Na o Amogetše “Môya wa Therešô”?
Na o Amogetše “Môya wa Therešô”?
“Tate [o] tlo Le nea Molwedi [“mothuši,” NW] e mongwê, xore a tlê a dulê le lena xo iša xo sa felexo. Ké Môya wa therešô.”—JOHANE 14:16, 17.
1. Ke tsebišo efe ya bohlokwa yeo Jesu a e neilego barutiwa ba gagwe diiring tša gagwe tša mafelelo phapošing ya ka godimo?
“MORÊNA, O ya kae?” Yeo ke e nngwe ya dipotšišo tšeo baapostola ba Jesu ba mmotšišitšego tšona diiring tša gagwe tša mafelelo tšeo a di feditšego a e-na le bona ka phapošing ya ka godimo kua Jerusalema. (Johane 13:36) Ge seboka se be se dutše se tšwela pele, Jesu o ile a ba botša gore bjale o be a le kgaufsi le go ba tlogela a boele go Tatagwe. (Johane 14:28; 16:28) A ka se hlwe a e-ba le bona ka nama bakeng sa go ba ruta le go araba dipotšišo tša bona. Lega go le bjalo, o ile a ba kgonthišetša gore: “ ’Me Nna ke tlo kxopêla Tate, a tlo Le nea Molwedi [“mothuši,” NW, goba mohomotši] e mongwê, xore a tlê a dulê le lena xo iša xo sa felexo.”—Johane 14:16, mongwalo wa ka tlase wa NW.
2. Ke eng seo Jesu a ilego a holofetša go se romela barutiwa ka morago ga go tloga ga gagwe?
2 Jesu o ile a hlaola yoo mothuši e lego yena gomme a hlalosa kamoo a tlago go thuša barutiwa ba gagwe ka gona. O ba boditše gore: “Xe xo tloxa mathomong kè sa ka ka Le botša, ké ka xobane ke be ke sa na le lena. Byale ke ya xo E a nthomilexo; . . . Xo a Le hola xe ke tloxa. Xobane xe ke sa tloxe, Molwedi a ka se tle xo lena. Fêla, xe ke ya, ke tlo mo roma a tla xo lena. . . . Mohla xò tlile Môya wa therešô, ó tlo Le sepediša tsela ya therešô-moka.”—Johane 16:4, 5, 7, 13.
3. (a) “Môya wa therešô” o ile wa romelwa neng go Bakriste ba pele? (b) Ke ka tsela efe e nngwe e bohlokwa yeo ka yona moya e bilego “mothuši” go bona?
3 Kholofetšo ye e ile ya phethagatšwa ka Pentekoste ya 33 C.E., go etša ge moapostola Petro a ile a hlatsela gore: “Yêna Jesu eo, Modimo ó mo tsošitše bahung; ’me rena ka moka re dihlatse tša taba yeo. Byale xe a xodišitšwe ka letsôxô le letona la Modimo, ’me kholofedišô yeo e bolêlaxo Môya-mokxêthwa è le Yêna a bexo a e tšere xo Tat’axwe, ó thšollotše se Le se bônaxo le se Le se kwaxo lehono.” (Ditiro 2:32, 33) Bjale ka ge re tla bona ka morago, moya o mokgethwa wo o ilego wa tšhollwa ka Pentekoste, o ile wa phetha dilo tše dintši bakeng sa Bakriste ba pele. Eupša Jesu o holofeditše gore “môya wa therešô” o tla ba ‘gakolla tšohle tše a ba boditšego tšona.’ (Johane 14:26) O tla dira gore ba kgone go gopola bodiredi bja Jesu le dithuto, gaešita le mantšu a gagwe gomme ba a ngwala. Se e be e tla ba se se thušago kudu-kudu go moapostola Johane yo a tšofetšego mafelelong a lekgolo la pele la nywaga C.E. ge a be a thoma go ngwala Ebangedi ya gagwe. Pego yeo e akaretša keletšo e bohlokwa yeo Jesu a e neilego ge a be a hloma Segopotšo sa lehu la gagwe.—Johane, dikgaolo 13-17.
