” (Genesi 2:16, 17) Ee, batho ba swanetše go lebelela go Mmopi wa bona bakeng sa go tseba botse le bobe.
Pontšho e sa re Swanelago ya go Loka
4. Ke eng seo Modimo a se diretšego batho ga e sa le go tloga mola Adama a dirago sebe?
4 Tebelelo ya batho ya lethabo la ka mo go sa felego ba phethagetše e ile ya bewa kotsing ge Adama a be a dira sebe gomme a gana go dumela tshwanelo ya Modimo ya go bea ditekanyetšo tša go loka. (Genesi 3:1-6) Lega go le bjalo, pele ga ge bana ba Adama ba ka belegwa ba abetše sebe le lehu, Modimo o ile a bolela e sa le pele ka go tla ga Peu e phethagetšego. Ge e le gabotse, ge a be a bolela le “Nôxa e kxolo,” Sathane Diabolo, Jehofa o itše: “Le xôna ke bea lehlôyô xare xa xaxo le mosadi, le xare xa peu ya xaxo le peu ya xaxwe. Yôna e tlo Xo phšatla hlôxô; ’me wêna O tlo e loma serêthê.” (Kutollo 12:9; Genesi 3:15) E be e le morero wa Jehofa go lopolla batho ba sebe. Ka pontšho e sa re swanelago ya go loka, Jehofa ka kgonthe o dirile tokišetšo e bjalo bakeng sa go phološa bao ba bontšhago tumelo sehlabelong sa topollo sa Morwa wa gagwe yo a rategago.—Mateo 20:28; Ba-Roma 5:8, 12.
5. Gaešita le ge re abetše tshekamelo e mpe ya pelo, ke ka baka la’ng re ka bontšha tekanyo ya go loka?
5 Ke therešo gore ka baka la sebe sa Adama, re abetše tshekamelo e fošagetšego ya pelo. (Genesi 8:21) Lega go le bjalo, ka mo go thabišago Jehofa o re thuša go bontšha tekanyo ya go loka. Go tšwela pele dilong tšeo re ithutilego tšona mangwalong a gagwe a makgethwa le a bohlokwa ga ‘go hlalefišetše feela bakeng sa go phologa’ le ‘go kgonišwa go dira mediro e botse ka moka,’ eupša gape go dira gore re kgone go dira seo se kgahlišago mahlong a gagwe. (2 Timotheo 3:14-17) Lega go le bjalo, bakeng sa go holwa ke tlhahlo ya Mangwalo le go bontšha go loka, re swanetše go ba le boemo bja kgopolo bja mopsalme yoo a opetšego ka gore: “[Jehofa] o yo botse le Mo-dira-botse, hlê nthutê ’taêlô tša xaxo.”—Psalme 119:68.
Go Loka ga Jehofa go Phagamišitšwe
6. Ka morago ga ge Kgoši Dafida a tlišitše areka ya kgwerano Jerusalema, ba-Lefi ba ile ba opela kopelo e nago le mantšu afe?
6 Kgoši Dafida wa Isiraele ya bogologolo o ile a dumela go loka ga Modimo gomme a tsoma tlhahlo ya Gagwe. Dafida o itše: “Morêna ké yo botse, ké wa xo loka; ké ka ’baka leo a rutaxo badira-dibe tsela.” (Psalme 25:8) Tlhahlo ya Modimo yeo e neilwego ba-Isiraele e be e akaretša melao e lesome e bohlokwaMelao e Lesomee ngwadilwego diphaphathing tše pedi tša mafsika gomme ya bolokwa polokelong e kgethwa yeo e bitšwago areka ya kgwerano. Ka morago ga ge Dafida a tlišitše Areka motseng-mošate wa Isiraele e lego Jerusalema, ba-Lefi ba ile ba opela kopelo yeo e bego e akaretša mantšu a: “Leboxang Morêna, xobane ké yo bolô [“o lokile,” NW], Yo botho bya neng le neng.” (1 Koronika 16:34, 37-41) E swanetše go ba e be e le mo go thabišago gakaakang go kwa mantšu ao go tšwa melomong ya diopedi tša ba-Lefi!
7. Go diragetše’ng ka morago ga ge Areka e tlišitšwe Sekgethwa-kgethweng le ka morago ga thapelo ya Salomo ya go neela tempele?
