Ithute Thuto go Nikodemo

“XE MOTHO a rata xo nthšala moraxo, a ikxafê, a rwalê [kota ya gagwe ya tlhokofatšo, NW] ka mehla, ’me a ntatêlê.” (Luka 9:​23) Barei ba dihlapi bao ba ikokobeditšego le molekgetho yo a nyatšegago ba ile ba amogela taletšo yeo ka ntle le tika-tiko. Ba ile ba tlogela selo se sengwe le se sengwe gomme ba latela Jesu.—Mateo 4:​18-22; Luka 5:​27, 28.

Pitšo ya Jesu e sa dutše e kwewa lehono, gomme ba bantši ba arabetše. Lega go le bjalo, ba bangwe bao ba thabelago go ithuta Beibele le Dihlatse tša Jehofa, ba dika-dika go ‘ikgafa gomme ba rwala dikota tša bona tša tlhokofatšo.’ Ba dika-dika go amogela boikarabelo le tokelo ya go ba barutiwa ba Jesu.

Ke ka baka la’ng ba bangwe ba dika-dika go amogela taletšo ya Jesu le go ineela go Jehofa Modimo? Ke therešo gore bao ba sa godišwago ka kgopolo ya Bokriste bja bo-Juda ya thuto e kwešišegago gabonolo, ba ka nyaka nako e lekanego  pele ga ge ba ka kwešiša ka mo go tletšego go ba gona ga Mmopi yo matla ka moka. Lega go le bjalo, gaešita le ka morago ga ge ba kgodišitšwe gore Modimo ke wa kgonthe, ba bangwe ba phema go latela mehlaleng ya Jesu. Ba ka boifa seo ba leloko le bagwera ba tla se naganago ka bona ge e ba ba e-⁠ba Dihlatse tša Jehofa. Ba bangwe, bao ba se sa bonago go akgofa ga mehla yeo re phelago go yona, ba retologela go nyakeng botumo le mahlatse. (Mateo 24:​36-42; 1 Timotheo 6:​9, 10) Go sa šetšwe gore lebaka ke lefe, go bao ba tšwelago pele ba šuthiša phetho ya bona ya go ba balatedi ba Jesu, go na le thuto yeo ba ka ithutago yona pegong ya Nikodemo, mmuši yo a atlegilego wa mo-Juda wa mehleng ya Jesu.

O Šegofaditšwe ka Dibaka tše Kgahlišago

Mo e ka bago dikgwedi tše tshela feela ka morago ga ge Jesu a thomile bodiredi bja gagwe bja lefaseng, Nikodemo o ile a lemoga gore Jesu ‘bjalo ka morutiši o be a e-⁠tšwa go Modimo.’ A kgahlišitšwe ke mehlolo yeo Jesu a sa tšwago go e dira morago bjale kua Jerusalema ka Paseka ya 30 C.E., Nikodemo o ile a tla lefsifsing la bošego, bakeng sa go bolela go dumela ga gagwe go Jesu le go ithuta ka mo go oketšegilego ka morutiši yo. Ka nako yeo, Jesu o botša Nikodemo therešo ya kgonthe ka go nyakega ga go “tswalwa lefsa” bakeng sa go tsena Mmušong wa Modimo. Lebakeng le, Jesu gape o bolela mantšu a rego: “Xobane Modimo ó ratile lefase xakaakaa, a bá a le nea Morwa wa xaxwe e a tswetšwexo à nnoši, xore mang le mang e a mo dumetšexo a se kê a lahlêxa, a bê le bophelô byo bo sa felexo.”—Johane 3:​1-16.

A tebelelo e kgahlišago gakaakang e lego ka pele ga Nikodemo! E ka ba e be e le mogwera wa kgaufsi wa Jesu, yo a bego a kgona go nea bohlatse bja go iponela ka mahlo dibopego  tše di fapa-fapanego tša bophelo bja Jesu mo lefaseng. Bjalo ka mmuši wa ba-Juda le morutiši Isiraeleng, Nikodemo o be a e-na le tsebo e lekanego ya Lentšu la Modimo. Gape o be a e-na le temogo ya phišego, bjalo ka ge e bonwe ke go tseba ga gagwe Jesu e le morutiši yo a romilwego ke Modimo. Nikodemo o na le kgahlego ka dilo tša moya, gomme ke yo a ikokobeditšego ka mo go sa tlwaelegago. Go swanetše go ba go le thata gakaakang ka setho sa kgoro e phagamego ya ba-Juda go dumela gore morwa wa mmetli yo a kokobetšego ke motho yo a romilwego ke Modimo! Dika tše bjalo ka moka di bohlokwa bakeng sa go ba morutiwa wa Jesu.

