Phihlelo

Go Hlankela ka Moya wa Boikgafo

KA GE GO ANEGA DON RENDELL

Mma o hlokofetše ka 1927 ge ke be ke e-na le nywaga e mehlano feela. Lega go le bjalo, tumelo ya gagwe e tutueditše bophelo bja-ka kudu. Seo se kgonegile bjang?

MMA e be e le setho se se tiilego sa Kereke ya Engelane ge a be a nyalana le tate, lešole leo le tlwaeditšwego. Ka nako yeo e be e le pele ga Ntwa ya I ya Lefase. Ntwa ya I ya lefase e thomile ka 1914, gomme mma o ile a se dumelelane le molaodi wa kereke ka go diriša phuluphithi ya gagwe bjalo ka sethala sa go kalatša madira. Moruti o ile a araba ka gore’ng? “Boela gae gomme o se ke wa itshwenya ka dipotšišo tše bjalo!” Seo ga se sa mo kgotsofatša.

Ka 1917, ge ntwa e dutše e kgatlampana mma o ile a ya go bona “Photo-Drama of Creation.” A kgodišegile gore o hweditše therešo, o ile a tlogela kereke ya gagwe kapejana bakeng sa go kopanela le Barutwana ba Beibele, ka ge Dihlatse tša Jehofa di be di tsebja bjalo ka nako yeo. O ile a kopanela diboka le phuthego ya Yeovil, toropo e lego kgaufsi le motse wa rena wa West Coker, seleteng sa Seisemane sa Somerset.

Kapejana mma o ile a abelana tumelo ya gagwe yeo a sa tšwago go e hwetša le bana babo ba bararo. Ditho tše di godilego tša phuthego ya Yeovil di ile tša ntlhalosetša kamoo mma le ngwanabo Millie ba ilego ba sepela ka dipaesekele ka mafolofolo go dikologa tšhemo ya rena ya magaeng e nabilego, ba aba dithušo tša go ithuta Beibele e lego Studies in the Scriptures. Lega go le bjalo, ka manyami dikgweding tše 18 tša mafelelo tša bophelo bja gagwe, mma o be a dula a le malaong ka baka la bolwetši bja mafahla, bjoo bo bego bo se na kalafo ka nako yeo.

Boikgafo bo a Šoma

Mmane Millie yo a bego a dula le rena ka nako yeo, o ile a oka mma ge a be a babja gomme a hlokomela nna le kgaetšedi ya-ka ya nywaga e šupago, Joan. Ge mma a be a hlokofala, mmane Millie kapejana o ile a ithapela go re hlokomela.  Tate a thabetše go imollwa boikarabelo bjo, o ile a dumela kapejana gore mmane Millie o swanetše go dulela sa ruri le rena.

Re ile ra gola re e-na le lerato la go rata mmane gomme re be re thabetše gore o tlo šala le rena. Eupša ke ka baka la’ng a ile a dira phetho e bjalo? Nywaga e mentši ka morago, mmane Millie o ile a re botša gore o be a tseba gore o na le boikarabelo bja go aga motheong woo mma a o theilegogo ruta nna le Joan therešo ya Beibele—​selo seo a ilego a lemoga gore tatago rena o be a ka se tsoge a se dirile, ka ge a be a se na kgahlego bodumeding.

Ka morago ga moo, re ile ra tseba gore mmane Millie o be a dirile phetho e nngwe ya motho ka noši kudu. E le gore a re hlokomele ka mo go lekanego, o be a ka se tsoge a nyetšwe. A boikgafo bjo bo kaakang! Nna le Joan re na le mabaka ka moka a go mo leboga ka mo go tseneletšego. Sohle seo mmane Millie a re rutilego sona le mohlala o mobotse wo a o beilego re sa dutše re na le tšona.

Nako ya go Tšea Phetho

Nna le Joan re be re tsena sekolo sa motseng sa Kereke ya Engelane moo mmane Millie a ilego a emelana ka go tia le hlogo ya sekolo mabapi le thuto ya rena ya bodumedi. Ge bana ba bangwe ba be ba gwantela kerekeng, re be re e-ya gae, gomme ge moruti a e-tla sekolong go tla go nea tlhahlo ya bodumedi, re be re arogana le bana ba bangwe gomme re newa ditemana tša Mangwalo gore re di tsebe ka hlogo. Tše e bile tše holago go nna ka morago, ka ge ditemana tše di ile tša dula di sa tšwe ka kgopolong ya-ka.