7 Mantšu a swanago a theto a ile a gatelelwa nakong ya go neelwa ga tempele ya Jehofa e agilwego ke morwa wa Dafida, Salomo. Ka morago ga ge areka ya kgwerano e beilwe Sekgethwa-kgethweng sa tempele e sa tšwago go agiwa, ba-Lefi ba ile ba thoma go reta Jehofa ‘gobane o lokile, ke wa botho bja neng le neng.’ Lebakeng leo tempele e ile ya tlatšwa ka mohlolo ka leru leo le bontšhago go ba gona ga letago la Jehofa. (2 Koronika 5:13, 14) Ka morago ga thapelo ya Salomo ya go neela tempele, “xwa theoxa mollô ò e-tšwa lexodimong, wa fiša dihlabêlô le didimo.” Ge ba bona se, “ba-Isiraele ka moka . . . ba khunama ba inametša difahloxô fase lebatong, ba lothša ba leboxa Morena xobane [‘o lokile,’ NW] ké yo botse, yo botho bya neng le neng.” (2 Koronika 7:1-3) Ka morago ga monyanya wa matšatši a 14, ba-Isiraele ba ile ba boela magaeng a bona “bà thabile bà natefetšwe ke tše botse tše Morêna a di diretšexo Dafida le Salomo le sethšaba sa xaxwe sa Isiraele.”—2 Koronika 7:10.
8, 9. (a) Gaešita le ge ba-Isiraele ba ile ba reta Jehofa ka baka la go loka ga gagwe, ke tsela efe yeo ka morago ba ilego ba e latela? (b) Ke eng seo se ilego sa bolelwa e sa le pele ka Jeremia mabapi le Jerusalema, gomme boporofeta bjoo bo ile bja phethagala bjang?
8 Ka mo go nyamišago, ba-Isiraele ga se ba tšwela pele ba phela ka go dumelelana le dikopelo tša bona tša tumišo go Modimo. Ge nako e dutše e tšwela pele, batho ba Juda ‘ba ile ba reta Jehofa ka melomo feela.’ (Jesaya 29:13) Go e na le go dumelelana le ditekanyetšo tša Modimo tša go loka, ba ile ba thoma go dira seo se sa lokago. Le gona, bobe bja bona bo be bo akaretša’ng? Ke ka baka leo, ba ilego ba ba le molato wa go rapela diswantšho, boitshwaro bjo bo gobogilego, go gatelela badiidi le dibe tše dingwe tše dikgolo! Ka baka leo, Jerusalema e ile ya fedišwa gomme badudi ba yona ba Juda ba ile ba išwa bothopja Babele ka 607 B.C.E.
9 Ka gona Modimo o ile a otla batho ba gagwe. Lega go le bjalo, o ile a bolela e sa le pele ka moporofeta Jeremia gore kua Jerusalema go be go tla kwewa lentšu la bao ba rego: “Leboxang Morêna xobane ké yo boló, ’me botho bya xaxwe ké bya neng le neng!” (Jeremia 33:10, 11) Gomme go bile bjalo. Ka morago ga tšhwalalanyo ya nywaga e 70 ya naga, ka 537 B.C.E., mašaledi a ba-Juda a ile a boela Jerusalema. (Jeremia 25:11; Daniele 9:1, 2) Ba ile ba aga lefsa aletare le lefelo la tempele kua Thabeng ya Moria gomme ba thoma go neela dihlabelo moo. Motheo wa tempele o ile wa thewa ngwageng wa bobedi wa go boa ga bona. E be e le nako e thabišago gakaakang! Esera o itše: “Ya re xe baaxi ba thea Ntlo-kxêthwa ya Morêna, baperisita ba êma ba apere dikobô tša bôná ba swere diphalafala, Ba-Lefi barwa ba Asafa bà swere diletšô tša xo rêta Morêna ka mokxwa o beilwexo ke Dafida kxoši ya Isiraele, ba rêta Morêna ka xo šiêlana sebaka, ba mo tumiša ka xo re ké yo botse wa xo dira Isiraele ka botho neng le neng.”—Esera 3:1-11.
10. Psalme 118 e thoma le go phetha ka mantšu afe a bohlokwa?
10 Mantšu a swanago a theto mabapi le go loka ga Jehofa a tšwelela dipsalmeng tše dintši. Gare ga tšona ke Psalme 118, e opetšwego ke malapa a ba-Isiraele bakeng sa go phetha monyanya wa Paseka. Psalme yeo e thoma le go feleletša ka mantšu a rego: “Leboxang Morêna, xobane [‘o lokile,’ NW] ké yo boló; ’me botho bya xaxwe ké bya neng le neng.” (Psalme 118:1, 29) A mohlomongwe e ka ba e bile mantšu a mafelelo a theto ao Jesu Kriste a a opetšego le baapostola ba gagwe ba botegago bošegong bja pele ga lehu la gagwe ka 33 C.E.—Mateo 26:30.
