Na o Gare ga Bao ba Ratwago ke Modimo?

“E a naxo le melaô ya-ka ’me a e lôtôla, ké yêna a nthataxo. ’Me e a nthataxo, ó tlo ratwa ke Tate.”—JOHANE 14:21.

1, 2. (a) Jehofa o ile a bontšha bjang lerato la gagwe la go rata batho? (b) Jesu o ile a hloma eng bošegong bja Nisani 14, 33 C.E.?

JEHOFA o rata dibopša tša gagwe tšeo e lego batho. Ge e le gabotse, o ratile lefase la batho “xakaakaa, a bá a le nea Morwa wa xaxwe e a tswetšwexo à nnoši, xore mang le mang e a mo dumetšexo a se kê a lahlêxa, a bê le bophelô byo bo sa felexo.” (Johane 3:​16) Ge nako ya go bina Segopotšo sa lehu la Kriste e batamela, Bakriste ba therešo ba swanetše go gopola go feta le ge e le neng pele gore Jehofa o “re ratile a roma Morwa wa xaxwe, a ba seloba sa dibe tša rena.”—1 Johane 4:10.

² Bošegong bja Nisani 14, 33 C.E., Jesu le baapostola ba gagwe ba 12 ba ile ba bokana phapošing ya ka godimo kua Jerusalema bakeng sa go bina Paseka, ba gopola ka go lokollwa ga ba-Isiraele Egipita. (Mateo 26:​17-20) Ka morago ga go bina monyanya wo wa ba-Juda, Jesu o ile a raka Judase Isikariote gomme a hloma sejo sa mantšibua seo se gopolegago seo e bego e tla ba Segopotšo sa Bakriste sa lehu la Kriste. * A diriša senkgwa seo se se nago komelo le beine e khwibidu e le diswantšhetšo tša mmele wa gagwe le madi a gagwe, Jesu o be a e-na le baapostola ba gagwe ba 11 ba šetšego bakeng sa go abelana sejo se sa mohlakanelwa. Ditaba ka botlalo tša mabapi le kamoo a ilego a tšwela pele ka gona, di newa ke bangwadi ba Diebangedi tše tharo e lego Mateo, Mareka le Luka le moapostola Paulo yo a ilego a se bitša “selalelo sa Morena.”—1 Ba-Korinthe 11:​20, PK; Mateo 26:26-28; Mareka 14:​22-25; Luka 22:​19, 20.

3. Ke ka ditsela dife tše bohlokwa tšeo ka tšona pego ya moapostola Johane ya diiri tša Jesu tša mafelelo le barutiwa ba gagwe ka phapošing ya ka godimo e fapanago le tše dingwe?

³ Ke mo go tlabago gore moapostola Johane ga se a ka a bolela selo ka go fetišwa ga senkgwa le beine, mohlomongwe ka gobane ka nako ya ge a ngwala pego ya gagwe ya Ebangedi (mo e ka bago ka 98 C.E.), mogato wa go di sepediša o be o šetše o theilwe gabotse gare ga Bakriste ba pele. (1 Ba-Korinthe 11:​23-26) Lega go le bjalo, ka tlase ga pudulelo, Johane a nnoši o ile a re nea tsebišo e bohlokwa mabapi le seo Jesu a se boletšego le go se dira pele le ka morago ga ge A hlomile Segopotšo sa lehu la Gagwe. Dipego tše tšeo di kgahlišago, di tlatša dikgaolo tše fetago tše hlano tša Ebangedi ya Johane. Di bontšha gabotse mohuta wa batho bao Modimo a ba ratago. Anke re hlahlobeng Johane dikgaolo 13 go ya go 17.

Ithute Mohlaleng wa Jesu wa Lerato

4. (a) Johane o ile a gatelela bjang sehlogo se segolo sa seboka sa Jesu le barutiwa ba gagwe ge a be a hloma Segopotšo? (b) Lebaka le lengwe la bohlokwa leo ka lona Jehofa a ratago Jesu ke lefe?