Ke tlogetše sekolo ke e-na le nywaga e 14 bakeng sa tlwaetšo ya nywaga e mene feketoring ya lefelong leo ya go dira tšhese. Gape ke ile ka ithuta le go bapala piano, gomme mmino le motantsho wa ballroom e ile ya ba ditloša-bodutu tša-ka. Gaešita le ge therešo ya Beibele e be e metše ka pelong ya-ka, e be e sa swanetše go ntutuetša. Ke moka ka letšatši le lengwe ka March 1940, Hlatse e tšofetšego e ile ya ntaletša gore ke sepele le yona go ya kopanong kua Swindon, bokgole bja dikhilomithara tše 110. Albert D. Schroeder, modiredi yo a okamelago wa Dihlatse tša Jehofa kua Brithania o ile a nea polelo ya phatlalatša. Kopano yeo e ile ya ipontšha e tlišitše phetogo e kgolo go nna.

Ntwa ya II ya Lefase e be e kgatlampana. Ke be ke dira’ng ka bophelo bja-ka? Ke ile ka dira phetho ya go boela morago Holong ya Mmušo ya Yeovil. Sebokeng sa mathomo seo ke bilego go sona go ile gwa tsebišwa ka go nea bodiredi bja setarateng la mathomo. Go sa šetšwe tsebo ya-ka e lekanyeditšwego, ke ile ka ithapa go tšea karolo modirong wo, gaešita le ge ba bantši bao ba ipitšago bagwera ba ile ba makala le go nkwera ge ba dutše ba feta!

Ka June 1940, ke ile ka kolobetšwa motseng wa Bristol. Pele ga ge kgwedi e fela ke ile ka ingwadiša bjalo ka mmulamadibogo wa ka mehlamoebangedi wa nako e tletšego. Ke be ke thabile gakaakang ge ka moragonyana kgaetšedi ya-ka a be a bontšha boineelo bja gagwe ka kolobetšo ya meetseng!

Go Bula Madibogo Nakong ya Ntwa

Ngwaga ka morago ga ge ntwa e thomile, ke ile ka amogela pampiri yeo e bego e ntsenya madireng. Ka ge ke be ke ngwadišitše bjalo ka yo a ganago ka baka la letswalo kua Yeovil, ke ile ka swanelwa ke go tšwelela ka pele ga kgoro ya tsheko ya Bristol. Ke be ke tladitše John Wynn go bula madibogo kua Cinderford, Gloucestershire gomme ka morago ga moo kua Haverfordwest le Carmarthen, Wales. * Ka morago, tshekong ya  molato kua Carmarthen, ke ile ka ahlolelwa dikgwedi tše tharo kgolegong ya Swansea, le go lefišwa £25e bego e le tšhelete e ntši mehleng yeo. Ka morago ga moo, ke ile ka amogela lebaka la bobedi la dikgwedi tše tharo ke le kgolegong ka go se lefe tefišo yeo.

Nyakišišong ya boraro ke ile ka botšišwa gore: “Na ga o tsebe gore Beibele e re, ‘Nthšetšang Kesara tše e lexo tša Kesara’?” Ke ile ka araba ka gore: “Ee, seo ke a se tseba eupša nka rata go feleletša temana yeo: ‘Modimo Le Mo nthšetšê tše e lexo tša Modimo.’ Seo ke se ke se dirago.” (Mateo 22:​21) Dibeke tše sego kae ka morago, ke ile ka amogela lengwalo le mpotša gore ke be ke lokologile medirong ya tirelo ya bohlabani.

Mathomong a 1945, ke ile ka laletšwa go tlatša lapa la Bethele ya London. Maregeng a latetšego, Nathan H. Knorr yo a ilego a etelela pele go rulaganya modiro wa boboledi wa lefaseng ka bophara le mongwaledi wa gagwe Milton G. Henschel, ba ile ba etela London. Bana babo rena ba bafsa ba seswai ba go tšwa Brithania ba ile ba ingwadiša sehlopheng sa bo-seswai sa Sekolo sa Beibele sa Watchtower sa Gilead bakeng sa tlwaetšo ya boromiwa, gomme ke be ke le gare ga bona.

