Tšwelang Pele le Bontšha go Loka
Tšwelang Pele le Bontšha go Loka
“Seenywa sa seetša se na le go loka ga mohuta o mongwe le o mongwe le toko le therešo.”—BA-EFESO 5:9, NW.
1. Ke bjang ba dimilione mo nakong ye ba bontšhago gore ba dumelelana le Psalme 31:19?
SELO seo se retegago kudu seo motho le ge e le ofe a ka se dirago ke go tumiša Jehofa. Lehono, ba dimilione ba dira se ka go reta Modimo ka baka la go loka ga gagwe. Bjalo ka Dihlatse tša Jehofa tše di botegago ka go se kwanantšhe, re dumelelana ka pelo ka moka le mopsalme yo a opetšego gore: “Botho [“go loka,” NW] bya xaxo ké byo boxoloxolo byo O bo beetšexo ba Xo boifaxo.”—Psalme 31:19.
2, 3. Go be go ka direga’ng ge e ba modiro wa rena wa go dira barutiwa o be o sa sepedišane le boitshwaro bjo bobotse?
2 Poifo ya borapedi ya go boifa Jehofa e re tutuetša go mo reta ka baka la go loka ga gagwe. Gape e re tutueletša go ‘leboga Jehofa, go mo reta le go tsebiša letago la bogoši bja gagwe.’ (Psalme 145:10-13) Ke ka baka leo re tšeago karolo ka mafolofolo modirong wa go bolela ka Mmušo le go dira barutiwa. (Mateo 24:14; 28:19, 20) Ke therešo gore modiro wa rena wa boboledi o swanetše go sepedišana le boitshwaro bjo bobotse. Go sego bjalo, re ka tliša kgobošo leineng le lekgethwa la Jehofa.
3 Batho ba bantši ba bolela gore ba rapela Modimo, eupša boitshwaro bja bona ga bo dumelelane le ditekanyetšo tšeo di beilwego ka Lentšung la gagwe leo le buduletšwego. Mabapi le ba bangwe bao ba bego ba sa phele ka go dumelelana le dipolelo tša bona tša go dira go loka, moapostola Paulo o ngwadile gore: “Wene, O rutaxo ba bangwê, O re’ng Ò sa ithute? O iletša xo utswa, wa tla wa utswa. O iletša xo otswa, wa tla wa otswa. . . . Xobane xo ngwadilwe xwa thwe: Ina la-ka le hlwa lè xoboxa ka bô-lena mo xo ba-ntlê.”—Ba-Roma 2:21, 22, 24.
4. Boitshwaro bja rena bjo bobotse bo na le mafelelo afe?
4 Go e na le go tliša kgobošo leineng la Jehofa, re katanela go le reta ka boitshwaro bja rena bjo bobotse. Se se na le mafelelo a mabotse go bao ba lego ka ntle ga phuthego ya Bokriste. Lebaka le lengwe ke gore se re thuša go thiba melomo ya bao ba re ganetšago. (1 Petro 2:15) Sa bohlokwa kudu, boitshwaro bja rena bjo bobotse bo gogela batho mokgatlong wa Jehofa, le go ba bulela tsela bakeng sa go mo reta le go hwetša bophelo bjo bo sa felego.Ditiro 13:48.
5. Ke dipotšišo dife tšeo re swanetšego go di ela hloko ga bjale?
5 Ka ge re se ra phethagala, re ka phema bjang boitshwaro bjoo bo tla hlomphollago Jehofa le go kgopiša bao ba tsomago therešo? Ge e le gabotse, re ka atlega bjang ka go bontšha go loka?
Seenywa sa Seetša
6. E mengwe ya “medirô ya lefsifsi ye e sa tšweletšexo dienywa tša selô” ke efe, eupša ke seenywa sefe seo se swanetšego go bonagala gare ga Bakriste?