⁴ Lerato ke sehlogo se segolo dikgaolong tše ka moka tšeo di nago le keletšo ya Jesu ya go arogana le balatedi ba gagwe. Ge e le gabotse, dibopego tše di fapa-fapanego tša lentšu “lerato” di tšwelela moo ka makga a 31. Ga go moo lerato la Jesu le le tseneletšego la go rata Tatagwe, Jehofa le barutiwa ba gagwe le bonagalago  kudu go feta dikgaolong tše. Lerato la Jesu la go rata Jehofa le ka bonwa dipegong ka moka tša Diebangedi tša bophelo bja gagwe, eupša ke Johane a nnoši yo a begago gore Jesu o boletše ka go lebanya gore: “Ke rata Tate.” (Johane 14:​31) Jesu gape o ile a bolela gore Jehofa o a mo rata gomme a ba a hlalosa le lebaka. O itše: “Ke Le ratile byalo ka xe Tate a nthatile. Dulang Lè le leratong la-ka. Xe Le lôtôla melaô ya-ka, ké xôna Le dulaxo Lè le leratong la-ka, byalo ka xe ke lototše melaô ya Tate, kè dutše kè le le leratong la xaxwe.” (Johane 15:​9, 10) Ee, Jehofa o rata Morwa wa gagwe ka baka la go kwa ga gagwe ka mo go feletšego. A thuto e botse gakaakang bakeng sa balatedi ka moka ba Jesu Kriste!

5. Jesu o ile a bontšha bjang lerato la gagwe la go rata barutiwa ba gagwe?

⁵ Lerato la Jesu le le tseneletšego la go rata balatedi ba gagwe le gatelelwa mathomong a pego ya Johane ya seboka sa mafelelo le baapostola. Johane o itše: “Monyanya wa Paseka xe o tla, ké xe Jesu a tseba xore lebaka la xaxwe le tlile la xo tloxa lefaseng le xo ya xo Tat’axwe. Ka xe a ratile ba xaxwe ba lefaseng, a hlwa a ba rata xo fihla bofelong.” (Johane 13:1) Mantšibua ao a gopolegago o ile a ba nea thuto e sa lebalegego ka go hlankela ba bangwe ka lerato. O ile a hlapiša maoto a bona. Se e be e le selo seo yo mongwe le yo mongwe wa bona a bego a swanetše go rata go se direla Jesu le bana babo bona, eupša ba ile ba dika-dika. Jesu o dirile modiro wo wa boikokobetšo, ke moka o ile a botša barutiwa ba gagwe gore: “Byale xe Nna ke lexo Moruti le Morêna, kè Le hlatswitše maoto, le lena xo Le swanetše xe Le hlatswana maoto. Xobane ke Le beetše mokxwa, xore le lena Le dirê se Nna ke se dirilexo.” (Johane 13:​14, 15) Bakriste ba therešo ba swanetše go ikemišetša le go thabela go hlankela bana babo bona.—Mateo 20:​26, 27; Johane 13:17.

Latela Molao o Mofsa

6, 7. (a) Ke ditaba dife tše bohlokwa tšeo Johane a di neago mabapi le go hlongwa ga Segopotšo? (b) Ke molao ofe o mofsa wo Jesu a ilego a o nea barutiwa ba gagwe, gomme ke eng seo e bego e le se sefsa ka wona?

⁶ Pego ya Johane ya seo se ilego sa direga ka phapošing ya ka godimo bošegong bja Nisani 14 ke yona e nnoši yeo e bolelago ka go lebanya go tšwa ga Judase Isikariote. (Johane 13:​21-30) Go dumelelanya dipego tša Diebangedi go bontšha gore ke feela ka morago ga ge moeki yo a sepetše, moo Jesu a ilego a hloma Segopotšo sa lehu la Gagwe. Ke moka o ile a bolela lebaka le le telele le baapostola ba gagwe ba botegago, a ba laela ka keletšo le ditaelo. Ge re dutše re itokišeletša go ba gona Segopotšong, re swanetše go ba le kgahlego ka mo go tseneletšego ka seo Jesu a se boletšego tiragalong yeo, gomme kudu-kudu ka gobane re tloga re nyaka go ba gare ga bao Modimo a ba ratago.