4. “Môya wa therešô” o ile wa thuša bjang Bakriste ba tloditšwego ba pele?
4 Jesu gape o ile a holofetša barutiwa bao ba pele gore moya o tla ba ‘ruta dilo tšohle’ gomme o ba ‘hlahle therešong ka moka.’ Moya o tla ba thuša go kwešiša dilo tše di tseneletšego tša Mangwalo le go boloka botee bja bona bja kgopolo, kwešišo le morero. (1 Ba-Korinthe 2:10; Ba-Efeso 4:3) Ka gona moya o mokgethwa o ile wa nea Bakriste bao ba pele matla a go šoma bjalo ka “molaki e a bôtêxaxo yo bohlale” yo a momaganego bakeng sa go nea Bakriste ba tloditšwego ka o tee ka o tee “dijô [tša moya] ka lebaka la xôna.”—Mateo 24:45.
Moya o Nea Bohlatse
5. (a) Ke tebelelo efe e mpsha yeo Jesu a ilego a e utollela barutiwa ba gagwe bošegong bja Nisani 14, 33 C.E.? (b) Ke tema efe yeo e tlago go kgathwa ke moya o mokgethwa bakeng sa go phethagatša kholofetšo ya Jesu?
5 Bošegong bja Nisani 14, 33 C.E., Jesu o ile a sebotša barutiwa ba gagwe gore ka morago ba tla amogelwa ke yena gomme ba dule le yena le Tatagwe legodimong. O ba boditše gore: “Ngwakong wa Tate xo na le madulô a mantši. Xe xo ka be xo se byalo, a nka be ke Le boditše ka re ke ya xo Le lokišetša sebaka? Xe ke ya xo Le lokišetša sebaka, ke tlo boa ka Le tšea, xore mo Nna ke lexo xôna le lena Le bê xôna.” (Johane 13:36; 14:2, 3) Ba tla buša le yena Mmušong wa gagwe. (Luka 22:28-30) Bakeng sa gore ba be le kholofelo ye ya legodimong, ba be ba swanetše go ‘tswalwa ke moya’ bjalo ka barwa ba Modimo ba moya gomme ba tloletšwe go hlankela le Kriste e le dikgoši le baperisita legodimong.—Johane 3:5-8; 2 Ba-Korinthe 1:21, 22; Tito 3:5-7; 1 Petro 1:3, 4; Kutollo 20:6.
6. (a) Pitšo ya legodimong e thomile neng, gomme ke ba ba kae bao ba amogetšego pitšo ye? (b) Bao ba biditšwego ba kolobeditšwe ka eng?
6 ‘Pitšo ye ya legodimong’ e thomile ka Pentekoste ya 33 C.E., gomme karolo ya bohlokwa go bonagala e fedile magareng a bo-1930. (Ba-Hebere 3:1) Palo ya bao ba swailwego ka moya o mokgethwa gore e be karolo ya Isiraele ya moya ke ba 144 000, ‘ba rekolotšwe bathong.’ (Kutollo 7:4; 14:1-4) Ba ba ile ba kolobetšwa ka mmele wa moya wa Kriste, phuthegong ya gagwe, le ka lehu la gagwe. (Ba-Roma 6:3; 1 Ba-Korinthe 12:12, 13, 27; Ba-Efeso 1:22, 23) Ka morago ga go kolobetšwa meetseng le go tlotšwa ka moya o mokgethwa, ba ile ba tsena tseleng ya boikgafo, bophelo bja go botega go fihlela lehung la bona.—Ba-Roma 6:4, 5.