6 Bjalo ka Bakriste ba ineetšego, re thabela selo se itšego seo se re thušago go phema “medirô ya lefsifsi ye e sa tšweletšexo dienywa tša selô.” Ye e akaretša mediro ya go se hlomphe Modimo e bjalo ka go bolela maaka, go utswa, polelo e gobošago, polelo e sa agego ka kopano ya botona le botshadi, boitshwaro bjo bo lešago dihlong, metlae ya bošilo le botagwa. (Ba-Efeso 4:25, 28, 31; 5:3, 4, 11, 12, 18) Go e na le gore re ikakaretše medirong e bjalo, re ‘swara tsela bjalo ka bana ba seetša.’ Moapostola Paulo o re “seenywa sa seetša se mo bothakxeng ka moka le xo lokeng le therešong.” (Ba-Efeso 5:8, 9) Ka gona ke ka go sepela seetšeng moo re kgonago go tšwela pele re bontšha go loka. Eupša se ke seetša sa mohuta ofe?
7. Re swanetše go dira’ng bakeng sa go tšwela pele re bontšha seenywa sa go loka?
7 Go sa šetšwe go se phethagale ga rena, re ka bontšha go loka ge e ba re sepela seetšeng sa moya. Mopsalme o opetše ka gore: “ ’Ntšu la xaxo ké lebônê la dinaô tša-ka, ké seetša tseleng ya-ka.” (Psalme 119:105) Ge e ba re nyaka go tšwela pele re bontšha “seenywa sa seetša” mo ‘go lokeng ka moka,’ ka mehla re swanetše go diriša ka mo go holago seetša sa moya seo se hwetšwago ka Lentšung la Modimo, se hlahlobilwe ka kelohloko ka dipukung tša Bokriste gomme se ahla-ahlwa ka mehla dibokeng tša rena tša borapedi. (Luka 12:42; Ba-Roma 15:4; Ba-Hebere 10:24, 25) Gape re swanetše go lebiša tlhokomelo e kgethegilego mohlaleng le dithutong tša Jesu Kriste, “seetša sa lefase” le “seetša sa xo tšwa letaxong la [Jehofa] Modimo.”—Johane 8:12; Ba-Hebere 1:1-3.
Seenywa sa Moya
8. Ke ka baka la’ng re ka bontšha go loka?
8 Ka ntle le pelaelo seetša sa moya se re thuša go bontšha go loka. Go oketša moo, re kgona go bontšha seka se ka gobane re hlahlwa ke moya o mokgethwa wa Modimo goba matla a šomago. Go loka ke karolo ya “dienywa tša Môya.” (Ba-Galatia 5:22, 23) Ge e ba re ipea ka tlase ga tlhahlo ya moya o mokgethwa wa Jehofa, o tla tšweletša ka go rena seenywa sa ona se se kgahlišago sa go loka.
9. Re ka dira bjang ka go dumelelana le mantšu a Jesu a begilwego go Luka 11:9-13?
9 Kganyogo ya rena ya kgonthe ya go thabiša Jehofa ka go bontšha seenywa sa moya sa go loka e swanetše go re tutueletša go dira ka go dumelelana le mantšu a Jesu a rego: “Kxopêlang, ké mo Le tl’o xo fiwa; nyakang, ké mo Le tl’o xo bôna; ôpa-ôpang, ké mo Le tl’o xo bulêlwa. Xobane e a kxopêlaxo ó tlo tšea; e a nyakaxo ó tlo bôna; e a ôpa-ôpaxo ó tlo bulêlwa. Ké mang mo xo lena, yo e lexo tata xo ngwana, e rexo xe ngwana wa xaxwe a mo kxopêla boxôbê, a mo fe lebye? Xe a kxopêla sešeba, a mo fe nôxa bakeng sa hlapi? Xoba xe a kxopetše lee, a ka mo fa phepheng? Byale, xe ešita lena Le lexo ba [sa phethagalago gomme le bapetšwa le ba] babe, Lè tseba xo nea bana ba lena dineô tše botse, a Tata-weno wa maxodimong xa a Le fetiše kxolê? Ba ba Mo kxopêlaxo ó ba nea Môya o mokxêthwa.” (Luka 11:9-13) Anke re lateleng keletšo ya Jesu ka go rapelela moya wa Jehofa e le gore re ka tšwela pele re bontšha seenywa sa wona sa go loka.
