Melao ya Motheo ya Modimo e ka go Hola

KA NTLE le pelaelo o lemogile gore diphoofolo di bušwa ke tlhago. Metšhene e mentši e hlamilwe ka mokgwa woo e tla latelago ditaelo. Eupša batho ge e le gabotse ba be ba bopetšwe go hlahlwa ke melao ya motheo. O ka kgonthišega bjang ka seo? Goba gona, Jehofa e lego Mothomi wa melao ya motheo ka moka ya go loka, o ile a tsebiša ge a be a dira batho ba pele gore: “A re direng motho ka xo swanthša ka rena.” Mmopi ke moya; ga a na mmele wa nama bjalo ka rena, ka gona re ‘swana’ le yena ka kgopolo ya gore re ka bontšha semelo sa gagwe, ra bontšha tekanyo ya dika tša gagwe tše dibotse. Batho ba na le bokgoni bja go ka hlahla maphelo a bona go ya ka melao ya motheo, e lego go ya ka seo ba dumelago gore ke thulaganyo ya melao ya motheo ya tiro e nepagetšego. Jehofa o dirile gore bontši bja melao ye ya motheo e begwe ka Lentšung la gagwe.—Genesi 1:​26; Johane 4:​24; 17:17.

 Yo mongwe a ka re: ‘Eupša Beibele e na le melao ya motheo e makgolo. Ga go kgonege gore ke e tsebe ka moka.’ Ke therešo. Lega go le bjalo ela hloko ntlha ye: Gaešita le ge melao ya motheo ya Modimo e le bohlokwa ka moka, e mengwe e bohlokwa kudu go feta e mengwe. O ka bona seo go Mateo 22:​37-​39, moo Jesu a bontšhitšego gore gare ga melao le melao ya metheo e swanago le melao ya motheo ya Molao wa Moše, e mengwe e be e le bohlokwa kudu go feta e mengwe.

Ke melao efe ya motheo e lego bohlokwa kudu? Melao ya motheo e bohlokwa ya Beibele ke yeo e kgomago ka go lebanya tswalano ya rena le Jehofa. Ge e ba re ela hloko melao ye ya motheo, Mmopi e ba tutuetšo e kgolo khamphaseng ya rena ya boitshwaro. Go oketša moo, go na le melao ya motheo yeo e kgomago tswalano ya rena le batho ba bangwe. Go e diriša go tla re thuša gore re ganetše moya wa nna pele, go sa šetšwe kamoo o ka bitšwago ka gona.

Anke re thome ka e nngwe ya ditherešo tše bohlokwa kudu ka Beibeleng. Therešo yeo ke eng, gomme e re kgoma bjang?

“Yo-xodimodimo Kukama-lefase”

Mangwalo a Makgethwa a bolela ka go kwagala gore Jehofa ke Mmopi wa rena yo Mogolo, Modimo Ra-matla-ohle. A ka se lekanywe goba go tšeelwa legato. Yeo ke therešo ya motheo e begilwego ka Beibeleng.—Genesi 17:1; Mmoledi 12:1.

Yo mongwe wa bangwadi ba puku ya Dipsalme o boletše ka Jehofa gore: “Yo-xodimodimo Kukama-lefase.” Kgoši Dafida wa bogologolo o ngwadile gore: “O mmuši, O hlôxô ye e iphaxamišitšexo xodimo xa tšohle.” Gomme moporofeta Jeremia yo a tsebjago kudu o ile a tutueletšega go ngwala gore: “Xa xo Mo-ka-Wêna Morêna, O e moxolo; ’ina la xaxo ké le lexolo ka matla a xaxo.”—Psalme 83:​18; 1 Koronika 29:​11; Jeremia 10:6.

Re ka diriša bjang ditherešo tšeo tša mabapi le Modimo bophelong bja letšatši le letšatši?

Go molaleng gore ruri ke mang yo a swanetšego go ba yo mogolo maphelong a renaMmopi wa rena le Monei-Bophelo. Ka gona, na e ka se be mo go swanetšego go gana tshekamelo le ge e le efe ya go gogela tlhokomelo go rena ka nošitshekamelo yeo e ka bago e matla go ba bangwe go feta ba bangwe? Molao wa motheo wa bohlale le o hlahlago ke gore ‘tšohle tše re di dirago Modimo a retwe ka tšona.’ (1 Ba-Korinthe 10:​31) Moporofeta Daniele o beile mohlala o mobotse tabeng ye.