⁷ Taelo ya mathomo yeo Jesu a e neilego barutiwa ba gagwe ka morago ga go hloma Segopotšo sa lehu la gagwe e be e le selo se sefsa. O itše: “Ké Le nea molaô o mofsa, wa xo re Le ratanê, wa xo re Le ratanê byalo ka Nna xe ke Le ratile. Seo bohle ba tl’o xo tseba ka sôna xe Le le barutiwa ba-ka, ké xe Le na le leratanô.” (Johane 13:​34, 35) Ke eng seo e bego e le se sefsa ka molao wo? Ka morago mantšiboeng ao, Jesu o ile a hlalosa ditaba ka gore: “Molaô wa-ka šó: Ratanang byalo ka xe Nna ke Le ratile. Xa xo e a naxo le leratô le le fetišaxo la eo a xafaxo bophelô bya xaxwe ka ’baka la baxwêra ba xaxwe.” (Johane 15:​12, 13) Molao wa Moše o ile wa laela ba-Isiraele go ‘rata magagabo bona bjalo ka ge ba ithata.’ (Lefitiko 19:​18) Eupša molao wa Jesu o ile wa tšwela pele. Bakriste ba be ba swanetše go ratana bjalo ka ge Kriste a ba ratile, ba ikemišetše go gafa maphelo a bona ka noši bakeng sa bana babo bona.

8. (a) Lerato la go ikgafa le akaretša’ng? (b)Dihlatse tša Jehofa di bontšha bjang lerato la go ikgafa lehono?

⁸ Sehla sa Segopotšo ke nako e swanetšego bakeng sa gore re itlhahlobe, re le motho ka o tee ka o tee e bile re le phuthego bakeng sa go bona ge e ba re tloga re e-na le leswao le leo le hlaolago Bokriste bja therešolerato le bjalo ka la Kriste. Lerato le bjalo la go ikgafa le ka bolela gore Mokriste a ka bea bophelo bja gagwe kotsing go e na le go eka bana babo, gomme ka dinako tše dingwe le šetše le bontšhitše seo. Gantši, le akaretša go rata ga rena go gafa dikgahlego tša rena bakeng sa go thuša le go hlankela bana babo rena le ba bangwe. Moapostola Paulo e be e le mohlala o mobotse tabeng ye. (2 Ba-Korinthe 12:​15; Ba-Filipi 2:​17) Dihlatse tša Jehofa di tsebja lefaseng ka bophara ka moya wa tšona wa boikgafo, go thuša bana babo tšona le baagišani ba tšona le go ineela ga tšona go botša magagabo tšona therešo ya Beibele. *—Ba-Galatia 6:10.

 Ditswalano Tšeo di Swanetšego go Tšeelwa Godimo

9. Re thabela go dira’ng bakeng sa go boloka tswalano ya rena e bohlokwa le Modimo le Morwa wa gagwe?

⁹ Ga go selo seo se ka bago bohlokwa go rena go feta go ratwa ke Jehofa le Morwa wa gagwe, Kriste Jesu. Lega go le bjalo, gore re be le lerato le le go le kwa, re swanetše go dira se sengwe. Bošegong bjoo bja mafelelo a e-na le barutiwa ba gagwe, Jesu o itše: “E a naxo le melaô ya-ka ’me a e lôtôla, ké yêna a nthataxo. ’Me e a nthataxo, ó tlo ratwa ke Tate. Le Nna ke tlo mo rata ka ipônatša xo yêna.” (Johane 14:​21) Ka ge re tšeela godimo tswalano ya rena le Modimo le Morwa wa gagwe, re kwa melao ya bona ka lethabo. Se se akaretša molao o mofsa wa go bontšha lerato la boikgafo le taelo yeo Kriste a e neilego ka morago ga tsogo ya gagwe ya go ‘bolela le batho le go nea bohlatse bjo bo tseneletšego,’ re katanele go ‘dira barutiwa’ ka bao ba amogelago ditaba tše dibotse.—Ditiro 10:​42, NW; Mateo 28:​19, 20.