7. Ke ka baka la’ng e le Bakriste ba tloditšwego feela bao ba nago le tshwanelo ya go ja diswantšhetšo Segopotšong?
7 Bjalo ka ba-Isiraele ba moya, Bakriste ba ba tloditšwego ba be ba le kgweranong e mpsha e dirilwego gare ga Jehofa le “ba-Isiraele ba Modimo.” (Ba-Galatia 6:16; Jeremia 31:31-34) Kgwerano e mpsha e ile ya tiišwa ka madi a tšholotšwego a Kriste. Jesu o ile a bolela se ge a be a hloma Segopotšo sa lehu la gagwe. Luka o bega gore: “A tšea senkxwa, a leboxa, a ngwatha, a ba nea sôna, a re: Ké mmele wa-ka o newaxo ka ’baka la lena. Dirang byalo xore e bê xo nkxopola. Ka mokxwa o byalo a tšea le senwêlô ka moraxo xa selalêlô, a re: Senwêlô sé ké kxwêranô e mphsa mading a-ka a a thšollwaxo ka ’baka la lena.” (Luka 22:19, 20) Mašala goba ditho tše šetšego tša ba 144 000 tše sa dutšego di le mo lefaseng, ke ona a nago le tshwanelo ya go ja senkgwa le go nwa beine tša seswantšhetšo Segopotšong sa lehu la Kriste.
8. Batlotšwa ba tseba bjang gore ba amogetše pitšo ya legodimong?
8 Batlotšwa ba tseba bjang gore ba amogetše pitšo ya legodimong? Ba amogela ka mo go swanetšego bohlatse bja moya o mokgethwa. Moapostola Paulo o ile a ngwalela ba bjalo gore: “Xobane bana ba Modimo ké bao bohle ba ba išwaxo ke Môya wa Modimo. . . . Môya-mokxêthwa Yêna mong ké hlatse ya xo kwana le môya wa rena, hlatse ya xo re re bana ba Modimo. Byale, xe re le bana, xôna re baji ba bohwa, baji ba bohwa ba Modimo, ba xo ja bohwa le Kriste; xobane re tlo ba rè tlaišexile le Yêna, ra tlo kxôna xo fiwa letaxô le Yêna.” (Ba-Roma 8:14-17) Bohlatse bjo bja moya ke bjo matla kudu moo e lego gore bao ba nago le go se kgodišege mo go nyenyane mabapi le go amogela ga bona pitšo ya legodimong ba ka phetha ka mo go kwagalago gore ga se ba e amogela, gomme ba tla tlogela go ja diswantšhetšo Segopotšong.
Moya le Dinku tše Dingwe
9. Ke dihlopha dife tše pedi tšeo di aroganego tšeo go bolelwago ka tšona Diebangeding le ka pukung ya Kutollo?
9 A naganne ka palo e lekanyeditšwego ya Bakriste bao ba bileditšwego go dira Isiraele ya moya, Jesu o ile a ba bitša “mohlatswana.” Ba amogelwa ka ‘lešakeng’ la kgwerano e mpsha, go fapana le palo e sa balegego ya “dinku tše dingwê,” tšeo Jesu a itšego le tšona o swanetše go di gapa. (Luka 12:32; Johane 10:16) Ba dinku tše dingwe bao ba kgobokeditšwego mehleng ya bofelo ba tla bopa “lešaba le lexolo” leo le beetšwego go phologa ‘tlaišego e kgolo,’ ka tebelelo ya go phela ka mo go sa felego lefaseng la paradeise. Se se thabišago ke gore, pono yeo Johane a e amogetšego mafelelong a lekgolo la pele la nywaga C.E., e bontšha phapano magareng ga lešaba le legolo le ditho tše 144 000 tša Isiraele ya moya. (Kutollo 7:4, 9, 14) Na dinku tše dingwe le tšona di amogela moya o mokgethwa, ge e ba go le bjalo, o kgoma bjang maphelo a tšona?
10. Dinku tše dingwe di kolobetšwa bjang “leineng la Tate le la Morwa le la Môya o mokxêthwa”?
10 Ka kgonthe moya o mokgethwa o kgatha tema ya bohlokwa maphelong a dinku tše dingwe. Di bontšha boineelo bja tšona go Jehofa ka go kolobetšwa “leineng la Tate le la Morwa le la Môya o mokxêthwa.” (Mateo 28:19) Di dumela bobuši bja Jehofa, di ikokobeletša Kriste e le Kgoši le Molopolodi, gomme di ikokobeletša matleng a moya wa Modimo goba matla a šomago maphelong a tšona. Letšatši ka letšatši, di leka go hlagolela “dienywa tša Môya” maphelong a tšona, e lego “leratô, le lethabô, le moláô; ké xo se fêle pelo, le botho, le bonôlô, le pôtêxô le bolêta, le boithswarô.”—Ba-Galatia 5:22, 23.