Pego ya histori e re botša gore ka nako e nngwe Kgoši Nebukadinetsara wa Babele o ile a tshwenywa ke toro gomme a nyaka go tseba tlhaloso ya yona. Le ge batho ka moka ba be ba gakanegile, Daniele o ile a botša kgoši ka go nepagala seo a bego a nyaka go se tseba. Na Daniele o ile a itumiša ka se? Aowa, o ile a iša tumišo go “Modimo wa lexodimong, Moutolodi wa diphihlô.” Daniele o tšwetše pele ka gore: “Tša yôna phihlô yeo xa nka ka di nyarola ka bohlale byo bo ka baxo xo nna bya phala bya ba bangwê ba ba phelaxo.” Daniele e be e le monna yo a laolwago ke molao wa motheo. Ga go makatše gore ka pukung ya Daniele o hlaloswa ka makga a mararo e le “moratexi” mahlong a Modimo.—Daniele 2:​28, 30; 9:​23; 10:​11, 19.

O tla holega ge o ekiša Daniele. Go lateleng mohlala wa Daniele, taba yeo e swanetšego go direlwa phetho ke boikemišetšo. Ke mang yo a swanetšego go tumišwa ka seo o se dirago? Go sa šetšwe boemo bja gago, o na le bokgoni bja go dira ka go dumelelana le molao wo wa motheo o bohlokwa wa BeibeleJehofa ke Morena yo a Phagamego. Go dira ga gago seo go tla go dira gore o be “moratexi” mahlong a gagwe. Anke ga bjale re eleng hloko melao ya motheo e mebedi yeo e ka re hlahlago tabeng ya ditswalano tša batho. Go sa šetšwe go gatelela mo go phatlaletšego ga motho ka noši, karolo ye ya bophelo ke e hlohlago ka mo go kgethegilego.

“A e bê xo Ipoetša”

Bao ba ipeago pele ga ba ke ba kgotsofala. Ba bantši ba nyaka bophelo bjo bokaone ka mehla, gomme ba bo nyaka ka yona nako yeo. Go bona, boipoetšo ke mohuta o itšego wa bofokodi. Ba lebelela go se fele pelo e le selo seo ba bangwe fela ba swanetšego go se bontšha. Ge go tliwa kgopolong ya bona ya go ikhweletša maemo, selo se sengwe le se sengwe se a dumelelega. Na o nagana gore o na le tsela e nngwe ya go itshwara ka ntle le mokgwa wo ba itshwarago ka wona?

Bahlanka ba Modimo ba kopana le boemo bjo bja kgopolo letšatši le letšatši, eupša ga se bja swanela go ba fetola gore ba swane le bona. Bakriste ba godilego tsebong ba amogela molao wa motheo wa gore “mmotexi xa se moikemedi; ké yo Morêna a mo êmêlaxo.”—2 Ba-Korinthe 10:18.

Go diriša molao wa motheo o lego go Ba-Filipi 2:​3, 4 go tla re thuša. Temana yeo e go kgothaletša gore o se dire ‘selo ka kgang le ka go nyaka go retwa, eupša ka go ipoetša le go phalana go godišaneng.’ Ka go dira bjalo o tla be o ‘sa šetša tša go ikhola, eupša gape o šetša tša go hola ba bangwe.’

Motho yo mongwe yo a bego a e-na le boemo bja kgopolo bjo bo swanetšego ka yena ka noši le yo a ilego a ba le kahlolo e kwagalago ka seo a bego a le sona, e bile Gideoni, yo mongwe wa baahlodi ba ba-Hebere ba bogologolo. Ga se a ka a nyaka go ba moetapele  wa Isiraele. Lega go le bjalo, ge a be a kgethelwa go tšea boemo bjoo, Gideoni o ile a bolela ka go se swanelege ga gagwe. O ile a hlalosa gore: “Etšwe leloko lešo è le lôna le lenyenyane mo xo Ba-Manase, le nna kè le yêna e monyenyane mo kxorong ya Tata wešo!”—Baahlodi 6:​12-16.

Go feta moo, ka morago ga ge Jehofa a neile Gideoni phenyo, banna ba Efuraimi ba ile ba mo hlohla. Gideoni o ile a arabela bjang? Na phenyo e ile ya mo dira gore a ikwe a le bohlokwa kudu? Aowa. O ile a phema masetla-pelo ka go nea karabo e bonolo. “Nna ke kxonne’ng se se kaxo lekana le seo Le se dirilexo?” Gideoni o be a kokobetše monaganong.—Baahlodi 8:​1-3.