Kgahlego ya Nikodemo ka monna yo a tšwago Natsaretha ga e bonagale e fokotšega. Nywaga e mebedi le seripa ka morago Monyanyeng wa Mešaša, Nikodemo o ile a ba gona sebokeng sa Sanhedrine. Ka nako ye, Nikodemo e sa dutše e le “e mongwê wa bôna.” Baperisita ba bagolo le Bafarisei ba romela bahlankedi go ya go swara Jesu. Bahlankedi ba a boa gomme ba bega gore: “Xa xo ešo xwa ba le motho e a bolêlaxo byalo ka motho eo.” Bafarisei ba thoma go ba nyenyefatša ka gore: “E se bê le lena Le arošitšwe? A xo na le e mongwê wa baxolo xoba mofarisei e a mo dumetšexo? Ké sethšaba sé sa xo se tsebe Molaô; sôna ké dihlôbôxwa.” Nikodemo o palelwa ke go kgotlelela go se bolele selo. O re: “A xomme ka Molaô wa rena re ka bea motho molato à sešo a sekišwa, xwa tsebya se a se diraxo?” Ke moka o ikhwetša e le mohlaselwa wa go ganetšwa ke Bafarisei ba bangwe ka gore: “Anthe le wêna O Mo-Galilea? Tsomeša O bônê xe xo se moporofeta wa xo thwe ó tlo tsoxa Galilea.”Johane 7:​1, 10, 32, 45-52.

Dikgwedi tše tshela ka morago, ka Letšatši la Paseka ka 33 C.E., Nikodemo o bona mmele wa Jesu o theošwa koteng ya tlhokofatšo. O sepela le Josefa wa Arimathea, setho se sengwe sa lekgotla la Sanhedrine bakeng sa go lokišeletša mmele wa Jesu gore o bolokwe. Ka lebaka leo, Nikodemo o tliša “ditlôlô tše di hlakanthšitšwexo le dinokô,” tšeo di imelago mo e ka bago diponto tše 100 tša ba-Roma, tše lekanago le dikhilograma tše 33. E be e le tša theko e phagamego. Go ile gwa nyakega sebete ka lehlakoreng la gagwe gore a bewe ka legorong la “moaroši eo,” bjalo ka ge Bafarisei-gotee le yena ba be ba bitša Jesu bjalo. Kapejana ba ile ba lokišeletša mmele wa Jesu bakeng sa go bolokwa,  bobedi bja bona ba bea Jesu lebitleng le lefsa leo le lego kgaufsi. Lega go le bjalo, gaešita le nakong ye, Nikodemo o sa dutše a sa tsebje e le morutiwa wa Jesu!Johane 19:​38-42; Mateo 27:​63; Mareka 15:43.

Lebaka Leo ka Lona a Sego a Gata Mogato

Johane ga se a ka a utolla pegong ya gagwe lebaka leo ka lona Nikodemo a ilego a phema go ‘rwala kota ya gagwe ya tlhokofatšo’ le go latela Jesu. Lega go le bjalo, o ile a tlogela dilo tšeo di ka re hlahlago go hlalosa tika-tiko ya Mofarisei yo.

Sa pele, Johane o bontšha gore mmuši yo wa mo-Juda o ile “a tla xo Jesu è le bošexo.” (Johane 3:2) Seithuti se sengwe sa Beibele se šišinya gore: “Nikodemo o ile a tla bošego, e sego ka baka la go boifa, eupša bakeng sa go phema mašaba ao a bego a ka šitiša poledišano ya gagwe le Jesu.” Lega go le bjalo, Johane o ile a bolela ka Nikodemo e le “yola wa xo tla xo Jesu bošexo” tabeng e swanago le yeo go yona a ilego a bolela ka Josefa wa Arimathea e le “morutiwa wa Jesu, xomme à ikutile ka xo boifa Ba-Juda.” (Johane 19:​38, 39) Ka gona, go bonala Nikodemo a ile a etela Jesu a ikapešitše lefsifsi ka baka la go “boifa ba-Juda,” go swana le ge ba bangwe mehleng ya gagwe ba be ba boifa go itswalanya ka tsela le ge e le efe le Jesu.Johane 7:13.