“Hle a k’O Mponthšê Letaxô la Xaxo”
11, 12. Ge Moše a be a bona pono e nyenyane ka letago la Modimo, o ile a kwa boipolelo bofe?
11 Tswalano magareng ga go loka ga Jehofa le botho bja gagwe bjo lerato e ile ya dirwa la mathomo nywaga-kgolo pele ga mehla ya Esera. Kapejana ka morago ga ge ba-Isiraele ba rapetše namane ya gauta lešokeng gomme bafoši ba ahlotšwe, Moše o ile a kgopela Jehofa gore: “Hle a k’O mponthšê letaxô la xaxo.” Ka go tseba gore Moše a ka se ke a bona sefahlego sa Gagwe gomme a phela, Jehofa o itše: “Botse [“go loka,” NW] bya-ka ka moka ke tlo bo fetiša pele xa xaxo.”—Ekisodo 33:13-20.
12 Go loka ga Jehofa go ile gwa feta pele ga sefahlego sa Moše letšatšing le le latelago Thabeng ya Sinai. Ka nako yeo, Moše o ile a ba le pono e nyenyane ya letago la Modimo gomme a kwa boipolelo bjo: “Jehofa, Jehofa, Modimo wa kgaugelo le wa lešoko, yo a diegago go galefa le yo a tletšego botho bjo lerato le therešo. Wa go bolokela ba dikete-kete botho bjo lerato, wa go lebalela batho bokgopo le dikarogo le dibe, fela, a se ke a lesa go otla mosenyi, le go bana le bana ba bana o bela molato wa bo-tatabo, go iša go moloko wa boraro le wa bone. “ (Ekisodo 34:6, 7, bapiša le NW.) Mantšu a a bontšha gore go loka ga Jehofa go tswalana le botho bja gagwe bjo lerato le dibopego tše dingwe tša semelo sa gagwe. Go ela hloko tše go tla re thuša go bontšha go loka. Sa pele anke re eleng hloko seka seo se boletšwego gabedi boipolelong bjo bo kgahlišago bja go loka ga Modimo.
“Modimo . . . yo a Tletšego Botho bjo Lerato”
13. Boipolelong bja go loka ga Modimo, ke seka sefe seo se boletšwego gabedi, gomme ke ka baka la’ng se e le seo se swanetšego?
13 ‘Jehofa ke Modimo yo a tletšego botho bjo lerato, wa go bolokela ba dikete-kete botho bjo lerato.’ Lentšu la Sehebere leo le fetoletšwego e le “botho bjo lerato” gape le bolela “lerato leo le botegago ka go se kwanantšhe.” Ke seka se nnoši seo se boletšwego gabedi boipolelong bja Modimo go Moše. Ke mo go swanelago gakaakang ka ge seka sa Jehofa se segolo e le lerato! (1 Johane 4:8) Mantšu ao a tsebegago kudu a go reta Jehofa ‘ka gobane a lokile, wa botho bja neng le neng’ a gatelela seka se.
14. Ke bomang bao ka mo go kgethegilego ba thabelago go loka le botho bjo lerato tša Modimo?
14 Pontšho e nngwe ya botho bja Jehofa ke gore o ‘tletše botho bjo lerato.’ Se ke seo se bonagalago kudu tlhokomelong e lerato yeo a e neago bahlanka ba gagwe ba batho ba botegago bao ba ineetšego. (1 Petro 5:6, 7) Bjalo ka ge Dihlatse tša Jehofa di ka hlatsela se, o ‘boloka botho bjo lerato’ bakeng sa bao ba mo ratago le go mo hlankela. (Ekisodo 20:6) Setšhaba sa Isiraele ya tlhago se ile sa kgaotša go bona botho bjo lerato bja Jehofa goba lerato leo le sa kwanantšhego ka gobane se ile sa gana Morwa wa gagwe. Eupša go loka ga Modimo le lerato leo le sa kwanantšhego go Bakriste bao ba botegago ba ditšhaba ka moka e tla ba la ka mo go sa felego.—Johane 3:36.
JehofaWa Kgaugelo le wa Lešoko
15. (a) Boipolelo bjo bo kwelwego ke Moše Thabeng ya Sinai bo thomile ka mantšu afe? (b) Kgaugelo e akaretša’ng?