‘Tšwelang Pele le Dira tše Botse’
10. Ke dibopego dife tša go loka ga Jehofa tšeo di boletšwego go Ekisodo 34:6, 7?
10 Ka seetša sa moya se se tšwago Lentšung la Modimo le ka thušo ya moya o mokgethwa wa Modimo, re ka “tšwela pele re dira tše botse.” (Ba-Roma 13:3, NW) Ka thuto ya Beibele ya ka mehla, re ithuta ka mo go oketšegilego mabapi le kamoo re ka ekišago go loka ga Jehofa. Sehlogo se se fetilego se ahla-ahlile dibopego tša go loka ga Modimo tšeo di tsopotšwego boipolelong go Moše bjo bo begilwego go Ekisodo 34:6, 7, moo re balago gore: “Jehofa, Jehofa, Modimo wa kgaugelo le wa lešoko, yo a diegago go galefa le yo a tletšego ka botho bjo lerato le therešo. Wa go bolokela ba dikete-kete botho bjo lerato, wa go lebalela batho bokgopo le dikarogo le dibe, fela, a se ke a lesa go otla mosenyi.” (Bapiša le NW.) Go hlahlobišiša dibopego tše tša go loka ga Jehofa go tla re thuša go “tšwela pele re dira tše botse.”
11. Re swanetše go kgongwa bjang ke go tseba gore Jehofa o na le kgaugelo le lešoko?
11 Boipolelo bjo bja Modimo bo re phafošetša go nyakega ga go ekiša Jehofa ka go ba le kgaugelo le lešoko. Jesu o itše: “Ba lehlôxônôlô ké baxauxedi, xobane bôná-bao ba tlo xauxêlwa.” (Mateo 5:7; Luka 6:36) Ka go tseba gore Jehofa o na le lešoko, re tutueletšega go ba le lešoko le lethabo ditirišanong tša rena le ba bangwe, go akaretša bao re dirago boboledi go bona. Se se dumelelana le keletšo ya Paulo e rego: “Polêlô ya lena a e bê ya botho ka mehla, e bê e nokilwexo letswai; Le tsebê xo fetola mang le mang ka mo xo Le swanetšexo.”—Ba-Kolose 4:6.
12. (a) Ka ge Modimo a diega go galefa, re swanetše go itshwara bjang go ba bangwe? (b) Botho bja lerato bja Jehofa bo re tutueletša go dira’ng?
12 Ka ge Modimo a diega go galefa, kganyogo ya rena ya go “tšwela pele re dira botse” e re tutueletša go kgotlelela diphošo tše nyenyane tša badumedi-gotee le rena le go lebiša tlhokomelo dikeng tša bona tše dibotse. (Mateo 7:5; Jakobo 1:19) Botho bjo lerato bja Jehofa bo re tutueletša go bontšha lerato leo le sa kwanantšhego, gaešita le ka tlase ga maemo a lekago kudu. Se ka kgonthe ke seo se rategago.—Diema 19:22.
13. Re swanetše go itshwara bjang bakeng sa go bontšha gore Jehofa o ‘tletše therešo’?
13 Ka ge Tatago rena wa legodimong a ‘tletše therešo’ re tsoma gore re ‘bonale re le bahlanka ba Modimo ka lentšu la therešo.’ (2 Ba-Korinthe 6:3-7) Gare ga dilo tše šupago tšeo di hlaswegago go Jehofa ke “ ’leme la maaká” le “hlatsi-phori kxêba-maaká.” (Diema 6:16-19) Ka gona, kganyogo ya rena ya go kgahliša Modimo e re tutueleditše gore re ‘apole maaka gomme re bolele therešo.’ (Ba-Efeso 4:25) Anke le ka mohla re se ke ra palelwa ke go bontšha go loka ka tsela ye e bohlokwa.
14. Ke ka baka la’ng re swanetše go ba bao ba lebalelago?
14 Boipolelo bja Modimo go Moše bo swanetše go re tutueletša go ba bao ba lebalelago, ka gobane Jehofa o ikemišeditše go lebalela. (Mateo 6:14, 15) Ke therešo gore Jehofa o otla bafoši bao ba sa sokologego. Ka gona, re swanetše go swarelela ditekanyetšong tša gagwe tša go loka mabapi le go boloka bohlweki bja moya bja phuthego.—Lefitiko 5:1; 1 Ba-Korinthe 5:11, 12; 1 Timotheo 5:22.