Dikabelo tša Boromiwa

Ka May 23, 1946, re ile ra namela sekepe sa nakong ya ntwa sa Liberty go tloga boema-kepeng bjo bonyenyane bja Cornish bja Fowey. Molaodi wa boema-kepe e lego Captain Collins, e be e le yo mongwe wa Dihlatse tša Jehofa, gomme ge re tloga boema-kepeng o ile a letša nakana. Bjalo ka ge go letetšwe, ka moka ga rena re bile le maikwelo a hlaka-hlakanego ge re bona lebopo la Engelane le nyamelela. Go tshela moo Atlantic e be e le mo go šoro kudu, eupša matšatši a 13 ka morago re ile ra fihla re šireletšegile kua United States.

Go ba gona Kopanong ya Pušo ya Modimo ya Ditšhaba tše Thabilego ya matšatši a seswai kua Cleveland, Ohio go tloga ka August 4 go ya go 11, 1946 e be e le phihlelo e gopolegago. Batla-kopanong ba ka bago dikete tše 80 ba be ba le gona, go akaretša le ba 302 bao ba tšwago dinageng tše dingwe tše 32. Kopanong yeo makasine wa Phafoga! * o ile wa lokollwa, gomme thušo ya go ithuta Beibele ya “Let God Be True” e ile ya lokollwa go lešaba le le fišegago.

Re ile ra aloga Gilead ka 1947, gomme nna le Bill Copson re ile ra abelwa Egipita. Eupša pele ga ge re tloga, ke ile ka holega ka go hwetša tlwaetšo e botse ya go tlwaetšwa mošomo wa ka ofising ke Richard Abrahamson kua Bethele ya Brooklyn. Re ile ra ema kua Alexandria, gomme kapejana ke ile ka tlwaelana le mokgwa wa bophelo wa ka Bohlabela bja Magareng. Lega go le bjalo, go ithuta se-Arabia e be e le tlhohlo, gomme ke ile ka swanela ke go diriša dikarata tša bohlatse ka maleme a mane.

Bill Copson o ile a dula nywaga e šupago, eupša ga se ka kgona go tsošološa visa ya-ka ka morago ga ngwaga wa mathomo, ka gona ke ile ka swanela ke go tloga nageng. Ke lebelela morago ngwageng woo wa tirelo ya boromiwa bjalo ka wo o bilego le tšweletšo e kgolo kudu bophelong bja-ka. Ke ile ka ba le tokelo ya go swara dithuto tša magae tša Beibele tše fetago 20 beke e nngwe le e nngwe, gomme ba bangwe ba bao ba ilego ba ithuta therešo ka nako yeo ba sa dutše ba reta Jehofa ka mafolofolo. Go tloga Egipita, ke ile ka abelwa Cyprus.

 Cyprus le Isiraele

Ke ile ka thoma go ithuta leleme le lefsa, Segerika, le go tlwaelana le mmolelo wa lefelong leo. Ka moragonyana, ge Anthony Sideris a be a kgopelwa go romelwa Gerika, ke ile ka kgethwa go ba molebeledi wa mošomo kua Cyprus. Ka nako yeo ofisi ya lekala ya Cyprus gape e be e hlokomela Isiraele, gomme ke ile ka ba le tokelo ya go sepela le bana babo rena ba bangwe go ya go etela kgafetša-kgafetša Dihlatse tše sego kae Isiraele.

Leetong la-ka la mathomo la go ya Isiraele, re ile ra swara kopano e nyenyane lebenkeleng la go jela kua Haifa, moo go bego go e-na le batho ba 50 goba ba 60. Ka go aroganya dihlopha tša ditšhaba, re ile ra nea lenaneo la kopano ka maleme a tshelelago a fapanego! Lebakeng le lengwe ke ile ka kgona go bontšha filimi yeo e tšweleditšwego ke Dihlatse tša Jehofa kua Jerusalema, gomme ka nea polelo ya phatlalatša yeo e ilego ya bolelwa gabotse ke kuranta ya leleme la Seisemane.

