Ke ba Bohlale ka Tsela ya Bona
Ke ba Bohlale ka Tsela ya Bona
SEEMA sa se-Nigeria se re: “Batho ba bagolo ba na le bohlale, eupša bana ke ba bohlale ka tsela ya bona.” Edwin yo e lego mogolo wa Mokriste kua Nigeria, o ile a hwetša se e le sa therešo.
Ka letšatši le lengwe Edwin o ile a hwetša lepokisi la tšhipi ka tlase ga teseke ya gagwe ka gae.
Edwin o ile a botšiša bana ba gagwe ba bararo gore: “Lepokisi le ke la mang?”
Emmanuel wa nywaga e seswai o ile a araba ka gore: “Ke la-ka.” O ile a akgofela go oketša ka gore lepokisi le la tšhipi leo le rusitšego la disenthimithara tše 12 leo le bego le na le lešobana ka godimo, e be e le la meneelo ya modiro wa lefase ka bophara wa Dihlatse tša Jehofa. O hlalositše gore: “Ka ge ke sa ye Holong ya Mmušo letšatši le lengwe le le lengwe, ke ile ka dira phetho ya go dira lepokisi gore neng le neng ge ke sa diriša tšhelete ya-ka ya go reka ditlatša-mpa, ke e tsenye ka lepokising.”
Tatago Emmanuel o be a e-na le lepokisi ka gae bakeng sa go boloka tšhelete ya go ya kopanong ya selete ya ngwaga le ngwaga. Eupša ka baka la boemo bja tšhoganetšo bja lapa, ba ile ba diriša tšhelete yeo e bego e le ka gare ga lona. Bakeng sa go kgonthišetša gore tšhelete ya gagwe ya moneelo ga e dirišetšwe morero o mongwe, Emmanuel o ile a tšea boleke bja kgale a bo iša go motšhumeledi wa ditšhipi gore a bo tswalele. Motšhumeledi ka morago ga go tseba ka morero wa boleke, o ile a direla Emmanuel lepokisi ka tšhipi ya kgale. Michael, e lego moratho wa Emmanuel wa nywaga e mehlano le yena o ile a kgopela lepokisi.A makaditšwe ke seo bana ba se dirilego, Edwin o ile a ba botšiša lebaka leo ka lona ba dirilego mapokisi. Michael o ile a araba ka gore: “Ke nyaka go neela!”
Emmanuel, Michael le Uchei e lego kgaetšedi ya bona ya nywaga e senyane, ba be ba dutše ba boloka karolo ya tšhelete ya bona ya ditlatša-mpa gomme ba e tsenya ka mapokising batswadi ba bona ba sa tsebe. Ba tšere kae kgopolo ye? Kapejana ge bana ba šetše ba godile ka mo go lekanego go ka swara tšhelete ka diatleng tša bona, batswadi ba bona ba ile ba ba ruta go lahlela tšhelete ka gare ga mapokisi a meneelo Holong ya Mmušo. Go molaleng gore, bana ba ile ba diriša seo ba ithutilego sona gabotse.
Ge mapokisi a be a tletše a be a bulwa. Tšhelete e bolokilwego e be e le R27,42ga se tšhelete e nyenyane nageng yeo go yona mogolo o tlwaelegilego wa ngwaga ka moka o lego ka tlase ga R3 000. Meneelo e bjalo ya go ithapa e thekga modiro wa boboledi wa Dihlatse tša Jehofa woo ga bjale o dirwago dinageng tše 235 lefaseng ka bophara.