Kgetho ya Gago ya Melao ya Motheo

NA O motho yo a hlahlwago ke melao ya motheo? Goba na o lebelela thuto ya boitshwaro e le e fetilwego ke nako ka tsela e itšego? Therešo ke gore, yo mongwe le yo mongwe o hlahlwa ke melao ya motheo ya mohuta o itšego, yeo a dumelago gore e bohlokwa. Go ya le ka The New Shorter Oxford English Dictionary, molao wa motheo o ka hlaloswa e le “thulaganyo ya melao ya motheo ya motho ka noši ya seo se nepagetšego.” Melao ya motheo e tutuetša diphetho tša rena gomme e ama tsela yeo re e tšeago bophelong. Melao ya motheo e ka šoma bjalo ka khamphase.

Ka mohlala, Jesu o kgothaleditše balatedi ba gagwe gore ba boloke Molao wa Gauta, o hwetšwago go Mateo 7:​12: “Tšohle tše Le rataxo xore batho ba Le dirêlê tšôna, le lena Le ba dirêlê tšôna-tšeo.” Balatedi ba Confucius ba dumelelana le melao ya motheo ya li le jen, yeo e bolelago ka dika tše bjalo ka botho, boikokobetšo, tlhompho le potego e sa kwanantšhego. Gaešita le batho bao e sego badumedi ba na le dilo tše di tlago pele goba ditlhahlo tšeo di laolago boitshwaro bja bona.

Ke Melao ya Motheo ya Mohuta Ofe Yeo re Swanetšego go e Kgetha?

Lega go le bjalo, re swanetše go gopola gore melao ya motheo e ka ba e mebe goba e mebotse. Ka mohlala, palo e oketšegago ya batho ba tutuetšwa ke seo nywaga-someng o fetilego goba go feta moo, se hlalositšwego e le moya wa nna pele. Le ge ba bantši ba ka be ba sa tsebe polelwana ye goba ba nagana gore ga e šome go bona, moya wa nna pele ke molao wa motheo wo ba bantši ba o dirišago, e lego thuto ya boitshwaro yeo e lego gore ba bantši ba tšhabela go yona ge ba lahla ditekanyetšo tše di phagamego tša boitshwaro. Go sa šetšwe gore e hlaloswa e le bjalo goba go se bjalo, ke nna ke nna ke pontšho ya boithati, yeo gantši e sepedišanago le go rata dilo tše di bonagalago ka tsela ya go se nagane. Molaodi wa TV kua China o boletše gore: “Re na le melao ya motheo e mebedi feela. Wo mongwe ke go kgotsofatša go nyaka go reka. Wo mongwe ke go dira tšhelete.”

Moya wa nna pele o ka šoma bjalo ka makenete. Gomme ke bjang makenete o kgomago khamphase? Ge bobedi bja tšona di le kgaufsi le kgaufsi, lenakana la khamphase le šupa go šele. Ka tsela e swanago, moya wa nna pele o ka lahla khamphase ya motho ya boitshwaro, goba molao o ngwadilwego wa boitshwaro bjo bo nepagetšego, ka go dira gore selo se sengwe le se sengwe e be sa tlasana dikganyogong tša motho.

Na o be o ka makatšwa ke go tseba gore moya wa nna pele ga se selo sa mehleng yeno? Go hlahlwa ke moya wo wa nna pele go thomile serapeng sa Edene ge batswadi ba rena ba pele ba be ba lahla ditekanyetšo tša boitshwaro tšeo di hlomilwego ke Mmopi wa rena. Seo se ile sa fetola khamphase ya bona ya boitshwaro. Ka ge e le ditlogolo tša Adama le Efa, batho ba tshwenywa ke tsela e swanago ya go lebelela bophelo, yeo morago bjale e bitšwago “moya wa nna pele.”—Genesi 3:​6-8, 12.

Go phatlalala ga boemo bja kgopolo bjo bjalo go bonagala ka mo go kgethegilego nakong ye boporofeta bja Beibele bo e bitšago ‘mehla ya bofelo,’ e swawago ke “dinako tše hlobaetšago tšeo go lego thata go lebeletšana  le tšona.” Batho ba bantši ke “baithati.” Ga go makatše ge re ikhwetša re le ka tlase ga kgateletšo ya go ekiša tsela ya go dira dilo ya moya wa nna pele.—2 Timotheo 3:​1-5, NW.

Mohlomongwe o ka ikhwetša o dumelelana le mofsa yo a bitšwago Olaf yo a ilego a ngwalela lekala la Yuropa la Dihlatse tša Jehofa gore: “Go thata kudu go dula re hlwekile boitshwarong, kudu-kudu go rena bafsa. Hle tšwelang pele le re gopotša ka go nyakega ga go kgomarela melao ya motheo ya Beibele.”

Olaf o bontšhitše pono ya go ba le temogo. Melao ya motheo ya Modimo e ka re thušaba banyenyane goba ba bagologo kgomarela ditekanyetšo tše di phagamego tša boitshwaro. Gape e ka re dira gore re kgone go gana go kgomarela moya wa nna pele, go sa šetšwe gore e bitšwa bjalo goba go se bjalo. Ge e ba o nyaka go ithuta ka mo go oketšegilego mabapi le ka moo melao ya motheo ya Beibele e ka go thušago ka gona e le ka kgonthe, hle ela hloko sehlogo se se latelago.

[Diswantšho go letlakala 4]

Batho ba bantši lehono ga ba bontšhe go naganela dinyakwa tša ba bangwe