Na o dika-dika go dira phetho ya go ba yo mongwe wa barutiwa ba Jesu ka baka la seo ba leloko la gago, bagwera goba bao o tlwaelanego le bona ba ka se bolelago? Seema se re: “Xo boifa batho xo wetša moreong.” O ka lebeletšana bjang le poifo yeo? Seema se tšwela pele ka gore: “Xo pholoxa e a bôʹtaxo Morêna.” (Diema 29:​25) Bakeng sa gore o age go bota Jehofa mo go bjalo, o swanetše go iponela ka noši gore Modimo o tla go šireletša ge o le tlalelong. Rapela Jehofa gomme o mo kgopele gore a go nee sebete sa go dira gaešita le diphetho tše nyenyane mabapi le borapedi bja gago. Ganyenyane-ganyenyane, tumelo ya gago le go bota ga gago Jehofa di tla gola go fihla ntlheng ya gore o kgone go dira diphetho tše dikgolo ka go dumelelana le thato ya Modimo.

Boemo bja Nikodemo le botumo bjalo ka setho sa sehlopha se bušago le tšona di ka be di ile tša mo thibela go gata mogato o bohlokwa wa go ikgafa. Ka nako yeo, o swanetše go ba a be a sa dutše a e-na le lerato le matla la go rata boemo bja gagwe bjalo ka setho sa lekgotla la Sanhedrine. Na o dika-dika go gata mogato wa go ba molatedi wa Kriste ka gobane o ka lahlegelwa ke maemo setšhabeng goba o ka swanelwa ke go gafa ditebelelo tše itšego tša go dira tšwelopele? Ga go le se tee sa dilo tše seo se ka bapišwago le tokelo ya go kgona go hlankela yo a Phagamego Kudu wa legohle, yo a ikemišeditšego go kgotsofatša dikgopelo tšeo o di dirago ka go dumelelana le thato ya gagwe.Psalme 10:​17; 83:​18; 145:18.

Lebaka le lengwe leo e ka bago la kgonthe la go senya nako ga Nikodemo le ka be le be le tswalana le mahumo a gagwe. Bjalo ka Mofarisei, a ka be a ile a tutuetšwa ke ba bangwe, “ba xo bušwa ke mexabaru.” (Luka 16:​14) Ntlha ya gore o ile a kgona go reka ditlolo tše di hlakantšhitšwego le dinoko, e hlatsela bohumi bja gagwe. Ba bangwe lehono ba dula ba dika-dika go gata mogato wa go rwala boikarabelo bja go ba Bakriste ka gobane ba tshwenyegile ka dilo tša bona tše di bonagalago. Lega go le bjalo, Jesu o ile a eletša balatedi ba gagwe gore: “Le se kê la belaêlêla bophelô bya lena la re: Re tlo ja’ng? Re tlo nwa’ng? Le mmele Le se kê la o belaêlêla la re: Re tlo apara’ng . . . Xe e le Tataweno wa maxodimong ó tseba xobane le lena tšeo ka moka Le phela ka tšôna. Sa pele Le tsomê mmušô wa Modimo le tokô ya wôna; ké mo Le tl’o xo ekeletšwa ka tšeo ka moka.”Mateo 6:​25-33.

O Ile a Lahlegelwa ke mo Gontši

Se se makatšago ke gore pego ya mabapi le Nikodemo yeo e tšwelelago feela ka Ebangeding ya Johane, ga e re botše ge e ba a ile a ba molatedi wa Jesu goba go se bjalo. Go ya ka mabare-bare a mangwe, Nikodemo o ile a ema ka lehlakoreng la Jesu, a kolobetšwa, a ba mohlaselwa wa tlaišo ya ba-Juda, a tlošwa maemong a gagwe gomme mafelelong a rakwa Jerusalema. Go sa šetšwe gore boemo ke bofe, selo se tee seo se kgonthišeditšwego ke gore: O ile a lahlegelwa  ke mo gontši ka baka la go senya nako ge Jesu a be a le mo lefaseng.

Ge nkabe Nikodemo a ile a thoma go latela Jesu gatee-tee ge a be a kopana le Morena la mathomo, nkabe e bile morutiwa wa kgaufsi wa Jesu. Ka tsebo ya gagwe e le Nikodemo, temogo, boikokobetšo le go ela hloko dinyakwa tša moya, e ka be e bile morutiwa yo a kgahlišago kudu. Ee, a ka be a ile a kwa dipolelo tše makatšago tša Morutiši yo Mogolo, a ithuta dithuto tše bohlokwa diswantšhong tša Jesu, a hlatsela mehlolo e makatšago yeo Jesu a ilego a e dira gomme a hwetša matla keletšong ya Jesu ya ge a arogana le baapostola ba gagwe. Eupša o ile a lahlegelwa ke tšeo ka moka.