Go be go e-na le Dihlatse tše ka bago 100 kua Cyprus ka nako yeo, gomme di be di swanetše go lwa ka thata bakeng sa tumelo ya tšona. Dihlopha tša bahlola-mpherefere tšeo di bego di etilwe pele ke baruti ba Kereke ya Greek Orthodox di ile tša šitiša dikopano tša rena, gomme e be e le phihlelo e mpsha go nna go fošwa ka mafsika ge ke nea bohlatse ditikologong tša magaeng. Ke ile ka swanela ke go ithuta go tšhaba kapejana! Gare ga kganetšo e bjalo e šoro, e be e le mo go matlafatšago tumelo go ba le baromiwa ba oketšegilego ba abetšwego sehlakahlakeng. Dennis le Mavis Matthews gotee le Joan Hulley le Beryl Heywood ba ile ba ntlatša kua Famagusta, ge Tom le Mary Goulden le Nina Constanti, Leisemane la Cypriot ba ile ba ya Limassol. Ka nako e swanago, Bill Copson le yena o ile a romelwa Cyprus, gomme ka morago a tlatšwa ke Bert le Beryl Vaisey.

Go Tlwaelana le Maemo a Fetogago

Mafelelong a 1957, ke ile ka babja gomme ka se kgone go tšwela pele ka kabelo ya-ka ya boromiwa. Ka manyami ke ile ka phetha ka gore e le gore ke tsošološe bophelo ba-ka ke swanetše go boela Engelane, moo ke ilego ka tšwela pele ke bula madibogo go fihla ka 1960. Kgaetšedi ya-ka le monna wa gagwe ba ile ba nkamogela ka ntlong ya bona ka botho, eupša maemo a be a fetogile. Joan o be a hwetša maemo e le a thata ka mo go oketšegilego. Ka ntle le go hlokomela monna wa gagwe le morwedi wa gagwe yo monyenyane, nakong ya nywaga e 17 ya go se be gona ga-ka, ka lerato o ile a hlokomela tate le mmane Millie bao ka nako ye ba bego ba tšofetše gomme ba sa phela gabotse. Go nyakega ga gore ke latele mohlala wa mmane wa boikgafo go ile gwa ba molaleng, ka gona ke ile ka dula le kgaetšedi ya-ka go fihlela bobedi mmane le tate ba hlokofala.

Go be go tla ba bonolo go dula kua Engelane, eupša ka morago ga go khutša ka nakwana ke ile ka kwa go nyakega gore ke boele kabelong ya-ka. Go feta moo, na mokgatlo wa Jehofa ga se wa diriša tšhelete e ntši o ntlwaetša? Ka gona ka 1972, ke ile ka itefelela leeto la go boela morago Cyprus go ya go bula madibogo moo gape.

Nathan H. Knorr o ile a goroga go tla go lokišeletša kopano yeo e bego e tlo swarwa ngwageng o latelago. Ge a hwetša gore ke boile, o ile a dumelela go kgethwa ga-ka bjalo ka molebeledi wa tikologo sehlakahlakeng ka moka, e lego tokelo yeo ke bilego le yona ka nywaga e mene.  Lega go le bjalo, e be e le kabelo e thata ka ge e be e bolela gore ke bolele Segerika nako e ntši.

Nako ya Bothata

Ke be ke dula legaeng le tee le Paul Andreou e lego Hlatse e bolelago Segerika ya Cypriot, motseng wa Karakoumi, mo e ka bago ka bohlabela bja Kyrenia ka lebopong la ka leboa. Ofisi ya Lekala ya Cyprus e be e le Nicosia, ka borwa bja Dithaba tša Kyrenia. Mathomong a July 1974, ke be ke le Nicosia ge go menolwa mmušo bakeng sa go raka Mopresidente Makarios go be go direga, gomme ke ile ka bona mošate wa gagwe o lauma dikgabo tša mollo. Ge go be go bolokegile go ka sepela, ke ile ka akgofela go boela morago Kyrenia, moo re bego re lokišeletša kopano ya tikologo. Matšatši a mabedi ka morago ke ile ka kwa pomo ya mathomo e wela boema-kepeng, gomme ka bona leratadima le tletše ka difofane tšeo di tlišago madira a hlaselago go tšwa Turkey.