‘Phakgamang’
15, 16. Ke bjang keletšo ya Paulo e begilwego go Ba-Efeso 5:15-19 e re thušago go tšwela pele re bontšha go loka?
15 Bakeng sa go tšwela pele re bontšha go loka go sa šetšwe bobe bjo bo re dikologilego, re swanetše go tlatšwa ka moya wa Modimo le go šetša kamoo re sepelago ka gona. Paulo o eleditše Bakriste ba kua Efeso ka mo go swanetšego gore: “Ké xôna phakxamêlang xo swara tsela ka xo itôta; Le se etšê mašilo, Le etšê bahlale. Le thakanêlê sebaka se botse; xobane mehla yeno ké e mebe. Lesang-xê xo ba mašilo; sa lena e bê xo hlatha se Modimo a se rataxo. Le se kê la boiwa ke sedilá; ké mo xo tšwaxo bohlôla. Sa lena e bê xo tlala Môya, Le fêlê Le boledišana ka dipsalme le ka difela le ka dikôpêlô tša Môya; Le ôpêlêlê Morêna Le mminêlê ka dipelong tša lena.” (Ba-Efeso 5:15-19) Ka ntle le pelaelo keletšo ye ke e swanetšego go rena mehleng ye ya bofelo e hlobaetšago.—2 Timotheo 3:1.
16 Ge e ba re tla tšwela pele re bontšha go loka, re swanetše go phakgama gore re sepele bjalo ka bao ba bontšhago bohlale bja Modimo. (Jakobo 3:17) Re swanetše go phema dibe tše kgolo gomme re swanetše go tlatšwa ka moya o mokgethwa, re itumelele gore re hlahlwe ke ona. (Ba-Galatia 5:19-25) Ka go diriša tlhahlo ya moya yeo e newago dibokeng tša Bokriste, dikopanong tše dikgolo le tše nyenyane, re tšwela pele re dira seo se lokilego. Mantšu a Paulo go ba-Efeso gape a ka re gopotša gore dibokeng tša rena tše dintši tša borapedi, re holwa ke go opela “dikôpêlô tša Môya” go tšwa pelongtšeo bontši bja tšona di bolelago ka dika tša moya tše bjalo ka go loka.
17. Ke eng seo Bakriste bao ba babjago kudu ba swanetšego go kgodišega ka sona ge e ba maemo a bona a ba thibela go ba gona dibokeng ka mehla?
17 Go thwe’ng ka badumedi-gotee le rena bao ba sa kgonego go ba gona dibokeng tša Bokriste ka mehla ka baka la malwetši a šoro? Ba ka ikwa ba nolegile moko ka gobane ba sa kgone go rapela Jehofa ka mehla ba le gotee le bana babo bona le dikgaetšedi ba moya. Eupša ba ka kgonthišega gore Jehofa o kwešiša maemo a bona, o tla ba boloka seetšeng, o tla ba nea moya wa gagwe o mokgethwa gomme o tla ba thuša go tšwela pele ba dira se sebotse.—Jesaya 57:15.
18. Ke eng seo se tlago go re thuša go phegelela tseleng ya go loka?
18 Go phegelela tsela ya go loka go nyaka gore re hlokomele ditlwaelano tša rena gomme re furalele bao ba ‘sa ratego go loka.’ (2 Timotheo 3:2-5 bapiša le NW; 1 Ba-Korinthe 15:33.) Go diriša keletšo e bjalo go re thuša go phema go “nyamiša Môya o mokxêthwa wa Modimo,” ka go dira ka mo go fapanego le tlhahlo ya wona. (Ba-Efeso 4:30) Go feta moo, re thušwa go dira seo se lokilego ge e ba re hlagolela ditlemo tša kgaufsi le bao maphelo a bona a neago bohlatse bja gore ba rata go loka gomme ba hlahlwa ke moya o mokgethwa wa Jehofa.—Amosi 5:15; Ba-Roma 8:14; Ba-Galatia 5:18.