10. Ke ditswalano dife tše bohlokwa tšeo di bulegetšego batlotšwa le “dinku tše dingwê”?

¹⁰ Ka morago bošegong bjoo, ge a araba potšišo yeo a e botšišitšwego ke moapostola yo a botegago Judase (Thadeo), Jesu o itše: “Xe motho a nthata, ó tlo lôtôla Lentšu la-ka; le Tate ó tlo mo rata. Xomme re tlo tla xo yêna ra mo dira madulô.” (Johane 14:​22, 23) Gaešita le ge ba sa dutše ba le mo lefaseng, Bakriste ba tloditšwego bao ba bileditšwego go buša le Kriste legodimong ba na le tswalano ya kgaufsi ka mo go kgethegilego le Jehofa le Morwa wa gagwe. (Johane 15:​15; 16:​27; 17:​22; Ba-Hebere 3:1; 1 Johane 3:​2, 24) Eupša bagwera ba bona ba “dinku tše dingwê,” bao kholofelo ya bona e lego go phela ka mo go sa felego lefaseng, le bona ba na le tswalano e bohlokwa le “modiši o tee,” Jesu Kriste, le Modimo wa bona Jehofa ge feela ba ipontšha e le bao ba kwago.Johane 10:​16; Psalme 15:​1-5; 25:14.

‘Ga le ba Lefase’

11. Ke temošo efe e phafošago yeo Jesu a e neilego barutiwa ba gagwe?

¹¹ Sebokeng se sa mafelelo le barutiwa ba gagwe  ba botegago pele ga lehu la gagwe, Jesu o ile a nea temošo e phafošago: Ge motho a ratwa ke Modimo, o tla hloiwa ke lefase. O itše: “Xe lefase lè Le hlôya, Le tsebê xore le thomile xo hlôya Nna. Xe le ka be Le le ba lefase, lefase le ka ba le rata ba e lexo ba xalô; xomme le Le hloile ka xe Le se ba xalô, ka xe ke Le hlaotše lefaseng. Xopolang Lentšu le ke Le boditšexo lôna ka re: Mohlanka xa a fete mong wa xaxwe. Xe Nna ba nthlomere, le lena ba tlo Le hlômara. Xe la-ka Lentšu ba le lototše, le la lena ba tlo le lôtôla.”—Johane 15:​18-20.

12. (a) Ke ka baka la’ng Jesu a ile a lemoša barutiwa ba gagwe gore lefase le tla ba hloya? (b) Ke eng seo e tla bago gabotse go naganišiša ka sona ge Segopotšo se dutše se batamela?

¹² Jesu o neile temošo ye e le gore baapostola ba ba 11 le Bakriste ba therešo ka moka bao ba bego ba tla ba gona ka morago, ba se ke ba nolega moko gomme ba lapa ka baka la lehloyo la lefase. O okeditše ka gore: “Ditaba ši-di tše ke Le boditšexo tšôna, xore Le se tlo kxopišwa. Ba tlo Le nthša phuthexong; xo tlo bá xwa tla lebaka la xe motho à Le bolaya a tl’o xo re ké xôna xe a dirêla Modimo. Ké tše ba tl’o xo di dira ka xobane ba sa ka ba tseba Tate, le Nna bà sa ntsebe.” (Johane 16:​1-3) Puku-ntšu e nngwe ya Beibele e hlalosa gore mohuta wa lediri le le fetoletšwego mo e le “kxopišwa” le bolela “go dira gore motho a thome go se bote le go lahla motho yoo a swanetšego go mmota le go mo kwa; go hlanoga.” Ge nako ya go bina Segopotšo e dutše e batamela, ka moka ga rena re tla dira gabotse go naganišiša ka tsela ya bophelo ya batho bao ba botegago ba nakong e fetilego le ba gona bjale, gomme re ekiše mohlala wa bona wa go se šišinyege ka tlase ga teko. O se ke wa dumelela kganetšo goba tlaišo e dira gore o lahle Jehofa le Jesu, eupša ikemišetše go ba bota le go ba kwa.