Ka ge ke be ke le modudi wa Brithania, mašole a Turkey a ile a nkiša mollwaneng wa Nicosia, moo ke ilego ka botšološišwa ke mošomi wa Ditšhaba tše Kopanego yo a ilego a ikopanya le ofisi ya lekala. Ke ile ka lebeletšana le mošomo o boifišago wa go sepela godimo ga metato e raraganego ya mogala le ya motlakase go ya magaeng a bego a tlogetšwe ka kua ga naga ao a sa dulwego ke motho magareng ga madira a lwantšhanago. Ke be ke thabile gakaakang gore tsela ya-ka ya poledišano le Jehofa Modimo e be e ka se ke ya šitišwa! Dithapelo tša-ka di ile tša mphološa nakong ya diphihlelo tše gateletšago tša bophelo bja-ka.

Ke be ke lahlegetšwe ke dilo tša-ka ka moka, eupša ke be ke thabetše go ba yo a šireleditšwego ke ofisi ya lekala. Lega go le bjalo, boemo bjo e be e le bja nakwana. Ka matšatšinyana, madira a hlaselago a be a laola dikarolo tše tharo tša ka leboa tša sehlakahlaka. Bethele e be e swanetše go tlogelwa, gomme re ile ra hudugela Limassol. Ke be ke thabetše go kgona go šoma moo le komiti e hlametšwego go hlokomela bana babo rena ba 300 bao ba bego ba kgomilwe ke khuduego, bao bontši bja bona ba bego ba lahlegetšwe ke magae a bona.

Diphetogo tše Oketšegilego tša Kabelo

Ka January 1981, Sehlopha se Bušago se ile sa kgopela go nthomela Gerika go ya go tlatša lapa la Bethele kua Athene, eupša mafelelong a ngwaga, ke be ke boetše Cyprus gomme ka kgethwa bjalo ka molomaganyi wa Komiti ya Lekala. Andreas Kontoyiorgis le mosadi wa gagwe Maro, ma-Cypriots ao a bego a rometšwe London, ba ile ba itlhatsela e le “thušo e matlafatšago” go nna.Ba-Kolose 4:​11, NW.

Mafelelong a ketelo ya lekala ka Theodore Jaracz ka 1984, ke ile ka amogela lengwalo le le tšwago go Sehlopha se Bušago leo le itšego: “Ge a fetša, re tla rata gore o sepele le Ngwanešo Jaracz go ya Gerika.” Ga go na lebaka leo le boletšwego, eupša ge re fihla Gerika lengwalo le lengwe le le tšwago go Sehlopha se Bušago le ile la balelwa Komiti ya Lekala, le nkgetha go ba molomaganyi wa Komiti ya Lekala nageng yeo.

Ka nako ye, re be re lebeletšane le go tšwelela ga bohlanogi. Gape go be go na le ditatofatšo tše dintši ka bosokolli bjo bo sego molaong. Batho ba Jehofa ba be ba golegwa ka mehla gomme ba tlišwa pele ga dikgoro tša tsheko. E be e le tokelo  gakaakang go tseba bana babo rena le dikgaetšedi bao potego ya bona e ilego ya dula e tiile ka tlase ga diteko! E mengwe ya melato ya bona e ile ya sekwa pele ga Kgoro ya Tsheko ya Yuropa ya Ditshwanelo tša Batho, ka mafelelo a kgahlišago ao a bilego le tutuetšo e botse modirong wa boboledi kua Gerika. *

Ge ke be ke hlankela kua Gerika, ke ile ka kgona go ba gona dikopanong tše gopolegago kua Athene, Thesalonika le dihlakahlakeng tša Rhodes le Crete. E be e le nywaga e mene e thabišago le e nago le dienywa, eupša phetogo e nngwe e be e le tselenggo boela Cyprus ka 1988.

Cyprus le go Boela Morago Gerika

Ge ke be ke se gona kua Cyprus, bana babo rena ba ile ba hwetša lefelo le lefsa bakeng sa lekala kua Nissou, dikhilomithara tše sego kae go tloga Nicosia, gomme Carey Barber go tšwa ntlong-kgolo ya Dihlatse tša Jehofa Brooklyn o ile a nea polelo ya go neela moago. Maemo e be e le a tsepamego bjale sehlakahlakeng, gomme ke be ke thabetše go boaeupša e be e ka se be ka lebaka le letelele.