Go Loka go Tliša Mafelelo a Mabotse
19-21. Laodiša diphihlelo tšeo di bontšhago mafelelo a go bontšha go loka.
19 Go sepela seetšeng sa moya, go sekamela tlhahlong ya moya wa Modimo le go hlokomela kamoo re sepelago ka gona, go tla re thuša go phema seo se sa lokago gomme ra “tšwela pele re dira tše botse.” Ka morago se se ka tšweletša mafelelo a mabotse. Ela hloko phihlelo ya Zongezile, yo mongwe wa Dihlatse tša Jehofa Afrika Borwa. Mesong e mengwe ge a be a e-ya sekolong, o ile a ya go hlola tšhelete ya gagwe e nyenyane pankeng. Pampišana e tšwelego motšheneng, ka phošo e ile ya bontšha tšhelete e ntši kudu ya R42 000. Mohlokomedi wa panka le ba bangwe ba ile ba mo kgothaletša go ntšha tšhelete gomme a e tsenye pankeng e nngwe. Ke feela banyalani ba Dihlatse bao a bego a dula le bona bao ba ilego ba mo kgothaletša gore a se ke a ntšha tšhelete le ge e le efe.
20 Letšatšing le le latelago la mošomo, Zongezile o ile a bega phošo yeo pankeng. Go ile gwa hwetšwa gore o be a na le nomoro ya akhaonto e swanago le ya rakgwebo yo a humilego yoo ka phošo a bego a rometše ditšhelete akhaontong e fošagetšego. A makaditšwe ke gore Zongezile ga se a ka a šomiša le ge e le efe ya tšhelete ye, rakgwebo o ile a mmotšiša gore: “Bodumedi bja gago ke bofe?” Zongezile o ile a hlalosa gore ke yo mongwe wa Dihlatse tša Jehofa. O ile a retwa ka borutho ke bahlankedi ba panka bao ba itšego: “Re duma ge nkabe batho ka moka ba be ba botega bjalo ka Dihlatse tša Jehofa.” Ka kgonthe, ditiro tša go botega le go loka di ka dira gore ba bangwe ba tumiše Jehofa.—Ba-Hebere 13:18.
21 Ditiro tša go loka ga se tša swanela go ba tšeo di bonagalago bakeng sa gore di be le mafelelo a mabotse. Ka mohlala: Mofsa wa Hlatse yo a hlankelago e le moebangedi wa nako e tletšego go se sengwe sa dihlaka-hlaka tša Samoa o ile a swanelwa ke go ya sepetlele sa lefelong leo. Batho ba be ba letetše go bona ngaka, gomme Hlatse e ile ya lemoga gore go na le mokgekolo kgaufsi le yena yo a bego a babja kudu. O ile a lokišeletša gore mokgekolo a tšee sebaka sa gagwe e le gore a ka hwetša tlhokomelo ya tša kalafo kapejana. Nakong e nngwe ka morago, Hlatse ye e ile ya gahlana le mokgekolo yo mmarakeng. O ile a mo gopola le ditiro tša gagwe tše botse sepetlele. Mokgekolo o ile a re: “Ga bjale ke a tseba gore Dihlatse tša Jehofa ka kgonthe di rata baagišani ba tšona.” Gaešita le ge nakong e fetilego a se a ka a arabela molaetšeng wa Mmušo, go loka mo a go bontšhitšwego ke Hlatse go bile le mafelelo a mabotse. O ile a amogela mpho ya thuto ya Beibele gomme a thoma go monya tsebo ya Lentšu la Modimo.