13. Ke eng seo Jesu a ilego a se kgopelela balatedi ba gagwe ge a be a rapela Tatagwe?

¹³ Thapelong ya gagwe ya go phetha pele a tloga phapošing yeo ya ka godimo kua Jerusalema, Jesu o itše go Tatagwe: “Nna ke ba neile ’ntšu la xaxo; ’me lefase le ba hlôya ka xe e se ba xalô, byalo ka Nna kè se wa xalô. Xa ke kxopele xore O ba tlošê lefaseng; ke ba kxopêlêla xo phêmêlwa bobe. Bôná xa se ba lefase, byalo ka Nna kè se wa lefase.” (Johane 17:​14-16) Re ka kgonthišega gore Jehofa o hlokomela bao a ba ratago le go ba matlafatša ge ba dutše ba ipoloka ba arogile lefaseng.—Jesaya 40:​29-31.

Dulang Leratong la Tate le Leratong la Morwa

14, 15. (a) Jesu o ile a itshwantšha le eng, go fapana le ‘morara o senyegilego’? (b) “Makala” a “morara wa makxonthe” ke bomang?

¹⁴ Nakong ya poledišano ya kgaufsi yeo a bilego le yona le barutiwa ba gagwe bošegong bja Nisani 14, Jesu o ile a itshwantšha le “morara wa makxonthe,” ka go fapana le ‘morara o senyegilego’ wa Isiraele e sa botegego. O itše: “Ké Nna sehlare sa morara wa makxonthe; molemi ke Tate.” (Johane 15:1) Nywaga-kgolong ya pejana ga moo, moporofeta Jeremia o ile a bega mantšu a a Jehofa bathong ba gabo ba bahlanogi: “Mola Nna kè Xo šemile Ò le morara-sešifa, . . . O mphetoxetše ka mokxwa ofe morara [“o senyegilego,” PK] wa dithabe tša wa naxa?”  (Jeremia 2:​21) Le gona moporofeta Hosea o ngwadile gore: “Isiraele ké morara; o ikatladitše ’me wa enywa. . . . ’Pelo tša bôná di xobedi.”—Hosea 10:​1, 2.

¹⁵ Go e na le go tšweletša dienywa tša borapedi bja therešo, Isiraele e ile ya wela boikaketšing gomme ya tšweletša dienywa tša go tsebja ke yona. Matšatši a mararo pele ga seboka sa gagwe sa mafelelo le barutiwa ba gagwe ba botegago, Jesu o boditše baetapele ba baikaketši ba ba-Juda gore: “Ke re: Le tlo amoxiwa mmušô wa Modimo; ’me o tlo fiwa sethšaba se se tl’o xo tšweletša dienywa tša sôna.” (Mateo 21:​43) Setšhaba seo se sefsa ke “ba-Isiraele ba Modimo,” bao ba dirilwego ke Bakriste ba tloditšwego ba 144 000, bao ba swantšhwago le “makala” a “morara wa makxonthe,” Kriste Jesu.—Ba-Galatia 6:​16; Johane 15:5; Kutollo 14:​1, 3.

16. Jesu o ile a kgothaletša baapostola ba 11 ba botegago go dira’ng, gomme go ka bolelwa’ng ka batlotšwa ba botegago mehleng ye ya bofelo?