Go se kgone go tšea phetho ga Nikodemo go ile gwa bolela go lahlegelwa ka lehlakoreng la gagwe. Go lahlegelwa ga gagwe go be go akaretša taletšo ya Jesu e borutho e rego: “Tlang xo Nna bohle ba Le lapišitšwexo, ba Le imêlwaxo; Nna ke tlo Le khutšiša. Le ithwešê yoko ya-ka, Le rutwê ke Nna; xobane ke yo boló le wa pelo e kokobetšexo; ’me Le tlo hwetša khutšô ya meôya ya lena. Xobane yoko ya-ka xa e robe, morwalô wa-ka ké o bohwêfê.” (Mateo 11:​28-30) Nikodemo o ile a lahlegelwa ke go hwetša tapologo ye ka go lebanya go tšwa go Jesu ka noši!

Go Thwe’ng ka Wena?

Ga e sa le go tloga ka 1914, Jesu Kriste o be a dutše a le legodimong e le Kgoši ya Mmušo wa Modimo wa legodimong. Ge a bolela e sa le pele ka seo se tla diregago nakong ya go ba gona ga gagwe, gare ga dilo tše dingwe o itše: “Gomme ditaba tše tše dibotse tša mmušo di tla bolelwa lefaseng ka moka leo go agilwego go lona gore e be bohlatse go ditšhaba ka moka; gomme e tla ba gona bofelo bo fihlago.” (Mateo 24:​14, NW) Pele bofelo bo fihla, modiro woo wa go bolela lefaseng ka bophara o swanetše go ba o phethilwe. Jesu Kriste o thabišwa ke go ba le batho ba sa phethagalago bao ba tšeago karolo. Le wena o ka ba le karolo modirong wo.

Nikodemo o ile a lemoga gore Jesu o be a e-tšwa go Modimo. (Johane 3:2) Ka go ithuta Beibele, o ka ba o ile wa fihlelela phetho e swanago. O ka ba o dirile diphetogo tseleng ya gago ya bophelo bakeng sa go dumelelana le ditekanyetšo tša Beibele. O ka ba o bile o e-ba gona dibokeng tša Dihlatse tša Jehofa bakeng sa go hwetša tsebo e oketšegilego ya Beibele. O a retwa ka maiteko a bjalo. Lega go le bjalo, Nikodemo o be a swanetše go dira go fetiša moo bakeng sa go bontšha kwešišo ya gore Jesu e be e le yo a romilwego ke Modimo. O be a swanetše gore “a ikxafê, a rwalê [kota ya gagwe ya tlhokofatšo, NW] ka mehla, ’me a ntatêlê [Jesu].”Luka 9:23.

Naganišiša ka seo moapostola Paulo a re botšago sona. O ngwadile gore: “Rè le ba xo dirišana le Modimo re Le eletša xore Le se kê la ba ba ba amoxetšexo kxauxêlô ya Modimo ’me e se kê ya Le hola selô. Xobane ó re: Ke Xo kwa ka lebaka la kxahlêxô; ke Xo thuša ka letšatši la phološô. Tsebang-xê, lebaka la kxahlêxô ké la byale; ’tšatši la phološô ké la lehono lé.”2 Ba-Korinthe 6:​1, 2.

Ga bjale ke nako ya go hlagolela tumelo yeo e go tutueletšago go gata mogato. Bakeng sa go fihlelela seo, naganišiša ka dilo tšeo o ithutago tšona ka Beibeleng. Rapela Jehofa, gomme o mo kgopele gore a go thuše go bontšha tumelo e bjalo. Ge o dutše o lebeletšana le letsogo la gagwe le thušago, tebogo ya gago le lerato la go mo rata di tla go tutueletša go nyaka go ‘ikgafa gomme o rwale kota ya gago ya tlhokofatšo letšatši le letšatši gomme o latele Jesu Kriste ka mehla.’ Na o tla gata kgato gona bjale?

[Seswantšho go letlakala 9]

Mathomong, Nikodemo o ile a emela Jesu ka sebete

[Seswantšho go letlakala 9]

Go sa šetšwe kganetšo, Nikodemo o ile a thuša go lokišeletša mmele wa Jesu bakeng sa go bolokwa

[Seswantšho go letlakala 10]

Thuto ya motho ka noši le thapelo di ka go matlafaletša go gata mogato

[Seswantšho go letlakala 10]

Na o tla amogela tokelo ya go šoma ka tlase ga boetapele bja Jesu Kriste?