11, 12. (a) Batlotšwa ba kgethagaditšwe bjang ka tsela e kgethegilego kudu? (b) Ke ka tsela efe dinku tše dingwe di kgethagatšwago le go dirwa tše kgethwa?
11 Dinku tše dingwe di swanetše go dumelela Lentšu la Modimo le moya wa gagwe o mokgethwa go di sekiša goba go di kgethagatša. Batlotšwa ba šetše ba kgethagaditšwe ka mokgwa o kgethegilego kudu, ba boletšwe e le ba lokilego le ba bakgethwa bjalo ka monyadiwa wa Kriste. (Johane 17:17; 1 Ba-Korinthe 6:11; Ba-Efeso 5:23-27) Moporofeta Daniele o bolela ka bona e le “bakxêthwa ba Yo-xodimo-dimo,” bao ba amogelago Mmušo ka tlase ga “Morwa-motho,” Kriste Jesu. (Daniele 7:13, 14, 18, 27) Pejana ga moo, Jehofa o ile a tsebiša setšhaba sa Isiraele ka Moše le Arone gore: “Xobane ké Nna Morêna Modimo wa lena; ikxetheng, Le bê ba bakxêthwa, xobane Nna ke e mokxêthwa.”—Lefitiko 11:44.
12 Lentšu “go kgethagatšwa” ge e le gabotse le bolela “tiro goba mosepelo wa go dira selo se sekgethwa, go se arola, goba go se beela ka thoko bakeng sa tirelo goba go dirišwa ke Jehofa Modimo; boemo bja go ba se sekgethwa, se se kgethagaditšwego goba se se sekišitšwego.” Mathomong ka bo-1938, Morokami o ile wa bontšha gore bo-Jonadaba goba dinku tše dingwe, “ba swanetše go ithuta gore kgethagatšo [boineelo] le go kgethagatšwa di nyakega go yo mongwe le yo mongwe yo a tlago go ba karolo ya lešaba le legolo gomme a phela mo lefaseng.” Ponong ya lešaba le legolo e begilwego ka pukung ya Kutollo, go bolelwa ka bona “ba hlatswitše mašela a bôná ba a taxafatša mading a Kwana” gomme ba direla Jehofa “mosexare le bošexo bà le Ntlong e kxêthwa ya xaxwe.” (Kutollo 7:9, 14, 15) Ka thušo ya moya o mokgethwa, dinku tše dingwe di dira sohle seo di ka se kgonago go fihlelela dinyakwa tša Jehofa tša bokgethwa.—2 Ba-Korinthe 7:1.
Go Dira Botse go Bana Babo Kriste
13, 14. (a) Go ya ka seswantšho sa Jesu sa dinku le dipudi, phologo ya dinku e ithekgile ka eng? (b) Dinku tše dingwe di thekgile bjang bana babo Kriste mehleng ye ya bofelo?
13 Jesu o bontšhitše tswalano ya kgaufsi magareng ga dinku tše dingwe le mohlape o monyenyane wa seswantšhong sa gagwe sa dinku le dipudi, seo se akaretšwago boporofeteng bja gagwe bja “bofêlô bya mabaka ano.” Seswantšhong seo, Kriste o bontšhitše gabotse gore phologo ya dinku tše dingwe e tswalanywa kgaufsi le boitshwaro bja tšona go batlotšwa bao a ba biditšego “bana bešo.” O itše: “Ké mo yêna kxoši a tl’o xo bolêla le bao ba ka letsoxong la xaxwe le letona, a re: Tlang lena bašexofatšwa ba Tate, Le tšeê kabêlô ya lena ya mmušô wo Le o lokišeditšwexo xo tloxa xo theweng xa lexohle. . . . Ruri, ke a Le botša: Mo Le di diretšexo e mongwê wa bana bešo ba banyenyane bá, Le di diretše Nna.”—Mateo 24:3; 25:31-34, 40.