15 Boipolelo bjo Moše a bo kwelego kua Thabeng ya Sinai bo thomile ka mantšu a rego: “Jehofa, Jehofa, Modimo wa kgaugelo le wa lešoko.” Lentšu la Sehebere leo le fetoletšwego e le “kgaugelo” le ka šupa go “mala” gomme le tswalana kudu le lentšu “popelo.” Ka gona kgaugelo e akaretša maikwelo a kwelobohloko e lerato ao a lego ka gare-gare ga motho. Eupša kgaugelo e akaretša se se fetago feela kwelobohloko ya kgonthe. E swanetše go re tutuetša go dira selo se itšego bakeng sa go imolla go tlaišega ga ba bangwe. Ka mohlala, bagolo ba lerato ba Bakriste ba bona go nyakega ga go ba le kgaugelo go badumedi-gotee le bona, ‘ba bontšha kgaugelo ba thabile’ ge se se swanetše.—Ba-Roma 12:8; Jakobo 2:13; Juda 22, 23.
16. Ke ka baka la’ng go ka thwe Jehofa o na le lešoko?
16 Botho bja Modimo gape bo bontšhwa lešokong la gagwe. Motho yo a nago le lešoko o “naganela kudu maikwelo a ba bangwe” gomme o bontšha ‘botho bjo lerato kudu-kudu go ba lego tlasana.’ Jehofa ke mohlala o mobotse kudu wa lešoko ge a dirišana le bahlanka ba gagwe ba botegago. Ka mohlala, ka go diriša barongwa, Modimo ka lešoko o ile a matlafatša moporofeta Daniele yo a tšofetšego gomme a tsebiša Maria kgarebe ka tokelo yeo a bego a tla ba le yona ya go belega Jesu. (Daniele 10:19; Luka 1:26-38) Bjalo ka batho ba Jehofa, ka ntle le pelaelo re thabela tsela ya gagwe ya kgaugelo ya go ipiletša go rena ka matlakala a Beibele. Re mo reta ka pontšho ye ya gagwe ya go loka ga gagwe gomme re tsoma go ba le lešoko ge re dirišana le ba bangwe. Ge bao ba nago le ditshwanelo tša moya ba phošolla modumedi-gotee ka “môya o bonôlô,” ba leka go ba ba botho, le go ba le lešoko.—Ba-Galatia 6:1.
Modimo yo a Diegago go Galefa
17. Ke ka baka la’ng re leboga kudu gore Jehofa o ‘diega go galefa’?
17 “Modimo yo a diegago go galefa.” Mantšu ao a gatelela gape sebopego se sengwe sa go loka ga Jehofa. Jehofa o kgotlelela ka go se fele pelo diphošo tša rena gomme o re nea nako ya go fenya mafokodi a magolo le go dira tšwelopele ya moya. (Ba-Hebere 5:12–6:3; Jakobo 5:14, 15) Go se fele pelo ga Modimo gape go hola bao ba se ba tšwago ba e-ba barapedi ba gagwe. Ba sa dutše ba na le nako ya go arabela molaetšeng wa Mmušo gomme ba sokologe. (Ba-Roma 2:4) Lega go le bjalo, gaešita le ge Jehofa a sa fele pelo, go loka ga gagwe ka dinako tše dingwe go mo tutueletša go bontšha kgalefo ya gagwe, bjalo ka ge a dirile ge ba-Isiraele ba be ba rapela namane ya gauta kua Thabeng ya Sinai. Kgalefo ya Modimo e tla tloga e bontšhwa ka tsela e kgolo kudu ge a tliša phedišo tshepedišong ya dilo e kgopo ya Sathane.—Hesekiele 38:19, 21-23.
18. Mabapi le therešo, go na le phapano efe magareng ga Jehofa le baetapele ba batho?
18 ‘Jehofa ke Modimo yo a tletšego therešo.’ Jehofa o fapana kudu gakaakang le baetapele ba batho, bao ba dirago dikholofetšo tše dikgolo ke moka ba palelwa ke go di phethagatša! Ka mo go fapanego, barapedi ba Jehofa ba ka ithekga ka mo go tletšego ka selo se sengwe le se sengwe seo se boletšwego ka Lentšung la gagwe le le buduletšwego. Ka ge Modimo a tletše ka therešo, ka mehla re ka holofela dikholofetšo tša gagwe. Ka go loka ga gagwe, Tatago rena wa legodimong ka go se palelwe o araba dithapelo tša rena bakeng sa therešo ya moya ka go nea ka bontši.—Psalme 43:3; 65:2.
