Motse o Lego Thabeng

JESU o boditše barutiwa ba gagwe Thutong ya gagwe e tumilego ya Thabeng gore: “Lena Le seetša sa lefase. Motse wa thabeng xa o kxone xo utama.”—Mateo 5:14.

Metse e mentši ya Juda le Galilea e be e agilwe dithabeng go e na le go agwa meeding. Lebaka la bohlokwa kudu la go kgetha mafelo a dithabeng e be e le bakeng sa tšhireletšego. Go tlaleletša go madira a hlaselago, dihlopha tša bahlakodi di be di tlwaetše go senya metsana ya ba-Isiraele. (2 Dikxoši 5:2; 24:2) Badudi bao ba ikemišeditšego ba be ba ka šireletša gabonolo kudu sehlopha sa dintlo tšeo di bataganego kudu tšeo di lego tlhoreng ya thaba go feta motse o lego molaleng, woo o nyakago morako o motelele kudu bakeng sa tšhireletšo.

Ka ge maboto a dintlo tša ba-Juda gantši a be a pharwa ka kalaka, sehlopha ka moka sa dintlo tše di takilwego tše di lego gotee tlhoreng ya thaba di be di ka bonwa gabonolo bokgoleng bja dikhilomithara tše dintši go di dikologa. (Ditiro 23:3) Letšatšing le le phadimago la Palestina, metse ye ya dithabeng e be e phadima bjalo ka pakane, go no swana le ge metse ya Mediterranean e sa dutše e phadima mehleng ya rena.

Jesu o ile a diriša sebopego se seo se makatšago sa dinaga tša Galilea le Juda bakeng sa go ruta balatedi ba gagwe tema yeo e kgathwago ke Mokriste wa therešo. O ba boditše gore: “Le sa lena seetša a se bônêxêlê batho ka mokxwa woo, xore ba bônê medirô e mebotse ya lena, ba tumišê Tata weno wa maxodimong.” (Mateo 5:​16) Gaešita le ge Bakriste ba sa dire mediro e mebotse gore ba retwe ke batho, boitshwaro bja bona bjo bobotse ga bo hlokomologwe.—Mateo 6:1.

Boitshwaro bjo bo bjalo bjo bobotse ke bjo bo lego molaleng ka mo go kgethegilego nakong ya dikopano tša selete tša Dihlatse tša Jehofa. Kuranta e nngwe kua Spain ge e bolela ka kopano ya selete ya morago bjale e begile gore: “Le ge go ba le kgahlego ditabeng tša bodumedi go fokotšega dihlopheng tše dingwe tša madumedi, ga go bjalo go Dihlatse tša Jehofa. Ka ge di sa nyake gore Beibele e lahlegelwe ke go šoma ga yona, di diriša Lentšu la Modimo.”

Thomas yo e lego moleti wa lepatlelo la ka leboa-bodikela bja Spain leo Dihlatse di bego di le diriša ka mehla, o ile a thabela go ba gare ga batho bao ba dirišago Lentšu la Modimo. O ile a šuthišetša pele go rola ga gagwe modiro ka dibeke tše sego kae e le gore a kgone go ba gona bakeng sa kopano ya selete ya Dihlatse tša Jehofa. Ge batla-kopanong ba bantši, go akaretša le bana ba be ba e-tla go yena ka morago ga kopano go tla go mo leboga bakeng sa tirišano ya gagwe go theoša le nywaga le go mo lakaletša mahlatse bakeng sa go rola modiro ga gagwe, o ile a tšholla megokgo. O itše: “Go le tseba e bile e nngwe ya diphihlelo tše kaone kudu bophelong bja-ka.”

Motse o lego thabeng o tanya kgahlego ya mmogedi ka baka la gore o goga tlhokomelo leratadimeng le gore ntlo e nngwe le e nngwe e tšhweu e lego go ona e bonagatša seetša sa letšatši. Ka mo go swanago, Bakriste ba therešo ba dula e le ba fapanego ka gobane ba katanela go latela ditekanyetšo tše di phagamego tša Mangwalo tša mabapi le go botega, boitshwaro le kwelobohloko.

Go oketša moo, Bakriste ba bonagatša seetša sa therešo ka modiro wa bona wa boboledi. Moapostola Paulo o ile a bolela ka Bakriste ba lekgolong la pele la nywaga gore: “Xe re na le botseta byoo, ka mo kxauxêlô yé e re direxetšexo, xa re lape . . . re sekišana le matswalô a batho ka moka pele xa Modimo rè bola therešô.”  (2 Ba-Korinthe 4:​1, 2) Gaešita le ge ba ile ba lebeletšana le kganetšo kae le kae moo ba bego ba bolela gona, Jehofa o ile a šegofatša bodiredi bja bona e le gore mo e ka bago ka ngwaga wa 60 C.E., Paulo o be a ka ngwala gore ditaba tše dibotse di be di boletšwe go “babopya bohle ba tlase xa lexodimo.”—Ba-Kolose 1:23.

Lehono, Dihlatse tša Jehofa le tšona di tšeela godimo boikarabelo bja tšona bja go ‘dira gore seetša sa tšona se phadime bathong,’ bjalo ka ge Jesu a laetše. Ka go bolela ka molomo le ka dipuku tšeo di gatišitšwego, Dihlatse tša Jehofa di phatlalatša ditaba tše dibotse tša Mmušo dinageng tše 235 lefaseng ka bophara. Gore seetša sa therešo ya Beibele se fihlelele batho ba bantši ka mo go ka kgonegago, di dirile gore dikgatišo tša tšona tšeo di theilwego Beibeleng di hwetšagale ka maleme ao e ka bago a 370.—Mateo 24:​14; Kutollo 14:​6, 7.

Mafelong a mantši, Dihlatse di amogetše ditlhohlo tša go ithuta maleme a batho bao ba hudugilego go tšwa dinageng tšeo go tšona modiro wa boboledi o thibetšwego goba o bego o thibetšwe. Ka mohlala, metseng e megolo kudu e mentši ya Amerika Leboa, batho ba bantši ba ba tšwago China le Russia ba ile ba kgeregela moo. Dihlatse tša lefelong leo di ile tša katanela go ithuta se-China, se-Russia le maleme a mangwe e le gore di bolele ditaba tše dibotse go bao ba sa tšwago go fihla. Ge e le gabotse, go swarwa dithuto bakeng sa go akgofiša tšwelopele ka maleme a mmalwa e le gore ditaba tše dibotse di ka bolelwa le go ba bangwe ge mašemo a sa dutše a “šweufaletše xo bunwa.”—Johane 4:35.

Moporofeta Jesaya o boletše e sa le pele gore: “Bofelong bya mabaka thaba ya Ntlo ya Morêna e tlo ba e thekxilwe xodimo xa dithaba, è beilwe xodimo xa meboto; ’me dithšaba tšohle di tlo thšoloxêla mo xo yôna.” Bobedi ka boitshwaro le bodiredi bja tšona, Dihlatse tša Jehofa di thuša batho kae le kae go tla ‘thabeng ya ntlo ya Jehofa’ gore ba rutwe ka ditsela tša Modimo le go ithuta go sepela tseleng ya Modimo. (Jesaya 2:​2, 3) Bjalo ka ge Jesu a bontšhitše, mafelelo a thabišago ke gore, ba le gotee ba ‘tumiša Tatago bona yo a lego legodimong,’ Jehofa Modimo.—Mateo 5:​16; 1 Petro 2:​12.