14 Polelwana “mo le diretšexo” e bolela ka ditiro tša thekgo e lerato e newago bana babo Kriste bao ba tswetšwego ka moya, bao lefase la Sathane le ba swerego bjalo ka bao ba sa tsebjego, gaešita le go lahlela ba bangwe ba bona kgolegong. Ba nyaka dijo, diaparo tše di lekanego le tlhokomelo ya tša maphelo. (Mateo 25:35, 36, mongwalo wa tlase wa NW) Mehleng ye ya bofelo, ga e sa le go tloga ka 1914, bontši bja batlotšwa ba ikhweditše ba le maemong a bjalo. Histori ya mehleng yeno ya Dihlatse tša Jehofa e hlatsela gore ba ile ba thekgwa ke bagwera ba bona ba botegago ka go se kwanantšhe, e lego dinku tše dingwe, ka ge tše di be di tutuetšwa ke moya.
15, 16. (a) Ke modirong ofe ka mo go kgethegilego moo dinku tše dingwe di thušitšego bana babo Kriste mo lefaseng? (b) Batlotšwa ba bontšhitše bjang tebogo ya bona go dinku tše dingwe?
15 Bana babo Kriste ba tloditšwego mo lefaseng mehleng ye ya bofelo ba amogetše ka mo go kgethegilego thekgo e matla ya dinku tše dingwe ka go tšwetša pele taelo e neilwego ke Modimo ya go ‘bolela ditaba tše tše dibotse tša mmušo lefaseng ka moka leo go agilwego go lona gore e be bohlatse go ditšhaba ka moka.’ (Mateo 24:14, NW; Johane 14:12) Ge palo ya batlotšwa mo lefaseng e dutše e theoga go theoša le nywaga, palo ya dinku tše dingwe e oketšegile go akaretša dimilione tša kgonthe. Ba dikete ba tšona ba hlanketše e le baebangedi ba nako e tletšegobabulamadibogo le baromiwa—ba phatlalatša ditaba tše dibotse tša Mmušo “maxomong a lefase.” (Ditiro 1:8) Ba bangwe ba tšea karolo modirong wa go nea bohlatse kamoo ba ka kgonago ka gona gomme ba thekga ka lethabo modiro wo o bohlokwa ka tša ditšhelete.
16 Bana babo Kriste ba tloditšwego ba leboga gakaakang thekgo ye e sa kwanantšhego ya bagwera ba bona ba dinku tše dingwe! Maikwelo a bona a ile a bontšhwa gabotse ka pukung ya Polokego ya Lefase ka Bophara Tlase ga ‘Kgoši ya Khutšo,’ e neilwego ke sehlopha sa molaki ka 1986. E re: “Ga e sa le go tloga Ntweng ya II ya Lefase, ruri go phethega ga boporofeta bja Jesu ka ‘bofelo bja tshepedišo ya dilo’ go diregile kudu ka baka la karolo yeo “lešaba le lexolo” la “dinku tše dingwê” le e dirago. . . . Ka gona, a ditebogo tše dintši di išwe ‘lešabeng le legolo’ la batho ba ditšhaba tšohle le maleme ohle ka baka la karolo e kgahlišago yeo ba e tšeago ka go tlatša boporofeta [bja Jesu] bja Monyadi bjo bo lego go Mateo 24:14!”
‘Ba se Dirwe ba ba Phethagetšego ka Ntle le Rena’
17. Ke ka tsela efe batho ba botegago ba kgale bao ba tlago go tsošetšwa lefaseng, ‘ba ka se dirwego ba ba phethagetšego’ ka ntle le batlotšwa?
