Na o Bota Modimo wa Kgonthe?

Lesolo leo le bego le laetšwe ke American Museum of Natural History le be le le tseleng ya lona ya go yo ithuta ka lefase la Arctic leo monyakišiši Robert E. Peary a ilego a bega gore o le bone nywageng e šupago pejana, ka 1906.

GO TLOGA Cape Colgate yeo e lego mafelelong a leboa-bodikela bja karolo ya Amerika Leboa, Peary o ile a bona seo se bego se bonala eka ke ditlhora tše ditšhweu tša nageng ya kgole. O ile a e bitša gore ke Crocker Land e lego leina la yo mongwe wa baswari ba gagwe ba tša ditšhelete. E swanetše go ba e bile mo go kgahlišago gakaakang go maloko a lesolo ao a bego a latela ge a be a bona karolo e bego e le ka pele e e-na le meboto, melapo le ditlhora tšeo di apešitšwego ke lehlwa! Eupša kapejana ba ile ba lemoga gore ba be ba lebeletše dibopego tše di forago tša Arctic. Mafelelo a ponagalo ya leratadima a be a forile Peary, gomme ge ba be ba lemoga seo ba be ba šetše ba sentše nako, matla le didirišwa go tla go bona selo seo e bego e se sa kgonthe.

Batho ba bantši lehono ba nea boineelo bja bona le nako ya bona go medimo yeo ba dumelago gore ke ya kgonthe. Mehleng ya baapostola ba Jesu, medimo e bjalo ka Hermes le Zeus e be e rapelwa. (Ditiro 14:​11, 12) Lehono, medimo yeo e rapelwago ke ma-Shinto, ma-Hindu le madumedi a mangwe a lefase e balelwa go dimilione. Seo ke sa kgonthe, bjalo ka ge Beibele e re, “xò na le medimo e mentši le marêna a mantši.” (1 Ba-Korinthe 8:​5, 6) Na ye ka moka e ka ba medimo ya kgonthe?

Medimo Yeo e “sa Phološexo”

Ka mohlala, ela hloko go dirišwa ga diswantšho le dika borapeding. Go bao ba di botago goba ba rapelago ka tšona, diswantšho di bonala e le baphološi ba nago le matla a fetago a motho ao a ka putsago batho goba go ba phološa kotsing. Eupša na ruri e ka phološa? Mopsalme o ile a opela mabapi le dilo tše bjalo gore: “Medimo ya dithšaba ké ya silifêra le xauta, dibopya tša ’atla tša batho. E na le melomo ’me xa e bolêle; e na le mahlô, ’me xa e bône; E na le  ditsêbê, xomme xa e kwe; xomme xa e buše môya ka xanong xa yona.” Ka kgonthe, ke medimo yeo e “sa phološexo.”—Psalme 135:​15-17; Jesaya 45:20.

Ke therešo gore bao ba dirago medimo ya diswantšho ba ka tumiša mediro ya diatla tša bona ka bophelo le ka matla. Gomme bao ba rapelago medimo ya diswantšho ba a e bota. Moporofeta Jesaya o itše: “Ba o [modimo wa seswantšho] kuka ka maxetla ba o rwala, ba o bea madulong a wôna.” O okeditše ka gore: “Wa êma o se šuthe; ba o bitša o se arabe. Xa o phološe motho tlalelong.” (Jesaya 46:7) Ke therešo gore modimo wa seswantšho o dula o sa phele go sa šetšwe gore tumelo ya bao ba o botago ke e tšwago pelong gakaakang. Diswantšho tše bjalo tše betlilwego le dihlwa-dieme tše tološitšwego ke “medimo e se nago mohola.”—Habakuku 2:​18, NW.

Go dira medimo ya diswantšho, go hlompha goba go rata kudu batho ba tša boithabišo, bahlomphegi ba dipapadi, ditshepedišo tša bopolitiki le baetapele ba bangwe ba bodumedi ke dilo tšeo lehono di tlwaelegilego. Go oketša moo, go ba bantši tšhelete ke modimo. Tabeng e nngwe le e nngwe, medimo ye ya diswantšho e bolelelwa e e-na le dika le ditekanyetšo tšeo e se nago tšona. Ga e kgone gomme e ka se kgone go nea dilo tšeo di holofelwago ke bao ba dumelago go yona. Ka mohlala, lehumo le ka bonagala e le tharollo go mathata a mantši, eupša matla a lehumo ke a bofora. (Mareka 4:​19) Monyakišiši yo mongwe o botšišitše gore: “Re ka hlalosa bjang lebaka le le dirago gore selo se se kganyogwago kudu ke batho ba bantši gakaakaa le seo go dumelwago gore ke makgona-tšohle, ge se hweditšwe se bake manyami gaešita le bohloko maikwelong?” Ee, go phegelela lehumo go ka nyaka gore motho a gafe dilo tšeo e tlogago e le tša kgonthe, tše bjalo ka bophelo bjo bobotse, bophelo bjo bo kgotsofatšago bja lapa, ditswalano tša kgaufsi goba tswalano e bohlokwa le Mmopi. Modimo wa gagwe wa tšhelete le lehumo o fetoga go ba “mafêla a foraxo”!—Jona 2:8.

‘Gwa Hlokwa e a Arabago’

Ke bošilo go šupa seo e sego sa kgonthe gore ke sa kgonthe. Barapedi ba modimo wa Baali mehleng ya moporofeta Eliya ba ile ba ithuta se ka tsela e bohloko. Ba be ba dumela ka go tia gore Baali o na le matla a go ka dira gore go we mollo go tšwa legodimong gomme o fiše sehlabelo sa phoofolo. Ge e le gabotse, “ba bitša leina la Baali, ba thôma è sa le ka moswana, ya ba mosexare bà sa fêla ba re: Baali, re kwê!” Na Baali o be a e-na le ditsebe tšeo di bego di ka kwa le molomo wo o bego o ka bolela? Pego e tšwela pele: “Xwa hlôkwa phetolô le e a arabaxo.” Ka kgonthe, ‘go be go se e a kwago.’ (1 Dikxoši 18:​26, 29) Baali e be e se wa kgonthe, o be a sa phele, goba go ba mafolofolo.

Go bohlokwa gakaakang gore re lemoge le go rapela Modimo wa kgonthe! Eupša ke mang? Le gona ke bjang go mmota go ka re holago?

[Diswantšho go letlakala 3]

Modirišani wa Peary e lego Egingwah o lebeledišiša naga kgaufsi

Robert E. Peary

[Methopo]

Egingwah: From the book The North Pole: Its Discovery in 1909 Under the Auspices of the Peary Arctic Club, 1910; Robert E. Peary: NOAA

[Diswantšho go letlakala 4]

Ba bantši ba fora-foretšwa ke dilo tšeo di dirilwego medimo ya diswantšho lefaseng le