Sehlopha se Bušago se be se dumeletše dipolane tša go aga legae le lefsa la Bethele kua Gerika, dikhilomithara tše mmalwa ka leboa la Athene. Ka ge ke be ke kgona go bolela bobedi Seisemane le Segerika, ke ile ka laletšwa go boela go šoma moo lefelong le lefsa la moago ka 1990 bjalo ka mofetoledi bakeng sa lapa la bahlanka ba ditšhaba-tšhaba bao ba šomago fao. Ke sa dutše ke gopola lethabo la go ba lefelong la moago ka iri ya botshelela mesong ya selemo, ke amogela makgolo a bana babo rena le dikgaetšedi ba Gerika bao ba bego ba ithapile go šoma gotee le lapa la go aga! Ke tla dula ke gopola lethabo la bona le phišego ya bona ka mehla.

Baruti ba Greek Orthodox le bathekgi ba bona ba ile ba leka go tsena lefelong la moago go tla go šitiša modiro wa rena, eupša Jehofa o kwele dithapelo tša rena gomme re ile ra šireletšwa. Ke ile ka dula moagong go fihlela legae le lefsa la Bethele le neelwa ka April 13, 1991.

Go Thekga Kgaetšedi Ya-ka e Rategago

Ngwageng o latelago, ke ile ka boela Engelane ka maikhutšo, ke dula le kgaetšedi ya-ka le monna wa gagwe. Ka manyami, ge ke be ke le moo molamo wa-ka o ile a hlaselwa ke bolwetši bja pelo gabedi gomme a hlokofala. Joan o nneile thekgo ka bolokologi nakong ya tirelo ya-ka ya boromiwa. Go be go fetile mo e ka bago beke a nngwaletše lengwalo la kgothatšo. Kgokagano e bjalo ke tšhegofatšo gakaakang bakeng sa moromiwa! Ga bjale e be e le mohlologadi, a sa phela gabotse gomme a nyaka thekgo. Ke swanetše go dira’ng?

Morwedi wa Joan e lego Thelma le monna wa gagwe ba be ba šetše ba hlokomela mohlologadi yo mongwe yo a botegago ka phuthegong, yo mongwe wa metswalo ya rena yo a bego a babjetša go hwa. Ka gona ka morago ga go rapela kudu, ke ile ka phetha ka gore ke swanetše go dula gomme ke thuše go hlokomela Joan. Go be go se bonolo go dumelelana le maemo, eupša ke na le tokelo ya go hlankela bjalo ka mogolo Pen Mill, e lego e nngwe ya diphuthego tše pedi tša Yeovil.

Bana babo rena bao ke ilego ka hlankela le bona dinageng tša kgole ba ikgokaganya le nna ka mogala le lengwalo, gomme ke leboga seo kudu. Ge nka bontšha kganyogo ya go boela Gerika goba Cyprus, ke a tseba gore dithekethe tša-ka tša go sepela di tla tla kapejana. Eupša ga bjale ke na le nywaga e 80, gomme mahlo a-ka goba bophelo ga di sa le ka mokgwa wo di bego di le ka gona. Ke mo go gateletšago go se sa ba mafolofolo bjalo ka pele, eupša nywaga ya-ka ya tirelo ya Bethele e nthušitše go hlagolela mekgwa e mentši yeo e nkholago lehono. Ka mohlala, ke bala temana ya letšatši ka mehla pele ga difihlolo. Ke ithutile go dirišana le batho le go ba ratae lego senotlelo sa tirelo e atlegilego ya boromiwa.

Ge ke lebelela morago nywageng e kgahlišago e ka bago 60 yeo ke e feditšego ke tumiša Jehofa, ke a tseba gore bodiredi bja nako e tletšego ke tšhireletšo e kgolo gomme bo nea thuto e kaone kudu. Nka bolela ka pelo ka moka mantšu a Dafida go Jehofa a rego: “Xobane mola kè tlaletšwe O be O le sebô sa-ka, sethšabêlô sa-ka.”Psalme 59:16.

[Mengwalo ya ka tlase]

[Seswantšho go letlakala 21]

Mma ka 1915

[Seswantšho go letlakala 22]

Ka godimo ga Bethele ya Brooklyn ka 1946, nna (wa bone go tloga ka go le letshadi) le bana babo rena ba bangwe go tšwa sehlopheng sa bo seswai sa Gilead

[Seswantšho go letlakala 23]

Ke e-na le mmane Millie ka morago ga go boa ga-ka la mathomo Engelane

[Mebapa go letlakala 24]

GERIKA

CYPRUS

Famagusta

Limassol

Kyrenia

Nicosia

Athene