Dipotšišo tše Tšwago go Babadi

Ke go fihla bokgoleng bofe moo dithibelo tša go nyalana le wa leloko tšeo di lego ka Molaong wa Moše e lego tše šomago go Bakriste lehono?

Molao wo Jehofa a bego a o neile setšhaba sa Isiraele ga o bolele ka mo go tseneletšego ka ditshepedišo le meletlo ya lenyalo. Lega go le bjalo, o bea dithibelo tše itšego malebana le ditswalano tše itšego tša manyalo. Ka mohlala, go Lefitiko 18:​6-20, re hwetša lelokelelo la ditswalano tšeo di thibetšwego magareng ga ‘meloko ya kgaufsi.’ (NW) Karolo ye e hlalosa ka mo go nabilego gore ke ba leloko lefe bao ba sa swanelago go ba le dikopano tša botona le botshadi. Go ba gona, Bakriste ga ba ka tlase ga Molao wa Moše goba go tlangwa ke ditaelo tša wona. (Ba-Efeso 2:​15; Ba-Kolose 2:​14) Lega go le bjalo, seo ga se bolele gore Bakriste ba ka fo hlokomologa taba ye ge ba kgetha yo ba mo nyalago. Go na le mabaka a mantši a gore ke ka baka la’ng se se le bjalo.

Sa pele, go na le melao ya lefase yeo e laolago manyalo magareng ga ba leloko la kgaufsi, gomme Bakriste ruri ba tlamegile go kwa melao ya naga yeo ba dulago go yona. (Mateo 22:​21; Ba-Roma 13:1) Go ba gona, melao e bjalo e fapana go ya le ka mafelo. Melao e mentši ya lehono ya mohuta wo e theilwe ka tlase ga maemo a leabela. Ke taba e tsebjago e le therešo gore manyalo magareng ga ba leloko a bea bana le ge e le bafe kotsing ya malwetši le bogole bja leabela. Ka baka le le ka baka la gobane ba sa “xanê xo bušwa,” Bakriste bao ba tsenago lenyalong ba kwa melao ya manyalo ya lefelong leo ba lego go lona.

Gomme go na le taba ya seo se amogelegago le seo se sa amogelegego setšhabeng seo o dulago go sona. Mo e nyakilego go ba setšo se sengwe le se sengwe se na le melao le metlwae yeo e solago lenyalo magareng ga batho bao ba tswalanago kgaufsi ka madi, gantši se lebelela ditlemo tše bjalo e le tswalano le wa leloko la kgaufsi le gona e sa amogelege. Gaešita le ge go se swane ga ditswalano go ka fapana kudu ditlogong tše di sa swanego, The Encyclopædia Britannica e re, “ka kakaretšo, ge batho ba babedi ba e-na le tswalano ya kgaufsi ya leabela, ke moo motlwae wa seila o gatelelwago kudu ka go iletša goba go se kgothaletše ditswalano tša botona le botshadi magareng ga bona.” Ka gona, le moo ditswalano tša dikopano tša botona le botshadi le wa leloko wa kgaufsi di sa akaretšwego, Bakriste ga ba nyake go bontšha go se ele hloko ka mo go feletšego metlwae e theilwego goba go kgomega mo go kwešišegago ga setšhaba, e le gore ba se tliše thogako phuthegong ya Bokriste goba leineng la Modimo.2 Ba-Korinthe 6:3.

Letswalo la rena leo re le filwego ke Modimo ga se la swanela go hlokomologwa. Batho ka moka ba belegwa ba e-na le go kwa seo se nepagetšego le se se fošagetšego, se se lokilego le se sebe. (Ba-Roma 2:​15) Letswalo la bona le ba botša seo e lego se se swanetšego le se se loketšego le seo e sego sa tlhago le se hlomphollago, ka ntle le ge le ile la kgopamišwa goba la bolawa ke mediro ya bohlanogi. Jehofa o ile a bolela ka taba ye ge a be a nea ba-Isiraele molao wa gagwe malebana le lenyalo magareng ga ba leloko la kgaufsi. Re a bala: “Le se kê la dira tša ba naxa ya Egipita ye Le kilexo la dula xo yôna, le xe e le tša ba naxa ya Kanana ye ke Le išaxo xo yôna; Le se kê la di dira, Le se kê la tšea mekxwa ya bôna.” (Lefitiko 18:3) Bakriste ba tšeela godimo letswalo la bona leo le theilwego Beibeleng gomme ga ba le dumelele gore le senywe ke go kwagala mo go kgopamišitšwego ga seo se nepagetšego le seo se fošagetšego ga ditšhaba.—Ba-Efeso 4:​17-19.

Ka gona, re ka phetha ka go re’ng? Le ge Bakriste ba se ka tlase ga Molao wa Moše, matswalo a bona a ba botša gabotse gore lenyalo magareng ga ba leloko la kgaufsiba bjalo ka tate le morwedi, mma le morwa, motho le kgaetšediga le a dumelelwa kamoo go feletšego setšhabeng sa Bakriste. * Ge tswalano tša madi di gola, Bakriste ba tseba gore go na le melao le dikahlolo tšeo di laolago manyalo a molao le gore go na le ditekanyetšo tša leago le tša setšo tšeo di amogelegago. Tše di swanetše go tšeelwa šedi e kgolo e le gore re ka dumelelana le taelo ya Mangwalo e rego: “Xo tšeana a xo xodišwê mo xohle.”—Ba-Hebere 13:4.

[Mengwalo ya ka tlase]