22. Tsela e nngwe ya bohlokwa e kgethegilego ya go bontšha go “tšwela pele re dira tše botse” ke efe?
22 Gantši o ka anega diphihlelo tšeo di bontšhago mohola wa go bontšha go loka. Tsela e nngwe e kgethegilego kudu ya go bontšha go “tšwela pele go dira tše botse,” ke go ba le karolo ka mehla go tsebatšeng ditaba tše dibotse tša Mmušo wa Modimo. (Mateo 24:14) Anke re tšweleng pele re e ba le karolo ka mafolofolo modirong wo o bohlokwa, re lemoga gore ye ke tsela e nngwe ya go dira botse, kudu-kudu go bao ba arabelago gabotse. Sa bohlokwa kudu, bodiredi bja rena le boitshwaro bjo bobotse di reta Jehofa, yena mothei wa go loka.—Mateo 19:16, 17.
Tšwelang Pele go “Dira tše Botse”
23. Ke ka baka la’ng bodiredi bja Bokriste e le modiro o mobotse?
23 Ka ntle le pelaelo, bodiredi bja rena ke modiro o mobotse. Bo ka feleletša ka phologo go rena le go bao ba theetšago molaetša wa Beibele gomme ba tsena tseleng e lebišago bophelong bjo bo sa felego. (Mateo 7:13, 14; 1 Timotheo 4:16) Ka gona, ge re lebeletšane le diphetho, kganyogo ya go dira seo se lokilego e ka dira gore re ipotšiše gore: ‘Phetho ye e tla kgoma bjang modiro wa-ka wa go bolela ka Mmušo? Na tsela yeo ke e naganago e tloga e le e holago? Na e tla nthuša go thuša ba bangwe go amogela “Ebangedi ya neng le neng” gomme ba ba le tswalano ya kgaufsi le Jehofa Modimo?’ (Kutollo 14:6) Lethabo le legolo le tla tšweletšwa ke phetho yeo e etišago pele dikgahlego tša Mmušo.—Mateo 6:33; Ditiro 20:35.
24, 25. Ditsela tše dingwe tša go dira botse ka phuthegong ke dife, gomme re ka kgonthišega ka eng ge e ba re tšwela pele re bontšha go loka?
24 Anke le ka mohla re se ke ra tšeela fase mafelelo a holago a go loka. Re ka tšwela pele re bontšha seka se ka go thekga phuthego ya Bokriste le ka go dira sohle seo re ka se kgonago go hlokomela dikgahlego tša phuthego le katlego ya yona. Ka kgonthe re dira gabotse ge re e ba gona ka mehla gomme re e ba le karolo dibokeng tša Bokriste. Go ba gona ga rena go kgothatša barapedi-gotee gomme dikarabo tša rena tšeo di lokišeleditšwego gabotse di ba aga moyeng. Gape re dira gabotse ge re diriša matlotlo a rena go boloka Holo ya Mmušo e le boemong bjo bobotse le go thuša go e hlokomela gabotse. (2 Dikxoši 22:3-7; 2 Ba-Korinthe 9:6, 7) Ka kgonthe, “xe re sa na le lebaka, a re direng botse; re bo direlê batho bohle, xa-xolo re bo dirêlê batho ba-bô-rena ba tumêlô.”—Ba-Galatia 6:10.
25 Re ka se ke ra letela boemo bjo bongwe le bjo bongwe bjoo bo tla nyakago gore re bontšhe go loka. Ka gona, ge re lebeletšana le ditlhohlo tše difsa, anke re tsomeng seetša ka Mangwalong, re rapelele moya o mokgethwa wa Jehofa gomme re dire sohle seo re ka se kgonago go tšwetša pele thato ya gagwe e botse le e phethagetšego. (Ba-Roma 2:9, 10; 12:2) Re ka kgodišega gore Jehofa o tla re putsa kudu ge re tšwela pele re bontšha go loka.
O tla Araba Bjang?
• Re ka fihlelela botse bjo bogolo bjang?
• Ke ka baka la’ng go loka go bitšwa “seenywa sa seetša”?
• Ke ka baka la’ng go loka go bitšwa ‘seenywa sa moya’?
• Boitshwaro bja rena bjo bobotse bo na le mafelelo afe?
[Dipotšišo tša Thuto]
[Seswantšho go letlakala 17]
Lentšu la Modimo le moya o mokgethwa wa gagwe di re thuša go bontšha go loka
[Diswantšho go letlakala 18]
Go bontšha go loka go tliša mafelelo a mabotse