Bohlweki—Ge e le Gabotse bo Bolela’ng?

KA BAKA la maemo a boifišago a tša maphelo kua Yuropa le United States lekgolong la bo-18 le la bo-19 la nywaga, baromiwa ba nakong yeo ba ile ba bolela ka seo se ka bitšwago “thuto ya bohlweki.” Thuto ye e ile ya swantšha ditšhila le sebe, mola bohlweki bo ile bja bolelwa bo tliša motho kgaufsi le Modimo. Mohlomongwe se ke seo se dirilego gore go tume polelwana e rego “Bohlweki bo kgaufsi le go boifa Modimo.”

Kgopolo ye e ile ya dirišwa ke Salvation Army, e hlomilwego ke William le Catherine Booth. Go ya ka puku ya Health and Medicine in the Evangelical Tradition, o mongwe wa meano ya bona ya pele e be e le: “Sesepe, Sopo le Phološo.” Gomme, ge Louis Pasteur le ba bangwe ba be ba bontšha ka ntle le pelaelo kgokagano magareng ga bolwetši le twatši, go ile gwa hlohleletša gore go be le mekgatlo e mekaone ya tša maphelo a phatlalatša le mabaka a motheo a thutamahlale.

E mengwe ya megato ye e ilego ya tšewa le semeetseng e akareditše go se sa nyakega ga gore ka kgorong hlatse e atle Beibele le go fedišwa ga gore batho ka moka ba nwe ka komiki e tee dikolong le diteišeneng tša ditimela. Go ile gwa ba gwa dirwa le maiteko a go bea dikomiki tša motho ka noši legatong la dikomiki tša batho bohle ditirelong tša bodumedi. Ee, babulamadibogo bao ba pele go ile gwa bonala ba bile le katlego e kgolo go fetošeng boemo bja kgopolo bja batho mabapi le bohlweki. Boemo bja kgopolo bja batho bo be bo kgomilwe mo e  lego gore mongwadi yo mongwe o ile a bo bitša “go ratana le bohlweki.”

Lega go le bjalo, “go ratana le bohlweki” mo, e be e se mo go tseneletšego. Kapejana barekiši bao ba nago le maikemišetšo ba ile ba fetola sesepe se se tlwaelegilego gore e be sedirišwa sa bobotse. Dipapatšo tše bohlale di ile tša dira gore bareki ba dumele gore go diriša didirišwa tše itšego tša maphelo bjalo ka sesepe di tla dira gore bao ba sa di dirišego ba dume bao ba di dirišago. Thelebišene e dira gore pono ye e be gona ka go se kgaotše. Batho ba humilego le ba kgahlišago bao ba bontšhwago dipapatšong le go diswantšhetšo-dikgao ke ka sewelo ba bonwago ba hlwekiša dintlo, ba fsiela lebala, ba topa ditšhila goba ba tloša mantle a dikatse le a dimpša tša bona.

Go na le ba bangwe bao ba bolelago gore go ya mošomong go dira gore o kgone go lefa ditshenyagalelo tša bophelo, mola e le gore modiro wa ka ntlong goba mediro e mengwe ya go hlwekiša ga e na tšhelete. Gomme ka ge go sa akaretšwe moputso wa tšhelete, ke ka baka la’ng ba swanetše go hlokomela tikologo? Mafelelo a mangwe a se e bile gore batho ba bangwe lehono ba nagana gore bohlweki bo šoma feela go bohlweki bja mmele.

Pono ya Modimo ka Bohlweki

Ga go na pelaelo gore maiteko ao a mathomong a go ruta bohlweki a ile a thuša go kaonefatša maemo a batho a go phela. Gomme se e be e le sa tshwanelo, ka gobane bohlweki ke seka sa Modimo le seo se tšweleditšwego ke Modimo yo mokgethwa le yo a hlwekilego, Jehofa. O re ruta gore re ikhole ka gore re be ba bakgethwa le ba hlwekilego ditseleng tša rena ka moka.Jesaya 48:​17; 1 Petro 1:15.

Jehofa Modimo ke mohlala tabeng ye. Bohlweki gotee le dika tša gagwe tšeo di sa bonagalego, di bonagala gabotse tlholong ya Modimo e bonagalago. (Ba-Roma 1:​20) Re ka bona gore tlholo ka noši e dira gore go se be le tšhilafalo e sa felego. Lefase gotee le mesepelo ya lona e mentši ya tswalano ya diphedi le tikologo ya tšona ke semaka sa go itlhwekiša ka noši, gomme le hlametšwe bophelo bjo bobotse le bjo bo hlwekilego. Modiro o bjalo o hlwekilego o ka tšwa feela go Mohlami yo a nago le kgopolo ya bohlweki. Ka gona, go tšwa go se re ka phetha ka gore, barapedi ba Modimo ba swanetše go hlweka dibopegong ka moka tša bophelo bja bona.