Ke therešo gore ditiragalo tše di lego mabapi le Gideoni di diregile kgale kudu. Lega go le bjalo, go bohlokwa kudu go ela hloko pego yeo. O ka kgona go bona gore Gideoni o be a e-na le boemo bja kgopolo bjo bo tlogago bo fapane le bjo bo tlwaelegilego lehono, gomme o ile a phela ka go dumelelana le bjona, e le gore a holege.

Boemo bja kgopolo bjo bo bušago bjo bo lebišago tlhokomelo go motho ka noši bo ka kgopamiša pono ya rena ya go ikwa re le bohlokwa. Melao ya motheo ya Beibele e phošolla go kgopama moo, e re ruta bohlokwa bja rena bja kgonthe mabapi le Mmopi le ba bangwe.

Ka go ela hloko melao ya motheo ya Beibele, re fenya mokgwa wo o lego nakong. Ga re sa bušwa ke maikwelo goba dimelo. Ge re dutše re ithuta ka melao ya motheo ya go loka, ke mo re tsebago gakaone Mothomi wa yona. Ee, go ela hloko ka mo go kgethegilego melao ya motheo ya Modimo ge re bala Beibele ke mo go swanetšego ke boiteko.Bona lepokisi.

Jehofa o dirile batho gore ba be ka godimo ga diphoofolo, tšeo di laolwago ke tlhago. Go latela thato ya Modimo go akaretša go diriša melao ya motheo ya Modimo. Ka gona re ka dula re beile khamphase ya rena ya boitshwaro boemong bjo bobotse, khamphase yeo e tla re hlahlago go re tsenya tshepedišong e mpsha ya Modimo ya go dira dilo. Beibele e re nea lebaka la go letela kgaufsinyana tshepedišo e mpsha ya lefase ka bophara moo go yona “xo axilexo tokô.”—2 Petro 3:13.

[Lepokisi/Seswantšho go letlakala 6]

E Mengwe ya Melao ya Motheo ya Beibele e Thušago

Ka lapeng:

“A motho a se kê a inyakela tša xaxwe; a a nyakê sa xo hola ba bangwê.”—1 Ba-Korinthe 10:24.

“Leratô . . . xa le tsome xo ikhola.”—1 Ba-Korinthe 13:​4, 5.

“Mang le mang a ratê mosadi wa xaxwe ka mokxwa wo a ithataxo ka wôna.”—Ba-Efeso 5:33.

“Lena Basadi! Kwang banna ba lena.”—Ba-Kolose 3:18.

“Kwaa tat’axo, yêna motswadi wa xaxo; ’me mm’axo xe a kxekotše, O se kê wa mo nyatša.”—Diema 23:22.

Sekolong, mošomong goba ditirišanong tša kgwebo:

“Kêlô ya xo fora Morêna ó a e hlaswa . . . E mobe ó rua leruô la maaká.”—Diema 11:​1, 18.

“E a utswitšexo a se kê a hlwa a utswa; a a kxothalê.”Ba-Efeso 4:28.

“Mo-xana-modirô, le xo ja a lesê.”—2 Ba-Thesalonika 3:10.

“Ka moka tše Le di diraxo, Le di dirê ka pelo e rataxo, e ke Le dirêla Modimo.”—Ba-Kolose 3:23.

“Re ratile xo Ya ka tsela e botse dilong tšohle.”—Ba-Hebere 13:18.

Boemo bja kgopolo ka lehumo:

“Mo-thakanêla-khumô molato xa a o hloke.”—Diema 28:20.

“E a rataxo mahumô xa a hore ka ôna.”—Mmoledi 5:9.

Go lekola boitlhompho bja motho: “Ge batho ba itsomela letago la bona ka noši, na ke letago?”—Diema 25:​27, NW.

“Homola O rêtwê ke bangwê.”—Diema 27:2.

“Xo se kê xwa ba le e a ithsemaxo a fetiša moo xo mo swanetšexo.”—Ba-Roma 12:3.

“Xe motho a ka ithsema a re: Ke selô, mola à se selô, ó a iphora.”—Ba-Galatia 6:3.

[Seswantšho go letlakala 5]

Daniele o ile a nea Modimo tumišo e mo swanetšego

[Seswantšho go letlakala 7]

Go dirišana le ba bangwe ka go dumelelana le melao ya motheo ya Modimo go tlaleletša ditswalanong tše di kgahlišago le tša lethabo

[Mothopo wa Seswantšho go letlakala 7]

U.S. Fish & Wildlife Service, Washington, D.C./Robert Bridges