¹⁶ Jesu o ile a botša baapostola ba 11 bao ba bego ba e-na le yena ka phapošing yeo ya ka godimo gore: “Lekala lefe le lefe mo xo Nna le sa enyexo dienywa, ó a le ripa; lefe le lefe le le enyaxo, ó a le thênêla xore le atišê dienywa. Dulang Lè le mo xo Nna, kè le xo lena. Bo-ka lekala, xe le sa kxone xo enya lè le nnoši, lè sa dule sehlareng sa morara, le xo lena xo tlo ba byalo, xe Le sa dule mo xo Nna.” (Johane 15:​2, 4) Histori ya mehleng yeno ya batho ba Jehofa e bontšha gore mašaledi a botegago a Bakriste ba tloditšwego a dutše boteeng le Hlogo ya ona, Kriste Jesu. (Ba-Efeso 5:​23) Ba amogetše go hlwekišwa le go thenelwa. (Maleaki 3:​2, 3) Ga e sa le go tloga ka 1919, ba tlišitše dienywa tša Mmušo ka bontši, sa pele Bakriste ba tloditšwego gomme ga e sa le go tloga ka 1935 “lešaba le lexolo” leo le oketšegago kudu la bagwera.—Kutollo 7:9; Jesaya 60:​4, 8-11.

17, 18. (a) Ke mantšu afe a Jesu ao a thušago batlotšwa le dinku tše dingwe go dula leratong la Jehofa? (b) Go ba gona Segopotšong go tla re thuša bjang?

¹⁷ Go Bakriste ka moka ba tloditšwego le bagwera ba bona, mantšu a Jesu a tšwela pele go šoma go bona: “Se Tate a tl’o xo rêtwa ka sôna, ké xe Le enya dienywa tše ntši, Lè e-ba barutiwa ba-ka. Ke Le ratile byalo ka xe Tate a nthatile. Dulang Lè le leratong la-ka. Xe Le lôtôla melaô ya-ka, ké xôna Le dulaxo Lè le leratong la-ka, byalo ka xe ke lototše melaô ya Tate, kè dutše kè le le leratong la xaxwe.”—Johane 15:​8-10.

¹⁸ Ka moka ga rena re nyaka go dula leratong la Modimo, gomme se se re tutueletša go ba Bakriste bao ba enywago dienywa. Re dira se ka go diriša sebaka se sengwe le se sengwe bakeng sa go bolela “ditaba tše dibotse tša mmušo.” (Mateo 24:​14, NW) Gape re dira sohle seo re ka se kgonago go bonagatša “dienywa tša Môya” maphelong a rena ka noši. (Ba-Galatia 5:​22, 23) Go ba gona Segopotšong sa lehu la Kriste go tla matlafatša boikemišetšo bja rena bja go dira se, ka gobane re tla gopotšwa ka lerato le legolo la Modimo le la Kriste go rena.—2 Ba-Korinthe 5:​14, 15.

19. Ke thušo efe e nngwe e tlago go ahla-ahlwa sehlogong se se latelago?

¹⁹ Ka morago ga go hloma Segopotšo, Jesu o ile a holofetša gore Tatagwe o tla romela balatedi ba gagwe ba botegago “Molwedi [“mothuši,” NW] Môya-mokxêthwa.” (Johane 14:​26) Sehlogong se se latelago re tla ahla-ahla kamoo moya wo o thušago ka gona batlotšwa le dinku tše dingwe go dula leratong la Jehofa.

[Mengwalo ya ka tlase]

Dipotšišo tša Tlhahlobo

• Ke thuto efe e šomago ka tirelo e lerato yeo Jesu a e neilego barutiwa ba gagwe?

• Ke mabapi le eng moo sehla sa Segopotšo e lego nako e swanetšego bakeng sa go itlhahloba?

• Ke ka baka la’ng re se ra swanela go kgopišwa ke temošo ya Jesu ya mabapi le go hloiwa le go tlaišwa ke lefase?

• “Morara wa makxonthe” ke mang? “Makala” ke bomang gomme go letetšwe eng go bona?

[Dipotšišo tša Thuto]

[Seswantšho go letlakala 15]

Jesu o neile baapostola ba gagwe thuto e sa lebalegego ya tirelo e lerato

[Diswantšho go letlakala 16, 17]

Barutiwa ba Kriste ba kwa molao wa gagwe wa go bontšha lerato la go ikgafa