Dibopego tše Nne tša Bohlweki

Beibele e bolela ka dibopego tše nne tša bohlweki tšeo barapedi ba Modimo ba swanetšego go di katanela. A re eleng hloko e nngwe le e nngwe ya tšona.

Moyeng. Bjo bo ka lebelelwa e le bohlweki bjo bohlokwa kudu go feta a mangwe ka moka, ka gobane bo tswalana le ditebelelo tša motho tša bophelo bjo bo sa felego. Lega go le bjalo, se gantši ke sebopego seo se sa šetšwego kudu sa bohlweki. Ka mantšu a bonolo, go ba yo a hlwekilego moyeng go bolela go se tshele mellwane yeo Modimo a e hlomilego magareng ga borapedi bja therešo le bja maaka, ka gobane Modimo o lebelela mohuta le ge e le ofe wa borapedi bja maaka e le bjo bo šilafetšego. Moapostola Paulo o ngwadile gore: “Tšwang-xê moo xare xa bôná, Le khuduxê; ó r’yalo Morêna, Le se swarê thšila. Ké mo ke tl’o xo Le amoxêla.” (2 Ba-Korinthe 6:​17) Morutiwa Jakobo le yena ke yo a lebanyago tabeng ye: “Borapedi byo Modimo Tata-wešo a bônaxo bò se na thšila le senyalô ké . . . xo itôta xore lefase le se Xo thšilafatšê.”—Jakobo 1:27.

Modimo o ile a bontšha gabotse go se amogele ga gagwe go hlakanya borapedi bja maaka le borapedi bja gagwe bja therešo. Borapedi bja maaka gantši bo akaretša mediro e sa hlwekago le medimo ya diswantšho e šišimišago le medimo. (Jeremia 32:​35) Ka gona, Bakriste ba therešo ba kgothaletšwa go tšhaba go ikopanya le ge e le gofe le borapedi bjo bo sa hlwekago.—1 Ba-Korinthe 10:​20, 21; Kutollo 18:4.

Boitshwarong. Le gona mo ka mo go swanago, Modimo o bontšha gabotse phapano magareng ga seo se hlwekilego le seo se šilafetšego. Lefase ka kakaretšo le swana le seo se hlaloswago go Ba-Efeso 4:​17-19 ge e re: “Ba fifetše thlaoloxanyô, ba tloxêlane le bophelô bya Modimo, . . . Ba reteletše ba ineêla bohlôtlôlô, ba dira tša dithšila bà ile le dikxanyoxô.” Go nagana mo go bjalo mo go sa hlwekago boitshwarong go itšweletša ka ditsela tše dintši, tše di lego molaleng le tša bohwirihwiri, ka gona Bakriste ba swanetše go hlokomela.

Barati ba Modimo ba a tseba gore go gweba ka mmele, bosodoma, dikopano tša botona le botshadi pele ga lenyalo le diswantšho tšeo di  kgothaletšago bootswa ke go tshela ditekanyetšo tša Jehofa tša boitshwaro bjo bo hlwekilego. Lega go le bjalo, dipontšho tša mediro ye ke tše tlwaelegilego lefaseng la boithabišo le la fešene. Ka gona, Bakriste ba swanetše go itiša malebana le mediro e bjalo. Go apara diaparo tše dikopana kudu le tšeo di sa khupetšego karolo e kgolo ya mmele wa gago, diaparo tšeo di bonatšago tšeo di dirago gore dikarolo tša mmele wa gago tšeo gantši di dulago di khupeditšwe gore di bonale ge o e-ya dibokeng tša Bokriste goba pokanong ya segwera go gogela tlhokomelo e sa nyakegego mmeleng wa motho le go bontšha go fapoga ga nakwana go bokwala. Ka ntle le go tliša dikgopolo tša lefase bogwereng bja Bokriste, go apara ka tsela yeo go na le tshekamelo ya go bakela batho ba bangwe dikgopolo tše di sa hlwekago. Ye ke karolo yeo Bakriste ba swanetšego go šoma ka thata go yona go bontšheng “bohlale byo bo tšwaxo xodimo.”—Jakobo 3:17.

Monaganong. Dikgopolo tša motho tša ka gare ga se tša swanela go ba bobolokelo bja dikgopolo tše sa hlwekago. Jesu o ile a lemoša ka dikgopolo tše sa hlwekago ge a be a re: “Mang le mang e a lebêlêlaxo mosadi à mo kxanyoxa, ó šetše a otswitše pelong ya xaxwe.” (Mateo 5:​28; Mareka 7:​20-23) Mantšu a a šoma ka mo go swanago le go bogela difilimi le diswantšho tšeo di kgothaletšago bootswa, go bala dipego tša mediro ya bohlola ya botona le botshadi le go theetša mantšu a dikoša ao a kgothaletšago dilo tše sa swanelago. Ka gona, Bakriste ba swanetše go phema go itšhilafatša ka go nagana ka dikgopolo tše di sa hlwekago tšeo di ka tsošago ditiro le dipolelo tšeo e sego tše kgethwa le tše sa hlwekago.—Mateo 12:​34; 15:18.