19. Ke pontšho efe e kgolo ya go loka yeo Jehofa a e bontšhitšego bafoši bao ba sokologago?
19 ‘Jehofa ke Modimo wa go lebalela batho bokgopo le dikarogo le dibe.’ Ka go loka ga gagwe, Jehofa o ikemišeditše go lebalela bafoši bao ba sokologago. Ka ntle le pelaelo, re thaba kudu gore Tatago rena yo lerato wa legodimong o dirile tokišetšo ya go lebalela ka sehlabelo sa Jesu. (1 Johane 2:1, 2) Ka kgonthe, re thabela gore bohle bao ba bontšhago tumelo topollong ba kgona go thabela tswalano e rategago le Jehofa, ka kholofelo ya bophelo bjo bo sa felego lefaseng la gagwe le lefsa leo le holofeditšwego. A mabaka a kwagalago gakaakang a go reta Jehofa bakeng sa go bontšha go loka bathong!—2 Petro 3:13.
20. Ke bohlatse bofe bjoo re nago le bjona bja gore Modimo ga a kgothaletše bobe?
20 ‘Fela Jehofa a ka se ke a lesa go otla mosenyi.’ Ge e le gabotse, le ke lebaka le lengwe la go reta Jehofa bakeng sa go loka ga gagwe. Ka baka la’ng? Ka gobane sebopego se bohlokwa sa go loka ke gore ga go kgothaletše bobe ka tsela le ge e le efe. Go feta moo, go “kutollô ya Morêna Jesu xe a e-tšwa lexodimong à na le Barongwa ba xaxwe ba matla,” tefetšo e tla tlišwa go “ba ba sa tsebexo Modimo, le ba ba sa kwexo Ebangedi.” Bao “kôtlô e tl’o xo ba wêla ké thsenyêxô ye e sa felexo.” (2 Ba-Thesalonika 1:6-9) Ke moka barapedi ba phologilego ba Jehofa ba tla kgona go thabela bophelo ka mo go tletšego ka ntle le go šitišwa ke batho bao ba sa boifego Modimo, bao e lego ‘ba sa ratego go loka.’—2 Timotheo 3:1-3, bapiša le NW.
Ekiša go Loka ga Jehofa
21. Ke ka baka la’ng re swanetše go bontšha go loka?
21 Ka ntle le pelaelo re na le mabaka a mantši a go reta le go leboga Jehofa bakeng sa go loka ga gagwe. Bjalo ka bahlanka ba gagwe, na ga se ra swanela go dira sohle bakeng sa go bontšha seka se? Ee, ka gobane moapostola Paulo o kgothaleditše Bakriste-gotee gore: “Bang baetši ba Modimo byalo ka bana ba ba ratêxaxo.” (Ba-Efeso 5:1) Tatago rena wa legodimong o bontšha go loka ka mehla, gomme le rena re swanetše go dira bjalo.
22. Re tla ahla-ahla eng sehlogong se se latelago?
22 Ge e ba re ineetše ka pelo ka moka go Jehofa, ka ntle le pelaelo re kganyoga e le ka kgonthe go ekiša go loka ga gagwe. Ka baka la gore re ditlogolo tša Adama wa modira-dibe, ga re hwetše go le bonolo go dira seo se lokilego. Lega go le bjalo, sehlogong se se latelago, re tla bona gore ke ka baka la’ng go kgonega gore re bontšhe go loka. Gape re tla ahla-ahla ditsela tše di fapa-fapanego tšeo ka tšona re ka ekišago Jehofa e bile re swanetšego go mo ekišamohlala o mogolo wa go loka.
O tla Araba Bjang?
• Go loka ke eng?
• Ke mantšu afe a Mangwalo ao a gatelelago go loka ga Modimo?
• Dipontšho tše dingwe tša go loka ga Jehofa ke dife?
• Ke ka baka la’ng re swanetše go ekiša mohlala wa Jehofa wa go loka?
[Dipotšišo tša Thuto]
[Seswantšho go letlakala 12]
Jehofa o ile a kgalema batho ba gagwe ba bogologolo ka gobane ga se ba phela ka go dumelelana le mantšu a bona a theto
[Seswantšho go letlakala 12]
Mašaledi a botegago a ile a boela Jerusalema
[Seswantšho go letlakala 13]
Moše o ile a kwa boipolelo bjo bo kgahlišago bja go loka ga Modimo
[Seswantšho go letlakala 15]
Botho bja Jehofa bo bonwa ka tsela yeo a ipiletšago go rena ka matlakala a Beibele