17 A bolela bjalo ka yo mongwe wa batlotšwa, gomme a bolela ka banna le basadi ba botegago bao ba phetšego pele ga Kriste, moapostola Paulo o ngwadile gore: “Ka moka ba ba hlasetšwexo ke tumêlô, tše ba di holofedišitšwexo xa ba ka ba di bôna ka mahlô. Ké ka xobane Modimo ó na le tše a re beetšexo tšôna, tše di phadišaxo xore mohla bà fihlêlaxo tša botlalô le rena [batlotšwa] re bê xôna [“e le gore ba se ke ba dirwa ba ba phethagetšego ka ntle le rena,” NW].” (Ba-Hebere 11:35, 39, 40) Nakong ya Nywaga e Sekete, Kriste le bana babo ba tloditšwego ba 144 000 legodimong ba tla šoma e le dikgoši le baperisita gomme ba abe mehola ya sehlabelo sa Kriste sa topollo mo lefaseng. Ka go rialo, dinku tše dingwe di tla “dirwa tše di phethagetšego” mmeleng le monaganong.—Kutollo 22:1, 2.
18. (a) Ditherešo tša Beibele di swanetše go thuša dinku tše dingwe go thabela eng? (b) Ke kholofelong efe moo dinku tše dingwe di letetšego ‘kutollo ya bana ba Modimo’?
18 Tše ka moka di swanetše go gatelela ka menaganong ya dinku tše dingwe lebaka leo ka lona Mangwalo a Bakriste a Segerika a lebišago tlhokomelo kudu go Kriste le bana babo ba tloditšwego le tema ya bona e bohlokwa go phethagatšweng ga merero ya Jehofa. Ka gona dinku tše dingwe di go lebelela e le tokelo go thekga sehlopha se se tloditšwego sa molaki ge di dutše di letetše ‘kutollo ya bana ba Modimo’ ka Haramagedone le nakong ya Nywaga e Sekete. Di ka lebelela pele go “hunollwa bohlankeng bya thsenyêxô, di be le tokoloxô ya xe bana ba Modimo bà e-ya letaxong.”—Ba-Roma 8:19-21.
Go Kopana ka Moya Segopotšong
19. Ke eng seo “môya wa therešô” o se diretšego batlotšwa le bagwera ba bona, gomme ba tla kopanywa bjang ka mo go kgethegilego mantšiboeng a March 28?
19 Thapelong ya gagwe ya go phetha bošegong bja Nisani 14, 33 C.E., Jesu o itše: “Ke kxopêlêla . . . Xore bohle e bê batee, byalo ka xe Wene Tate Ò le xo Nna, le Nna kè le xo Wene. E bê batee ka rena xore lefase le tlê le dumêlê xore ké Wene O nthomilexo.” (Johane 17:20, 21) Ka lerato, Modimo o romile Morwa wa gagwe go neela bophelo bja gagwe bakeng sa phologo ya batlotšwa le lefase la batho bao ba kwago. (1 Johane 2:2) “Môya wa therešô” o kopantše bana babo Kriste le bagwera ba bona. Mantšibua a March 28, ka morago ga ge letšatši le sobetše, dihlopha ka bobedi di tla kopana gotee bakeng sa go gopola lehu la Kriste le go gopola sohle seo Jehofa a ba diretšego sona ka sehlabelo sa Morwa wa gagwe yo a rategago, Kriste Jesu. Anke go ba gona ga bona tiragalong yeo e bohlokwa go matlafatše botee bja bona le go mpshafatša boikemišetšo bja bona bja go tšwela pele ba dira thato ya Modimo, ka go rialo ba nea bohlatse bja gore ba thabela go ba gare ga bao Jehofa a ba ratago.
E le go Boeletša
• Ke neng moo “môya wa therešô” o ilego wa romelwa go Bakriste ba pele, gomme ke bjang o ilego wa itlhatsela e le “mothuši”?
• Batlotšwa ba tseba bjang gore ba amogetše pitšo ya legodimong?
• Moya wa Modimo o šoma bjang go dinku tše dingwe?
• Dinku tše dingwe di ile tša dira botse bjang go bana babo Kriste, gomme ke ka baka la’ng ‘di ka se dirwe tše phethagetšego ka ntle’ le batlotšwa?
[Dipotšišo tša Thuto]
[Seswantšho go letlakala 21]
“Môya wa therešô”o ile wa tšhollelwa barutiwa ka Pentekoste ya 33 C.E.
[Diswantšho go letlakala 23]
Dinku tše dingwe di diretše bana babo Kriste botse ka go ba thekga go phethagatšeng taelo ya Modimo ya go dira boboledi