Mmeleng. Bokgethwa le bohlweki bja mmeleng di tswalanywa kgaufsi ka Beibeleng. Ka mohlala, Paulo o ngwadile gore: “Lena Baratwa! . . . a re hlapeng re tšwê thšila tšohle tša nama le tša môya, re phethê kxêthêxô ya rena rè boifa Modimo.” (2 Ba-Korinthe 7:1) Ka gona, Bakriste ba therešo ba swanetše go katanela go boloka mebele ya bona, magae le tikologo ya bona e le tše hlwekilego le tša bothakga, go fihla bokgoleng bjo maemo a dumelago. Gaešita le moo meetse a go hlatswa goba a go hlapa a sa hwetšwego gabonolo, Bakriste ba swanetše go leka go dira ka mo ba ka kgonago ka gona go dula ba hlwekile le go lebelelega.

Bohlweki bja mmeleng gape bo tla iletša go dirišwa ga motšoko ka tsela le ge e le efe, go nwa bjala ka mo go feteletšego le sebopego le ge e le sefe sa go dirišwa gampe ga dihlare-tagi moo go šilafatšago le go senya mmele. Modiši yo go boletšwego ka yena go Sefela sa Difela o ile a thabišwa ke senkgiša-bose diaparong tša ngwanenyana wa mo-Sulami. (Sefela sa Difela 4:​11) Go hlokomela boemo bja rena bja maphelo ke selo seo se rategago go ka dirwa, ka ge re rata go phema go fetiša menkgo e sa kgahlišego go bao ba re dikologilego. Dinkgiša-bose e ka ba e le tše di thabišago, eupša ga di tšeele go hlapa ka mehla le diaparo tše di hlwekilego legato.

Go Boloka Pono e Leka-lekanego

Mabapi le bohlweki bja mmeleng, batho ba ka dira ka mo go feteletšego. Ka lehlakoreng le lengwe, go ba ba ba fišegelago bohlweki go ka re amoga lethabo la go phela. Gape go ka re tšeela  nako e ntši e bohlokwa. Ka lehlakoreng le lengwe, magae a šilafetšego le a e sego a bothakga a ka ipontšha e le a bitšago kudu go ka lokišwa. Seo se lego magareng ga dipheteletšo tše ke tsela e šomago, tsela e leka-lekanego ya go boloka magae a rena a hlwekile le go lebelelega.

Di boloke di beakantšwe gabotse. Magae goba diphapoši tšeo di hlaka-hlakanego di thata go ka hlwekišwa, gomme ditšhila di ka fo se be bonolo go tloga ditikologong tše bjalo tše pitlaganego. Magae ao a lekanetšego le ao a sa hlaka-hlakanago a tšea nako e kopana go ka hlwekišwa. Beibele e kgothaletša kudu tsela ya bophelo e bonolo ge e re: “Xe re na le dijô le diaparô, a re kxolweng ke tšôna.”—1 Timotheo 6:8.

Le boloke ka bothakga. Gore go be le legae le le hlwekilego ke boikarabelo bja yo mongwe le yo mongwe yo a dulago ka go lona. Gantši magae ao e sego a bothakga a thoma ka diphapoši tšeo e sego tša bothakga. Bothakga bo bolela gore selo se sengwe le se sengwe se madulong a sona a swanetšego. Ka mohlala, lebato la phapoši ya marobalo ga se la swanela go ba lefelo la diaparo tša ditšhila. Gape se sengwe sa bohlokwa kudu, dibapadišwa le ditlabakelo tša mošomo tšeo di tlogetšwego di tletše mo fase di ka tliša kotsi. Dikotsi tše dintši ka magaeng di tlišwa ke mekgwa ya go se bee dilo ka bothakga.

Go molaleng gore bohlweki le tsela ya Bakriste ya bophelo ke monwana le lenala. Mabapi le tsela ya bo-Modimo ya go phela, moporofeta Jesaya o bolela ka “tsela-kxêthwa.” Gomme o oketša ka kgopolo e kwagalago kudu ya gore ‘ke e sa sepelwego ke wa ditšhila.’ (Jesaya 35:8) Ee, go hlagolela mekgwa e mebotse ya bohlweki ga bjale go nea bohlatse bjo bo tiilego bja tumelo ya rena kholofetšong ya Modimo ya gore kgaufsinyane o tla hloma lefase le le hlwekilego la paradeise. Gomme, dikarolong ka moka tša polanete ye e botse, batho ka moka ba tla reta Jehofa Modimo ka go latela ka botlalo ditekanyetšo tša gagwe tše di phethagetšego tša bohlweki.—Kutollo 7:9.

[Seswantšho go letlakala 6]

Gore go be le legae le le hlwekilego ke boikarabelo bja yo mongwe le yo mongwe yo a dulago ka go lona

[Seswantšho go letlakala 7]

Lefase ke semaka sa go itlhwekiša ka noši